Read Manikion MATIUS 6 Bible Online

MATIUS 6 - Manikion bible

MATIUS 6

¹Sug yen yaimo areg asesa Allah enin medoc mes naugb yen yeicara geigouhw dou lusud, kaba, yen yemens gini ainyes dou lusud laugwanlo. Doba yen yeic augwougb dous. Anai sug yen yens ainyes dou lenohob, kaba, yen Meijina se bogo emeic meijen siouwa ingma icira meijen geicara gin dou yen touwero.

²Dangga sug yen yeic ara ara dou leng meren ara ara ingmaro, kaba, yen yemoc desan dou lusud aninim dag leng leicara larerei lusud meriresero. Doba yen yodmun se yen meigdoc mes dous. Anai leng larerei gini, kaba, len loc desan dou lusud se meijen tuari, dara ucina mebera terimda. Dauntoba lusud leimiman len meroho an areg len leic dou lusud gin namcir. Dangga, kaba, len leic meren siouwa dau ginohob. Yen youman dan indir an areg dan den dou yen gini deigeigouhw. Anai gini asesa dag misen namcir.

³Dangga sug yen yeic ara ara dou leng meren ara ara ingmaro, kaba, yen yemoc desan dou yen mesir misen touwero. Doba yen yecgoneh dau len toua, dauntoba len lemecinagero.

⁴Anai sug yen yeicara dag gini, kaba, yen Meijina se bogo en emeic ara ara naugb en emauni ingga ucugb dou yen toues. Anai en eiya dau areg yen yod se simei gin augwanohob.

⁵Dara yen yemaimo len gedig leicara larerei lusud meriresi meren geicara an gocuncum touwero. Doba yen yasid yenin dau len namcir. Anai len gini, kaba, len meru ehigehi naugb lusud louman dau sug len locuncum dou Allah. Dangga sug len merugwengga se tuari, era sug len lesa se ucina maraida, kaba, len locuncum ucucugb. Dauntoba lusud leimiman len an dau gin terimda. Hang len lemeic meren siouwa augwan icira gin dau touohob.

⁶Dangga sug yen yocuncum, kaba, yen yemaimo leng graga meren geicara an gocuncum ginero. Doba yen yeinesa meijen dimei mes. Dara yen youf misis dougwo yen touahabi. Yen yemocuncum dou yen Meijina se bogo gedig lusud lemeiya en mougwa hom touebma. Anai en, kaba, en eiya yen sug yen yecgoneh yen meijug naugb yen yocuncum dou enohob. Hang en emeic ara ara naugb en emauni ucugb dou yen toua.

⁷Dara sug yen yocuncum dou yen Meijina se bogo, kaba, yen yemeiso yen meijir an dou en aninim dag leng lecguna dou seiseij len touwero. Anai len gini, kaba, len loudesa dag sug len leiso len merir an dou en terimda, kaba, en emousa deisa areg len lacgeij en an gini dou len toues.

⁸Dangga yen yemeiso yen meijir an meijen gocuncum, aninim dag leng lecguna dou meren seiseij ginlo. Anai sug yen yemocuncum naugb yemacgeij ara ara dau yen Meijina Allah enbuma. Doba en ecinaga areg yen yesedeb naugb yacgeij en an gini se yen meigdoc mes dag misen nosohob.

⁹Dangga sug yen yocuncum dou Allah, kaba, yen yocuncum dag gini, yendagai: Akeinya se bogo, emen emouwan naugb lusud laugwan leigdoumesa ban aboho dara lesijaresa ban hom dous. Anai bani ecabeci namcir.

¹⁰Dara emen emacgeij ban ben naugb ban boiharaga emen emaugwan se cinogo gini ucugb toua. Dara ban barautut emen naugb emen emaimo areg asesa banin abdoc mes namcir, aninim dag leng se bogo len laimo ban abir touohob.

¹¹Dara ban beic ared edeinyum irogini dou emen toua.

¹²Dara ban baigdougwo emen sesar augwan dau emen, aninim dag emen emaigdougwo len gus meren geicara gecgu dou emen dau len toua.

¹³Dara ban bemesa areg ainyen emen aud sesar touwero. Doba ban beseyeiyo emen dougwo Sud Hom Mobgos Maha sug en ainyen emen gini, dauntoba emen ememobsara dau banlo. Anai banin boiharaga augwan. Dara ban abuwemougb esesa naugb augwan. Dara ban aboho eb taiba naugb augwan beb huhugb namcir toua. Amin.

¹⁴Sug Yesus eic gansins dau gocuncum dou men logodeh dag gragohob, kaba, en enara dau sug len laigdougwo lusud meren sesar mougwa hom ucan dou len deit, endagai: Sug yen yacgeij Allah aigdougwo meijen sesar dag mogud, kaba, esloulougb naugb yen yaigdougwo len gus meren sesar dag mogud toua. Anai sug yen yaigdougwo len gus meren sesar dag mogud terimda, kaba, yen Meijina se bogo en aigdougwo meijen sesar terimda toua.

¹⁵Doba sug yen meigdoc agadgeij naugb yen yemaigdougwo len gus meren sesar dag mogudero, kaba, yen Meijina se bogo emaigdougwo meijen sesar dag mogud touwero.

¹⁶Dara sug yen yehig dau ared naugb yen yocuncum dou Allah, kaba, yen yemec dara yen meigbes eririj. Aninim dag leng larerei lusud meriresero. Anai len gini, kaba, len lec dara len merbes eririj namcir. Dara len lehin ara ara se len merbes dara merugt bogor namcir toua, dauntoba lusud lecinaga dag len leigtou dau aredohob. Dangga len leic meren siouwa icira gin dauwohob. Yen youman dan indir an areg dan den dou yen gini, deigeigouhw. Anai gini asesa dag misen namcir.

¹⁷Doba yen, kaba, yen yemeicara danggero. Doba sug yen yehig dau ared, kaba, yen yomceduhu naugb yen yedu yen meigbes ecabeci. Dara yen yeic mani yaugb meijugt toua, dauntoba lusud lemecinaga dag yen yemehig dau aredero. Doba yen Meijina gedig lusud lemeiya en mougwa hombuma, kaba, enin eng ecinaga dous. Anai enin eng eiya dau meijen geicara gini sug yen yecgoneh dau lusudohob. Hang en emeic ara ara naugb en emauni ucugb dou yen toua.

¹⁸

¹⁹Dara yen yemeigb meijen aremougb deb se cinogo ginlo. Doba yen yarges dau namcir. Anai sug yen yeigb aremougb deb se cinogo gin, cum kaba, dagames et, dara ongkum betaha dau yen. Dara leng leiyohora lod sibij dau meijen tu. Hanoba len leinesa leiyoho meijen aremougb dau yen toua.

²⁰Dangga yen yemeic meijuwemougb asesa naugb yen yemeigb meijen aremougb se cinogo ginero. Doba yen yeic meijuwemougb esesa naugb yen yeigb meijen aremougb se bogo dous. Anai sungga, kaba, dagames emet, dara emongkum bemetaha dau yen touwero. Dara leng leiyohora lemod sibij dau meijen tu naugb len lemeiyoho meijen aremougb gini dau yen touwero.

²¹Hang yen meigdoc emetrij icira areg geb se cinogo gin toua deitero. Anai sug meijen aremougb eb se cinogo gini, kaba, yen meigdoc ebdebin sugin toua. Doba sug meijen aremougb eb se bogo, kaba, yen meigdoc ebdebin sungga toua.

²²Dara yen meijiresi edag smougb mouf naugb aisema yen meigdoc mes. Dangga sug yen meijires auweila areg gesgiraha dara medoc hom namcir, kaba, yen meigdoc dag mouf toua terimda.

²³Doba sug yen meijires auweila areg se lobeigbogo dous, kaba, yen meigdoc dag lobeigbogo toua terimda. Dangga sug lobeigbogo aihiron dougwo mouf dau yen meigdoc mesohob, kaba, mouf hom emeb se yen meigdoc mes toua deitero, doba augwan edag lobeigbogo mogud namcir dous.

²⁴Dara yen yemeicara naugb mougt hwai daremlo. Doba yen yeicara naugb mougt hom dous. Anai sug yen yeicara naugb mougt hwai, kaba, cum yen meigdoc gororougb homa. Doba yen meigdoc esges homa. Era sug yen meigdoc edag beim naugb yen yaimo mougt homa en mer, kaba, cum, yen yohoiya mougt homa en mer gin toua. Hang emedeinyum naugb yen yemeicara dou Allah dara aremougb lahwas daremero, doba yen yeicara dou mougt hom dous.

²⁵Dangga sug yen yeicara yaimo Allah dous, kaba, dan den dougwo yen naugb yen meigdoc emeijesan areg yen yet, dara areg yen yeg, deitlo. Dara yen meigdoc emeijesan areg yen yeg dougwo yen meijaga touwero, doba yen yesa doc dau namcir. Anai yen meijireseb gini mera eisaugb edreg dau areg yen yet. Dara yen meijaga mera eisaugb edreg dau sug yen yehilon sansun naugb yen yeg toua.

²⁶Dara yen yeiya dougwo ba meren geicara sug len lohw touahabi. Anai len gini, kaba, len lemeba meij dara lemec mera. Dara len lemeic meij gin lemobdeb se tu meij touwero. Doba yen Meijina se bogo enin eic ared edeinyum naugb len laugwan terimda. Sug en eic ared dou len dag ginohob, kaba, en eic ared dou yen toua terimda. Anai yeni mera eisaugb edreg medam dau len namcir.

²⁷Dangga yen meigdoc emeijesan terimlo. Anai gareg dau yen sug en medoc eijesan an ara graga, kaba, emousa en naugb eic maireseb aulo terberba dou en deita? Naro, en medoc eijesan gini emeic maireseb emaulo hom dou enero.

²⁸Dara yen meigdoc emeijesan areg yen yeg dougwo yen meijaga touwero. Doba yen yeiya dau bideh sug leiji se lomesmes len touahabi. Anai len gini, kaba, len lemeic ara ara naugb sug len lemerijero. Dara len lemou igdebes naugb lemesinsin sansun naugb lenin touwero.

²⁹Doba hom dau bideh gin, kaba, merij mouf esesilo edreg medam dau Solaiman men sansun gogouf cucugb augwan ginohob. Yen youman dan indir an areg dan den dou yen gin deigeigouhw namcir. Anai Solaiman, kaba, en mesoho mougb. Doba men ariloboc meb tintin hom aninim dag bideh hom merij mohw gesisilo gin touwero.

³⁰Doba sug Allah eg sansun se aremerij geb se lomesmes dag ginohob, kaba, dagiro, naugwe hang, yen meigdoc ebdebin an Allah gurereito dag gin dousa? Yen youdesa en emeic sansun dou yen naugb yen yemegeroei? Naro, en emeic sansun dag misen dou yen yemeg toues. Anai aremerij gin, kaba, eiji irogini. Doba lonehibi, kaba, lusud lec se smougb, hang emediyebeiya toua namcirohob.

³¹Dangga hang, yen yemohuresa eisaugb areg yen yet, dara areg yen yeg, dara areg yen yeg dougwo yen meijaga deitlo. Doba aimougtut, kaba, yen yehilon naugb Allah oiharaga yen ucugb. Dara yen yeic meijuwemougb esesa naugb yen yaimo areg asesa Allah enin medoc mes toua terimdahabi, Allah en emeic areg graga augwan emaos dara dou yen toua. Anai leng merdoc emebdebin an Allah enero, kaba, len lohuresara eisaugb areg len let, dara areg len leg, dara areg len leg dougwo len meraga terimda. Doba yen Meijina se bogo, kaba, en ecinaga dag areg graga augwan, kaba, esloulougb naugb yen teiteiyohob.

³²

³³

³⁴Dangga hang, yen meigdoc emeijesan areg yen yet dara areg yen yeg naugb lonamen gin touwero. Doba yen yogod se yenin meigdoc mes dag aremer naugb yen yaimo se lona irogini, kaba, edeinyum naugb lona iroginahabi. Anai lonamen, kaba, medoc eijesan areg geb se men lona gin dous.