Read Manikion MARKUS 10 Bible Online

MARKUS 10 - Manikion bible

MARKUS 10

¹Sug Yesus esulou men logodeh dag graga bouwohob, kaba, en eihwededau cinogo Kapernaum aud leng se Yudea meren hancob deit. Sug en edebeij lenohob, kaba, en aiga dig duhu Yordan nagama toua. Sug en edebeij sunggohob, kaba, lusud leinyana len len naugb louwa debin en dag nosa graga deit. Hanoba en edidib Allah mer men meijouhw dou len dag nosa toua.

²Sug en edidib meijouhw dag gin dou lusud, kaba, merug hosa dau leng Parisi len len aud en naugb lerba mohoisa en. Hanoba len leijidougwo en, lendagai: Sug sud hom en ouwan ogod ameiji dougwo en mesouwa, kaba, Musa men gomnomna ousa deisa en an inggei? Era naroei?

³Doba Yesus auni len merir ucugb. Hanoba en eijidougwo len deit, endagai: Sug nosa, kaba, Musa en ogod an gin dagiro dou yena?

⁴Hang len launi dou en, lendagai: Musa ogod an dou emen, endagai: Sug sud hom en ouwan ogod ameiji dougwo en mesouwa, kaba, en eic surad dag en ogod ameiji dougwo enohob teitei dou enahabi, en emarougb en naugb en emeihwedau en audi men lusudeda.

⁵Doba Yesus ens meijouhw bauni len merir an ucugb, endagai: Musa eic gomnomna gini dou yen, anai yen meigdoc emedag beim an Allah en mer ogdoc Musa gin terimdero. Doba yen meigdoc agadgeij dougwo namcir.

⁶Anai sug aimougtut, kaba, Allah en mer emogod an ingma deb dag ginero. Doba sug en esinsin lusud aimougtut, kaba, Surad Injil Meb Mohon enara endag en esinsin giji hom dara gida hom dous.

⁷Dangga sug gida en audi gijohob, kaba, giji emeigtou desij mena mem toua deitero. Doba en arges lan deb namcir. Hang lan lamedag hwai deitero, doba lan ladag mog homohob.

⁸Sug Allah eic lan deb dag ginohob, kaba, emedeinyum naugb lusud lemedug lan daum deitero. Anai lan lamedag hwaiyero, doba lan ladag hom namcirohob.

⁹

¹⁰Sug Yesus dara men logodeh leinesa tu ucugwohob, kaba, len leijidougwo en eisaugb aremer graga deit.

¹¹Hang en auni dou len, endagai: Gareg en ogod ameiji dougwo en mesouwa, hanoba en edeic gida gus deit, kaba, gini aninim dag en mesirebsa gida ginohob. Dangga toua, sug gida ogod ameiji dougwo en mesuwa, hanoba en edes giji gus deit, kaba, en mesirebsa giji gin touohob.

¹²

¹³Dara ligida merug hosa, kaba, len loho merihir aud Yesus. Dauntoba en ob mesira deisa len naugb en eic geigouhw dou len toua. Doba Yesus men logodeh len dougwo lusud ingga, lendagai: Yen yemahwan yen meijihir aud Yesusero.

¹⁴Sug Yesus ouman gini, kaba, en medoc esrougb an len namcir. Hanoba en enara dou len, endagai: Yen yemen dougwo lenlo. Doba yen yamsoho len naugb len loho logodeh ingga dou dan suginahabi. Anai sug Allah oiharaga lusud ucugb, kaba, en oiharaga leng merdoc aninim dag lugdeh gin dous. Yen youman dan indir an areg dan den dou yen gini deigeigouhw. Anai gini asesa dag misen namcir.

¹⁵

¹⁶Sug Yesus enara dou len dangga dauwohob, kaba, en os logodeh ingga hom yom se en mohora. Hanoba en ob mesira aga len merugt, kaba, en ocuncum dou Allah an len, dauntoba Allah eic geigouhw dou len toua.

¹⁷Se lona hom deit, kaba, Yesus ouwan ec mohora dig cinogo gus deit. Dangga sug en edebeij ucina mogumsohob, kaba, sud hom en obga dagasa eni. Sug en edebeij Yesusohob, kaba, en eic mohorbrida badedeij cinogo deseino en. Hanoba en eijidougwo Yesus, endagai: Adehsud, bang abdoc eigouhw an lusud laugwan namcir. Dangga hang, ban bens dou dan dag dan deicara dagiro, dauntoba Allah eic maireseb huhugb dou dana?

¹⁸Doba Yesus auni ucugb dou en, endagai: Ban beigdoumesa dan indoho dag sud hom geigouhw, anara? Anai sud hom ingma emeigouhwero, doba Allah enin dous eng ecabeci dara eigouhw namcir.

¹⁹Doba sug ban bouwan Allah eic maireseb menau geb huhugb dou ban, kaba, ban bemes lusud, dara ban absira emebsa ligida gus, dara ban bemeiyohora, dara ban bemaunun dara ban bemoho meh dougwo leng gus an meren aremer, dara sug ban bos badi aremer deseino lusud, kaba, ban bemereiyara mougwa hom touwero, doba ban bos badi augwan se geica namcir. Dara ban bemohoiya ban abina dara ban abim lan marir touwero, doba ban bowun banin abdoc mes arjaga deseino lan terimda. Ban becinaga dau Allah men gomnomna augwan gini dag misenohob.

²⁰Sug sud hom graga en ouman gini, kaba, en enara bauwun Yesus mer an, endagai: Adehsud, Allah men gomnomna augwan gin, kaba, dan daimo teitei sug dan dugdehohob.

²¹Sug Yesus ouman dau en mer gin, kaba, en ei maires dara en dareg en medoc eineg an en toua. Hanoba en enara dou en, endagai: Ban bedis aremer hom inggebgaba. Hang ban beihweda naugb ban bedohw aban aremougb augwan bauma aregoufu dau len gusahabi, ban bemedohw an leng merunggwereij laugwan toua. Anai sug ban beicara dag gin, kaba, aban siouwa einyana emeb naugb ban se bogo toues. Dauwohob, kaba, ban bemen naugb bemaimo dan terimda.

²²Sug en ouman gin, kaba, en mecdemaga eingbon namcir. Hanoba en eihwededau Yesus. Dareg en medoc momogo toua, anai en mesoho mougb an men aremougb einyana medamdaha.

²³Sug Yesus eiya, doba sud hom graga en medoc acincin an men aremougb augwandaha, kaba, en eineg bauweila men logodeh laugwan. Hanoba en eda mer dou len, endagai: Indagtorija, ogom medam naugb sug sud hom mesoho mougb en einesa Allah men goiharaga daha.

²⁴Sug Yesus men logodeh len louman gin, kaba, len leimiman dau gin namcir. Doba Yesus enara dou len deit, endagai: Dan indihirija, ogom medam naugb leng merisoho mougb len leinesa Allah men goiharaga.

²⁵Ogom medam dau sug sud hom en eic igdebes mamaga naugb en ei se bugwa meides. Doba naugb sug sud hom mesoho mougb en einesa Allah men goiharaga, kaba, ogom medam bedreg dau gin namcir.

²⁶Sug Yesus men logodeh len louman gin deit, kaba, len merdoc omom an namcir. Hanoba len leijidougwo Yesus, lendagai: Sug Allah emeigdoc leng merisoho mougb dau meren gogom naugb emoiharaga len ucugwero, kaba, en eigdoc gara dau men gogom naugb en oiharaga en ucugb gina?

²⁷Sug Yesus ouman gini, kaba, en ei mairesi dara len. Hanoba en enara dou len, endagai: Augwan gini emedeinyum dau lusudero, doba dau Allah dous. Anai men goubesa edeinyum naugb augwan namcirohob.

²⁸Sug Yesus men logodeh louman gin, kaba, Petrus en eijidougwo en an ucugb deit, endagai: Ban beiya emen gin, anai emen emarges ara ara augwan deb naugb emaimo banohob. Dangga dagiro naugb emen gina?

²⁹Doba Yesus enara bad len merdoc mes ucugb deit, endagai: Yen youman deigeigouhw. Gareg dau yen en arges dau men tu dara lo, dara en eihwededau maguner dara magtor, dara medamouwer dara medemeitor, dara mem dara mena, dara mehir laugwan, hanoba en aimo dan naugb en esai Mer Geigouhw eisaugb dan dou lusud laugwan toua, kaba, augwan gini emediyebeiya dau enero. Doba Allah emeic tu, dara maguner dara magtor, dara medamouwer dara medemeitor, dara mem ara mehir, dara lo huntun hom icira dou en sug eni moongga se cinogo ginaba. Dara en aimo ucina mog erij debin gin toua. Dara se lona sug Allah oiharaga lusud ucugb, kaba, en oiharaga en beb huhugb namcir toua. Augwan gini asesa dag misen namcir.

³⁰

³¹Dangga se lona sug Allah oiharaga lusud ucugb, kaba, leng ledag mebin iteitogin, kaba, leinyana len ledag mahara. Dara leng ledag mahara iteitogin, kaba, leinyana len ledag mebin se lona ingga toua.

³²Sug Yesus esulou men logodeh dag graga bouwohob, kaba, len leragasa ucina deit. Doba Yesus men logodeh len lahau medam namcir. Dara len gus gedig len laicira len, kaba, len laugwan merdoc eijesa toua. Anai len leiya, doba Yesus eino len merin aud Yerusalem deit. Dangga sug Yesus eija men logodeh merug sisa hobjerai ginohob, kaba, en enara dou len, endagai: Yen yin naugb maman madeigtou dou mamaninahabi. Sug len leihwededau leng gusohob, kaba, en esulou len eisaugb areg edobsara debin en se Yerusalem mougwa hom deit, endagai: Yen youman deigeigouhw, anai maman maisaugb namcir dig Yerusalem enggenda.

³³Dangga sug maman madebeij Yerusalemohob, kaba, len lemohw Lusud Meraguna Mebin dan deisa gembala gesa taij meren mougtir dara leng meru ouforoho se Musa men gomnomna len merisira naugb len logod aremer gomom deinaugb dan. Hanoba len lohw dan debsa sadodor dau lugmahara merisira deit naugb len leic dan lacecim, dara len leigdores aih dan, dara len labosbos dan. Dauwohob, kaba, len lemeic gomom dou dan sungga toua. Doba lona hwai debin gin, kaba, dan deisa dau domom ucugwohob.

³⁴

³⁵Sug Yesus arges mer an areg en esulou len graga dauwohob, kaba, Sebedeus meisi Yakobus dara Yohanes, lan ladebeij en naugb lacgeij dau en, landagai: Adehsud, aman amouwan naugb areg aman amacgeij dau ban gini, kaba, ban bousa deisa aman amir an namcir.

³⁶Doba Yesus eijidougwo lan ucugb an dous, endagai: Yan yauwan naugb dan deicara dou yana?

³⁷Dangga lan launi dou en, landagai: Sug ban beigtou se aban gogouf cucugb, kaba, ban beigdoumesa aman amaingma dig ban absira misen, dara amaingma dig ban absira metigi toua.

³⁸Doba Yesus etaha lan marir an, endagai: Yan yamecinaga areg yan yacgeij dau dan gini meijouhw dag misenbuma. Anai maijan goubesa edeinyum naugb yan yag mog an gogom aninim dag dan. Dara yan yasedeb yan maigdoc mes deb naugb sug lusud logun yan se duhu moho mog erij aninim dag cum, kaba, len logun dan se duhu moho mog erij gin touei?

³⁹Doba lan launi dou Yesus, landagai: Aman amesedeb aman amdoc mes naugb aman amaimo areg ban ben dou aman gin toua. Hang Yesus ousa lan marir an, endagai: Indeic, yan toua yaimo dan naugb yan yag mog an gogom aninim dag dan. Dara lusud logun yan se duhu moho mog erij, aninim dag len logun dan se duhu moho mog erij gin toua.

⁴⁰Doba eisaugb yaingma yaigtou dig dan insira misen dara dan insira metigi, kaba, dan demos gin dou yanero. Anai augwan gini aimo dau areg Allah enin esedeb naugb lusud dous.

⁴¹Sug Yesus men logodeh merug sisa hobjerai, len louman dau gini, kaba, len merdoc esrougb an Yakobus dara Yohanes namcir.

⁴²Dangga, kaba, Yesus eija len laugwan naugb len len aud en. Sug len len aud enohob, kaba, en esulou len, endagai: Yen yecinaga dau gareg lugmahara len leigdoumesa dag meren mougtir, kaba, len laresbes len terimda. Dara meren lusud gedig len meroho agas, kaba, len laiyan len toua terimda.

⁴³Doba yen, kaba, yen yemeicara dag ginero. Dangga gareg dau yen, en ouwan en moho agas, kaba, esloulougb naugb en owun enin medoc mes arjaga dag meijen sogougb naugb en eicara dou yen nosahabi.

⁴⁴Dara gareg dau yen en ouwan eino yen meijin, kaba, esloulougb naugb en owun enin medoc mes arjaga naugb en edag sogougb naugb yen yaugwan touahabi.

⁴⁵Aninim dag Lusud Meraguna Mebin dan toua demouwaden dau bogo naugb lusud lemeicara dou dan touwero. Doba dan douwaden dag bogo naugb dan deicara dou len. Dara dan dohw dan indugt edug naugb dancoho aga len leinyana dau sesar men gogom augwan toua.

⁴⁶Yesus dara men logodeh len ledebeij cinogo moho Yeriko. Dangga sug eni an men logodeh, dara lusud leinyana gougwa leihwededau cinogo ingga deit, kaba, len leiya, doba sud hom, moho Bartimeus gedig en maires mougb, en eigtou se ucina mebera naugb en ohwiaga lusud an aregoufu terimda. Len leija en Bartimeus, anai en Timeus en meisi.

⁴⁷Sug en ouman dag Yesus dau cinogo Nasared en eraga asa ucina gen eigtou dougwo gini, kaba, en eiyagarij en dara mer medam, endagai: Yesus, Daud medebeito, ban abdoc erij an danto ginahaba.

⁴⁸Doba lusud leinyana lesa merir debin en, lendagai: Ban barges abireda. Doba en eiyagarij dara mer medam edreg deit, endagai: Daud medebeito, ban abdoc erij an danto ginahaba.

⁴⁹Sug Yesus ouman en mer an gin, kaba, en esa deb sungga. Hanoba en arougb men logodeh, endagai: Yen yeija en aud dan suginahabi. Dangga, kaba, len ledeija en. Hanoba len lenara lad en medoc mes, lendagai: Ban beisa baiyan abdocesem, anai Yesus eija banohob.

⁵⁰Sug Bartimeus ouman dag gin, kaba, en eg men sansun gouji dedemeda dau eni. Hanoba en eisa maga eiloboro naugb edagasa Yesus namcir.

⁵¹Sug en edebeij Yesusohob, kaba, Yesus eijidougwo en, endagai: Ban bouwan dan deic ara dou bana? Dangga sud hom mairesmougb, en auni ucugb dou Yesus, endagai: Adehsud, dan douwan ban besga dan indiresi, dauntoba dan deiya lo asesa ucugb deit.

⁵²Sug Yesus ouman en mer an gini, kaba, en arougb en namcir, endagai: Ban bod abina debsa dan. Hang ban beihweda, anai ban beigouhwohob. Sug Yesus arougb en dag gini inegohob, kaba, en maires toua esga namcir naugb en eiya lo asesa ucugb deit. Hanoba en medoc eirirga Yesus naugb aimo en toua.