Read Manikion MARKUS 13 Bible Online

MARKUS 13 - Manikion bible

MARKUS 13

¹Sug Yesus ehigdecin lusud lerba aregoufu se biruwa dauwohob, kaba, eni dara men logodeh len len dau Allah men igtien. Dangga sug len lec merohora asa ucina, kaba, Yesus men godeh hom en edens dou en, endagai: Adehsud, ban beiya tu jeneg ginahabi. Anai augwan eigouhw namcir. Dara ban bauweila men igdahab touahabi. Anai augwan gini meb aingma, meb aingma, hanoba meb tintin namcirda.

²Doba Yesus edemer dou en, endagai: Ban beiya Tuari medam gini deigeigouhwohobei? Anai areg ban beiya ginohob, kaba, igdahab hom emeb se igdahab hom deitero. Doba cum, kaba, len lot augwan baisoboro namcir dangga.

³Sug Yesus dara men logodeh ledebeij mengarougb Saitun Medohob, kaba, len leigtou sungga dou lenin ainyes irir Allah Men Tuari. Dangga Petrus, dara Yakobus, dara Yohanes, dara Andreas len len naugb ledenara dou en dou lenin.

⁴Hanoba len leijidougwo en, lendagai: Adehsud, areg ban ben dou emen eisaugb Tuari gaih, kaba, aiseba emebija? Dara emen emeiya gansins dagiro, nosahaba?

⁵Dangga Yesus esulou len dougwo gin augwan deb, endagai: Yen yebehnehino yenin meigdoc mes dougwo lusud, dauntoba len lemaugwohosa yen icira aremer augwan ginlo.

⁶Anai se lona daiyamo, kaba, lusud leinyana lemagunya debin yen naugb len lemeic dan indoho lemaceca yens, lemendagai: Emen gin eng Mesias naugb emeigdoc yen dau meijen gogom augwan. Hang len laugwohosa lusud leinyana laijahasero dau ucina misen gin toua.

⁷Dara yen yemouman mougb dau sug lusud logodim deinyori. Dara yen yemouman loungmen dau sug len lesim se cinogo aigus toues. Doba yen yemeijisan ginlo. Anai augwan gini emansins dag Lona Sug Ouwedocbuma, doba Allah esedeb augwan gini ebiji ino dauwahabi.

⁸Dara cum, kaba, meijouhuder lenin lesara darem. Dara mougt mera medam dau cinogo ingma len lesara dara mougt mera medam se cinogo ingma. Dara inyomda toua eisa se cinogo sungga sungga. Dara sir gogoufu einesa cinogo einyana toua. Doba gogom augwan gin, kaba, dag ebiji dousaba, aninim dag gida hom en menuhwa ererij dau sug en emouwadan meh touebma.

⁹Doba yen yesedeh yenin meigdoc mes deb naugb sug gogom ainyen yen toua. Anai cum, kaba, len lagaigeij yen. Hanoba len lahwan yen dou meren Majelis. Dara len lahwan yen se meren tuari naugb labosbos yen. Dara len lahwan yen dou leng meroho eb taiba dara len meroho agas. Dauntoba yen yos yadi Mer Geigouhw eisaugb dan deseino len toua, anai yen yedag indan logodehohob.

¹⁰Doba augwan gini emansins dag Lona Gouwedoc emedebeijbuma, anai Allah en ouwan naugb sug lusud lesai en Mer Geigouhw eisaugb dan dou lusud se cinogo augwanahabi, Lona Gouwedoc emedebeij toua.

¹¹Dara sug len lagaigeij yen. Hanoba len loho las yen deseino mougt mougt, kaba, yen meigdoc momogo icira areg yen yen dou lenlo. Doba yen yaimo dau areg Allah ens dou yen se lona ingga dous. Anai areg yen yen dou len gini, kaba, emen dau yeninero, doba en dau Mena Gogoufu dous.

¹²Se Lona ingga, kaba, meraguner dara meragtor lenin lehin meraga anim dou mougt mougt naugb eic gomom dou len. Dara merner lehin meragan merihir. Dara merihir lehin meragan merna dara merimir naugb mougtir leic gomom dou len toua.

¹³Dara lusud laugwan merdoc ecgwan yen, anai yen yedag indan logodehohob. Doba gareg dau yen en es agadgeij terimda edebeij sug ouwedoc, kaba, Allah eigdoc en dau sesar men gogom aud maireseb menau geb huhugb dou en toua terimda.

¹⁴Doba sug yen yeiya lugmahara len leigdoumesa meren seiseij se usi gedig Allah emouwanero naugb lesijaresa, kaba, yen yemeigtou se leng Yudea meren hancob deitero. Doba yen yaugwan yougb dig menmod dau namcir. Anai sug len leigdoumesa seiseij se usi ingga, kaba, len leic Allah moho lacecim dous. Dara len leic mor mor dou men Tuari dara meijen cinogo augwan toua.

¹⁵Dangga gareg dau yen en atou se tu mondudi se Lona ingga, kaba, en emouwada se men dimei mes naugb emdeic men ara ara hom touwero. Doba en arges en maga bougb dig menmod dau namcir.

¹⁶Dara gareg dau yen sug en edeicara se men lo, kaba, en emecicugb naugb emdeic men sansun geb se men tu touwero. Doba en arges maga bougb sunggada namcir toua.

¹⁷Dara dan indoc erij an ligida gedig len meraga ogom, dara leng lohw arij dou merihir se Lona ingga toua. Anai len lemougb dagiro dau gogom gina?

¹⁸Dara yen yocuncum dou Allah esesa terimda, dauntoba gogom gini emobsara debin yen se igda goho lona gogoufu touwero.

¹⁹Anai gogom geb naugb yen se Lona ingga, kaba, edreg dau gogom augwan dau lona sug Allah esinsin cinogo dara bogo terimda iteitogini. Dara edreg dau gogom gen daiyamo augwan toua namcir.

²⁰Doba Allah medoc an men lusud yen, anai en ouci yen debinim naugb enohob. Dangga hang, gogom gini emeb naugb yen terimda Lona Sug Ouwedoc touwero. Doba maman Adehsud en ogod lona ingma an gogom dau yen, dauntoba yen yaugwan yemomomero. Anai sug en emogod lona ingma dauwero, kaba, yeni dara len gus yen yaugwan meijireseb emeb deitero. Doba yen yaugwan yomom namcir. Areg Yesus enara dou men logodeh eisaugb seiseij graga, kaba, eigouhw naugb yen yecinaga meijouhw augwan asesa namcir. Dauntoba sug yen yecic indan surad dau areg graga dou meijen lusud, kaba, yen yens meijouhw asesa augwan debin gin dou len toua.

²¹Dangga sug lusud lenara dou yen, lendagai: Yen yin, maman madeiya Mesias eng ouwada deb gin. Era len lenara dou yen, lendagai; Yen yin, maman madeiya Mesias eng ouwada deb gada, kaba, yen yemaimo len merirero.

²²Anai se lona ingga, kaba, lusud leinyana leigdoumesa lenin meroho deseino yen dag len leigdoc yen dau meijen gogom augwan namcir. Dara len leigdoumesa lenin meroho deseino yen dag len lesai Allah mer misen dou yen toua. Hanoba len leic gansins dara len laben ganusbus medam debin gin dou yen naugb len lemaugwohosa leng medigo Yesus dousero. Doba len leic meruwemougb esesa naugb len laugwohosa yen gedig Allah ouci yen debinim naugb enohob yen yaugwan toua. Dobnaro. Areg len len dou yen gin, kaba, dag len lereiyara dous.

²³Dan desulou yen dougwo aremer augwan gini sug emedebeij yenbuma. Dauntoba sug ebeij yenohob, kaba, yen yebehnehino yenin meigdoc mes dougwo namcir, dauntoba len lemaugwohosa yenlo.

²⁴Dangga toua sug gogom geb debin yen graga augwan obsara inegohob, kaba, yen yeiya, doba igda lona toua emerba mohora deitero. Doba dag lobeigbogo. Dara yen yeiya igda loba toua emeic moufesero.

²⁵Dara tebeij augwan og bobsara dau bogaden se cinogo gini. Dara areg men goubesa geb se bogo gacinda augwan einyeinya beijesa namcir toua.

²⁶Sug yen yeiya augwan gin dauwohob, kaba, yen yemeiya Lusud Meraguna Mebin dan douwaden dau bogo se umer an indan goubesa medam. Dara indan gogouf cucugb erbacec dan toua.

²⁷Hanoba dan darougb indan malaikadir len leihwedesa igda agunya, terimda igda obsaresa, dara dig dum moho, dara dum mer naugb len louci indan lusud yen yaugwan debinim dau cinogo moc ougbdesa, terimda edebeij bogo moc ougbdesa toua.

²⁸Dan deic dainyen dau sogo ara debin gin dou yen deitahabi. Dauntoba yen meiju obgesa gin namcir. Anai sug sogo ara maga eh naugb mes gougb ed mesira dara ougo an merijohob, kaba, yen yecinaga dag igda goho lohos ebeij deinyorohob.

²⁹Dangga toua, sug yen yeiya gansins augwan graga eb debin yen dauwohob, kaba, yen yecinaga dag indan Lona ebeij deinyor naugb sug dan desesa misis moc touohob.

³⁰Dara yen yaugwan yemomom dau aremer augwan gin touwero. Doba ligbum dau yen, kaba, yen meijireseb naugb yen yeiya augwan gini se yen meijiresahabi. Yen youman areg dan den dou yen gini deigeigouhw terimda. Anai augwan gini asesa dag misen namcir.

³¹Dangga cinogo dara bogo lamediyebeiyes. Doba dan indir, kaba, emediyebeiya deitero, doba eb huhugb terimda.

³²Doba indan Lona dara cumougt naugb sug dan decicugb gin, kaba, sud hom ingma emecinaga dau gin touwero. Dara malaikadir se bogo len toua lemecinagero. Dara Allah Meisi danin toua, demecinaga dau gin touwero. Doba dan Indina enin dous eng ecinaga dau Lona dara cumougt gin dag misen namcir.

³³Dangga hang, yen yematou dau Lona ginero. Doba yen yesedeh yauweila lona gin terimda. Anai yen yemecinaga Lona Sug Dan Decicugb aud yen ginero.

³⁴Sug Yesus esulou men logodeh eisaugb men lona dag graga bouwohob, kaba, en eic gainyenara hom debin gin dou len deit, endagai: Lona Sug Dan Decicugwen, kaba, aninim dag sud hom ouwan eihweda aigusi dau men tu deb. Sug en emeihwedebma, kaba, en ohw men sogougwir lesedougwo men tu deigeigouhw namcir deb naugb en. Dara en ekeber naugb len lesedougwo men ara ara augwan. Hanoba en esulou sud hom gedig en esedougwo misis, dauntoba en esedougwo misis dara geigouhw namcir toua. Gin dauwohob, kaba, en eihwedig cinogo gus dau lenda.

³⁵Dangga hang, yen toua yesedeh yauweila dougwo dan namcir. Dauntoba sug dan dagunya augwougb debin yen, kaba, yen yematou dau danlo. Doba yen meijires agai naugb dan terimda. Anai yen yemecinaga dau sug dang dedag mougt naugb tu gini dan decicugb aud yen se loba, era se lobeingmod, era sug berougwu eba mer, era se lonamen touwero.

³⁶

³⁷Areg dan desulou yen an gini, kaba, dan demen dou yen dousero. Doba dan den dou lusud laugwan naugb len lematou touwero. Doba len leisa dau latouda naugb len lesedeh lauweila dougwo dan toua terimda.