Read Manikion MARKUS 14 Bible Online

MARKUS 14 - Manikion bible

MARKUS 14

¹Se lona sug Yesus esulou men logodeh dag graga bouwohob, kaba, gembala gesa taij meren mougtir, dara leng meru ouforoho se Musa men gomnomna len lococim deb naugb lagaigeij Yesus, dara leic gomom dou en toua. Anai lona hwai deit, kaba, leng Yahudi merdoc eiseisan lona sug Allah esga len merjemouwer dau cinogo Mesir sug nosohob. Dara len logug domba dara let roti gemerisero debin gin toua. Dangga hang, leng mougtir gini len ledu meruwedau len gus naugb len lagaigeij Yesus se lona ingga. Dauntoba len gus lemecinaga naugb aremer emeijideijouhw touwero.

²Anai len lahau dau sug len lagaigeij Yesus se Lona Gohw Bedreg gini abeba len laugwan meriresi, kaba, cum, en merir ledim dougwo dangga.

³Sug Yesus esulou men logodeh se mengarougb Saitun Meda bouwohob, kaba, en ecicugb an len dig Betania geb deinyor Yerusalem deit naugb len ledatou desij sud hom, moho Simon, se men tu. Simon gini, kaba, lusud leija en moho dag sud hom garemos gogoufu et. Doba sug len leigtou naugb let ared, kaba, gida hom en einesa dimei aud Yesus toua. En odo debecij dau igdahab gogoufu hom an aremoung mohu men ouwedebeda gedig mera eisaugb namcir. Anai len lemeic aremoung mohu gus lemed se touwero, doba leic enin mohu mogud dous. Mohu gin, kaba, len lesinsin dau sogo mom gedig men ouwedebeda gini. Dangga sug en edesa desij Yesusohob, kaba, en eised debecij ingga mergomei dau. Hanoba en eir aremoung mohu men ouwedebeda ingga debin Yesus mougt toua.

⁴Doba sug merug hosa dau leng leigtou desij Yesus ingga len leiya dau gin, kaba, len merdoc ehin an gida hom gin namcir. Hanoba len lenara doum, lendagai: En amcirac aremoung mohu men ouwedebeda gini se sud hom gin mougt anara?

⁵Anai aremoung mohu gin, kaba, edeinyum naugb maman mauma aregoufu edreg dau perag mogo huntun homoi naugb maman mahu dou leng merunggwereij dousa. Dangga len lenara ucucugb an gida gin namcir.

⁶Doba Yesus etaha len merir an gini, endagai: Gida men geicara dou dan gin, kaba, eigouhw meiyah. Anai sug en ehin aremoung mohu se dan indugt, kaba, gini dag en esedeb dan indaga deb naugb sug lusud lec dan ingga. Dangga dagiro, naugwe hang, yen yenara ucucugb dou en dag gin, anara? Naro, yen yamsoho en namcir. Anai leng merunggwereij, kaba, len leigtou desij yen terimda naugb yen yousa len astesda sug yen youwan. Doba dan, kaba, dan demeigtou desij yen terimda deitero.

⁷

⁸

⁹Dangga astesda sug lusud lesai Mer Geigouhw eisaugb dan dou lusud sungga sungga, kaba, len lecic dau gida gin men geicara dou dan dou len. Dauntoba len lecinaga dau gin toua terimda. Yen youman dau areg dan den dou yen gin deigeigouhw. Anai augwan gini asesa dag misen namcir.

¹⁰Sug Yesus enara bauni men logodeh merir an gida ginohob, kaba, sud hom dau men logodeh sisa hobjerai, en moho Yudas dau cinogo Keriod, en edu mouwedou enin naugb en edehin magan Yesus dou gembala gesa taij meren mougtir. Dangga sug en edebeij lenohob, kaba, en enara dou len, endagai: Yen youwan naugb dan dohw Yesus dou yenei?

¹¹Sug len louman dau gin, kaba, len merdoc eigouhw an en namcir. Hanoba len len aregoufu men dou en. Sug Yudas ouman gin, kaba, en ehilon ucina naugb en edens Yesus dou len toua.

¹²Se leng Yahudi meren Ari Gouji sug len let roti gemerisero se lona gaimougtut ingga, kaba, Yesus men logodeh leijidougwo en, lendagai: Adehsud, ban bouwan emen emedougwan ared naugb Lona Gohw Bedreg gin deb sugiro? Len leijidougwo en an dangga, anai se lona gaimougtut ingga, kaba, aninim dag lona gouwedoc debin Lona Gohw Bedreg gin. Hang len logug domba se lona ingga debin toua.

¹³Dangga Yesus arougb men logodeh lahwai, endagai: Yan yaihwedesa cinogo Yerusalem gacda. Sug yan yadebeij cinogo inggohob, kaba, yan yagasa sud hom odo debecij hom an duhu. Yan yaucan en terimda en edebeij tu sug en einesa, kaba, yan yainesa ucan en toua.

¹⁴Sug yan yainesa tuohob, kaba, yan yanara dou sud hom men tu ingga, yandagai: Adehsud, eijidougwo ban, endagai: Dimei naugb dani dara indan logodeh emen emetara debin Lona Gohw Bedreg gini deb, sugiro?

¹⁵Sug en ouman gin, kaba, en emens dimei hom gouji se taiba gen esedeb augwan mougb mogud debsohob dou yans. Sug en ens dou yanohob, kaba, yan yasedeb maman ara ara naugb maman maugwan matara debin Lona Gohw Bedreg gin toua.

¹⁶Sug Yesus esulou lanohob, kaba, lan laihweda se cinogo Yerusalem. Sug lan ladebeijohob, kaba, lan lasa ared naugb Lona Gohw Bedreg gin augwan deb toua. Anai lan ladesma, doba augwan asesa dag areg Yesus arougb lan an gragohob.

¹⁷Dangga sug igda obsaresohob, kaba, Yesus dara men logodeh merug sisa hobjerai len toua len len naugb ledetara deb se dimei ingga.

¹⁸Doba sug len leigtou naugb letara inegohob, kaba, Yesus enara baga len merdoc mes, endagai: Yen youman dan indir deigeigouhw. Anai sud hom dau yeng yetara dara dan gini, kaba, en ohw dan se leng Yahudi meren mougtir merisirohob.

¹⁹Sug len louman en mer an gin, kaba, len merdoc eijesa medam namcir. Hanoba astesda sud hom yom dau len, kaba, en auni ucugb dou Yesus, endagai: Ban boudesa danei? Anai danis demohw banbuma.

²⁰Doba Yesus auni dou men logodeh sisa hobjerai gini, endagai: Gareg dau yen aman amatara se igdebir hom, kaba, eninggang emeicara dangga dou dans.

²¹Areg len log deb se Surad Injil Meb Mohon eisaugb Lusud Meraguna Mebin dan deb nosohob, kaba, dan daimo augwan gini aud gomom dag misen toua. Doba sud hom gohw dan gin, kaba, eigouhw naugb en mem emeh en deb touwero. Doba en ouwadan enohob. Hang iteitogin, kaba, gogom medam eb naugb en toua namcirohob.

²²Sug len letaraba, kaba, Yesus os roti mogo hom icira en mesirahabi, en emen sijo dou Allah naugb gin toua. Sug en en sijo dou Allah dauwohob, kaba, en ekris naugb en emohw dou men logodeh laugwan toua. Hanoba en ens meijouhw debin gin dou len, endagai: Yen yet gin, anai roti gini dag danin indaga.

²³Sug len let roti dauwohob, kaba, en os mog an anggur mohu deit. Hanoba en en sijo dou Allah debin gin. Sug en en sijo dou Allah dauwohob, kaba, en ohw mog an mohu dou astesda len laugwan leg toua.

²⁴Hanoba en ens meijouhw debin gin ucan dou len, endagai: Anggur mohu gini dag dan indugwihi gororo naugb yen yeinyana. Dauntoba yen yecinaga dag Allah men gos dou menau gin, kaba, emediyebeiya dau yenero, doba ebsugeb naugb yen terimda.

²⁵Doba yen youman deigeigouhw. Anai dau iteitogini terimda edebeij lona sug Allah oiharaga lusud ucugb deit, kaba, dan demeg anggur mohu dag gin dara yen deitero. Doba se lona sug Allah oiharaga yen ucugwohob, kaba, maman maugwan mameg anggur mohu menau aninim deits. Augwan gini asesa dag misen namcir.

²⁶Sug len letara ouwohob, kaba, len lei ugwaremer naugb lagahugouhw an Allah debin gin toua. Hanoba len leihwedig mengarougb moho Saitun Meda deitda.

²⁷Doba sug len leisaugb aud mengarougb gini, kaba, Yesus esulou men logodeh deb, endagai: Cum bahau, kaba, yen yaugwan yemougb yemaisoboro dau dans. Anai Allah en og deb se Surad Injil Meb Mohon eisaugb gin debohob, endagai: Dan demogod meren gembala emomom dau men domba laugwan lemougb lemaisoboro toues.

²⁸Doba sug Allah eigdoumesa dan dau gomom ucugwohob, kaba, dan demeino yen meijin dig leng Galilea meren hancobes.

²⁹Doba Petrus enara behirirmo dou Yesus, endagai: Leng gus, kaba, len laugwan lahau naugb len lougb dau banda. Doba danin, kaba, dan demougb dau banero.

³⁰Doba Yesus enara bauni en mer ucugb, endagai: Ban bouman deigeigouhw. Se loba gini sug berougwu emeba mer mougwa hwaibuma, kaba, ban baideido dan mougwa homoi icirohob. Augwan gini asesa dag misen namcir.

³¹Doba Petrus ehirirmo dou Yesus namcir, endagai: Sug len gus leic gomom dou dan aninim dara ban, kaba, dan demaideido dougwo banero. Doba dan dohw dan indugt edug naugb domom dara ban toua. Sug Petrus enara dag gin, kaba, Yesus men logodeh gus len laugwan louwas Petrus mer an gini len dangga dou en toua.

³²Sug Yesus dara men logodeh len leisaugb mengarougb Saitun Meda gini, kaba, len ledebeij usmougb hom, moho Gedsemani. Sug len ledebeij se usi ginohob, kaba, Yesus ecug men logodeh gus deb sungga. Hanoba en enara dou len, endagai: Yen yeigtou sugini naugb dan, dauntoba dan didocuncumahabi.

³³Doba sug en ecug len gus debohob, kaba, en enara dou Petrus, dara Yakobus, dara Yohanes naugb len loucan enda. Sug len lededau men logodeh gusohob, kaba, en medoc ebiji naugb eijesa dara ahau medagam namcir.

³⁴Hanoba en enara dou men logodeh merug homoi graga, endagai: Dan indoc momogo medam, kaba, eic dag dani deinyor domom icira gin namcir. Dangga hang, yen yeigtou desij dan naugb yen yesedougwo dan sugin toua.

³⁵Sug Yesus enara dou len dag gragohob, kaba, en asid enin gurereito dau len deit. Hanoba en ecguna bahuhumlo naugb en ocuncum dou en Mena. Dauntoba sug ucina gus moongga naugb sug en arges dau ucina mog erij gin, kaba, en emens dou en toues.

³⁶Hang en emenara dou en, endagai: Akeinya, ban abubisamougb dau augwan. Dangga sug ban bouwan, kaba, ban bedug mog an gogom gini dau dan naugb dan demeg touwero. Doba areg danin douwan, kaba, ga, naro. Doba areg banin bouwan beic dou dani, kaba, dan douwan daimo gin dous.

³⁷Sug Yesus en ocuncum dag graga ouwohob, kaba, en ecicugb naugb edeiya men logodeh merug homoi graga. Doba len latou lamumi dau en namcirohob, Dangga sug en ebir Petrusohob, kaba, en esa mer debin en, endagai: Simon, dagiro, naugwe hang, ban batou bamumi dau dan dag gina? Ban bemesedougwo dan mougwa cumahaberoei?

³⁸Sug en esa mer debin Petrus dag ginohob, kaba, en esulou merug homoi gini ucan deit, endagai: Esloulougb naugb yen yesedeh yauweila dougwo areg ainyen yen. Dara yen yocuncum esesa debin gin terimda toua. Dauntoba yen yemobsara aud areg gainyen yen ginero. Anai se yen meigdoc mes, kaba, yen youwan yaimo areg geigouhw namcirohob. Doba se yen meijaga, kaba, cum, en ouwan aimo areg gainyen yen gin dedemeda terimda.

³⁹Sug Yesus esulou men logodeh dag gragohob, kaba, en eihweda deit naugb en edocuncum dou en Mena, aninim dag en ocuncum mougwa hom nosa graga dou enohob.

⁴⁰Sug en ocuncum ouwohob, kaba, en ecicugb aud men logodeh. Doba len latou lamumi deitohob. Anai cicireba len medam namcirdaha. Hang len lemauni ara ara ucugb dou en touwero.

⁴¹Sug Yesus edecicugb aud men logodeh dag gin gedig homoiyohob, kaba, en esa mer debin len deit, endagai: Yen yatou debin yen meijug edeinyumohobei? Anai yen yeiya, doba indan cumougt naugb sug leng lohw Lusud Meraguna Mebin dan se leng merug mog merisira, kaba, enohob.

⁴²Dangga yen yisa, mada. Anai yen yeiya sud hom gohw dan en agunya an len deinyorohob.

⁴³Sug Yesus enara dou men logodeh dag gragaba, kaba, sud hom dau Yesus men logodeh merug sisa hobjerai, en moho Yudas, kaba, en agunyen. Dara mougt mera gouji dau gembala gesa taij, dara leng meru ouforoho se Musa men gomnomna, dara mougtir dau leng Yahudi meren logodeh leinyana laimo en. Anai meren mougtir gin, kaba, len larougb len naugb len laimo dara Yudas. Dangga hang, len gin laugwan, kaba, len lodo meren krawan dara meren ijouhugwa toua.

⁴⁴Dara sud hom gohw Yesus gini en ococi len deb touohob, endagai: Sug yen yemeiya sud hom gedig dan dou indufesa eni, kaba, aisa yen meisira naugb yagaigeij en namcir. Anai sud hom areg maman maihwedaud gin engga. Sug yen yagaigeij enohob, kaba, yen yesedougwo en deigeigouhw aud mougtir toua.

⁴⁵Dangga sug Yudas edebeij deinyor Yesus inegohob, kaba, en eic mos aud en namcir. Hanoba en eigdoumesa en moho, endagai: Adehsud, ban ingginei? Sug en eigdoumesa en moho danggohob, kaba, en ou moufesa Yesus bansins dou len toua.

⁴⁶Sug len leiya Yudas ou moufesa Yesus dag gin inegohob, kaba, aisa len merisira naugb lagaigeij en namcir.

⁴⁷Doba Yesus men godeh hom, kaba, en eigdesa men krawan dau meh. Hanoba en ogod Gembala Gesa Taij Meren Mougt Mera Medam men sogougb hom en moms edug dau en namcir toua.

⁴⁸Dauwohob, kaba, Yesus enara debin leng lagaigeij en gini, endagai: Yen youdesa dan gin indug mog, hang yen yemodo krawan dara sugb naugb yemagaigeij dan ginei?

⁴⁹Anai astesda lona dan indugwengga desij yen se Allah Men Tuari naugb dan dedidib en mer dou yen. Doba yen yemagaigeij danero, anara? Doba inggaida. Anai meijen geicara dou dan gini, kaba, esogwa deisa areg len log deb eisaugb dan se Surad Injil Meb Mohon deb nosohob.

⁵⁰Sug Yesus men logodeh len leiya, doba len lagaigeij Yesus dag ginohob, kaba, len laugwan lougb laisoboro dau en namcir.

⁵¹Doba sug len lahwan Yesus aud mougtir, kaba, godeh mes hom dous eng oucan len. Hang len louwan lagaigeij en toua. Doba en arges men sansun deb se len merisira deb. Hanoba en ougwan mougb mogud dau len namcir. Anai men sansun gogoufu homto gin dous eng eg dougwo en maga.

⁵²

⁵³Doba Yesus, kaba, len lahwan en aud Gembala Gesa Taij Meren Mougt Mera Medam se men tu. Anai gembala gesa taij meren mougtir, dara leng Yahudi meren mougtir, dara leng meru ouforoho se Musa men gomnomna, kaba, len laugwan loucimdeb sungga naugb enohob.

⁵⁴Dara Petrus en toua edoumouma len dig len meridigo an Yesus. Hanoba en edeinesa ucan len se mougt mera medam men igtia mougb gin toua. Sug en einesohob, kaba, en ehi naugb smougb desij leng lesedougwo mougt mera medam men tu ingga.

⁵⁵Doba gembala gesa taij meren mougtir dara Majelis gus len laugwan leija kiki len gus dougwo Yesus men geicara gecgu ucucugb terimda. Dauntoba sug men geicara gecgu ingmangga, kaba, len leic gomom dou en icira gin namcir. Doba len lemesma Yesus men geicara gecgu hom naugb sug len laic gomom dou en touwero.

⁵⁶Anai len laugwan lemouma debin merir mohw homero. Doba len lauwogod meru naugb lereiyaresa en dous. Hang len lenara merir edregim dous.

⁵⁷Gin dauwohob, kaba, merug hosa len leisa naugb leineg Yesus mer ucan dou leng Majelis deit, lendagai:

⁵⁸Sud hom gin, kaba, emen emouman dag en ot Allah Men Tuari gedig lusud lohud gini baisoboro namcir. Doba se lona hwai debin, kaba, en emohud tuari menau hom se mohw ucugb deit. Dara emen emouman dag tuari menau gini, kaba, lusud misen lemohud touwero.

⁵⁹Doba len toua lenara merir edregim eisaugb gin namcir.

⁶⁰Dangga Gembala Gesa Taij Meren Mougt Mera Medam en eisa besa deseino len laugwan. Hanoba en esa mer debin Yesus, endagai: Ban bauni ucugb dagiro dou len, anai len lahacugb gogom debin banohob gina? Era ban bosumei?

⁶¹Doba Yesus en emauni ara ara mougwa hom dou enero. Doba en eigtou dag osum se len merufu dous. Dangga mougt mera medam gini, en eijidougwo Yesus deit, endagai: Bani Allah gedig maman masijaresa en namcir, kaba, en Meisi banei? Dara ban ben dau eni naugb ban beigdoc emen dau emen gogom augwan gin touei?

⁶²Dangga Yesus ousa deisa en mer an gin, endagai: You, dan indugwenggini. Hang yen yaugwan yemeiya Lusud Meraguna Mebin dan demeigtou dig Allah Gedig En Mobisamougb en mesira misen naugb dan dedag mougt mera medam desij en toua. Dara yen yemeiya dan demecicugb se umer dau bogo aud yen toues.

⁶³Sug Gembala Gesa Taij Meren Mougt Mera Medam en ouman gini, kaba, en agasa men sansun dau en. Anai en medoc esrougb medam an Yesus namcirohob. Hanoba en enara dou Majelisir, endagai: Emedeinyum naugb sug maman mahilon aremer dau len gus deitero.

⁶⁴Anai yenin youman dau sug en eic Allah moho bacecim ginohob. Dangga yen yogod an dagiro naugb ena? Doba len laugwan merir logod an dou en, lendagai: Maman maic gomom dou en namcir, anai en eicara gecguohob.

⁶⁵Sug len merir logod an danggohob, kaba, merug aibibra dau leng ingga, kaba, len lebiji naugb locuc aih eni. Dara len leic minc meti lahud dougwo en maires toua. Dangga sug len logod enohob, kaba, len lobohuba leijidougwo en an, lendagai: Gareg en ogod ban gina? Dara leng lesedougwo mougt mera medam men tu, kaba, len lagaigeij en. Hanoba len logod en toua.

⁶⁶Doba sug Petrus en moongga se igtia mougwaba, kaba, mougt mera medam men sogougb gida hom, en eraga en.

⁶⁷Dangga sug en eiya Petrus ehi naugb smougb deb gini, kaba, en en naugb auweila en mebes toutou. Hanoba en ehin meresa eni, endagai: Dan decinaga Yesus dau cinogo Nasared men logodeh ban inggini.

⁶⁸Doba Petrus aideido dougwo en, endagai: Dan demecinaga dara dan indu emousa areg ban ben ginero. Hanoba en aisacij aud misis geb dougwo igtia ingga. [Doba sug en aideido dougwo Yesus dag gin inegohob, kaba, berougwu eba mer toua.]

⁶⁹Doba gida graga, kaba, en maires ebdebin en namcir. Hanoba en enara dou leng lesa sungga, endagai: Yen yeiya sud hom gabedahabi, anai en toua dau Yesus men logodeh.

⁷⁰Doba Petrus aideido dougwo dou en toua. Dangga sug emeb terberba debin inggebuma, kaba, len gus toua louwas gida ingga mer an deit, lendagai: Indeic, ban toua dau sud hom gin men logodeh. Anai ban toua dau leng Galilea.

⁷¹Doba Petrus ouwara dou len namcir, endagai: Sud hom areg yen yen dou dan gin, kaba, dan demecinaga enero. Augwan gini asesa dag misen namcir. Ga, naro, kaba, dan dacgeij Allah eic gogom medam dou dan debin gin toua.

⁷²Sug Petrus ouwara dou len dag gin inegohob, kaba, berougwu eba mer mougwa hom dara debin gin deitohob. Hang en medoc eiseisan Yesus mer gen dou enohob, endagai: Sug berougwu emeba mer mougwa hwaibuma, kaba, ban baideido dougwo dan mougwa homoiyohob. Dangga, kaba, en eb dara en medoc momogo namcir.