Read Manikion MATIUS 20 Bible Online

MATIUS 20 - Manikion bible

MATIUS 20

¹Hang Allah men geicara se lona sug en oiharaga lusud ucugb, kaba, aninim dag sud hom gedag mougt mera naugb men lo anggur meda. Anai en kaba, en eisa edehilon lusud se usi gedig lohwaresa se lonamenmen naugb len leicara se men lo anggur meda ingga.

²Dangga hang, sug en mer aninim dara len naugb sug en eic merumsi dag perag mogo hom se lona hom dou lenohob, kaba, en arougb len, endagai: Yen yeihweda yedeicara se indan lo anggur meda ingga.

³Sug igda etrij besa taibohob, kaba, en eihweda bedogod dougwo usi graga deit. Dangga sug en eiya, doba ligbum deit len leigtou se usi gedig lusud lohwaresa ingga, kaba, en arougb len, endagai:

⁴Yen yeihweda yedeicara se indan lo anggur meda toua. Doba naugb meijen siouwa, kaba, dan demeic dou yen yaugwan aninim se mer hom dag mougwu. Dangga len toua leihweda se men lo naugb ledeicara dou en.

⁵Sug igdabogo dara igdedeij, kaba, mougt mera graga en en dau men tu deit naugb en arougb lusud ledeicara se men lo, aninim dag en arougb len gus se lonamen dara sug igda esa taiba graga touohob.

⁶Sug deinyor igda obsaresa, kaba, en en dau men tu naugb edogod dougwo us graga deit. Dangga sug en eiya, doba lusud aibibra len leigtou augwougb se us graga debaba, kaba, en esa mer debin len, endagai: Yen yeigtou sugin se lona hom augwougb anara?

⁷Doba len lenara launi en mer ucugb, lendagai: Emen emeigtou sugin augwougb, anai sud hom ingma emacgeij emen naugb emen emeicara dou enero. Dangga mougt graga en arougb len, endagai: Dag gin, kaba, yen toua yeihweda naugb yen yedeicara se indan lo anggur meda toua.

⁸Sug deinyor lobohob, kaba, mougt mera enara dou sud hom gesedougwo men lo anggur meda graga, endagai: Ban beija lusud gedig len leicara se longga laugwan naugb ban bohw merumsi astesda dau len. Bebiji dara leng leicara dau sug igda obsaresa ucugb debin leng leicara se lonamen gini.

⁹Dangga sug leng leicara dau sug igda obsaresa len len ledebeij sud hom gesedougwo lo gragohob, kaba, en ohw merumsi dag en eic aregoufu perag mogo hom dou astesda len laugwan.

¹⁰Dangga hang, sug leng leicara dau sug acgunog len ledebeij mougt gesedougwo lo graga, kaba, len loudesa en eic merumsi edreg dau perag mogo hom dou len. Anai len leicara edreg dau leng leicara se igda obsaresohob. Dobnaro. Sud hom gesedougwo lo graga, kaba, en eic merumsi perag mogo hom dou len toua.

¹¹Sug len leic dau en mesira, doba emedregero, kaba, len lenara ucucugb an mougt mera gedig en men lo gini, lendagai: Len gedig leicara dau sug igda obsaresa, kaba, len leicara se ijam hom dous. Doba emen, kaba, emen emeicara emug erij medam namcir. Dara igdes ogod emen toua. Dangga dagiro, Adehsud, ban bohw emen emaugwan emumsi aninima?

¹³Doba mougt mera en enara bauni ucugb dou sud hom dau len ingga, endagai: Insiya, dan demeicara dag dan demesenagan banero. Anai nanan nagod an gin debohob, dag dan deic siouwa perag mogo hom edeinyum ban abumsi se lona hom dou ban dous.

¹⁴Dangga ban beic ban abumsi perag mogo hom gini, kaba, ban beihwedanda. Doba naugb leng leicara dou dan dau igda obsaresa gini, kaba, dan indoc agug naugb dan deic perag mogo hom dou len toua, aninim dag dan deic dou banohob.

¹⁵Anai gomnomna hom emen dougwo ginero. Doba dan deic indan aregoufu gini dou lusud aimo dau areg dan douwan dou len dous. Sug dan indoc edag riseh an len dag ginohob, kaba, dagiro, naugwe hang, ban benara ucucugb dou dana? Ban bediseij len an ginei?

¹⁶Dangga se lona sug Allah oiharaga lusud ucugb, kaba, aninim dag gin toua. Anai leng leicara se igda obsaresa, kaba, len ledag len mebin. Doba leng leicara se lonamen, kaba, len ledag len mahara dous.

¹⁷Sug Yesus dara men logodeh leisaugb ledebeij deinyor Yerusalemohob, kaba, en eija men logodeh merug sisa hobjerai led debinim hom. Dangga sug len led debinimohob, kaba, en esulou len se ucina mogumsi ingga deit, endagai:

¹⁸Yen youman dan indir deigeigouhw namcir. Anai cum, kaba, maman madebeij Yerusalem ingga. Sug maman madebeij cinogo ginohob, kaba, lusud lemohw Lusud Meraguna Mebin dan debsa gembala gesa taij meren mougtir, dara leng meru ouforoho se Musa men gomnomna len merisira toua.

¹⁹Dangga sug len logod aremer gomom deinaugb dan namcirohob, kaba, len lohw dan debsa sadodor dau lugmahara merisira deit, naugb len leic dan lacecim dara labosbos dan. Hanoba len letob dan dara sogo salib toua. Doba lona hwai debin gin, kaba, Allah eigdoumesa dan dau leng lomom ucugb deit touohob.

²⁰Sug Yesus esulou men logodeh dag gragohob, kaba, Sebedeus mesouwa en en aud Yesus dara en meisi lan toua laicira en. Sug len ledebeij Yesusohob, kaba, lan marim en ecgun mohorbrida badedeij cinogo deseino Yesus naugb en acgeij aremer hom dau eni.

²¹Dangga Yesus eijidougwo eni, endagai: Daneh, ban bacgeij ara dau dana? Doba gida ingga, kaba, en auni dou Yesus, endagai: Se lona sug ban boiharaga lusud ucugb, kaba, dan douwan ban beigdoumesa dan indisi lahwai gini lan maroho naugb homa, kaba, en eigtou dig ban absira misen. Doba homa, kaba, en eigtou dig ban absira metigi. Dara ban bos dangga dou dan deb iteitogin toua.

²²Doba Yesus etaha en mer an, endagai: Yen meiju emaijero namcir an areg yen yacgeij dau dan gini. Yen toua yaiyan meigdocesem naugb yen yeic yen meijug erij, aninim dag Allah esedeb naugb dan deic gin touohobei? Hang len ingga len lousa deisa en mer dedemeda an gini, lendagai: Emen emaugwan emesedeb emdoc mes naugb emaimo dangga touohob.

²³Dangga Yesus ousa deisa len merir an gin toua, endagai: Gini asesa. Anai cum, kaba, yen yemaimo ucina mog erij gin toues. Doba eisaugb aremer gedig sud hom en eigtou dig dan insira misen dara insira metigi, kaba, dan indoho emagas emedeinyum naugb dan demouci gin dou yenero. Doba naugb lusud gedig len leigtou dig dan insira misen dara dan insira metigi gin, kaba, dan Indina Allah enin eng emesedeb naugb gin dous.

²⁴Sug Yesus men logodeh merug sisa, len louman dangga, kaba, len merdoc esrougb medam an len mersi lahwai graga namcir.

²⁵Doba Yesus, kaba, en eija men logodeh laugwan len len aud eni naugb en en dougwo len eisaugb aremer graga. Sug len ledebeij enohob, kaba, en esulou len, endagai: Yen yecinaga dau lugmahara meren mougt mera medam meren geicara dou meren logodeh dag len leic mog erij dou len terimda. Dara lugmahara meren lusud gedig len meroho agas, kaba, len leigdoumesa gogom aingma aingma debin meren logodeh terimda toua.

²⁶Doba meijen geicara doum iteitogin deit, kaba, susugb dau gin augwan namcir. Dangga gareg dau yen gini en ouwan dag en moho agas deseino yen, kaba, en owun enin moho bedag meijen godeh gaugdoho deseino yen gus yaugwan.

²⁷Dara gareg dau yen en ouwan en moho eb taiba deseino yen yaugwan, kaba, en owun enin moho bedag meijen sogougb deseino yen yaugwan toua.

²⁸Aninim dag Lusud Meraguna Mebin dan demouwaden dau bogo aud yen naugb yen yemeicara dou dan touwero. Doba dan douwaden dau bogo gini naugb dan dowun dan indoho dedag sogougb naugb lusud se cinogo gin augwan. Dara dan dohw dan indugt naugb dan dancoho aga len leinyana dau sesar men gogom augwan gin toua.

²⁹Sug Yesus dara men logodeh len len dau cinogo Yeriko aud Yerusalem deit, kaba, lusud leinyana leila ucan en toua.

³⁰Doba sug len lagunya dau Yeriko ginohob, kaba, len leiya, doba lasud lahwai gedig lan mairires mougb lan laigtou se ucina mebera. Dangga sug lan lauman dag Yesus eraga ucina irir sug lan laigtou ingga, kaba, lan laiyagarij en, landagai: Daud Medebeito, ban abdoc eineg an aman gini.

³¹Doba lusud leinyana gedig len leila ucan Yesus ingga, kaba, len letaha lan marir dougwo, lendagai: Maijirero. Doba lan lasa marir naugb laiyagarij edreg namcir, landagai: Daud Medebeito, ban abdoc eineg an aman gin toua.

³²Sug Yesus ouman lan marir, kaba, en esa. Hanoba en eija lan lan aud eni. Sug lan ladebeij enohob, kaba, en eijidougwo lan, endagai: Yan yauwan dag dan deic ara dou yana?

³³Dangga lan launi dou en, landagai: Adehsud, aman amouwan naugb ban besga aman amiresi, dauntoba aman ameiya lo asesa ucugb deit.

³⁴Sug Yesus ouman dau gin, kaba, en medoc eineg an lan medam namcir. Hanoba en ou mesira bos lan mairiresi. Sug en os lan mairires mesohob, kaba, lan mairires esga naugb lan laiya lo asesa ucugb deit. Dau, kaba, lan laicira en namcir.