Read Manikion MARKUS 5 Bible Online

MARKUS 5 - Manikion bible

MARKUS 5

¹Sug loungmen dara duhu obsara dau lenohob, kaba, len leisa ij terimda len ledebeij dig nagama se leng Gerasa meren hancobohob.

²Dangga irir sug Yesus esogwa dau ij se lonogohob, kaba, sud hom en en dau igdohos mes gedig lusud lob aremogougb debsa naugb en agasa Yesus an men logodeh. Sud hom gini, kaba, merna mog mog esesa medoc mes namcirohob.

³Dangga lusud len lainyen naugb len lahud en mohora dara mesira lahwas darem dara lanta mougwa einyanohob. Doba en eic magan lanta geb debin mesira dara mohora toua hwas obogougb namcir.

⁴Hang en emdatou dou enin se igdohos mes gin dous. Anai sud hom men goubesa ingma naugb en emagaigeij enero. Dara lanta emedeinyum naugb sug len lahud en mesira dara mohora darem touwero.

⁵Dara sug en esebesa se igdohos mes sungga sungga, dara sug en eisaugb se menmod, kaba, en eiyaga dara mer medam astesda lona loba terimda. Dara en eic igdahab agod enin maga toua.

⁶Dangga sug en eiya Yesus aigusohob, kaba, en obgen naugb en ecguna dou Yesus dara esijaresa en toua.

⁷Hanoba en eiyaga dougwo Yesus dara mer medam, endagai: Yesus, ban ben sugini naugb bedeberou dana? Anai dan decinaga bani Adehsud Gen Moho Eb Taiba Augwan en Meisi ban ginohob. Dangga hang, dan douwan naugb ban bou Allah moho dougwo ban, dauntoba ban bemeic mog erij dou danero.

⁸En enara dangga dou Yesus, anai Yesus arougb en eihwedau sud hom ingga namcir.

⁹Doba Yesus eijidougwo en ucugb deit, endagai: Ban aboho dagiro? Hang en en moho dou Yesus, endagai: Dan indoho dag emeinyana. Anai emen emeinyana eng emugwengga desij sud hom ginohob.

¹⁰Sug mena mog mog ens enin moho dou Yesusohob, kaba, en eiyaga dougwo Yesus dara medoc erleij deit, endagai: Sug emen emagunya dau sud hom ginohob, kaba, ban bemocirma emen dau emen hancob ginero.

¹¹Dara merna mog mog laugwan louma debin gin namcir toua, lendagai: Emen emacgeij ban barougb emen naugb emen emeinesa hweijir gada merdoc mes. Len len dag gin dou Yesus, anai len leiya, doba hweij leinyana len letara se men maga desij len sunggohob.

¹²

¹³Dangga sug Yesus ousa len merir anohob, kaba, len leihwededau sud hom ingga namcir. Hanoba len ledeinesa hweing maga ribu hwai merdoc mes deit, kaba, hweijir ingga len laugwan lougb lesogwa se duhu bogo lomom namcirda.

¹⁴Sug leng lesedougwo hweij ingga, len leiya dau gini, kaba, len lahau medam namcir. Hanoba len lougb dig meren guseda naugb len leden dau aremer gini dou leng sungga. Dara leng geb acec laugwan toua. Dangga, kaba, len laugwan len len naugb len ledeiya aremer ingga se len merires toua.

¹⁵Sug len ledebeij Yesusohob, kaba, len leiya, doba sud hom gedig merna mog mog leinesa en medoc mes gragenggohob, kaba, en eigtou deb gini. Dara en eg sansun. Dara en mecdemaga toua esgiraha ucugwohob. Hang len lahau medam dau gin namcir.

¹⁶Dara len leiya sug Yesus ocirma merna mog mog dau sud hom gini. Dara leng leiya dau sug hweijir lougb lesogwesa duhu, kaba, len eng lecic meijouhw dau augwan gini asesa dou lusud toua.

¹⁷Dangga sug len louman dau ginohob, kaba, len lecicugb Yesus, lendagai: Ban bededau emen hancob gin namcir.

¹⁸Sug Yesus ouwan eisa ij dau len, kaba, sud hom areg merna mog mog esogwa dau en gragohob, en acgeij dau Yesus dauntoba en aimo enda.

¹⁹Doba Yesus en emouwanero. Dangga en arougb en, endagai: Ban becicugb aud aban lusud se aban cinogo dous. Hanoba ban bedecic dau maman Adehsud men geicara. Dara dau sug en medoc eineg an ban dag ginohob meijouhw augwan asesa dou len laugwan.

²⁰Dangga sug en eihwededau lenohob, kaba, en edens dau Yesus men geicara ganusbus hom gini dou leng se leng Dekapolis meren hancob laugwanda. Hang gareg en ouman dag gin, kaba, len laugwan leimiman dau gin namcir toua.

²¹Sug len leisa ij an Yesus ucugb dig nagamohob, kaba, lusud leinyana gougwa, len len naugb louwa debin en deit sug eni moongga se Galilea meberaba.

²²Dangga sud hom gedag mougt mera naugb leng Yahudi meren tuari se cinogo ingga, en moho Yairus, en en aud Yesus sungga toua. Sug en edesma Yesusohob, kaba, en ecguna dou en toua.

²³Hanoba en eiyagarij en ucucugb dara medoc erleij terimda, endagai: Adehsud, dan indihida godeh hom en areba medam. Dangga hang, dan demacgeij naugb ban bidob ban absira deisa enahabi. Dauntoba en emomomlo, doba en maireseb desij danahaba.

²⁴Sug Yesus ouman dau gin, kaba, en aimo en namcir dig men tueda. Doba sug lan lac gini, kaba, lusud leinyana len leila ucan lan dau dingan dingan.

²⁵Sug len leila ucan lan dag gin, kaba, gida hom gedig en os mogwihi se arisogomoc sisa hobjeraiyohob, kaba, en toua moongga dara len. Gida gin, kaba, en acgeij leng meru ouforoho naugb len louci aremougb naugb en terimdohob. Doba augwan gini emousa en anero. Doba eic dag mog erij edreg dou en dous. Dangga hang, men gareba gini eihweda se gebeba namcir. Dara men aremougb augwan ouwa icira gin toua.

²⁶

²⁷Doba en ouman dag Yesus men goubesa inggebga naugb sug en eic geigouhw dou lusudohob. Hang en aihagab lusud laugwan ucan Yesus dig medigo terimda en edos sansun icira Yesus mos namcir.

²⁸En os Yesus dangga, anai en oudesa se enin medoc mes dag en os sansun icira en mos dous, kaba, edeinyum naugb sug en emeigouhwes.

²⁹Dangga sug en os sansun icira Yesus mos inegohob en mogwihi graga toua arges docohob. Hang en ecinaga se en medoc mes dag en eigouhw namcirohob.

³⁰Doba Yesus en mos ecinaga dag men goubesa eihwededau en aud sud homohob. Dangga en eineg ucugb dig medigo dedemeda. Hanoba en eijidougwo len leinyana ingga, endagai: Gareg dau yen en os sansun icira dan indus gina?

³¹Doba men logodeh len launi en mer ucugb dou en, lendagai: Ban bemeiya lusud leinyana gedig len lec lomdi ban gineroei? Dangga dagiro ban beijidougwo len, bendagai: Gareg en os sansun icira ban abusa?

³²Doba Yesus en mairesi bahilon dougwo len laugwan dag gareg os eni, hang men goubesa eihwededau en aud enohob, gina?

³³Dangga gida hom gini, en en aud Yesus dara medoc eijesa dara en ahau dau en namcir. Anai en ecinaga dag men goubesa eic geigouhw dou enohob. Sug en edebeij Yesusohob, kaba, en ecguna dou en. Hanoba en ecic dau sug en areba, dara sug en eigouhw gini meijouhw augwan asesa dou en toua.

³⁴Sug Yesus ouman augwan ginohob, kaba, en oho mer debin en, endagai: Dan indihida, ban bod abina debsa danohob, hang ban bemeigouhw gini, dangga ban beihweda. Dara Allah eic gesgigouhwesa dou ban dougwo augwan toua, anai ban beic geingmos agauwesa namcirohob.

³⁵Sug Yesus enara dou gida ginaba, doba ligbum len len dau Yairus men tu naugb leden dou en, lendagai: Ban bemarerei Adehsud gini mohora emerijlo, anai ban abihida omomohob.

³⁶Doba Yesus oho mer debin sud hom gesedougwo leng Yahudi meren tuari gini, endagai: Ban abdoc emeijesero. Doba ban bod abina debsa dan dous.

³⁷Sug Yesus oho mer debin Yairus dag ginohob, kaba, en en dougwo lusud laugwan leigtou sungga deb. Hanoba en ouci Petrus, dara Yakobus, dara en magto Yohanes, len gin dous eng laicira landa.

³⁸Sug len ledebeij sud hom gesedougwo leng Yahudi meren tuari en men tuohob, kaba, Yesus en ouman, doba lusud len leb dara leiyogoseser medam terimda. Dara en eiya, doba len lebara eijideijo namcir toua.

³⁹Sug Yesus einesa touohob, kaba, en esa mer debin len, endagai: Yen yebara eijideijo, anaringgina? Yen yarges meijireda. Anai godeh gin, kaba, en emomomero, doba en atouda dous.

⁴⁰Sug len louman Yesus mer an gini, kaba, len lobohuba dagasges an en namcir. Doba Yesus ecicugb len laugwan dau, endagai: Yen yaugwan yeihwedig medigo dauwahabi. Sug len leihwededauwohob, kaba, Yesus, dara godeh ingga en mena dara en mem, dara men logodeh merug homoi graga leng leinesa dimei mes sug len lob en maga debsohob.

⁴¹Sug len ledebeij en magohob, kaba, Yesus os godeh ingga mesira. Hanoba en enara dou en, endagai: Talita kum. Meijouhw gini se maman leci dag: Daneh, gidob, dan darougb ban beisa.

⁴²Sug Yesus enara dangga ineg dou enohob, kaba, en eisa bec namcir. Anai en men arisogomoc sisa hobjeraiyohob. Dangga len gus, sug len leiya dau gini inegohob, kaba, len leimiman dareg merdoc omom namcir.

⁴³Doba Yesus oungben len dougwo, endagai: Yen yemdecic dau areg yen yeiya gini dou len gusero. Sug en oungben lenohob, kaba, en arougb len naugb len leic ared dou godeh ingga ben et toua.