Read Manikion MATIUS 26 Bible Online

MATIUS 26 - Manikion bible

MATIUS 26

¹Sug Yesus ens meijouhw dau Lona Sug Ouwedoc dou men logodeh dag graga dauwohob, kaba, en ens dau lona sug en omom dou len deit, endagai:

²Yen yecinaga dag lona hwai deit, kaba, maman maugwan ared debin lona sug Allah esga maman mamjemouwer dau cinogo Mesir sug nosohob. Dangga se lona ingga, kaba, sud hom en emohw Lusud Meraguna Mebin dan se leng Yahudi meren mougtir merisira naugb len letob dan dara sogo salib toues.

³Se lona sug Yesus enara dou men logodeh dag gin, kaba, gembala gesa taij meren mougtir dara leng Yahudi meren mougtir len laugwan loucimdeb se Gembala Gesa Taij Meren Mougt Mera Medam, moho Kayapas, men tu.

⁴Sug len loucimdebohob, kaba, len lehilon ucina, dauntoba len lagaigeij Yesus naugb leic gomom dou en. Dara len lehilon ucina, dauntoba lusud leinyana lemecinaga dau gin touwero.

⁵Doba sug len lehilon ucina dag ginohob, kaba, len len dougwom an ucucugb, lendagai: Maman mamagaigeij eni se Lona Gohw Bedreg gin, isnaro. Anai cum, kaba, lusud leic gecgu dou maman icira en namcir.

⁶Se lona hom, kaba, Yesus moongga se sud hom, moho Simon, men tu se cinogo Betania. Simon gini, kaba, lusud leija en moho dag aremos gogoufu et en sug nosohob. Doba iteitogin, kaba, en eigouhwohob.

⁷Dangga sug eni moongga se Simon men tu, kaba, gida hom en odo debecij hom dau igdahab gogoufu an aremoung mohu men ouwadebeda gedig mera eisaugb namcir aud Yesus. Sug en edebeij Yesusohob, kaba, en eir aremoung mohu gini se en mougt toua.

⁸Doba sug Yesus men logodeh, len leiya dau gin, kaba, len letaha en an gini, lendagai: Ban beir aremoung mohu gini bamcirac icira en mougt, anara? Anai aremoung mohu ingga sug ban bohw dou len gus, kaba, mera eisaugb namcir. Dangga sug ban bauma aregoufu dau len gusahabi, kaba, ban bemohw aregoufu dou leng merunggwereij dous.

⁹

¹⁰Doba Yesus ecinaga areg men logodeh lauwam an gini. Hang en etaha len dougwo, endagai: Leng merunggwereij gini, kaba, len leigtou desij yen terimda naugb sug yen yousa len. Doba dan, kaba, dan demeigtou desij yen deitero. Doba cum, kaba, dan domom dau yenohob. Anai sug gida gini ehin aremoung mohu men ouwadebeda se dan indugt gini, kaba, en esedeb dan indaga naugb lona sug lusud lec dan gini. Dangga dagiro, naugwe hang, yen yemeic igdebes dou ena? Anai men geicara geigouhw dou dan gini dag lusud leimiman en an namcir.

¹¹

¹²

¹³Hang yen youman deigeigouhw. Sug lusud lesai Mer Geigouhw eisaugb dan dou lusud se cinogo sugiro sugiro, kaba, len lecic dau gida gini men geicara dou len, dauntoba len merdoc eiseisan en terimda. Augwan gini asesa dag misen namcir.

¹⁴Sug Yesus enara dag graga dou men logodeh ouwohob, kaba, sud hom dau Yesus men logodeh merug sisa hobjerai, en moho Yudas dau cinogo Keriod, kaba, en eihwedaud leng Yahudi meren mougtir naugb en ohw Yesus dou leni.

¹⁵Sug en edebeij lenohob, kaba, en eijidougwo len, endagai: Sug dan dohw Yesus dou yen, kaba, yen yemeic ara dou dana? Dangga sug len lecic aregoufu perag mogo mos homoiyohob, kaba, len leic dou en.

¹⁶Hang dau lona ingga, kaba, Yudas en ehilon ucina naugb en ohw Yesus dou len namcir.

¹⁷Edebeij leng Yahudi meren Ari Gouji sug len let roti gemerisero se lona gaimougtut ingga, kaba, Yesus men logodeh len len aud en. Hanoba len leijidougwo en, lendagai: Ban bouwan emen emougwan ared naugb Lona Gohw Bedreg gin deb sugiro?

¹⁸Dangga Yesus arougb len, endagai: Yen yeihweda yedeiya sud hom se Yerusalem gedig yen yecinaga enohob. Sug yen yedeiya enohob, kaba, yen yen dou eni, yendagai: Emen adehsud, kaba, en ouwan emen emougwan emetara debin Lona Gohw Bedreg gini se aban tu, anai men lona edagasohob.

¹⁹Sug Yesus men logodeh louman en mer an danggohob, kaba, len leihweda naugb len lesedeb ared debin Lona Gohw Bedreg gini se sud hom graga men tu deb.

²⁰Sug edebeij lobohob, kaba, Yesus dara men logodeh merug sisa hobjerai len laugwan len toua len len. Hanoba len leigtou naugb letara se dimei mes se tu graga.

²¹Sug len letaraba, kaba, Yesus enara dou len, endagai: Yen youman dan indir deigeigouhw. Sud hom dau yenin gin, kaba, en emohw dan dou len guses. Gini asesa dag misen namcir.

²²Sug men logodeh louman en mer an gin, kaba, len merdoc eijesa medam namcir. Hanoba astesda sud hom yom dau len, kaba, en auni ucugb dou Yesus, endagai: Adehsud, ban boudesa danei? Anai danis demohw banbuma.

²³Doba Yesus auni ucugb dou men logodeh sisa hobjerai gini, endagai: Gareg dau yen aman amatara se igdebir hom, kaba, eninggang emohw dans.

²⁴Anai areg lusud len log deb se Surad Injil Meb Mohon eisaugb Lusud Meraguna Mebin dan deb sug nosohob, kaba, dan daimo augwan gini aud gomom dag misen toua. Doba sud hom gohw dan gini, kaba, gogom medam eb naugb en namcir. Hang eigouhw naugb en mem emeh en deb touwero.

²⁵Doba sug Yudas gen ohw Yesus en ouman dau gini, kaba, en eijidougwo Yesus, endagai: Guru, ban boudesa dan dohw ban dou len gusei? Dangga Yesus enara bauni en mer, endagai: Areg banin benohob, kaba, teiyengga.

²⁶Sug Yesus etara dara men logodehaba, kaba, en os roti hom icira en mesira. Sug en os roti ginohob, kaba, en en sijo dou Allah naugb en oiharaga roti ingga. Sug en en sijo dou Allah enohob, kaba, en ekris roti naugb en eic dou len. Hanoba en enara dou len, endagai: Yen yet gini, anai roti gini dag danin indaga.

²⁷Sug en eic roti dou lenohob, kaba, en os mog an mohu deit. Sug en os mog an mohu ginohob, kaba, en en sijo dou Allah naugb oiharaga ingga toua. Sug en en sijo dou Allah enohob, kaba, en eic mog an mohu dou men logodeh naugb len leg toua.

²⁸Hanoba en enara dou len, endagai: Yen yeg mohu geb se mog gini. Anai mohu gini dag dan indugwihi gedig ororo naugb Allah aigdougwo lusud leinyana se cinogo augwan meren sesar. Hang ouma debin areg Allah os deb dou men lusud nosa debohob.

²⁹Dangga dau iteitogini, terim edebeij lona sug dan Indina en oiharaga lusud ucugb, kaba, dan demeg anggur mohu dag gin dara yen deitero. Doba se lona sug dan Indina en oiharaga yen ucugwohob, kaba, maman maugwan mameg anggur mohu menau aninim deit. Yen youman dan indir an gin deigeigouhw namcir.

³⁰Sug len letara ouwohob, kaba, len lei ugwaremer lagahugouhw an Allah debin gini. Sug len lei ugwaremer ouwohob, kaba, len len dau tu naugb len leihwedig menmougb hom, moho Saitun Meda.

³¹Sug len leisaugb menmougb ingga, kaba, Yesus enara dou men logodeh asa ucina, endagai: Areg len gus leic dou dan se loba gini, kaba, eic dag yen yaugwan meigdoc obsara dau dan namcir. Dara yen yougbdedau dan toua. Anai Allah og deb se Surad Injil Meb Mohon sug nosa debohob, endagai: Dan demogod gembala en emomom dau men domber laugwan len lemougb lemaisoboro toues.

³²Doba sug Allah eigdoumesa dan deisa dau domom ucugwohob, kaba, dan demeino yen meijen dig leng Galilea meren hancobes.

³³Doba sug Petrus ouman gini, kaba, en eic mos naugb en enara bauni Yesus mer dedemeda, endagai: Len gus laugwan, kaba, len lahau naugb len lougbdedau banda. Doba danin, kaba, dan demougbdedau banero.

³⁴Doba Yesus en enara bauni en mer ucugb, endagai: Ban bouman dan indir deigeigouhw. Anai se loba gini sug berougwu emeba merbuma, kaba, ban baideido dougwo dan mougwa homoi icirohob dag ban bemecinaga danero. Augwan gini asesa dag misen namcir.

³⁵Doba Petrus eic mos naugb en enara bauwun Yesus mer terimda, endagai: Sug len gus logod dan domom aninim dara ban, doba dan demaideido danin dougwo banero. Sug Petrus enara danggohob, kaba, Yesus men logodeh gus len laugwan lousa deisa Petrus mer an gin dou en toua.

³⁶Sug Yesus dara men logodeh len ledebeij usi hom, moho Gedsemanohob, kaba, Yesus enara dou men logodeh, endagai: Yen yaugwan yeigtou sugini naugb dan, dauntoba danin didocuncum dou daninahabi.

³⁷Doba sug en eihweda naugb en edocuncum, kaba, en en dou Petrus dara Sebedeus meisi lahwai naugb len loucan en. Sug len lededau men logodeh gusohob, kaba, en ebiji naugb en medoc momogo dara en medoc eijesa medam namcir.

³⁸Hanoba en enara dou men logodeh merug homoi gini, endagai: Dan indoc momogo medam, kaba, eic dag dan domom icira gin namcir. Dangga hang, yen yeigtou desij dan naugb yen yesedougwo dan sugin namcir toua.

³⁹Sug en en dou men logodeh merug homoi dag gragohob, kaba, en asid enin gurereito dau len deit. Hanoba en ecguna bamuhumlo naugb en ocuncum dou en Mena, endagai: Akeinya, sug aban ucina ingma naugb dan demaimo gogom ginero, kaba, ban bedug mog an gogom gini dau dani, dauntoba dan demeg touwero. Doba areg danin douwan dau danin dag gini, ga, naro. Doba areg banin bouwan beic dou dan, kaba, dan daimo areg ban beic dou dan ingga dous.

⁴⁰Sug en ocuncum dag gragohob, kaba, en ecicugb aud men logodeh merug homoi graga deit. Doba cicireber, kaba, len laugwan latou dauwohob. Dangga sug en etaha lenohob, kaba, en ehin meresa Petrus, endagai: Dagiro naugb yen yemesedougwo dan gurereito sug docuncum gin touwero?

⁴¹Esloulougb naugb yen yesedeh yauweila dougwo areg gainyen yen namcir, dauntoba yen yemobsara aud areg ginero. Dara yen yocuncum esesa terimda. Anai se yen meigdoc mes, kaba, yen yogod an uwan yaimo areg geigouhw dous. Doba se yen meijaga, kaba, cum, yen youwan yaimo areg gainyen yen gin dedemedohob.

⁴²Sug Yesus ehin meresa len danggohob, kaba, en ecicugb dau len naugb en edocuncum mougwa hwai dou en Mena Allah deit, endagai: Akeinya, ban bouwan naugb dan deg mog an gogom gin namcir, kaba, ban bemedug dau danero. Anai dan douwan daimo areg ban bouwan gin dous.

⁴³Sug en ecicugb dau edocuncum gini aud men logodeh deit, kaba, en eija, doba len laugwan latou dau en deitohob. Anai len louwan lesga meriresi, doba cicir ogomcin len namcirohob.

⁴⁴Dangga en emebir lenero. Doba en eihwededau len naugb en edocuncum gedig mougwa homoi dou en Mena deit. Aninim dag en ocuncum mougwa hwai nosa graga dou enohob.

⁴⁵Sug en ocuncum gin ouwohob, kaba, en ecicugb aud men logodeh merug homoi graga deit. Hanoba en esa mer debin len, endagai: Yen yatou dara yeigtou debin yen meijug terimda, anara? Anai yen yeiya, doba indan cumougt naugb sug len lohw Lusud Meraguna Mebin dan debsa leng lebesesar merisira enohob.

⁴⁶Dangga yen yeisa naugb maman maihweda. Anai yen yeiya sud hom gohw dan se len ingga merisira, kaba, en ebeij deinyor danohob.

⁴⁷Irir sug Yesus en enara dou men logodeh merug homoi gragaba, kaba, sud hom dau Yesus men logodeh merug sisa hobjerai en moho Yudas, kaba, en agunyen. Dara mougt mera gouji dau gembala gesa taij dara mougtir dau leng Yahudi meren logodeh leinyana laicira en. Anai meren mougtir gin, kaba, len larougb len naugb len laimo Yudas an ginohob. Dangga hang, len laugwan gini, kaba, len lod meren krawan dara meren ijouhugwa toua.

⁴⁸Doba Yudas en acoci lusud leinyana laimo en graga debohob, endagai: Yen yemeiya sud hom gedig dan dou indufesa eni, kaba, aisa yen meisira naugb yen yagaigeij en namcir. Anai sud hom areg maman maihwedaud en gin engga.

⁴⁹Dangga sug Yudas eiya Yesus, kaba, en edesa deinyor. Hanoba en ou en, endagai; Adehsud, abiresou. Sug en enara dangga dou Yesusohob, kaba, en ou moufesa en namcir.

⁵⁰Doba Yesus enara bauni en mer ucugb dou en, endagai: Insiya, areg ban ben sugini naugwohob, kaba, ban baimo gin dedemeda. Sug en enara dou Yudas danggohob, kaba, len laugwan louwa debin en naugb lagaigeij en namcir.

⁵¹Doba sud hom dau Yesus men logodeh gesa desij en ingga, kaba, en eigdesa men krawan dau meh. Hanoba en ogod Gembala Gesa Taij Meren Mougt Mera Medam men sogougb hom en moms edug dau en toua.

⁵²Doba Yesus esa mer debin en icira gini, endagai: Ban beis aban krawan se meh ucugb. Anai gareg en os men krawan naugb ogod len gus lomom, kaba, cum, len gus leic lagod en toua omom namcir.

⁵³Ban boudesa dan dag demeiyagarij dan Indina naugb en emousa daneroei? Dangga, isnaro. Anai sug dan deiyagarij eni, kaba, en emesa men malaikadir merug ribu mos senggai iteitogini naugb len leseyeiyo dan toua.

⁵⁴Doba areg lusud leic dou dan iteitogini esogwa deisa areg len log se Surad Injil Meb Mohon deb sug nosohob. Dangga sug dan dacgeij dan Indina naugb en esa malaikadir lousa dan dougwo augwan gin, kaba, dagiro esogwa deisa areg len log deb gina?

⁵⁵Sug Yesus en dougwo men godeh hom dag gragohob, kaba, en enara debin lusud leinyana gedig len len aud en naugb lagaigeij en ingga toua, endagai: Nosa, kaba, dan indugwengga se Allah men igtia naugb dan dens en mer dou yen astesda lona terimda. Doba yen yemagaigeij danero. Dangga dagiro, naugwe hang, yen yemodo meijen krawan dara ijouhugwa naugb yen yagaigeij dan gina? Yen youdesa dan dedag sud hom mog mogei?

⁵⁶Doba inggaida. Meijen geicara augwan dou dan gin, kaba, esogwa deisa areg leng lesai Allah moro sug nosa len log deb se Surad Injil Meb Mohon deb sug nosohob. Sug Yesus men logodeh len leiya, doba len lagaigeij Yesus danggohob, kaba, len laugwan lougb laisoboro dau en namcir.

⁵⁷Sug len lagaigeij Yesusohob, kaba, len lahwan en deseino Gembala Gesa Taij Meren Mougt Mera Medam, moho Kayapas, se men tu. Anai leng meru ouforoho se Musa men gomnomna dara leng Yahudi meren mougtir len laugwan loucimdeb sungga naugb enohob.

⁵⁸Dara Petrus toua edoumouma ucan Yesus dig medigo, terimda bedebeij Gembala Gesa Taij Mougt Mera Medam men igtia. Dangga sug en einesohob, kaba, en eigtou desij lusud gedig len lesedougwo mougt mera medam men tu maga ingga. Dauntoba en ouman len logod aremer dagiro deinaugb Yesusa?

⁵⁹Sug len lahwan Yesus deseino gembala gesa taij meren mougtir dara Majelis len laugwanohob, kaba, len lehilon ucina naugb lereiyareseni. Dauntoba len logod aremer gomom naugb en toua.

⁶⁰Dangga lusud leinyana len len naugb lereiyara amgemaseni namcir. Doba len lemesma aremer gemeica hom touwero. Sug len gus lenara ouwa dauwohob, kaba, lahwai lan lan daiyamo naugb lan toua lauma debin en deit, landagai:

⁶¹Aman amouman en mer dag en ot Allah Men Tuari baisoboro namcir. Doba se lona hwai debin, kaba, en ohud ucugb se mohw deit.

⁶²Sug lan lauma debin en danggohob, kaba, Gembala Gesa Taij Meren Mougt Mera Medam en eisa besa naugb en esa mer debin Yesus, endagai: Lan gini, kaba, lan laigdoumesa gogom debin ban deseino emenohob. Dangga ban bauni dagiro eisaugb gina? Era ban bosumei?

⁶³Doba sug Yesus eigtou dag osum namcir, kaba, Gembala Gesa Taij Meren Mougt Mera Medam gini en eijidougwo Yesus mougwa hom dara deit, endagai: Dan dacgeij naugb ban bou Allah gedig en maireseb huhugb gini en moho debin dou emen, dauntoba emen emecinaga ban bedag Allah Meisi mohora hom gedig en eigdoc lusud dau meren sesar dag misenohobei? Era naroei?

⁶⁴Dangga Yesus ousa deisa en mer an gini, endagai: Areg ban ben, kaba, moongga. Hang yen youman dan indir deigeigouhw namcir. Anai dau iteitogin, kaba, yen yemeiya Lusud Meraguna Mebin dan demeigtou dig Allah Gedig En Mobisamougb en mesira misen naugb dan dedag mougt mera medam desij en. Dara yen yemeiya dan demecicugb se umer aud yen toues.

⁶⁵Sug Yesus auni dou mougt mera medam dag gragohob, kaba, mougt mera medam ingga en ekris enin men sansun dau enin mos, anai en mos eigeigan areg Yesus auni dou en gin namcir. Hanoba en eija Majelis gus, endagai: Sud hom gini, kaba, en eic Allah moho acecim namcirohob. Dangga hang, maman mamehilon lusud gus ucucugb eisaugb en deitero. Anai maman maugwan mauman dau enin mer dag en eic Allah en moho bacecimohob.

⁶⁶Sug mougt mera medam enara dag graga dou Majelisohob, kaba, en eijidougwo len deit, endagai: Yen youdesa naugb gin dagiro? Hanoba len launi dou en ucugb, lendagai: Enin mer gini edeinyum naugb sug maman maic gomom dou enohob.

⁶⁷Sug Majelis logod gomom deinaugb Yesus danggohob, kaba, len leigdores aih en mebes. Dara len lecgun merisira naugb logod en toua. Doba ligbum deit, kaba, len leh merusutimei naugb loto eni. Hanoba len lesbesan eni, lendagai: Bani Sud Hom Geigdoc Lusud Dau Meren Gogom Augwan, kaba, ban ben emen emoho dou emen dag gareg en oto ban gina?

⁶⁸

⁶⁹Sug Yesus en moongga se dimei mesaba, kaba, Petrus en toua moongga se igtia mougwaba. Dangga mougt mera medam graga men sogougb dau gida hom, kaba, en en aud Petrus naugb eijidougwo en dag ehin mereseni, endagai: Dan decinaga dag ban baiceicira Yesus dau cinogo Galilea en touohoba?

⁷⁰Doba Petrus aideido dougwo en deseino len leinyana ingga namcir, endagai: Dan demecinaga areg ban beijidougwo dan an gini men meijouhw asesero.

⁷¹Sug Petrus aideido dougwo Yesus danggohob, kaba, en aisacij aud misis geb dougwo igtia. Sug en ebeij deinyor misis inggohob, kaba, mougt mera medam men sogougb dau gida hom deit, kaba, en eiya Petrus. Hanoba en ens en dou leng lesa deinyor misis ingga, endagai: Yen yeiya sud hom gini. Dan decinaga en aiceicira Yesus dau cinogo Nasared ingga toua.

⁷²Doba Petrus aideido dara ouwara dougwo namcir, endagai: Dan demecinaga sud hom gedig ban ben inggaro.

⁷³Dangga sug emeb terberba debin inggabuma, kaba, lusud areg len leigtou se igtia ingga kaba, len len naugb lenara dou Petrus deit, lendagai: Indeic, ban gin toua sud hom dau leng laiceicira Yesus sug nosa. Anai ban benara, doba ban abir eineg an susugb dau emen lecohob.

⁷⁴Doba Petrus ouwara dou len namcir, endagai: Dan demecinaga sud hom gedig yen yehin meijiresa dan an ginero. Augwan gini asesa dag misen namcir. Ga, naro, kaba, dan dacgeij Allah naugb en eic gogom medam debin gin dou dan toua. Sug en ouwara dangga inegohob, kaba, berougwu eba mer bagod dougwo en mer an toua.

⁷⁵Sug Petrus ouman berougwu eba merohob, kaba, en medoc eiseisan areg Yesus en dou enohob dag berougwu emeba mer mougwa hombuma, kaba, en aideido dougwo Yesus mougwa homoiyohob. Dangga sug en agunya dau mougt mera medam men igtia dig medigohob, kaba, en eb medam an gin namcir.