Read Manikion MATIUS 4 Bible Online

MATIUS 4 - Manikion bible

MATIUS 4

¹Sug Mena Gogoufu ohw dau bogaden naugb eigtou desij Yesusohob, kaba, en ahwan en aud usi hom se lomougwisa naugb Bilis ainyen en sungga.

²Dangga sug Yesus en ehig dau ared se lona sud hwai, dara loba sud hwaiyohob, kaba, sireben namcir.

³Hanoba Bilis en en aud en naugb ainyen en. Sug Bilis edebeij Yesusohob, kaba, en enara dou en endagai: Bang Allah Meisi misen, kaba, ban benara dou igdahab einyana geb gini bedag roti naugb ban bet.

⁴Doba Yesus auni dou en, endagai: Musa en og deb se Surad Injil Meb Mohon debohob, endagai: Lusud lemeic merireseb dau sug len let ared misen dousero. Doba dau sug len lesogwesa areg asesa Allah enin medoc mes toua.

⁵Dobnaro, kaba, Bilis ahwan Yesus aud Allah Men Tuari medgomori se cinogo gecabeci, moho Yerusalem, naugb en ainyen en sungga deit. Hanoba en enara dou en, endagai: Bang Allah Meisi misen, kaba, ban bahacugb banin dau sugini dig cinogo gaihida. Anai sud hom en erba ugwaremer se Surad Injil Meb Mohon an debohob, endagai: Allah en emarougb men malaikadir an bans. Hang len lemoc len merisira naugb ban, dauntoba ban abohora emoc igdahab touwero.

⁷Doba Yesus auni dou en, endagai: Musa en og deb eisaugb gin se Surad Injil Meb Mohon deb touohob, endagai: Yen yemainyen Adehsud meijen Allah en touwero.

⁸Dobnaro, kaba, Bilis ahwan Yesus aud menmod gagas medam hom naugb en ens dau mougt mera medam se cinogo gini meren hancob dara meren ariloboc geigouhw gebsa augwan dou en toua.

⁹Hanoba en ainyen en deit, endagai: Ban becguna naugb besijaresa dan, kaba, dan deic areg dan dens dou ban gragohob augwan dou ban dag banin aban namcir.

¹⁰Doba Yesus en auni Bilis mer ucugb deit, endagai: Setan, ban beihwededau dan namcir. Anai Musa en og deb eisaugb gini se Surad Injil Meb Mohon deb sug nosa touohob, endagai: Yen yecguna yesijaresa meijen Adehsud Geis Huhugb. Dara yen yeicara yaimo en toua. Anai enin dous eng meijen Allah misen.

¹¹Sug Yesus ecicugb Bilis ineg danggohob, kaba, Bilis ougbdedau en namcir. Hanoba Allah men malaikadir len len naugb len lagauwesa en toua.

¹²Doba sug Yesus en ouman dag len lagaigeij Yohanes naugb louf en se tu gesisugohob, kaba, en emeigtou se leng Yudea meren hancob gin deitero. Doba en eisa dau sungga dig leng Galilea meren hancob deitda. Sug en edebeij sungga, kaba, en emeigtou se en gun Nasared touwero. Doba en eitig naugb en eigtou se Kapernaum dous. Anai cinogo ingga, kaba, eb se leng Sebulon dara Nabtali meren hancob geb deinyor Tiberias mebera.

¹⁴En eicara dag gini dauntoba esogwa deisa areg sud hom gesai Allah moro sug nosa, en moho Yesaya, en og deb sug nosohob, endagai:

¹⁵Leng se Sebulon dara Nabtali maran hancob, dara leng se dum mebera, dara leng se cinogo aud igda agunya se Yordan nagama, dara lugmahara se leng Galilea meren hancob, kaba, len laugwan gini leigtou se lobeigbogo nosohob.

¹⁶Doba sud hom en moho dag mouf eririj medam, en en naugb aisema len deitohob. Dara leng leigtou se cinogo gomom meniha, kaba, sud hom, en moho mouf, en agunya aud len touohob.

¹⁷Dangga ebiji dau sug Yesus en eigtou se Kapernaum graga, kaba, en ebedbed dou lusud, endagai: Yen yesga meijen sesar, dara yen yahau an dougwo toua. Anai lona naugb sug Allah oiharaga yen ucugb, kaba, edebeij deinyor namcirohob.

¹⁸Se lona hom sug Yesus oci Galilea mebera, kaba, en eiya Simon dara en magto Andreas lan larba diara debin hosei deb gini. Anai maran geicara dag lan lahilon hosei dous terimda. Lusud leija Simon en moho toua dag Petrus.

¹⁹Dangga Yesus en dougwo lan, endagai: Yan yaimo dan. Anai dan douwan dens meijouhw dou yan naugb yan yahwan lusud aud dan, dauntoba len ledag indan logodeh, aninim dag yan yarba diara debin hosei gin toua.

²⁰Sug lan lauman Yesus eija lan dangga inegohob, kaba, lan larges diara deb. Hanoba lan laimo en namcir toua.

²¹Sug Yesus en eda deitohob, kaba, en eiya Sebedeus meisi lahwai, lan maroho Yakobus dara en magto Yohanes, lan eng lagon maran diara gobogougb dougwo deb se ing mes gini. Dara lan marna Sebedeus en toua moongga desij lan. Sug Yesus eiya lan, kaba, en eija lan toua, endagai: Yan toua, yan naugb yaimo dan.

²²Sug lan lauman Yesus eija lan dangga inegohob, kaba, lan larges maran ij dara marna toua deb. Hanoba lan laimo Yesus namcir.

²³Sug Yesus eija len gragohob, kaba, en ec mohora acec leng Galilea meren hancob naugb en esai Allah moro geigouhw dau sug en ouwan oiharaga lusud ucugb dou len se meren tuari augwan. Dara en edidib meijouhw dau augwan gin dou len toua. Hanoba en eic geingmos agauwesa dou leng areber, dara leng meraga omomtom len laugwan toua.

²⁴Sug lusud leiya dau gini, kaba, len lagaha merir an men geicara gini se Galilea dara leng Siria meren hancob augwan toua. Dangga hang, len lemahwan leng areber aingma aingma, dara leng merna mog mog einesa len merdoc mes, dara leng ugweber, dara leng merohora dara merisira agaim dou Yesus naugb en eic geigouhw dou len laugwan toua.

²⁵Dangga lusud dau leng Galilea meren hancob, dara lusud dau Cinogo Sisa ladedim hom meren hancob, dara lusud dau cinogo Yerusalem, dara lusud dau leng Yudea meren hancob, dara leng leigtou se Yordan nagama, kaba, len leinyana leila ucan Yesus naugb laimo en toua.