Read Manikion MARKUS 1 Bible Online

MARKUS 1 - Manikion bible

MARKUS 1

¹Mer Geigouhw gini eisaugb Yesus Krisdus, Allah Meisi mohora hom sug ebiji, kaba, esogwa deisa areg sud hom gesai Allah moro nosa moho Yesaya, en og deb se Surad Injil Meb Mohon deb nosohob, endagai: Allah os dou en meisi, endagai: Ban bouman deigeigouhw. Anai dan demesa indan sud hom en emeino ban abin naugb en esedeb lusud merdoc mes obosboro naugb banohob.

³En edag sud hom geija ara dou lusud se lomougwisa mer esesa terimda, endagai: Yen yesa yen meigdoc mes obosboro deb naugb Allah sug en en. Aninim dag lusud lesa ucina obosboro naugb mougt mera medam sug en einesa aud len toua.

⁴Dangga sug Yohanes agunya debin lusudohob, kaba, en eihwedig lomougwisa naugb en ogun len sungga toua, aimo dau areg Yesaya en og deb gragohob. Dara en ebedbed dou len, endagai: Yen yesga meijen sesar augwan moho asesa dou Allah. Dara yen yahau an dougwo toua, kaba, Allah emaigdougwo meijen sesar gini. Dara dan demogun yen se duhu dag ansins debin gin toues.

⁵Sug len louman dag ginohob, kaba, lusud dau leng Yudea meren hancob dara leng dau cinogo Yerusalem, len len aud en naugb len lesga meren sesar augwan asesa dou en. Dau, kaba, en ogun len dag ansins debin gin se duhu Yordan toua.

⁶Doba Yohanes gin, kaba, en eg sansun dau aremeta, moho unta, mos. Dara areg en ohud meida moc, kaba, dau aremeta mos toua. Dara men ared naugb en et, kaba, en et amo dara omohu mogud dous.

⁷Dara en ens dau aremer hom dara dou len deit, endagai: Dan, kaba, dan dogun yen se duhu, doba duhu misen dous. Doba cum, kaba, sud hom en emaimo ucan dan aud yens. En, kaba, en emesa Mena Gogoufu se yen meigdoc mes. Anai en moho agas medam bedreg dau dan namcir. Dangga hang, emedeinyum naugb dan demesga aumaga dau men hwigbeimos icira en mohora touwero.

⁸

⁹Doba lona hosa debin sug Yohanes ebiji naugb en ogun lusud se duhu ginohob, kaba, Yesus toua en dau cinogo Nasared se leng Galilea meren hancob aud en se duhu Yordan naugb en ogun en sungga toua.

¹⁰Dangga sug Yesus eisa dau duhu inegohob, kaba, en eiya, doba bogo ec dau. Hanoba en eiya Mena Gogoufu ohw dag bohobei dau bogaden aud en toua.

¹¹Dara en ouman en Mena Allah enara dau bogaden ucan debin gin dou en toua, endagai: Bani dan Indisi gedig dan indoc gororougb ban. Dara dan indoc eigouhw an ban namcir toua.

¹²Sug en Mena enara dou en inegohob, kaba, Mena Gogoufu einoisa en se lomougwisa naugb Setan ainyen en sungga se lona sud hwai debin ginahabi. Dara aremeta mog mog len louma debin en sungga toua. Doba malaikad lousa en toua terimda.

¹³

¹⁴Doba edebeij sug Herodes en arougb men sadodor naugb len louf Yohanes se tu gesisug dauwohob, kaba, Yesus eihwedig leng Galilea meren hancob. Dangga sug en edebeij lenohob, kaba, en ebiji naugb en esai Mer Geigouhw dau Allah dou len toua, endagai:

¹⁵Allah men lona ebeij deinyorohob naugb en oiharaga yen ucugb. Dangga hang, yen yod meijina debsa dan indir an Allah Mer Geigouhw gini. Dara yen yesga meijen sesar augwan asesa dou en. Dara yen yahau an dougwo toua.

¹⁶Se lona hom sug Yesus oci Galilea mebera, kaba, en eiya Simon dara en magto Andreas, lan larba diara debin hosei deb gini. Anai maran geicara dag lan lahilon hosei dous terimda.

¹⁷Dangga Yesus en dou lan, endagai: Yan yaimo dan. Anai dan douwan dens meijouhw dou yan naugb yan yahwan lusud aud dan, dauntoba len ledag indan logodeh, aninim dag yan yarba diara debin hosei gin toua.

¹⁸Sug lan lauman Yesus eija lan inegohob, kaba, lan larges maran diara deb. Hanoba lan laimo en dau namcir.

¹⁹Sug Yesus an lahwai graga, len lec merohora gurerei deitohob, kaba, len leiya Sabedeus meisi lahwai. Lan maroho, Yakobus dara en magto, Yohanes. Lan eng lagon maran diara gobogougb dougwo deb se ing mes gini.

²⁰Sug Yesus eiya lan inegohob, kaba, en eija lan namcir, endagai: Yan toua yan naugb yaimo dan. Dangga lan ladedau lan marna Sebedeus an leng leicara dou en deb se ing mesedeb. Hanoba lan laicira Yesus toua.

²¹Sug Yesus eija men logodeh ginohob, kaba, len leihwededau sungga terimda len ledebeij cinogo Kapernaum. Doba sug leng Yahudi meren Lona Gemeicaresero ebijohob, kaba, Yesus en toua einesa meren tuari naugb en edidib Allah mer men meijouhw dou len sungga.

²²Sug len louman en mer an gini, kaba, len leimiman dau en namcir. Anai en emenara dag emeses meresa, aninim dag leng meru ouforoho se Musa men gomnomnero. Doba en os badi augwan dara goubesa dag misen dou len namcir.

²³Irir sug Yesus edidib Allah mer dou len, kaba, sud hom gedig mena mog mog eisa en medoc mesohob, en toua einesa tuari mes debin len. Doba sug en eiya Yesus, kaba, en esa mer medam debin en, endagai:

²⁴Yesus dau cinogo Nasared, ban ben sugin naugb bedeberou emen eng gina? Ban ben naugb eic mor mor dou emen namcir danggei? Anai dan decinaga ban bedag sud hom gedig Allah ouci ban douwoswos naugb ginohob.

²⁵Doba Yesus esa mer debin en, endagai: Abirero. Ban beihwededau sud hom ingga namcir.

²⁶Dangga sug mena mog mog etitir sud hom ingga en maga eijesa medamohob, kaba, en eiyaga mer medam. Hanoba en agunya beihwededau en toua.

²⁷Sug leng se tuari mes len leiya dau gini, kaba, len leimiman dau en namcir. Hanoba len leijidougwom, lendagai: Aringgina? En mer gini menenauwei? Anai sug en arougb merna mog mog gini, kaba, en enara dou len dara goubesa. Hang len lemaimo en mer naugb leihwededau en namcir toua.

²⁸Dangga Yesus men geicara gini agaha dedemeda becinten se leng Galilea meren hancob augwan namcir.

²⁹Sug Yesus ocirma mena mog mog dau sud hom ingga inegohob, kaba, eni dara men logodeh len len dau tuari naugb len leihweda se Simon dara Andreas maran tu. Dara Yakobus dara Yohanes, laicira len toua.

³⁰Doba Simon memba en areba dag mos esrougb medam namcir. Dangga sug Yesus dara men logodeh len leinesa maran tu inegohob, kaba, len len dau Simon memba gin dou en dedemeda toua.

³¹Sug len len dou enohob, kaba, en einesa dimei aud enahabi. Dangga sug en os en mesira baigdoumesa enohob, kaba, mos esrougb edina dau en namcir. Hanoba en ousa len. Dara en ougwan ared naugb eic dou len toua.

³²Dangga se losog sug igda obsaresohob, kaba, leng Kapernaum, len lahwan leng areber, dara leng merna mog mog einesa len merdoc mesohob, len laugwan aud Yesus se dimei mes sug en eigtousa toua. Anai sug igda obsaresa dag ginohob, kaba, leng Yahudi meren Lona Gemeicaresero toua ouwohob.

³³Dara lusud gus se cinogo ingga, kaba, len laugwan lesesa misis moc naugb len toua leiya.

³⁴Dangga Yesus eic geigouhw dou leng areber aingma aingma. Dara en ocirma merna mog mog dau lusud toua. Hanoba en en dougwo merna mog mog, dauntoba len lemen en moho augwougb dou lusud lemouman touwero. Anai merna mog mog gini len lecinaga en dag misenohob.

³⁵Doba se loneinda, sug lona emesga namcirbuma, kaba, Yesus eisa dau sug atouda naugb en eihweda se usi hom gedig losneseba. Anai en enin ouwan edocuncum dou Allah sungga.

³⁶Doba Simon dara mesir len laugwan lehilon Yesus terimda len ledeiya en. Sug len ledebeij enohob, kaba, len leic len merir laic en, lendagai: Ban beigtou sugin augwougb, anara? Anai lusud laugwan len louwan bani.

³⁷

³⁸Doba Yesus enara bauni len merir ucugb dou len, endagai: Maman mamecicugb sunggaro. Doba yen yen naugb maman maihweda se cinogo gus geb acec gininda deit. Anai dan demen naugb dan demesai dou leng Kapernaum dousero. Doba dan den naugb dan desai dou lusud geb acec cinogo augwan gin toua.

³⁹Dangga sug Yesus ec mohora se leng Galilea meren hancob augwan dag gin, kaba, en esai Allah moro se meren tuari dou len. Dara gareg merna mog mog einesa en medoc mesohob, kaba, en ocirma len dau lusud gin toua.

⁴⁰Doba sug Yesus ec mohora naugb en esai Allah moro gini, kaba, sud hom aremos gogoufu et enohob, en en audi eni. Sug en edebeij Yesusohob, kaba, en eic mohorbrida badedeij cinogo deseino en. Hanoba en eiyagarij en, endagai: Adehsud, dan decinaga aban goubesa edeinyum naugb sug ban beic geigouhw dou dan. Dangga hang, ban bouwan, kaba, ban beic geigouhw dou danahabi. Anai sug aremos gogoufu et dan dag gini, kaba, emedeinyum naugb sug dan desijaresa Allah deiterohob, doba dan dogor deseino en namcir.

⁴¹Sug Yesus ouman dag gini, kaba, Yesus medoc eineg an en namcir. Hanoba en oho mer debin en, endagai: Dan douwan naugb deic geigouhw dou ban. Sug en enara dag gin dou enohob, kaba, en ou mesira os en toua. Dauwohob, kaba, en enara dou en deit, endagai: Ban beigouhwohob.

⁴²Sug Yesus enara dangga dou en inegohob, kaba, aremos gogoufu ingga ediyebeiya dau en. Hanoba en mos ecabeci ucugb se mohw deit.

⁴³Sug Yesus eic geigouhw dou enohob, kaba, en oungben en dougwo namcir, endagai: Ban bouf abirs dougwo gin namcir, dag ban bemecic dau gini dou sud hom touwero. Doba ban bedens banin dou gembala gesa taij nosahabi. Dauntoba en ouma debin ban dag ban abus ecabecohob. Gin ouwohob, kaba, ban beic ara ara bauwaharo dou Allah, aimo dau areg Musa en og deb se Surad Injil Meb Mohon an gin debohob. Dauntoba lusud laugwan lecinaga dag ban becabeci deseino Allah deitohob. Sug Yesus oungben en dougwohob, kaba, en arougb en, endagai: Ban beihweda dedemeda.

⁴⁴

⁴⁵Doba sud hom gini, kaba, en emaimo Yesus mer an areg en en dou en gragero. Anai sug en eihwededau Yesusohob, kaba, en ecic dau sug Yesus eic geigouhw dou en gin bagaha dou lusud laugwan sungga sungga namcir. Dangga dougwodaha, kaba, Yesus emeic maga ainyes se meren cinogo toua deitero. Doba en eigtou se lomougwisa geb acec meren cinogo dous. Doba toua, dobnaro. Anai lusud len len dau dingan dingan aud en sungga toua terimda.