Read Manikion MATIUS 28 Bible Online

MATIUS 28 - Manikion bible

MATIUS 28

¹Sug leng Yahudi meren Lona Gemeicaresero ouwa dauwohob. Hanoba edebeij Ari Prei lonamenmen, kaba, Mariam dau cinogo Magdala dara en mesi Mariam homa, kaba, lan laihweda naugb sug lan ladeiya igdohos mes dougwo Yesus deit. Anai leng Yahudi meren Lona Gemeicaresero ouwa dauwohob.

²Doba sug lan lac inegohob, kaba, inyomda eisa medam namcir. Anai maman Adehsud men malaikad hom en ouwaden dau bogo. Dangga sug en edebeij igdohos mocohob, kaba, en egrij igdohos meh dau. Hanoba en eigtou taiba igdohos meh ingga toua.

³Sug leng lesedougwo igdohos moc ingga len leiya dau gini kaba, len lahau dau en. Dara len leijesa medam dag lomom namcir toua.

⁴Anai len leiya malaikad, doba en maires edag bagar mouf. Dara men sansun toua dag cireg gogoufu namcir.

⁵Dangga sug lagida lahwai graga lan ladebeij igdohos mocohob, kaba, malaikad oho mer debin lan, endagai: Yan yamahau dau danlo. Anai dan decinaga dag yan yan sugini naugb yan yahilon Yesus gedig len letob en se sogo salibohob.

⁶Doba en moongga suginero. Anai en eisa dau gomom, aninim dag en en deb dou yen sug nosohob. Dangga yan yan naugb sug yan yaiya dougwo igdohos mes sug len lob en debsa gini, doba mes mogudohob.

⁷Hang yan yaihweda dedemeda naugb yan yaden dou men logodeh gus dag en eisa dau gomom ucugb. Dara yan yamen dou len dag en eino len merin dig leng Galilea meren hancob gin naugb len lemdeiya en sungga toua. Dara yan maigdoc moc dougwo areg dan den dou yen ginlo. Doba yan yaiseisan namcir.

⁸Sug lagida graga lan lauman dau ginohob, kaba, lan laobga dau aremogougb moda ucugb dedemeda naugb lan laden dau areg graga augwan dou Yesus men logodeh gus laugwan toua. Doba sug lan laobga asa ucina gini, kaba, lan mardoc nagama ahau. Doba lan mardoc nagama, kaba, agahugouhw an areg lan lauman gragohob.

⁹Dara sug lan laobga se ucina ginaba, kaba, Yesus enin agunya dagasa lan toua. Sug en ou lanohob, kaba, en oho mer debin lan, endagai: Yan yemahau dau danlo. Doba yan maigdoc ebtou namcir. Anai dan eng Yesus areg dan deisa dau gomom ucugb dag misenohob. Dangga hang, yan yaihweda naugb yan yaden dou dan indagtor naugb len leihweda se leng Galilea meren hancob. Anai sungga, kaba, len lemdeiya dans. Sug lan lauman en mer dag ginohob, kaba, lan lan aud en. Hanoba lan lacguna naugb lan laos en mohora dara lan lasijaresa en toua.

¹¹Doba yen youman deigeigouhw. Sug lagida graga laihwedohob, doba merug hosa dau leng lesedougwo aremoung moda graga toua lingma locucan lan dig cinogo Yerusalem naugb len ledecic dau aremer graga augwan asesa dou gembala gesa taij meren mougtir touahabi.

¹²Sug gembala gesa taij meren mougtir louman ginohob, kaba, len loucimdeb dara leng Yahudi meren mougtir naugb len lohw merdocedoum. Dauntoba len lehilon ucina naugb aremer ginahabi. Sug len lohw merdocedoum naugwohob, kaba, len leic aregoufu einyana dou leng lesedougwo aremogougb moda gini, dauntoba len louf merires dougwo.

¹³Hanoba len lococ len, lendagai: Sug lusud leijidougwo yen an aremer gini, kaba, yen yerei dou len dag se loba sug yen yatou dau, kaba, Yesus men logodeh len len naugb ledeigdoumesa en maga dau igdohos mesdohob.

¹⁴Doba sug aremer gini agaha dou mougt mera Pilatus en toua ouman, kaba, emenin toua ememenara emat en medoc dau yens. Dauntoba en emeic gogom dou yen touwero. Doba en medoc emtereta dau gin namcir. Hang yen meigdoc emeijesa dau ginlo.

¹⁵Sug len louman dag gini, kaba, len leic aregoufu dau mougtir merisira namcir. Hanoba len laimo debin dag areg mougtir lesulou len an graga dou lusud laugwan toua. Dangga hang, dau lona ingga terimda iteitogini, kaba, leng Yahudi lecic len merir an gin doum terimdaba.

¹⁶Sug lagida lahwai graga lan laden dau areg Yesus arougb lan an ingga dou men logodeh merug sisa hobjerem gragohob, kaba, len loucan en dig leng Galilea meren hancob naugb len leisaugb aud menmod hom dag areg Yesus ens dou lenohob.

¹⁷Sug len leisaugb menmod ingga, kaba, len leiya eni. Dangga len lesijaresa en toua. Doba ligbum, kaba, len leija meruwesa en dag enin eng Yesus areg en eisa dau gomom dag lusud misenohobei? Era en edag mena dousei? Era dagiro?

¹⁸Doba sug Yesus esa deinyor lenohob, kaba, en enara dou len, endagai: Allah eigdoumesa dan indoho dedag mougt naugb areg geb se bogo dara areg geb se cinogo augwan toua.

¹⁹Hang yen yemeihweda naugb yen yesai dan induro dou lusud se cinogo gin augwan, dauntoba len laimo dan dag indan logodeh namcir. Dara leng laimo danohob, kaba, yen yogun len laugwan bansins se duhu se dan Indina en moho, dara en Meisi dan indoho, dara Mena Gogoufu en moho debin gin toua.

²⁰Hanoba yen yesulou len dauntoba len lesogwa deisa areg dan den dou yen gini augwan dag misen namcir. Anai dan indugwengga dara yen terimda edebeij sug lona ouwedoc dougwo namcir toua.