Read Manikion MATIUS 7 Bible Online

MATIUS 7 - Manikion bible

MATIUS 7

¹Dara yen yemowun leng gus meroho an meren geicara ucucugblo. Dauntoba Allah emowun yen an meijen geicara touwero.

²Anai sug yen meigdoc agadgeij an len gus naugb yen yowun len meroho an meren geicara terimda, kaba, Allah en medoc agadgeij an yen naugb en owun yen meijoho an meijen geicara toua. Era sug yen yeic hameij an ared gurereito dou len gus, kaba, Allah eic dangga dou yen toua.

³Dangga dagiro, naugwe hang, yen yauweila aremoslos gobsaresa yen mesir meriresi toutoua? Doba yen yemeiya sogo meb geb se yenin meijiresi nosa dauwero?

⁴Era sug sogo meb eb se yen meijiresaba, kaba, dagiro yen yen dou yen meijaguner dara yen meigdamouwer naugb yen yeic aremoslos dau len meriresa?

⁵Naro, eigouhw naugb yen yeic sogo meb dau yen meijiresi dauwahabi. Anai sug yen yeicara dag gin, kaba, yen meijiresi esgiraha naugb yen yeic aremoslos dau yen meijaguner dara yen meigdamouwer toua. Doba sug yen yemeicara dag ginero, kaba, yen yedag lusud gedig len leicara larerei len gus meriresi.

⁶Dara yen yemeic areg Allah enin moho aiga becabecohob dou lusud gedig meren geicara dag mihero. Anai cum, kaba, len leineg naugb lau yen an gin dous. Dara yen yemeic areg mera eisaugb dau Allah dou lusud gedig meren geicara dag hweij touwero. Anai gini dag yen yerba sariou mogo dou hweij naugb len laiyan mor mor toua.

⁷Dangga yen toua, sug yen youwan yacgeij ara ara dau Allah, kaba, yen yemouf yen meijirs an gin touwero. Doba yen yacgeij en an ucucugb terimda. Dara sug yen meigdoc etrij icira ara ara dau Allah, kaba, yen meigdoc emtereta dau ginero. Doba yen meigdoc esrougb an gin namcir. Dara sug yen youwan youma misis se Allah men tu naugb en ousa yen toua, kaba, yen yemarges dau gin touwero. Doba yen youma misis dougwo en terimda toua.

⁸Anai gareg en emouf mers an areg en acgeij dau Allah enero, doba en eicara baimo dangga terimda, kaba, cum, Allah emeic dou ens. Dara gareg en medoc emtereta dau areg en acgeij dau Allah enero, doba en medoc esrougb an gin namcir, kaba, cum, en emesma dau ens. Dara gareg en emesa doc dau sug en ouma misis se Allah men tuero, doba en ouma misis dougwo en toua terimda, kaba, cum, Allah emousa en toues.

⁹Gareg dau yen sug en meisi acgeij roti dau en, kaba, en eic igdahab dou enei? Naro, en eic roti dou en.

¹⁰Era sug en acgeij hosei dau en, kaba, en eic hinogo dou enei? Naro, en eic hosei dou eni toua. Anai eni dag en mena misenohob.

¹¹Dangga sug yen yecinaga naugb yen yeic ara ara geigouhw dou yen meijihirohob, kaba, yen Meijina se bogo en emeic areg gecgu dou yenero. Naro, en eic ara ara geigouhw edreg medam dou yen sug yen yacgeij dau en toua. Anai meijen geicara einyana dag meijug mog namcir. Doba enin men geicara augwan ecabeci mogud an yen dous.

¹²Dara yen youwan len gus leicara geigouhw an yen, kaba, yen toua yeicara geigouhw an len nosahabi. Anai areg Musa dara leng lesai Allah moro sug nosa len log deb se Surad Injil Meb Mohonohob, kaba, men meijouhw dag gini.

¹³Dara yen yeic meijuwemougb esesa naugb sug yen yeinesa misis geinyim gin dous. Anai misis aud dum smougb, kaba, gebehibera namcir. Dara ucina gini emogom naugb sug lusud leraga touwero, doba eigouhw dous. Dangga hang, lusud leinyana leraga ucina gin touohob.

¹⁴Doba misis aud maireseb huhugb, kaba, einyim namcir. Dara ucina toua ogom naugb sug lusud leraga. Dangga lusud leinyana, kaba, len lemeraga ucina gin touwero. Doba lusud hom yom dous eng len lehilon ucina gini naugb sug len leraga toua terimda.

¹⁵Dara yen yebehnehino yenin meigdoc mes dougwo leng lesai Allah moro areibahau. Anai len gini, kaba, len leg domba modi laperwei lenin merucbobaga dag len merdoc arjaga deseino yen. Doba se len merdoc mes, kaba, len ledag mihiloro gau yen an ara ara dau yen dous.

¹⁶Dara yen yecinaga leng ledag gembala areibahau gini dau sug len lera mera. Anai sug len merdoc dag lisugaba, kaba, len lemera mera dag anggur mera naugb yenero. Doba len lera mera dag lisug mera dous. Era sug len merdoc dag imbrei mogaba, kaba, len lemera mera dag sogo, moho ara mera, naugb yen touwero. Doba len lera mera dag imbrei mera mogud dous.

¹⁷Dangga gareg en edag sogo maga geigouhw, kaba, en era mera geigouhw dous. Anai sug sogo maga geigouhw namcirohob, kaba, en emeineg naugb emera mera dag gecgu deitero. Doba en era mera geigouhw augwan terimda.

¹⁸Dangga toua, sug sud hom en edag sogo maga gecgu, kaba, en era mera gecgu dous. Anai sug sogo gecgu namcir, kaba, en emeineg naugb emera mera geigouhw touwero. Doba en era mera dag gecgu mogud terimda.

¹⁹Dara gareg en edag sogo maga gera mera ecgu, kaba, en emeigtou terberbero. Doba Allah ehi en dau naugb erba en se smougb namcir.

²⁰Dangga hang, yen yemecinaga leng lesai Allah mer areibahau dou yen dau sug len lera mera. Anai len lemera mera geigouhwero, doba ecgu namcir dous.

²¹Dara astesda sud hom areg en eigdoumesa dan indoho dag men mougt mera medam, doba se en mers dous, kaba, en emeinesa naugb Allah oiharaga enero. Doba gareg en aimo areg asesa dan Indina se bogo enin medoc mes gin toua, kaba, en ingga dous Allah oiharaga en.

²²Dangga ebeij Lona Sug Dan Dogod Aremer Aga Lusud, kaba, len leinyana lemeiyagarij dan, lendagai: Adehsud, Adehsud, emen emesai ban aburo dou lusud sungga sunggohob. Dara emen emocirma merna mog mog dau lusud ogdoc ban aboho. Dara ban beic goubesa dou emen naugb emen emens ganusbus einyana ainyes dou lusud touohob.

²³Doba se Lona ingga, kaba, dan denara dauni len merir dag misen namcir, dendagai: Dan demecinaga yenero. Hang yen yeihwededau dan sugin namcir. Anai meijen geicara augwan gini edag mog mog edreg dau areg asesa Allah enin medoc mes namcir touohob.

²⁴Gareg dau yen en ouman dan indir an areg dan den dou yen graga. Dara en eicara baimo toua, kaba, eni aninim dag sud hom gedig en mou ouforoho naugb en ohud men tu se igdahab moc gototo namcir.

²⁵Dangga sug los es medam, dara duhu eh medam, dara sug loungmen medam eisa naugb ahacugb tu graga, doba emeijero. Anai en men tu eb se igdahab moc gototo namcirohob.

²⁶Doba gareg dau yen en ouman dan indir an areg dan den dou yen graga, doba en emeicara emaimoro, kaba, eni aninim dag sud hom mou edgom gedig en ohud en men tu deb se dibo dous.

²⁷Dangga sug los es medam, dara duhu eh medam bougwan tu. Dara loungmen medam eisa naugb ahacugb tu graga, kaba, en eij bot baisoboro namcir.

²⁸Sug Yesus ens meijouhw dau areg graga augwan sug ouwedoc asesa dou lusudohob, kaba, len merug eijesa an areg en en dou len ingga.

²⁹Anai en ens meijouhw augwan dou len. Doba aninim dag leng meru ouforoho se Musa men gomnomnero. Anai len leses meriresa dou len dous. Doba Yesus enin, kaba, en ouma debin meijouhw asesa dou len namcir.