Read Manikion MARKUS 6 Bible Online

MARKUS 6 - Manikion bible

MARKUS 6

¹Sug Yesus eigdoumesa Yairus mehida dau gomomohob, kaba, en eihwededau cinogo ingga dig en guneda. Dara men logodeh laicira en toua.

²Dangga sug leng Yahudi meren Lona Gemeicaresero edebeijohob, kaba, en einesa meren tuari naugb en edidib Allah mer geigouhw dou len toua. Doba sug lusud louman gini, kaba, len leinyana merdoc omom dau gin namcir. Hanoba len lenara doum, lendagai: Areg sud hom gini en edidib dou maman gini, kaba, en daugiro? Dara gareng geic mou gouforoho gin dou ena? Hang men geicara dag ganusbus dou maman gin toua?

³Anai sud hom gini, kaba, eni Mariam meisi gen mou ouforoho naugb tu dous. Dara en magtor Yakobus, Yoses, Yudas, dara Simon, dara en medemeitor len laugwan toua merugwengga desij maman gina? Dangga len merdoc aihagab en an areg en ens dou len ingga toua terimda.

⁴Sug Yesus eiya gini, kaba, en enara ceg ceg len, endagai: Sug sud hom en esai Allah moro dou len gus, kaba, len louman en mer, dara len leigdoumesa en moho an gini toua. Doba sug en esai mer gini se enin men cinogo, dara men meijouhuda dara se enin men tu, kaba, len lemouman en mer. Dara len lemeigdoumesa en moho an gin touwero.

⁵Dangga en emens ganusbus einyana dou len sungga touwero. Doba en ob en mesira deb se leng areber hom yom naugb eic geigouhw dou len dous.

⁶Hanoba en edidib Allah mer geigouhw dou lusud se cinogo gus gus geb acec ingga dous. Anai lusud se en gun gin, kaba, len merdoc emebdebin an enero. Hang en medoc eimiman meren geicara gin toua terimda.

⁷Irir sug Yesus edidib Allah mer geigouhw dou lusud se cinogo gin, kaba, en eija men logodeh merug sisa hobjerai len len aud eni. Dauntoba en ekeba lahwai laimom, lahwai laimom naugb len ledesai Allah moro dou len gus deitda. Sug en ekeberohob, kaba, en ogugwo goubesa dou len toua, naugb sug len locirma merna mog mog dau len gus debin gin toua.

⁸Hanoba en esulou len dougwo, endagai: Sug yen yeihweda, kaba, yen yemoho ared. Dara yemoho i naugb yen yemohwiaga lusud an ara ara. Dara yen yemeic hwigbeimos an aregoufu. Dara yen yemeg sansun hwai darem. Dara yen yemoho ara gus gus augwan hom dara yen touwero. Doba yen yos ijouhugwa hom se yen meisira. Dara yen yeg hwigbeimos hom geb dougwo yen meijohora dous.

⁹

¹⁰Sug Yesus esulou len dag gin bouwohob, kaba, en esulou len eisaugb sug len ledebeij lusud se cinogo moho hom ucan gin dou len deit, endagai: Sug sud hom, en ebin yen se men tuohob, kaba, yen yemeihweda se tu gus dau enlo. Doba yen yeigtou desij en namcir, terimda edebeij lona sug yen yeihweda se cinogo gus dau len toua.

¹¹Sug yen yedebeij cinogo hom, doba lusud lemebin yen dara len lemouman yen meijir an Allah merero, kaba, yen yemeigtou desij lenlo. Doba yen yarges len ingga deb namcir. Hanoba yen yetir yen meijohora an meren cinogo mor dag ansins debin len ucugb. Anai gini ansins dou len dag yen yemeic cumougt dou len deitero. Doba yen yarges len deb namcirohob.

¹²Sug Yesus esulou len dag gin bouwohob, kaba, len leihweda naugb len lebedbed dou lusud, dauntoba len lesga meren sesar moho asesa dou Allah. Dara len lahau an dougwo meren sesar augwan toua.

¹³Dara len locirma merna mog mog einyana dau lusud. Dara len lehin mani se leng areber leinyana naugb laic geigouhw dou len toua.

¹⁴Doba sug lusud lecic Yesus moho an men geicara gin dou lusud sungga sungga terimda, kaba, mougt mera medam moho Herodes, en toua ouman dau Yesus men geicara gini. Anai ligbum, kaba, len lenara, lendagai: Sud hom gini eni Yohanes Gogun Lusud Se Duhu gia, eng en eisa ucugwohob. Hang men goubesa inggebga naugb en emeic ganusbus einyana gin toua.

¹⁵Doba ligbum deit, kaba, len leden deit, lendagai: Sud hom gini, eni Elia. Dara lingma, kaba, len leden deit, lendagai: Eni sud hom dau leng lesai Allah moro sug nosa, eng eisa ucugb gini.

¹⁶Sug Herodes en ouman gini, kaba, en toua medoc eica len merir an gini. Hanoba en enara dou men lusud, endagai: Sud hom gin, kaba, eni Yohanes Gogun Lusud Se Duhu dag misen. Anai sug nosa, kaba, dan darougb indan sadodor hom ogug en mougt dau. Doba iteitogin, kaba, en eisa ucugwohob.

¹⁷Herodes enara dag graga, anai sug nosa, kaba, en eihwa en magto Pilipus mesouwa, moho Herodias, dau enohob.

¹⁸Dangga Yohanes Gogun Lusud Se Duhu en en aud Herodes sug nosohob naugb en en dougwo en an gin ucucugb terimda, endagai: Emeigouhw naugb ban bemeic ban abagto en mesouwa ginero. Anai gin, kaba, dag ban bedreg Allah men gomnomnohob.

¹⁹Sug Yohanes owun Herodes en moho dag ginohob, kaba, Herodes arougb men sadodor naugb len louf Yohanes se tu gesisug. Dauntoba en eic Herodias medoc esgiraha dou en ucugb. Dobnaro. Herodias en ehilon ucina naugb en eic gomom dou Yohanes, anai en medoc esrougb an en terimdaba.

²⁰Doba Herodes en ahau dau Yohanes namcir. Anai en ecinaga Yohanes en aimo areg asesa Allah enin medoc mesohob. Dara en ecinaga dag Allah eigdoumesa en moho naugb en esai en moro dou lusud touohob. Dangga hang, en emarougb men logodeh naugb len lesedougwo tu gesisug an Yohanes deigeigouhw namcir. Dara en medoc eigouhw an Yohanes naugb sug en esai Allah moro dou en toua. Dangga astesda sug en ouman Allah mer gin, kaba, en ouman deigeigouhw. Doba se medoc mes, kaba, en ahau dau gin namcir.

²¹Doba edebeij lona sug Herodes medoc eiseisan men lona sug mem ouwadan en sug nosohob, kaba, cumougt geigouhw hom gini naugb sug Herodias eic gomom dou Yohanes namcir engga. Anai se lona ingga, kaba, Herodes ougwan ared naugb men gedeijan, dara leng sadodor meren mougtir, dara leng meroho agas se leng Galilea meren hancob len laugwan toua.

²²Dangga sug len letara dara Herodesohob, kaba, Herodias mehida en eihwa deseino len toua. Sug en eihwa, kaba, en eic Herodes dara en mosur merdoc eigouhw dou len namcir.

²³Dangga hang, Herodes en os dou Herodias mehida gini, endagai: Areg ban bouwan naugb bacgeij dau dan, kaba, dan demeic dou bans. Dara en ouwara mougwa hom debin gin dou en deit. Hanoba en ou meresa mer graga deit, endagai: Areg ban bouwan naugb dan deic dou ban, kaba, dan demeic dou bans. Era ban bouwan naugb dan dekeba indan hancob nagama dou ban, kaba, dan dos dou ban dag dan demekeba dou ban toues.

²⁴Sug Herodias mehida en ouman gin, kaba, en eihwededau dimei mes ingga naugb edeijidougwo en mem an ginahabi, endagai: Ameinya, dan dacgeij ara dau Herodesa? Dangga Herodias en auni dou en mehida ucugb, endagai: Ban bacgeij naugb en eic Yohanes Gogun Lusud Se Duhu en mougt dou ban dous.

²⁵Sug mehida en ouman danggohob, kaba, en obga dedemeda beden dou Herodes, endagai: Dan dacgeij naugb ban beic Yohanes Gogun Lusud Se Duhu en mougt debsa igdebir meh gedouder dou dan iteitogini.

²⁶Sug mougt mera Herodes, en ouman gin, kaba, en medoc eijesa medam namcir. Doba en emohoiya en mer an gin dagiro? Anai en ouwara deseino men lusud laugwanohob.

²⁷Dangga hang, en arougb men sadodor hom namcir, endagai: Ban beihweda se tu gesisug naugb ban bededougb Yohanes mougt dau en. Hanoba ban bemodo dou dan sugini. Hanoba sadodor ingga en eihweda se tu gesisug naugb en edougb Yohanes mougt dau toua.

²⁸Sug en edougb mougt dauwohob, kaba, en obdeisa igdebir meh gedouder. Hanoba en edeic an dou gidob graga. Sug en eic dou gidob gragohob, kaba, gidob edeic dou mem deitda.

²⁹Sug Yohanes men logodeh louman dau gin, kaba, len leihweda naugb len ledeic maga dau tu gesisugwen. Hanoba len ledob en se igdohos mes deb toua.

³⁰Sug Yesus men logodeh merug sisa hobjerai len lecicugwohob, kaba, len ledecic dau sug len locirma merna mog mog dau lusud. Dara areg len lens meijouhw dou leng gus augwan gini dou Yesus toua.

³¹Doba lusud leinyana ledregim debin len sungga terimda. Hang emedeinyum naugb sug len lemet ared touwero. Dangga Yesus enara dou men logodeh, endagai: Yen yisa, maihweda se losneseba gedig lusud lemeisero naugb maman madehig debin mamug sunggahabi.

³²Dangga, kaba, len laingmo ij. Hanoba len leihweda se losneseba hom naugb len ledeigtou debin lenin merug sungga toua.

³³Doba sug len leisa ij aud usi ingga, kaba, lusud leinyana dau cinogo geb acec Galilea mebera len lecinaga dag Yesus an men logodeh len leisa ij gini. Dangga hang, len len dau meren cinogo naugb len lobgei mebera. Hanoba len ledeigtou se usi deb ino naugb len deb touohob.

³⁴Dangga sug Yesus esogwa dau ij, kaba, en eiya, doba lusud leinyana gougwa eng leigtou deb ginohob, kaba, en medoc eineg dara erij an len namcir. Anai len ledag domba gedig meren gembala ingma naugb emesedougwo lenero. Hang en ebiji naugb en edidib Allah mer moho einyana meijouhw dou len toua deit.

³⁵Doba sug losogohob, kaba, Yesus men logodeh len len naugb ledenara dou en, lendagai: Ban barougb len gini naugb len ledehilon ared se desa dara cinogo augwan geb acec maman gininda naugb lenahabi. Anai sugin, kaba, losneseba namcir dara deinyor lobohob gaihida.

³⁶

³⁷Doba Yesus auni ucugb dou len, endagai: Yen eng yemeic ared dou len lemet. Doba len ledegeij merir an en namcir. Hanoba len leijidougwo en, lendagai: Ban boudesa endag emen emob aregoufu einyana deb. Hang emen ememauma ared emedeinyum naugb len gin laugwansei? Anai gini et aregoufu perag mogo huntun hwaiyohob gina?

³⁸Doba Yesus eija bauni len merir ucugb deit, endagai: Yen yedeiya dougwo dag yen yeisgoho roti mogo hosaiya, engga? Sug len ledeiya dougwohob, kaba, len launi ucugb dou Yesus, endagai: Areg emen emobdeb, kaba, roti mogo sergem dara hosei maga hwai dous.

³⁹Sug Yesus ouman ginohob, kaba, en arougb lusud ingga laugwan, endagai: Yen yeigtou debinim se aremon geigouhw gin gabedahabi.

⁴⁰Dangga, kaba, len ingga len leigtou led debinim se usi hwai. Usi hom, kaba, merug huntun hom. Dara usi hom deit, kaba, merug sud hwai sisedeisu len laugwan leigtou dara geigouhw namcir.

⁴¹Sug len lekebem se usi dag gragohob, kaba, Yesus os roti mogo sergem dara hosei maga hwai graga icira en mesirahabi, en emeised mergo augb bogo dauntoba en en sijo dou Allah naugb gin toua. Sug en ocuncum dou Allah dauwohob, kaba, en ekris roti. Hanoba en eic dou men logodeh naugb len lohw an len ingga laugwan toua. Dara en ohw hosei graga toua ucan dou len deit.

⁴²Dangga len laugwan let beicer namcir.

⁴³Sug len let beicerohob, kaba, Yesus men logodeh len leihweda ledouci ared mougwu dau roti dara hosei augwan ucugb debinim se aigdaga mes sisa hobjerai batij namcir.

⁴⁴Dara len laugwan gedig len let roti gini, kaba, len lecic lusud mogud dous, edebeij merug ribu sergem gini.

⁴⁵Sug len letara bouwa inegohob, kaba, Yesus arougb men logodeh, dauntoba len laingmo ij ino en men dig cinogo Bedsaida gacda. Sug en arougb men logodeh leis ijohob, kaba, en arougb lusud leinyana graga toua len laugwan leihweda.

⁴⁶Doba sug en arges len dara ou lenohob, kaba, en eisaugb mengarougb hom naugb en edocuncum dou Allah dou enin sungga toua.

⁴⁷Dangga sug loba od enohob, kaba, eninto moongga se mengarougb gin dous. Doba men logodeh, kaba, len merugwengga se Galilea mediaba.

⁴⁸Anai loungmen edeij len terimda. Hang en eiya men logodeh gin, kaba, dag len logo duhu termum naugb leihwedig mebera. Doba ij emeijeijo an lendero. Dangga edebeij sug bogo obrugwohob, kaba, Yesus ec mohora se duhu mod ucan len terimda en edacu len se duhu medi taij.

⁴⁹Doba sug len leiya en ec mohora se duhu mod ucan len dangga, kaba, len loudesa eni aremoung mena dous. Dangga len laugwan lomi medam dareg len lahau dau en toua. Anai len leiya en se len meriresohob. Doba Yesus oho mer debin len, endagai: Yen yemahaulo. Anai dani dag aremoung menero. Doba dang Yesus eng doucan yen gini. Hang yen yemomi touwero.

⁵⁰

⁵¹Sug en oho mer debin len danggohob, kaba, en toua aingmo ij desij len. Doba sug en aingmo desij len se ingmes inegohob, kaba, loungmen mohora edina namcir dau len toua. Sug men logodeh ingga, len leiya gini, kaba, len leimiman dau gin dag len merdoc omom dau gin namcir toua.

⁵²Anai sug Yesus ens ganusbus ogdoc roti dou len inohob, kaba, len merdoc agadgeij dougwo ginaba. Hang meijouhw dau augwan gin emeinesa len merdoc mes dag misen touebma.

⁵³Sug Yesus dara men logodeh len ledebeij dig nagama ginohob, kaba, leni merugwengga se leng Genasared meren hancob. Hanoba len leic ij deb sungga.

⁵⁴Doba sug Yesus dara men logodeh, len lesogwa dau ing mes inegohob, kaba, lusud lecinaga Yesus en eng ingga.

⁵⁵Dangga, kaba, len lobga dinga dingada se leng Genasared meren hancob augwan naugb len lodo boromei an leng areber aud Yesus se astesda sug len louman en meni sugiro toua.

⁵⁶Dara astesda cinogo, dara astesda beimes, dara astesda desa sug Yesus edebeij len, kaba, len ledob leng areber se astesda meren usmougb goujeiji hom yom dougwo ucina an en toua. Dauntoba sug en eraga irir len, kaba, len leiyagarij en naugb len los men sansun icira en mosahabi. Dangga gareg en os men sansun icira en mosohob, kaba, en eic geingmos agauwesa namcir.