Read Manikion MATIUS 18 Bible Online

MATIUS 18 - Manikion bible

MATIUS 18

¹Se lona ingga, kaba, men logodeh gus len toua len len aud Yesus. Sug len ledebeij enohob, kaba, len leijidougwo en, lendagai: Se lona sug Allah oiharaga emen ucugb, kaba, gareg dau emen en moho agas edreg dau emen gus emaugwana?

²Sug Yesus ouman dag gin, kaba, en eija godeh hom bedesa desij en maga deseino men logodeh laugwan.

³Sug godeh esa deseino len laugwanohob, kaba, Yesus ens meijouhw ucan gin dou len toua, endagai: Gareg dau yen en emeperwei en medoc mes, hanoba en emowun en medoc mes arjaga, aninim dag godeh gin touwero, kaba, en emeinesa Allah men goiharaga touwero. Doba en eigtou dig medigo beb huhugb namcir.

⁴Anai gareg dau yen en owun enin medoc mes arjaga, aninim dag godeh gin, kaba, en eng moho agas gedreg dau lusud se Allah men goiharaga len laugwanohob.

⁵Dara gareg dau yen en eperwei dan indoho, hanoba en owun enin medoc mes arjaga naugb en ebin godeh gedig en medoc ebdebin an dan ginohob, kaba, gini aninim dag en ebin dan touohob.

⁶Dangga sug godeh hom en medoc ebdebin an danohob. Doba cum kaba, sud hom dau yen men geicara eic dag godeh gini en emaimo dan indir an areg dan darougb en an gin toua deitero. Doba en obsara dau dan aud sesar ucugb deit, kaba, eigouhw naugb sug lusud lera aumaga an igdahab se en morcahabi, len lemderba en se dum mei geb aimei naugb sug en omom icira gin namcir. Anai gareg en eicara dag gini an indan godeh hom gini kaba, Allah men gogom edreg medam dau gin namcir toua.

⁷Dara gogom medam eb naugb lusud gedig Bilis oiharaga len se cinogo gini. Anai meren geicara ahwan lusud naugb len merdoc emebdebin an dan toua deitero. Dara len lemarges dau gin touwero. Doba sug len merdoc etrij icira dag ginohob, kaba, arautut len naugb len leicara larses len dag gin terimda. Hang Allah emamsoho len touwero. Doba gareg dau len en eicara barses lusud naugb len merdoc emebdebin an dan deitero, kaba, Allah eic gogom medam dou en namcir toua.

⁸Dangga hang, yen toua, sug yen meisira os areg gecgu, era yen meijohora ahwan yen aud areg gogor naugb yen yebesesar terimda, hanoba eic dag yen meigdoc emebdebin an dan toua deitero. Doba yen yobsara dau dan namcir, kaba, eigouhw naugb yen yogod yen meisira homa dara yen meijohora homa dau yen. Hanoba yen yerba dau yen toua. Anai eigouhw naugb yen yeinesa maireseb menau geb huhugb dara yen meisira dara meijohora hom dous, dau gedig yen yamsoho hwas gin deb, hanoba Allah erba yen an gini se dum smougb geb huhugb toua namcir. Anai eic dag yen yebesesar namcir.

⁹Dara sug yen meijires eiya areg gecgu naugb arautut yen meigdoc mes etrij icira, hanoba eic dag yen meigdoc emebdebin an dan deitero. Doba yen yobsara dau dan, kaba, eigouhw naugb yen yeihwa yen meijires homa dau yen. Hanoba yen yerba dau yen toua. Anai eigouhw naugb yen yeinesa maireseb menau geb huhugb dara yen meijiresi hom dous, dau gedig yen yamsoho hwas gin deb, hanoba Allah erba yen an gini se dum smougb toua namcir.

¹⁰Dangga hang, yen yesedougwo deciciji, dauntoba yen yemesbes an lusud gedig len lod merna debsa dan, aninim dag logodeh ginlo. Anai meren malaikadir, kaba, len leinesa aud dan Indina naugb len ledeseino en se bogo astesda lona loba naugb len terimda. [

¹¹Dara Lusud Meraguna Mebin dan demen naugb demamsoho len, dauntoba len lemaijahasero touwero. Doba dan den naugb dehilon len ucugb dous.] Yen youman dan indir an areg dan den dou yen gin deigeigouhw namcir.

¹²Sug Yesus esulou men logodeh dougwo meren geicara emedag igdahab naugb lusud lemetohobro ouwa dou lenohob, kaba, en eic bainyen dau sud hom men domba gaijahasero debin gin dou len deit, endagai: Sug sud hom men domba maga huntun hom doba hom aijahasero dauwohob, kaba, yen youdesa dagiro? En amsoho hom gin baijahasero deb namcirdei? Naro, en emamsoho debero. Doba en arges men domba gedig maga mos senggegu senggegu edeisu se men mougwa deb. Hanoba en eihweda naugb edehilon domba hom gedig aijahasero graga se menmod deitahabi.

¹³Dangga sug en edesma hom gragohob, kaba, en medoc agahugouhw medam an hom gini edreg dau maga mos senggegu senggegu edeisu gin toua. Anai augwan emaijahasero, doba merugwengga se uro mesaba. Yen youman dan indir an gini deigeigouhw namcir.

¹⁴Dangga hang, deciciji dauntoba meijen geicara emedag igdahab naugb len gedig lod merna debsa danohob, kaba, len letohob icira gin dau dan touwero. Anai yen Meijina se bogo en emouwan sud hom dau len gini, kaba, en emeihwedig dum smougwero. Doba en ouwan len laugwan lesma maireseb huhugb dous.

¹⁵Sug sud hom en ebesesar an ban, kaba, banin beihweda naugb sug ban bens dau men sesar dou en nosahabi. Dangga sug en obsara doc ban abir an, kaba, ban bebin en ucugb aud ucina misen deit touohob.

¹⁶Doba sug en edegeij mer dougwo ban abir, kaba, ban bidahwan sud hom, era lahwai dara ban deit. Dauntoba sug yahwai era yen meijug homoi, kaba, yen youma debin aremer gini dag misen dou en namcir. Anai augwan gini aimo dau areg geb se Surad Injil Meb Mohon gin touohob.

¹⁷Sug en edegeij mer an yen meijir, kaba, yen yedecic dau men geicara graga dou lusud se goucimdeb toua. Doba sug en edegeij mer an leng se goucimdeb toua, kaba, yen yowun en moho dau goucimdeb dag eni sud hom gedig en emecinaga Allah enero. Era yen yowun en moho dag sud hom gedig en acgeij lusud naugb len lohw cinogo dou leng Roma gini.

¹⁸Gareg yen yasid en dau goucimdeb se cinogo gin, kaba, Allah se bogo asid en toua. Doba gareg yen yogod men aremer obsara dau en se cinogo gin, kaba, Allah se bogo ogod aremer obsara dau en touohob. Yen youman dan indir an areg dan den dou yen gini deigeigouhw. Anai augwan gini asesa dag misen namcir.

¹⁹Sug lahwai dau yen se cinogo gini lan mardoc dag hom naugb lacgeij ara ara dau dan Indina se bogo, kaba, en ousa deisa lan marir an areg len lacgeij dau ingga toua.

²⁰Anai sug lahwai era merug homoi dau yen len loucimdeb naugb len lacgeij ara ara se dan indoho dau Allah, kaba, dan indugwengga desij lenohob. Hang areg len lacgeij gin, kaba, Allah ousa deisa len merir an gin toua. Yen youman dan indir deigeigouhw an gin toua namcir.

²¹Sug Yesus ens meijouhw dau leng lebesesar anim ouwa dou men logodehohob, kaba, Petrus en en aud Yesus naugb eijidougwo en, endagai: Adehsud, sug dan indaguna era dan indagto, lan labesesar an dan, kaba, dan daigdougwo maran sesar edebeij mougwa senggai dousei? Era mougwa hosaiya?

²²Dangga Yesus auni dou en, endagai: Ban bemaigdougwo maran sesar mougwa senggai dousero. Doba ban baigdougwo maran sesar esesa terimda.

²³Sug Yesus auni Petrus mer ucugb dag ginohob, kaba, en eic gainyenara hom debin gin dou men logodeh deit, endagai: Se lona sug Allah oiharaga lusud ucugb, kaba, aninim dag sud hom mougt mera medam gen ecic men aremeij geb dou men sogougwir laugwan.

²⁴Sug en ebiji naugb ecic men aremeij dou men sogougwir, kaba, len ledahwan men sogougb hom deseino en. Doba mougt mera men aremeij geic dou men sogougb gini dag aregoufu ebedero namcir.

²⁵Dangga sug sogougb men aregoufu emedeinyum naugb sug en oci ucugb dou men mougtero, kaba, men mougt arougb len gus naugb len lohw en dag sogougb lauma aregoufu dau len gus. Dara en arougb len naugb len lohw en mesouwa, dara en mehir, dara men aremougb geb se men tu augwan naugb lauma aregoufu dau len gus toua.

²⁶Sug men sogougb graga en ouman dau gin, kaba, en ecguna bamuhumlo deseino men mougt. Hanoba en eiyaga, dara eb namcir dou en, endagai: Ban beigtou bateteij danahabi, kaba, dan democ aban aremeij augwan dou bans.

²⁷Sug men mougt mera ouman dag gin, kaba, en medoc eineg an men sogougb gini medam namcir. Hanoba en ogod men aremeij gen ohw dou men sogougb graga augwan dag mogud dou en namcir.

²⁸Doba sug sogougb graga en agunya dau men mougt ingga men tu ucugwohob, kaba, en agasa mesi sogougb hom gus gen men aremeij geic dou mesi gini dag aregoufu ribu mos homoi sergem edeisu gini. Dangga hang, en agaigeij mesi gini, dara esugb en morc. Hanoba en agodgod en an, endagai: Ban boc indan aremeij dou dan dedemeda iteitoginahabi.

²⁹Doba mesi ecguna bamuhumlo deseino eni. Hanoba en en dougwo en ucucugb, endagai: Ban beigtou bateteijahabi, kaba, dan democ aban aremeij augwan ucugb dou bans.

³⁰Doba sogougb hom gin, kaba, en medoc aihagab mesi mer an gin namcir. Hanoba en ohugouhw mesi dou leng lesedougwo tu gesisug naugb len louf mesi ingga terimda mosur loc men aremeij augwan dou en dauwahabi.

³¹Sug mougt mera graga men sogougwir gus len leiya dau gin, kaba, len merdoc momogo medam icira en namcir. Hang len leihweda naugb len ledecic gin augwan asesa dou meren mougt mera toua.

³²Sug meren mougt mera medam ouman dau gin, kaba, en arougb men sogougwir ingga naugb len ledeija men sogougb hom graga aud eni. Sug en enohob, kaba, mougt mera esa mer debin en, endagai:

³³Ban bedag indan sogougb gedig men geicara augwan ecgu namcirohob. Anai sug ban beiyaga dara ban beb dougwo dan namcir, hang dan demogod dougwo indan aremeij augwan dag mogud dou banohob. Dangga dagiro, naugwe hang, ban abdoc emeineg an ban absi dau indan sogougb ginero?

³⁴Hang sug mougt mera medam esa mer debin en dag ginohob, kaba, en ohugouhw en aud leng lesedougwo tu gesisug naugb len leic mog erij dou en debin men aremeij geb dou en graga, terimda en oc augwan dou en toua. Anai en medoc esrougb medam an men sogougb ginohob.

³⁵Sug Yesus eic gainyenara dag graga dou men logodeh dauwohob kaba, en esulou len ucan deit, endagai: Dangga esloulougb medam dag sug lusud lebesesar an yen kaba, yen yemauni gogom. Hanoba yen yemacgeij aruler dau len icira gin touwero. Doba yen yaigdougwo yen meijaguner dara yen meigdamouwer meren sesar dag mogud dau len toua terimda. Anai sug yen yemaigdougwo meren sesar dag mogudero, doba yen yauni gogom icira gin cucugb dou len, era yen yacgeij aruler dau len icira gin toua kaba, dan Indina se bogo en emaigdougwo meijen sesar dag mogud touwero. Doba en eicara baimo an yen, aninim dag mougt mera medam en eicara baimo an men sogougb dag gin touohob. Dara yen yemaigdougwo meren aremer dara yen meijirs dousero. Doba yen yaigdougwo meren aremer augwan dag misen dara yen meigdoc augwan toua terimda.