Read Manikion MATIUS 22 Bible Online

MATIUS 22 - Manikion bible

MATIUS 22

¹Sug Yesus eic gainyenara dau leng lesedougwo lo dag graga dou leng mougtir bouwohob, kaba, en eic gainyenara hom ucan dou len deit, endagai: Edebeij lona sug Allah oiharaga lusud ucugb, kaba, aninim dag sud hom mougt mera medam en ougwan ared debin en meisi sug en eic mesouwa.

³Sug en esedebohob, kaba, en arougb men sogougwir, endagai: Gareg dan dos dou len naugb sug len letara dara dan indisi sug nosohob, kaba, yen yedahwan len laugwan aud dan sugini. Dangga men sogougwir ingga len leihweda ledebeij lenohob, doba len ingga lemenero.

⁴Dangga mougt mera medam arougb men sogougwir ingma ucan deit, kaba, en esulou len, endagai: Yen yecicugb aud leng graga deit naugb yedenara yedad merdoc mes, yendagai: Mougt mera medam ougwan ared augwan bouwa deb namcirohob. Anai en edgwa sapi giji dara aremeta gus gus gedig merij moto moto ingma dara toua debohob. Hang yen yen naugb maman maugwan matara aninim debin dan indisi sug en eic mesouwa gini. Anai dan desedeb augwan edeinyum deb namcirohob.

⁵Dangga men sogougwir ingga len leihweda ledebeij len deit. Doba len lohoiya sogougwir ingga len merir an gin namcir. Hanoba ligbum len leihweda ledes meren lo. Dara ligbum, kaba, len leihweda naugb ledohwara.

⁶Doba ligbum, kaba, len lagaigeij mougt mera men sogougwir gini. Hanoba len logodir dara leic gomom dou len toua.

⁷Sug mougt mera medam ouman dau gini, kaba, en medoc esrougb medam an len namcir. Hanoba en arougb men sadodor leihweda naugb ledeic gomom dou len. Dara len lasaih meren cinogo toua mor mor namcir. Anai len leic gomom dou men sogougwir leinyanohob.

⁸Sug mougt mera medam men sadodor laimo en mer an ginohob, kaba, en arougb men sogougwir gus deit, endagai: Dan dougwan ared debin dan indisi sug en eic mesouwa, kaba, augwan meij mogudohob. Doba leng dan dos dour nosa gini, kaba, meren geicara ecgu namcir. Dangga emedeinyum naugb len lemetara desij dan touwero.

⁹Hang yen yemeihwedaud len deitero. Doba yen yeraga ucina gouji augwan dougwo lusud gus gus dous. Gareg yen yagaseni, kaba, yen yen dou en, yendagai: Emen mougt mera medam ougwan ared debin en meisi sug eic mesouwohob. Hang en emacgeij ban ben naugb bedetara desij en toua.

¹⁰Sug men sogougwir gini laimo debin en mer naugb len leraga ucina gouji augwan dougwo lusudohob, kaba, len louci gareg len lagaseni dau leng merdoc arjaga dara leng merug mog len laugwan debinim hom. Dangga dimei letaresa atij an len laugwan namcir.

¹¹Doba yen youman deigeigouhw. Sug mougt mera medam einesa se dimei ingga naugb en edeiyer, kaba, en eiya sud hom, doba en emeg sansun leicim gin menero.

¹²Dangga hang, en eijidougwo sud hom gini, endagai: Insiya, aban sansun naugb laicim gin, inggiro? Ban beinesa sugini augwougb, anara? Doba sud hom ingga, kaba, en eigtou dag osum namcir.

¹³Dangga mougt mera medam arougb men sogougwir, endagai: Yen yahud sud hom gini mohora dara mesira hwas darem. Hanoba yen yerba en se lobeigbogo mes namcir. Sungga, kaba, en eb medam dara eg mogta terimda.

¹⁴Sug Yesus eic gainyenara dag graga dou len bouwohob, kaba, en ens meijouhw dau gin ucan dou len deit, endagai: Dangga hang, Allah eija len leinyana naugb sug len letara dara enohob. Doba en ouci hom yom dau len dous. Anai leng hom yom gin, kaba, len leg sansun naugb laicim ginohob. Doba len gus, kaba, len lohoiya en mer namcir.

¹⁵Sug Yesus eic gainyenara dag graga ouwa dou leng mougtirohob, kaba, leng Parisi leihwededau en naugb ledohw meruwedoum, dauntoba sug len lerba mohoisa en. Anai len louwan dau sug en auni didi, kaba, enin mer gini edag gogomes naugb enin toua.

¹⁶Hanoba len larougb lenin meren logodeh. Dara lusud gedig len leigdoumesa Herodes en moho naugb len lenara lahahumohumesa Yesus. Dangga sug len ledebeij Yesusohob, kaba, len larges merir merij dou en, lendagai: Adehsud, emen emecinaga ban bemereiyara dou lusudero. Doba ban benara misen dou lusud laugwan terimda. Dara ban bemesi lusud meroho agas emedreg dau lusud meroho eb tainya touwero. Doba ban bens dau Allah men ucina dou len laugwan aninim se geica dou len dous.

¹⁷Dangga hang, sug maman maohw cinogo dou leng Roma, kaba, maman maimo areg asesa Allah men gomnomna dag misenohobei? Era maman madreg dau en mer ginohobei? Ban bens banin abdoc mes asesa dou emenahabi.

¹⁸Doba Yesus ecinaga len lehilon ucina gecgu naugb en dous. Dangga hang, en esa mer debin len, endagai: Yen meigdoc dag hwai namcir, anara? Anai areg yen yeijidougwo dan an gin, kaba, dag yen yainyen dan dous.

¹⁹Yen yens aregoufu gedig yen yeic dou mougt mera medam dau leng Roma naugb yen yohw cinogo dou danahabi. Sug Yesus enara gouji dou len danggohob, kaba, len lens aregoufu mogo hom dou en beiya.

²⁰Sug en eiya aregoufu ginohob, kaba, en eijidougwo len deit, endagai: Gareng mena dara en moho geb se gina?

²¹Doba len launi dou en, lendagai: Leng Roma meren mougt mera medam eng mena dara moho inggeb se ingga. Dangga Yesus auni dou len ucugb, endagai: Areg mougt mera gin men, kaba, yen yeic dou eni. Doba areg Allah men, kaba, yen yeic dou eni toua.

²²Sug len louman gin, kaba, len leimiman dau gin namcir. Hanoba len leihwededau en toua.

²³Se lona sug leng Parisi meren logodeh len lainyen Yesus dag graga dauwohob, kaba, leng Saduki merug hosa len toua len aud en naugb len leijidougwo en eisaugb leng leisa ucugb dau lomom. Doba gini dag len lainyen en toua. Anai len loudesa dag lusud lemeisa dau gomom ucugb deitero, doba lomom namcir.

²⁴Dangga sug len ledebeij Yesusohob, kaba, len lenara dou en, lendagai: Adehsud, Musa arougb emen se men gomnomna dau sug sud hom maguna en omom dau mesouwa, doba lan lameic marih hom touebma, kaba, magto geiseni eic maguna mesouwa ingga deit. Dauntoba sug lan laic marih, kaba, lan marih gini es maguna moro deb.

²⁵Dangga sug nosa, kaba, sud hom en mehir ligiji mogud merug senggai merugwengga desij emen. Meis eng sud, kaba, en eic mesouwa. Doba sug en omom dau en sug lan lameic marihebma, kaba, en eic mesouwa dou magto geiseni naugb en eic dag mesouwa deit.

²⁶Dara eng gedig hwai gin toua en omom dau sug lan lemeic merihebma. Dangga magto mogumsi geisu lan, kaba, en eic en deit. Doba en toua omom dau en sug lan lameic marih touebma. Gini eb naugb merug senggai graga len laugwan leic gida hom gini. Doba len laugwan lomom teitei dau en namcir.

²⁷Sug len laugwan lomom dau enohob, kaba, gida hom gin toua omom ucan len.

²⁸Sug leng Saduki lenara dag gin dou Yesusohob, kaba, len leijidougwo en ucan deit, lendagai: Edebeij lona sug lusud leisa dau gomom ucugb, kaba, gareg dau len gin eng emeic gida gin deita? Anai len laugwan lougb dag mersouwohob.

²⁹Doba Yesus etaha len merir an gini, endagai: Yen yauwam an didi, anara? Yen yemecinaga dau Allah men mobisamougb dara areg en og se Surad Injil Meb Mohon deb touebmei?

³⁰Anai se lona sug Allah eigdoumesa lusud dau gomom ucugwohob, kaba, len lemeicim deitero. Doba len ledag malaikad se bogo dous.

³¹Dara aremer eisaugb lusud leisa dau gomom, kaba, yen yemecic dau areg Allah enara se Surad Injil Meb Mohon eisaugb gini mougwa hom touebmei?

³²Anai en enara se Surad Injil Meb Mohon gin deb nosohob, endagai: Dani Abraham, Isag, Yakub meren Allah. Sug Allah enara dangga deb nosohob, kaba, gini ansins dag len gin merires inggebga naugb lusud laugwanohob. Anai en emedag leng lomom meren Allah enero, doba en edag leng merireseb meren Allah dous.

³³Sug lusud louman dau areg en en dou leng Saduki gin, kaba, len leimiman dau gin namcir.

³⁴Sug leng Parisi louman, doba leng Saduki len leigtou dag losum naugb Yesus mer namcirohob, kaba, len toua len len naugb loucimdeb dara en toua.

³⁵Hanoba sud hom dau len en mou ouforoho se Musa men gomnomna, kaba, en eijidougwo Yesus naugb ainyen en toua, endagai:

³⁶Bani sud hom abu ouforoho naugb ban bens aremeijouhw dag misen dou lusud. Dangga hang, ban bemens dau Musa men gomnomna hom gedig moho eb taiba dau men gomnomna gus augwan asesa dou emenahabi.

³⁷Dangga Yesus auni dou en, endagai: Yen meigdoc gororougb meijen Adehsud Allah dara yen meigdoc augwan, dara yen meijireseb augwan, dara meijen gauwamara augwan toua.

³⁸Gomnomna hom gin, kaba, edag meiyo. Dara en moho eb taiba augwan namcir.

³⁹Dara gomnomna hom deit aninim dag meiyo gini men meijouhw, dag gini: Yen meigdoc gororougb len gus aninim dag yen meigdoc gororougb yenin toua.

⁴⁰Gomnomna hwai gin, kaba, lan maroho eb taiba naugb oiharaga areg Musa en og deb se men surad nosa. Dara areg leng lesai Allah moro nosa len log deb se meren surad augwanohob.

⁴¹Sug Yesus en auni dou leng Parisi dag graga ouwohob, kaba, en toua eijidougwo len ucugb deit. Anai len laugwan merugwengga desij enaba. Hanoba en eijidougwo len, endagai:

⁴²Yen youdesa dagiro eisaugb sud hom gedig en eigdoc lusud dau meren gogom augwana? Eni gareng medebeito ena? Doba len launi dou eni, lendagai: Sud hom ingga, kaba, eni Daud medebeito.

⁴³Dangga Yesus eijidougwo len ucan deit, endagai: Sug sud hom eni Daud medebeito, kaba, dagiro hang, Daud eigdoumesa en moho dag men Adehsuda?

⁴⁴Anai Mena Gogoufu arautut Daud naugb en erba ugwaremer an sud hom gin deb sug nosohob, endagai: Maman Adehsud Geis Huhugb en enara dou indan Adehsud, endagai: Ban beigtou dig dan insira misen naugb ban bedag mougt mera medam desij dan toua. Dara ban beigtou desij dan dag gini, terimda dan dowun aban moc augwan leb tainya se aban abohotimei namcir.

⁴⁵Dangga hang, sug Daud eigdoumesa sud hom gin dag men Adehsudohob, kaba, dagiro, naugwe hang, eni dag Daud medebeito gina?

⁴⁶Doba sud hom ingma dau leng Parisi ingga, kaba, en emauni dau areg graga hom ucugb dou Yesus touwero. Dara dau lona ingga, kaba, len lemeic merus naugb len lemeijidougwo Yesus an ara ara hom toua deitero.