Read Manikion MATIUS 3 Bible Online

MATIUS 3 - Manikion bible

MATIUS 3

¹Sug arisogomoc einyana debin lona sug Yusub ahwan Mariam dara Yesus dig cinogo Nasaredohob, kaba, sud hom moho Yohanes en en se lomougwisa se leng Yudea meren hancob naugb en en dougwo len an meren sesar. Lusud leija en toua dag Sud Hom Gogun Lusud Se Duhu.

²Dara sud hom gesai Allah moro sug nosa, en moho Yesaya, en og deb eisaugb Yohanes gin toua deb nosohob, endagai: Lona daiyamo, kaba, sud hom en emen aud yens naugb en emeijara an dou yen, emendagai: Yen yesedeb yenin meigdoc mes obosboro deb naugb Adehsud sug en en dau bogo, dauntoba en oiharaga yen ucugb. Aninim dag lusud lesa ucina obosboro naugb mougt mera medam sug en einesa aud len toua. Dangga sug Yohanes en edebeij se lomougwisa ginohob, kaba, en en dougwo len, endagai: Yen yesga meijen sesar moho asesa dou Allah. Dara yen yahau an dougwo namcir, anai Allah esedeb en medoc mes naugb sug en oiharaga yen ucugb.

⁴Doba Yohanes gin, kaba, en eg sansun dau aremeta, moho unta, mos. Dara areg en ahud meida moc, kaba, dau aremeta mos toua. Dara men ared naugb en et, kaba, dag amo dara omohu mogud dous.

⁵Dangga sug en eijara an dag graga dou lenohob, kaba, leng dau cinogo Yerusalem, dara lusud dau leng Yudea meren hancob, dara lusud dau cinogo geb acec duhu Yordan mebera, len laugwan louwa debin en se lomougwisa naugb len lesga meren sesar moho augwan asesa dou en. Hanoba en ogun len se duhu Yordan debin gin toua.

⁷Dangga leinyana dau leng Parisi, dara leinyana dau leng Saduki, len toua laimo len naugb Yohanes ogun len se duhu. Doba sug Yohanes en eiya leng gin, kaba, en owun len an gini, endagai: Gareg en en dau Allah men gogom dou yen, hang yen yamougwin aud dan gina? Anai meijen geicara augwan dag hinogo mehir yen smougb mougwaba.

⁸Hang yen yemens dau meijen geicara dag yen yarges dau meijen sesar dag misen dou danahabi, kaba, dan demogun yen se duhu debin gin toues.

⁹Dara yen yemoudesan yen meijemouwa Abraham dag en moho oiharaga yen dau Allah men gogom gin touwero. Doba yen yesa doc dan namcir. Anai sug Allah en ouwan, kaba, en eic igdahab augwan gini beperwei dag Abraham medebeitor misen dau yen deit. Yen youman dan indir gini deigeigouhw namcir.

¹⁰Dangga yen yera mera geigouhw ansins dag yen yesga dara yahau an dougwo meijen sesarohob. Anai Allah esedeb keita se sogo meiyo debohob. Gareg dau yen en emera mera geigouhwero, kaba, en eh en aninim dag en eh sogo gemera merero naugb en ec se smougb toua.

¹¹Dani, kaba, dan dogun yen se duhu ansins dag yen yesga meijen sesar dara yahau an dougwohob. Doba cum, kaba, sud hom deit en emaimo ucan dan aud yens. En moho agas medam edreg dau dan. Dangga dan indoho emedeinyum naugb sug dan demodo men hwigbeimos touwero. En gin, kaba, en emesa Mena Gogoufu dara smougb aud yen toues.

¹²Hanoba en emekeba yen daums. Aninim dag sud hom os aigdaga mes an tramdad naugb os berban. Dauntoba loungmen ohu merila etrij dau mogo misen eb se aigdaga mes dous. Dangga gareg dau yen en edag mogo misen, kaba, en ouci en debinim naugb en. Aninim dag sud hom en ob mogo misen se mougwa mes naugb enin toua. Doba gareg en edag merila, kaba, en erba en se smougb gedig lusud lemob touwero, aninim dag sud hom en erba merila mogud augwan se smougb toua.

¹³Lona aibibra debin gragohob, kaba, Yesus enin en dau leng Galilea meren hancob aud Yohanes se duhu Yordan mebera. Sug Yesus edebeij enohob, kaba, en en dou en, endagai: Ban bogun dan se duhu gin toua.

¹⁴Doba Yohanes ainyen eperwei Yesus medoc mes an gini. Hang en emenara dou en, endagai: Dagiro, naugwe hang, ban bacgeij dan naugb dan dogun ban se duhua? Eigouhw naugb ban bogun dan se duhu dous.

¹⁵Doba Yesus auni en mer, endagai: Ban bemen dougwo danlo. Doba se aremer hom gin, kaba, ban baimo areg dan douwan dous. Anai sug nanan naicara dag gin, kaba, nanan naimo areg asesa Allah enin medoc mes ingga. Sug Yohanes ouman danggohob, kaba, en ogun Yesus se duhu.

¹⁶Sug en ogun Yesus se duhuohob, kaba, Yesus eisa dedemeda dau duhu naugb en eihwedig lonog. Sug en edebeij lonogohob, kaba, en eiya, doba bogo ec dau. Hanoba en eiya Mena Gogoufu ohw dag bohobei dau bogaden aud en toua.

¹⁷Doba yen youman deigeigouhw. Sug bohobei eigtou taiba Yesus en mougtohob, kaba, Allah enara dau bogaden naugb auma debin en dou lusud gedig len lesa sungga, endagai: Gini dan Indisi gedig dan indoc gororougb eni, anai en eic dan indoc esgiraha dou dan namcir.