Read Manikion MATIUS 8 Bible Online

MATIUS 8 - Manikion bible

MATIUS 8

¹Sug Yesus enara dag graga dou len bouwohob, kaba, en ouwaden dau menmougb aud dougwen. Dara lusud leinyana leila ucan en naugb laimo en toua.

²Doba yen youman deigeigouhw, sug en ec gini, kaba, sud hom aremos gogoufu et en, en en aud Yesus. Sug en edebeij enohob, kaba, en eic mohorbrida badedeij cinogo naugb ecguna dou eni. Hanoba en enara dou en, endagai: Adehsud, dan decinaga aban goubesa edeinyum naugb sug ban beic geigouhw dou dan. Dangga hang, ban bouwan, kaba, ban beic geigouhw dou danahabi. Anai sug aremos gogoufu et dan dag gini, kaba, emedeinyum naugb sug dan desijaresa Allah deiterohob, doba dan dogor deseino en namcir.

³Sug Yesus ouman dag gini, kaba, en ou mesira naugb os en toua. Hanoba en oho mer debin en, endagai: Dan douwan naugb deic geigouhw dou ban. Dauwohob, kaba, en enara dou en deit, endagai: Ban beigouhwohob. Sug Yesus enara dag gin dou en inegohob, kaba, aremos gogoufu ingga, augwan ediyebeiya dau en mos namcir.

⁴Gin ouwohob, kaba, Yesus esulou en ucan deit, endagai: Ban abdoc eiseisan dan indir, dauntoba ban bemedecic dau areg dan deic geingmos agauwesa dou ban gini dou lusud gus hom touwero. Doba ban bidens banin dou aban gembala gesa taij naugb en ouma debin dag ban abus ecabecohob. Gin ouwohob, kaba, ban beic ara ara naugb bauwaharo dou Allah, aimo dau areg Musa en og se Surad Injil Meb Mohon an gin debohob. Dauntoba lusud laugwan len toua lecinaga dag ban becabeci deseino Allah deitohob.

⁵Sug Yesus edebeij cinogo Kapernaumohob, kaba, sadodor merug huntun hom meren mougt mera en edagasa Yesus naugb enara aigebeb dou en, endagai:

⁶Adehsud, indan sogougb hom en atou se indan tu terimda. Anai en areba dag en mog augwan arjeijaga namcir. Dara en mog erij medam toua.

⁷Yesus auni en mer dou en, endagai: Dan demenbo naugb dan demeic geigouhw dou ens.

⁸Doba sadodor merug huntun hom meren mougt mera graga, kaba, en en dougwo Yesus, endagai: Adehsud, dan indoho emagas emedeinyum naugb sug dan debin ban beinesa indan tuero. Doba ban ben se ban abir dous, kaba, indan sogougb men gareba gini edina dau enohob.

⁹Anai dan toua dedag mougt mera naugb sadodor. Hang len lemedreg dan indir touwero. Doba len laimo dan indir, aninim dag dan daimo indan mougt mera en mer gini toua. Dangga sug dan denara dou indan sadodor hom naugb en eihweda sugwada, kaba, en aimo dan indir asesa dag gini. Era sug dan deija indan sadodor hom naugb en en aud dan, kaba, en aimo debin gini. Era sug dan darougb indan sogougb hom naugb en eicara ara ara, kaba, en aimo debin dag gini toua.

¹⁰Sug Yesus ouman dau sadodor meren mougt mera en enara dou en dag graga, kaba, en eimiman dau en mer dou lusud gedig len laimo en ingga namcir, endagai: Dan demouman sud hom dau yeng Israel hom en emod mena debsa dani dag gin ingmebma.

¹¹Dangga hang, yen youman dan indir deigeigouhw namcir. Anai se lona sug ouwedoc, kaba, lugmahara leinyana len len dau dig igda eisaugb, dara igda obsaresa naugb sug Allah oiharaga len ucugb. Dara len leigtou desij Abraham, dara Isag, dara Yakub naugb len letara aninim dara len se Allah men goiharaga gin toua. Doba yeng Yahudi, kaba, Allah emoiharaga yen deitero. Doba en erba yen se lobeigbogo mes naugb yen yeiyogoseser, dara yeg meijugta ecugwom sungga terimda.

¹³Sug Yesus owun len dag ginohob, kaba, en arougb sadodor meren mougt mera graga, endagai: Ban becicugb dig aban tueda. Anai areg ban bod abina debsa dan an gini, kaba, acgunogohob. Dangga sug Yesus enara dou en ingga, kaba, mougt mera men sogougb toua eigouhw namcirohob.

¹⁴Sug Yesus enara dou mougt mera graga ouwohob, kaba, en eihweda bedebeij Petrus men tu. Hang en eiya, doba Petrus memba en atou se boromei, anai en areba dag en mos esrougb medam namcir.

¹⁵Dangga sug en ou mesira bos gida ingga en mesirohob, kaba, men mos gesrougb augwan edina dau en namcir. Sug mos gesrougb edina dau en inegohob, kaba, en eisa naugb en ougwan ared dou Yesus ben et.

¹⁶Doba sug lobohob, kaba, lusud lahwan leinyana gedig merna mog mog einesa merdoc mesohob aud Yesus se Petrus men tu. Dangga men goubesa edeinyum naugb en ocirma merna mog mog lougbdedau lusud graga len laugwan merdoc mes namcir. Dara leng areber, kaba, Yesus eic geigouhw dou len laugwan toua.

¹⁷Dangga men geicara gini esogwa deisa areg sud hom gesai Allah moro nosa, en moho Yesaya, en og deb se Surad Injil Meb deb sug nosohob, endagai: Enin eng eigdoumesa areg geic maman mamug omomtom dau maman. Dara areg eic gareba dou maman, kaba, enin eng erba augwan dau maman toua.

¹⁸Sug Yesus en eiya, doba lusud leinyana gougwa len len naugb louwa debin en, kaba, en arougb men logodeh len larougb ij naugb leisan en dig duhu nagama.

¹⁹Doba sug Yesus emeinesa ing mesebma, kaba, sud hom gedig en mou ouforoho se Musa men gomnomna, kaba, en en aud Yesus naugb enara dou eni, endagai: Bani sud hom abu ouforoho naugb ban bens aremeijouhw augwan asesa dou emen namcir. Dangga hang, dan douwan daimo ban naugb nanan nac sungga sungga toua.

²⁰Doba Yesus enara bagod dougwo en mer, endagai: Mihiloro, kaba, meren igdohos mes inggebga naugb len latousa. Dara ba toua len mererum inggebga naugb len latousa. Doba Lusud Meraguna Mebin dan, kaba, indan ara ara ingmemeb naugb sug dan dareb touwero.

²¹Dara sud hom dau Yesus men logodeh gus en toua en aud Yesus naugb en acgeij dau en, endagai: Adehsud, ban bouwan, kaba, ban barges dan naugb dan dedec dan indina magahabi, dan demaimo ban deits.

²²Doba Yesus en dougwo eni, endagai: Ban, isnaro. Anai leng lomom dau Allah leinyana merugwengga naugb len lemec leng lomom misen inggas. Doba ban, kaba, ban baimo dan namcir dous.

²³Sug Yesus en dougwo lahwai graga ouwohob, kaba, Yesus dara men logodeh, len laugwan leisa ij.

²⁴Doba sug len logo duhu leihweda, kaba, Yesus en atou bamumi dau ginohob. Doba cum, kaba, loungmen medam eisa obsara se duhu. Dangga duhu mogo medam erba se ing mes.

²⁵Dangga men logodeh len lebir en, dara len leiyagarij en namcir, lendagai: Adehsud, ban bisa beigdoc emeni. Anai duhu mogo erba se ingmes naugb aiyan maman maugwan mamom dangga.

²⁶Doba Yesus en esa mer debin len, endagai: Dagiro naugb yen yahau dau gina? Yen yemod meijina debsa daneroei? Sug en enara dag graga dou len ouwohob, kaba, en eisa dau sug en atou graga naugb en esa mer debin loungmen dara duhu mogo. Dangga, kaba, loungmen aimo en mer bedina namcir. Dara duhu mogo arjaga bebtou namcir toua.

²⁷Dangga men logodeh len leimiman dau en namcir. Hanoba len leijidougwom ucucugb, lendagai: Sud hom gini garena? Hang en emenara dou loungmen dara duhu mogo lamaimo en mer gina?

²⁸Sug len ledebeij se leng Gadara meren hancob dig nagamohob, kaba, lasud lahwai lan lan dau igdohos mes gedig len lob leng lomom debsa naugb lan aud Yesus. Lani marug mog, anai merna mog mog eisa lan mardoc mes namcirohob. Dangga hang, lusud laugwan lahau naugb len lemeraga ucina irir sug lan laigtou sunggaro.

²⁹Doba sug lan ladebeij Yesusohob, kaba, merna mog mog geb se lan mardoc mes len lesa merir medam debin en, lendagai: Anara hang, Allah Meisi, ban bos aban dara naugb ban bogod aremer aga emen gina? Anai lona naugb ban beic mog erij dou emen emedagasebma. Dangga, dagiro naugb ban ben aud emen sugin iteitogina?

³⁰Doba hweij einyana lesa letara deinyor sungga.

³¹Dangga hang, merna mog mog len lacgeij dau Yesus ucucugb, lendagai: Sug ban bocirma emen dau lan gin mardoc mes, kaba, ban bousa deisa emen emir. Dauntoba emen emeinesa hweijir gedig len lesa gada len merdoc mes.

³²Sug Yesus ouman dau gin, kaba, en ousa deisa len merir an. Hanoba en enara dou len, endagai: Yen yeihweda. Sug merna mog mog louman danggohob, kaba, len lagunya dau lasud lahwai graga mardoc mes naugb len leinesa hweijir merdoc mes deit. Hang hweijir ingga len lemobga dau men maga terimda len lesogwesa duhu men lomom namcir.

³³Sug leng lesedougwo hweijir graga, len leiya dangga, kaba, len lobga ledecic aremer eisaugb hweij se meren cinogo dou lusud laugwan. Dara len lecic dau sug Yesus ocirma merna mog mog dau lan graga mardoc mes dou lusud toua.

³⁴Sug len lecic augwan dou lusud dauwohob, kaba, len laugwan len dau meren cinogo naugb len ledeiya Yesus. Sug len ledebeij enohob, kaba, len lecicugb Yesus, lendagai: Ban bededau emen hancob sugin namcir.