Read Manikion MATIUS 2 Bible Online

MATIUS 2 - Manikion bible

MATIUS 2

¹Sug Yesus mem ouwadan en se cinogo Bedlehemohob, kaba, lusud merug aibibra len meroho Majus, len len dau dig igda eisaugb dig cinogo Yerusalem. Lusud leija len dag Majus, anai len meru ouforoho naugb len lecinaga tebeij men gansins augwan dag misen namcir. Doba gini ebiji sug Herodes edag mougt mera medam naugb leng Yahudiaba.

²Dangga sug len ledebeij lusud se Yerusalemohob, kaba, len leijidougwo len, lendagai: Yeng Yahudi, yen yeiya meijen mougt mera medam gin ouwaden deb sugiro? Emen emecinaga mem ouwadan en dag misenohob. Anai emen emeiya men tebeij ens dou emenohob. Dangga hang, emen emen aud en naugb emesijaresa eni toua.

³Doba sug Herodes ouman dau areg leng Majus leijidougwo lusud dag graga, kaba, en medoc eijesa medam namcir. Dara men lusud se cinogo Yerusalem laugwan merdoc eijesa toua.

⁴Dangga hang, en emesa mer dou gembala gesa taij meren mougtir dara leng meru ouforoho se Musa men gomnomna naugb len loucimdeb dara eni. Sug len len aud enohob, kaba, en eijidougwo len, endagai: Sud hom gedig Allah osdeb deinaugb mamanohob naugb sug en eigdoc maman dau sesar men gogom augwan, kaba, mem ouwadan en deb sugiro?

⁵Doba len launi dou en, lendagai: Mem ouwadan mougt mera medam gini se cinogo Bedlehem se leng Yudea meren hancob. Anai Allah enara dangga ogdoc sud hom gesai en moro deb sug nosohob, endagai:

⁶Yeng dau cinogo Bedlehem se leng Yahudi meren hancob, kaba, yen meijoho eb taiba dau leng Yahudi meren mougtir laugwan. Anai se lona daiyamo gacin, kaba, mougt mera medam hom emdagunya debin yen naugb en eseyeiyo indan yusud dau yeng Israel yen yaugwan beb huhugb namcir.

⁷Sug Herodes en ouman danggohob, kaba, en esa mer dou leng Majus, endagai: Yen yedu yen meijaga naugb yen yen aud dan sugini. Dangga sug len ledebeij enohob, kaba, en eijidougwo dau len, endagai: Yen yeiya tebeij gini agunya se lona hosohoba?

⁸Sug len lens meijouhw augwan dou enohob, kaba, en arougb len, endagai: Yen yeihwedig Bedlehem naugb yen yeijidougwo leng se cinogo ingga an godeh hom gin deigeigouhwahabi. Dangga sug yen yesma enohob, kaba, yen yecicugb naugb yen yeden dou dan. Dauntoba dan deihweda sungga naugb dan dedesijaresa en toua. Doba gini dag en enara baunun dou len dous.

⁹Sug len louman en merohob, kaba, len leihwedig Bedlehem. Dara tebeij gedig len leiya nosa se igda eisaugwohob, kaba, en eino len merin terimda en esa bainobono irir tu sug mem ouwadan godeh debsa.

¹⁰Sug len leiya tebeij esa bainobono irir tu danggohob, kaba, len merdoc agahugouhw medam an gin namcir.

¹¹Dangga sug len leinesa tuohob, kaba, len leiya godeh ingga, dara en mem Mariam lani. Hanoba len lecguna dara lesijaresa godeh ingga. Gin ouwohob, kaba, len leigba biruwa meh dau meren aremougb mera eisaugb dag emas, dara aremoung mohu men ouwadebeda, moho kemenyan, dara sogo mod, moho mur, naugb len lob desij en maga.

¹²Doba Allah en dougwo len se augwa, endagai: Sug yen yecicugb, kaba, yen yemeraga ucina hom graga aud Herodesero. Dangga hang, sug len lecicugb, kaba, len leraga ucina susugb aud meren cinogoda.

¹³Sug leng Majus leihwededau Yusub dara Mariamohob, kaba, Adehsud men malaikad hom ouwaden naugb enara dou Yusub se augwa, endagai: Ban beisa bougwan godeh dara en mem dig cinogo Mesireda, kaba, ban beigtou sungga terimda dan demedenara dou ban deits. Anai Herodes esedeb naugb ehilon godeh ingga dauntoba en eic gomom dou en.

¹⁴Danggohob, kaba, Yusub en eisa dau atouda. Hanoba en ougwan godeh dara en mem se loba ingga dig cinogo Mesireda.

¹⁵Len leigtou sungga terim edebeij sug Herodes omom dauwahabi. Doba augwan gini ebiji dauntoba esogwa deisa maman Adehsud mogtimei mohw an areg en en dou lusud ogdoc sud hom gesai en moro deb nosohob, endagai: Dan deija dan Indisi Mohora Hom gini, en en dau cinogo Mesir en.

¹⁶Sug leng Majus len lemecicugb aud Herodesero, kaba, en medoc esrougb medam an len. Anai en oudesa dag len lereiyara dou enohob. Dangga en arougb men sadodor, endagai: Yen yeihweda se cinogo Bedlehem, dara cinogo geb acec cinogo ingga augwan toua. Hanoba yen yeic gomom dou logodeh ligiji gedig meren arisogomoc hwai dig gaihida laugwan lomom namcir. En arougb len dangga anai en aimo dau areg leng Majus len lens dau tebeij men lona sug ebiji dou enohob.

¹⁷Areg graga, augwan ebiji naugb ouma debin areg sud hom gesai Allah moro nosa, en moho Yeremia, en og deb nosohob, endagai:

¹⁸Yen youman gida hom en eb medam. Dara en eiyogoseser toua se meruda se cinogo Rama. Eni Rahel eb an medebeitor namcir. Dara en emouwan naugb len leic en medoc emagadgeij dou en ucugblo. Doba en ouwan eb terimda. Anai en medebeitor laugwan gini lomom dau enohob.

¹⁹Doba sug Herodes en omomohob, kaba, Adehsud men malaikad hom en ouwaden dau bogo naugb en enara dou Yusub se augwa, endagai: Ban besedeb naugb ban becicugb an ban abisi dara en mem Mariam dig leng Israel meren hancob. Anai leng louwan logod ban abisi gin, kaba, len lomom dau enohob.

²¹Sug Yusub en ouman dau ginohob, kaba, en eisa dau atouda naugb en eicara baimo Adehsud men malaikad en mer an gini. Hanoba en ahwan meisi dara mem dig Israel ucugb.

²²Doba sug Yusub en ouman dag Arkelaus, Herodes meisi, en eperwei mena mohw dag mougt mera medam se leng Yudea meren hancobohob, kaba, en emeinesa men cinogoro. Doba en ocir men hancob gin dous. Anai en ahau dag cum, kaba, en emeic gomom dou Yesus toua.

²³Dangga len leinesa leng Galilea meren hancob naugb len leigtou sungga se meren cinogo hom, moho Nasared. Anai Allah esulou Yusub se augwa dag gin dou en deitohob. Augwan gini esogwesa areg leng lesai Allah moro nosa, len log deb eisaugb Yesus deb nosohob, lendagai: Lusud lemeija en dag Adeh Nasaredes.