Read Manikion MATIUS 16 Bible Online

MATIUS 16 - Manikion bible

MATIUS 16

¹Sug Yesus en edebeij leng Magadan meren hancobohob, kaba, lusud aibibra dau leng Parisi dara leng Saduki, len len aud en naugb len lerba mohoisa en. Sug len ledebeij enohob, kaba, len lenara dou en, lendagai: Ban bens ganusbus dau bogo ingma deseino emenahabi. Dauntoba emen emecinaga dag Allah enin eng eigdoumesa ban aboho naugb augwan ginohob.

²Doba Yesus auni len merir ucugb dou len, endagai: Yen yeiya bogo ahani se losog, kaba, yen yenara doum, yendagai: Lona, kaba, lohos, anai bogo ahanohob.

³Era sug yen yeiya hinehibemogo ogorgor, dara bogo gahan se inenihi, kaba, yen yenara doum toua, yendagai: Irogini, kaba, lomos ecgu namcir. Dangga hang, yen meiju ouforoho naugb yen yecinaga umer goho lohos dara goho los toua asesohob. Doba gansins eisaugb lona sug sud hom en en naugb eigdoc yen dau meijen gogom, kaba, yen meiju emouforoho naugb ginero. Doba yen meigdoc aiyansem dougwo namcir.

⁴Dangga hang, dan demaimo yen meijir naugb dan demens ganusbus hom dou yen gin touwero. Doba dan demens sud hom gesai Allah moro nosa, moho Yunus, en edag gansins dou yens dous. Anai yen gini, kaba, yen meijug mog namcir. Dara yen meigdoc esges Allah deb terimda, aninim dag gida en medoc esges mesuwa toua deb dous. Sug Yesus enara gouji dangga dou lenohob, kaba, en arges len ingga deb sungga. Hanoba en eihwededau len.

⁵Sug Yesus eihwededau leng Parisi dara leng Saduki debohob, kaba, eni dara men logodeh len leisa ij dau Magadan ucugb dig nagama deit. Dangga sug len ledebeij dig nagamohob, kaba, men logodeh len ledoudesa ared, doba len lemoho homero.

⁶Hang Yesus esulou men logodeh, endagai: Yen yesedougwo dara yebehnehino yenin meigdoc mes dougwo leng Parisi dara leng Saduki meren gugdo mougb gin terimda.

⁷Doba sug Yesus men logodeh louman dau gin, kaba, len meru laiso en mer an gini. Hanoba len lenara doum ucucugb, lendagai: En enara baugtarera dougwo maman, anara? Anai maman mamodo maman roti ingmaro, gin enggei?

⁸Doba Yesus ecinaga areg len len doum ingga. Hanoba en etaha len merir an gini, endagai: Yen yenara doum eisaugb yemoho aredero, anara? Yen yemod meijina debsa daneroei?

⁹Anai sug dan dekris roti mogo sergem dou lusud merug ribu sergem nosa, kaba, yen youci mougwu debinim se aigdaga mes hosaiya? Yen meigdoc moc dougwohobei? Dara yen yemecinaga gin meijouhw asesa touebmei?

¹⁰Era sug dan dekris roti mogo senggai dou lusud merug ribu hogu, kaba, yen youci mougwu debinim se aigdaga mes hosa toua?

¹¹Dangga hang, dan demesulou yen eisaugb roti misen yen yen ginero. Doba dan desulou yen dauntoba yen yebehnehino yenin meigdoc mes dougwo leng Parisi dara leng Saduki meren gugdo mougb gin terimda. Dagiro hang, yen meigdoc emobgesa dan indir an ginero?

¹²Dau ingga, kaba, men logodeh len meru obgesa dag Yesus emenara eisaugb gugdo mougb misen dou lenero. Doba len lecinaga dag en esulou len dougwo dau sug leng Parisi dara leng Saduki len ledidib aremeijouhw dau gomnomna mohon dou len dous. Anai areg len lebedbed gin, kaba, dag gugdo gobobo deisa namcir.

¹³Sug Yesus edebeij nagamohob, kaba, eni dara men logodeh len lec merohora dig cinogo Kaisarea Pilipi deit. Sug len ledebeij deinyorohob, kaba, en eijidougwo len eisaugb enin, endagai: Lusud Meraguna Mebin dan gini, kaba, lusud leija dan dag garena?

¹⁴Dangga men logodeh, len launi dou eni, lendagai: Ligbum, kaba, len leija ban dag Yohanes Gogun Lusud Se Duhu. Doba ligbum, kaba, leija ban dag Elias. Dara ligbum deit, len leija ban dag sud hom gesai Allah moro nosa, en moho Yeremia. Doba ligbum, kaba, len leija ban dag sud hom gus dau leng lesai Allah moro nosohob.

¹⁵Doba Yesus eijidougwo men logodeh ucugb deit, endagai: Yen, kaba, yen yeija dan dag garena?

¹⁶Dangga Simon Petrus en auni dou en, endagai: Ban, kaba, Allah Gedig Maireseb Huhugb en Meisi ban gedig ban beigdoc emen dau emen gogom augwan.

¹⁷Sug Simon Petrus os badi Yesus deseino len gus dag ginohob, kaba, Yesus ousa deisa en mer ucugb, endagai: Simon, Yona meisi, areg ban ben gini, kaba, dau lusud misen se cinogo lemens dou banero. Doba dan Indina se bogo dous, eng ens dou ban gini. Hang en emeic geigouhw dou ban toues.

¹⁸Dangga ban bouman deigeigouhw. Sug ban bos badi dan dag ginohob, kaba, dan deigdoumesa ban bedag igdahab moc gototo naugb dan dohud indan logodeh laugwan dag tu icira ban. Hang emedeinyum naugb sug gomom men goubesa emougdud ban touwero, doba ban abina agau beb huhugb terimda.

¹⁹Dara dan demeic gusin dou ban. Dauntoba gareg en ouwan einesa bogo naugb Allah oiharaga en ucugb, kaba, ban bec misis dau en. Dangga gareg ban bouf misis dougwo en se cinogo gini, kaba, Allah en toua eicara aimo dangga. Era gareg ban bec misis dau en se cinogo gin, kaba, Allah eicara aimo dangga dou en toua.

²⁰Sug Yesus eigdoumesa Petrus en moho dag gragohob, kaba, en oungben dougwo men logodeh laugwan, endagai: Yen yemdecic dan dedag Sud Hom Geigdoc Lusud Dau Meren Gogom dou len gusero.

²¹Ebiji dau lona sug Petrus os badi Yesus en moho gini, kaba, Yesus ens dau areg Allah esedeb naugb enin meijouhw augwan asesa dou men logodeh toua. Hanoba en enara dou len, endagai: Allah esedeb naugb dan deihwedesa Yerusalem, dauntoba leng Yahudi meren mougtir, dara gembala gesa taij meren mougtir, dara leng meru ouforoho se Musa men gomnomna len laugwan leic mog erij aingma aingma dou dan sungga. Dara en esedeb naugb len leic gomom dou dan sungga toua. Doba lona hwai debin, kaba, Allah eigdoumesa dan dau leng lomom laugwan ucugb deitohob.

²²Doba sug Petrus ouman gini, kaba, en ohugouhw Yesus mesira dou enin naugb en eden dougwo eni, endagai: Adehsud, dan docuncum dou Allah naugb en asid gogom augwan gin dau ban. Anai dan demouwan naugb len leicara dangga dou banero.

²³Doba Yesus ei maires dara Petrus namcir. Hanoba en etaha en, endagai: Setan, ban beihwededau dan namcir. Anai cum, ban bedag igdahab naugb dan detohob bani. Anai areg ban ben gini, kaba, emaimo asesa Allah enin medoc mesero, doba aimo dau lusud meren gauwamara dous. Dangga hang, bemes lougb dougwo dan indibes touwero.

²⁴Sug Yesus etaha Petrus en mer an dag gragohob, kaba, en esulou men logodeh laugwan ucan deit, endagai: Gareg en ouwan aimo dani, kaba, en emaimo areg enin ouwan deitero. Doba en ogod se enin medoc mes naugb en aimo ucina mog erij aud gomom ucan dan terimda.

²⁵Anai gareg dau yen en ebehnehino enin mena naugb en maireseb terimda, kaba, cum, en mena ediyebeiya dau en namcir. Doba gareg dau yen en emebehnehino enin menero, doba en omom icira sug en aimo danohob, kaba, en mena emediyebeiya touwero. Doba en esma mena maireseb menau geb huhugb namcir.

²⁶Dangga hang, yen yemeic yenin meijina maireseb naugb yemamcirac icira areg geb se cinogo gin augwanlo. Anai sug yen yesma areg geb se cinogo augwanohob, doba yen meijina ediyebeiya se dum smougb, kaba, yen yemeic areg yemeperwei yen meijina ucugb se mohw deita? Naro, augwan gini hom ingma emeic yen meijireseb deb touwero.

²⁷Dangga yen yemebehnehino yenin meijina dau areg gogomero. Doba yen yesogwesa dan indohotimei mohw se ucina mog erij gini aud gomom dous. Anai lona naugb sug Lusud Meraguna Mebin dan dogod aremer aga lusud, kaba, ebeij deinyorohob. Hanoba dan dogod aremer daimo dau astesda sud hom yom men geicara geigouhw era gecgu dou len toua. Dara sug dan den gini, kaba, danin demenero. Doba dan den dara dan Indina men gougouf cucugb. Dara men malaikadir laugwan len laimo dan toua.

²⁸Doba yen youman deigeigouhw, ligbum dau yen gini, kaba, yen meijireseb terimda edebeij lona sug yen yemeija Lusud Meraguna Mebin dan dedag mougt mera medam naugb dan doiharaga lusud ucugb deits. Augwan gini asesa dag misen namcir.