Read Manikion MARKUS 4 Bible Online

MARKUS 4 - Manikion bible

MARKUS 4

¹Se lona hom deit, kaba, Yesus ens dau Allah mer meijouhw dou lusud se Galilea mebera deit. Dangga sug lusud leinyana gougwa len len naugb louwa debin en namcirohob, kaba, en aingmo ing mes mogud hom se duhu modeda. Doba lusud laugwan, kaba, len lesa dig lonogeda.

²Sug en eigtou se ing mesohob, kaba, en ens meijouhw dau Allah mer se gainyenara einyana dou len. Hanoba en enara dou len dag gini:

³Yen youman dau sud hom sug en eihwedaud men lo, kaba, en eic meij bargehilo dous.

⁴Doba sug en eic meij bargehilo gin, kaba, meij igbum obsara se ucina mebera deb. Hanoba ba len lohwin naugb let meij gin bouwa namcir.

⁵Doba meij igbum, kaba, obsara se cinogo geb se igdahab moc taiba dous. Dangga hang, meij gini eij dedemeda namcir, anai cinogo gurereito dous.

⁶Doba sug igdes ohu desrougb, kaba, ogod mec ingga bagac dedemeda ucugb, anai igdahab eb dougwodaha. Hang men mom emeinesa cinogo touwero.

⁷Dara meij igbum deit, kaba, obsara se ara mog mog meda. Dangga sug ara mog mog eijohob, kaba, eic baiyan dougwo mec gin bedehibera namcir. Hang en emera mera hom touwero.

⁸Doba meij igbum, kaba, obsara se cinogo mog geigouhw. Dangga sug meij gini eiji dara orbesbes namcirohob, kaba, en era mera einyana toua. Maga hom men mera edebeij mos homoi. Maga hom deit, kaba, men mera edebeij mos senggem. Dara maga hom deit, kaba, men mera edebeij huntun hom toua.

⁹Sug Yesus eic gainyenara gin dou len bouwohob, kaba, en esulou len debin gin dou len deit, endagai: Gareg dau yen, en moms ai, kaba, en ouman areg dan den dou en gini deigeigouhw namcir.

¹⁰Sug Yesus esulou lusud dag gragohob, kaba, len laugwan leihwededau en namcir. Dangga sug Yesus eigtou naugb eninohob, kaba, ligbum dau leng louman men gainyenara graga, dara men logodeh merug sisa hobjerai toua. Len len naugb leijidougwo en, dauntoba en ens gainyenara graga men meijouhw dou lenahabi.

¹¹Doba Yesus enara bauni dou len, endagai: Yen, kaba, Allah eigdoumesa yen meijoho naugb en ens dau sug en oiharaga lusud ucugb men meijouhw augwan asesa dou yen. Anai en emens dau augwan gini dou lusud sug nosa touebma. Doba len gus, kaba, en ecgoneh meijouhw gini augwan dau len terimda, anai len lemeinesa men uro mesbuma. Doba len leigtou dig medigaba. Hang dan demens augwan gin se gainyenara dou len dous.

¹²Dauntoba sug len leiya dau indan geicara dag ganusbus, doba len lemeiya augwan asesa. Dara len louman dau sug dan desai Allah moro dou len, doba len lemecinaga meijouhw augwan asesa touwero. Anai sug len leiya dara louman augwan asesa, kaba, len leineg aud Allah naugb en aigdougwo meren sesar toua. Dobnaro. Allah en emouwan dangga deitero, anai len ledreg en mer namcirohob.

¹³Sug Yesus ens meijouhw dag graga dou len bouwohob, kaba, en enara bauni len merir ucugb dou len. Anai len lacgeij naugb en ens dau sud hom geic meij bargehilo graga men meijouhw asesa dou lenahabi. Hanoba en enara dou len, endagai: Yen yemecinaga gainyenara gini men meijouhwero, kaba, dagiro naugb yen yecinaga dau gainyenara gus men meijouhw gin toua? Naro, emedeinyum naugb yenero.

¹⁴Sug Yesus enara bauwun len merir dag ginohob, kaba, en ens dau gainyenara graga men meijouhw dou len ucan toua, endagai: Sud hom gos meij bargehilo graga, kaba, eni dag sud hom gagaha Allah mer dau sug en oiharaga lusud ucugb dou len.

¹⁵Doba ligbum, kaba, len ledag meij gobsara se ucina. Anai sug len louman Allah mer ginohob, kaba, Setan en en dedemeda naugb en esma mer gini dau len merdoc mes namcir.

¹⁶Dara ligbum deit, kaba, merdoc mes aninim dag cinogo geb se igdahab moc taiba dous. Anai sug len louman Allah mer inggohob, kaba, len lebin dedemeda dara lagahugouhw an namcir.

¹⁷Doba mer gini emaga len merdoc mesero. Dangga hang, sug lusud leic gogom dara mog erij dou len icira Allah mer gin, kaba, len lemes emagadgeij terimdero. Doba len lobsara naugb len merdoc emebdebin an en mer gin deitero.

¹⁸Dara lingma, kaba, len ledag meij gobsara se ara mog mog. Anai sug len louman dau Allah en mer graga, kaba, len lebin mer gini se len merdoc mes namcir toua. Doba cum, kaba, ara mog mog gini aiyan Allah mer augwan dau len merdoc mes deit.

¹⁹Anai len lemarges dau sug len merdoc an areg geb se cinogo ginero. Doba sug len merdoc eijesa icira areg len let, dara areg len lohw dag gin terimda, kaba, eic dag len merdoc etrij naugb sug len merisoho mougb dara areg gus gus augwan toua terimda. Hang Allah mer emera mera se len merdoc mes touwero. Doba len ledag maga mogud dous.

²⁰Doba ligbum, kaba, len ledag meij gobsara se cinogo mog. Anai sug len louman dau Allah mer dag en ouwan oiharaga lusud ucugb, kaba, len lecinaga meijouhw asesohob. Hanoba len lebin en mer gini se len merdoc mes toua. Dangga ligbum, kaba, len lera mera edebeij mos homoi. Dara lingma, kaba, len lera mera edebeij mos senggem. Dara ligbum, deit, kaba, len lera mera edebeij huntun hom gin toua.

²¹Sug Yesus ens meijouhw dau gainyenara graga dou len bouwohob, kaba, en eic gainyenara hwai dara dou len deit, endagai: Sug sud hom ei men smougwohob, hanoba en obo se men tu, kaba, en ob dabei mes baihiron dougwo mouf ginei? Era en obdeb se boromei meniha dousei? Naro, en obo ainyes, dauntoba lusud laugwan len leiya.

²²Dangga areg lusud lecgoneh iteitogini, kaba, cum, Allah ens ainyes dou lusud laugwan lecinaga. Dara areg lusud ledu meru an daum, kaba, Allah eic beb ainyes se mouf namcir toua.

²³Dangga gareg dau yen, en moms ai, kaba, en ouman areg dan den dou yen gin deigeigouhw namcir.

²⁴Sug Yesus esulou men logodeh dag gragohob, kaba, en esulou len ucan gin deit, endagai: Yen yauwam an Allah mer areg dan desai dou yen gini deigeigouhw namcir. Anai areg eic ucugb dau yen gini, kaba, aimo dau sug yen yauwam an en mer gini deigeigouhwohobei? Era naroei?

²⁵Dangga sug yen yeic en mer gini dara yen meisira ogom, kaba, Allah eic ara ara dara en mesira ogom baos dara dou yen toua. Doba sug yen yeic en mer gini dara yen meigdoc eigouhw dous, kaba, Allah edug areg yen yeicohob gini ucugb dau yen toua.

²⁶Sug Yesus eic gainyenara dag graga dou men logodehohob, kaba, en eic gainyenara hom dou len deit, endagai: Sug Allah oiharaga lusud ucugb, kaba, aninim dag sud hom sug en eic meij bargehilo gini.

²⁷Dangga sug en eic meij bargehilohob, kaba, en ohw medigo dou namcir. Hanoba en edeicara gus gus dauda. Doba mec gini, kaba, eiji dou enin terimda agas namcir. Dara en emecinaga meijouhw dau mec gini sug en eiji bagas gin touwero.

²⁸Anai cinogo enin eng ouwaha meij gini, hang emeiji naugb era mera toua. Dangga sug aimougtut, kaba, mec eiji bedag maga nosahabi, kaba, merij. Merij, kaba, an mera toua.

²⁹Dangga edebeij lona sug mera gin ohoserohob, kaba, sud hom graga en arougb men lusud naugb sug len ledogod augwan namcir toua.

³⁰Sug Yesus eic gainyenara dag graga dou men logodehohob, kaba, en enara dou len ucan deit, endagai: Dan douwan dens dau lona sug Allah oiharaga lusud ucugb men meijouhw mougwa hom ucan dou yen deit. Doba maman maic gansins dagiro debin gin dou yen deita? Dara maman mainyen ara dou yen toua?

³¹Sug Yesus eijidougwo len dag ginohob, kaba, en eic gainyenara dau sawi mogo ucan dou len deit, endagai: Lona sug Allah oiharaga lusud ucugb, kaba, aninim dag sud hom geic sawi mogo hom naugb en eba se cinogo. Dara sawi mogo gini, kaba, mogo mogurereito bedreg dau aremerij gus gus geb se cinogo gin augwan namcir.

³²Doba sug eijohob, kaba, mon medam edreg dau aremec gus gus augwan toua. Dara en eba mesira einyana. Dangga hang, ba aingma aingma, len lohw naugb lohud mererum se mesira gini. Hanoba mon erba debin len namcir toua.

³³Dara en emeic gainyenara dau homoi graga dou lusud dousero. Doba en eic gainyenara dau sug Allah oiharaga lusud ucugb einyana toua dou len deit, aimo dau areg len meru ouforoho edeinyum naugb ginohob.

³⁴Dara en emens meijouhw dau gainyenara augwan gini dou lusud gus gin touwero. Doba sug eni dara men logodeh, len ledeigtou dou leninohob, en ens meijouhw augwan asesa dou len toua. Len gus, kaba, en eic gainyenara mogud dou len dous.

³⁵Se lona ingga bedebeij losogohob, kaba, Yesus arougb men logodeh, endagai: Yen yin aud dan se ingmes gini, dauntoba maman maisa ij gin dig nagama gacdahabi.

³⁶Dangga sug men logodeh len len dau lusud leinyana deb se mebera inegohob, kaba, len ledeisa ij gen eisa graga an enda. Dara men logodeh gus, len leisa ij ingma ucan en toua.

³⁷Doba sug len leisa ij terberba debin enbuma, kaba, loungmen eisa dara duhu oc medam namcir. Hanoba duhu mogo erba se ing mes terimda, cum, atij toua.

³⁸Dangga men logodeh ledebir Yesus. Anai en atou bareb misidgwa se ing mohob. Hanoba len lenara dou en, lendagai: Adehsud, dagiro naugb ban bamsoho emen dag gina? Anai duhu en baiyan maman maugwan dangga.

³⁹Dangga sug Yesus eisohob, kaba, en etaha loungmen ingga, endagai: Ban bedina namcir. Dara en en dougwo duhu mogo toua, endagai: Ban bobsara bebtou namcirda. Sug Yesus enara dag graga ineg dag ginohob, kaba, loungmen mohora edina. Dara duhu mogo toua obsara namcir.

⁴⁰Gin dauwohob, kaba, Yesus esa mer debin len, endagai: Yen yahau, anara? Yen yemod meijina debsa dan iteitogin touebmei?

⁴¹Doba men logodeh ingga, len merdoc omom dau gin namcir. Hanoba len lenara doum, lendagai: Sud hom gini garena? Hang en emenara dou loungmen dara duhu lamaimo en mer, gina?