Read Manikion MARKUS 7 Bible Online

MARKUS 7 - Manikion bible

MARKUS 7

¹Doba se lona hom, kaba, merug hosa dau leng Parisi dara leng meru ouforoho se Musa men gomnomna len ledebeij Yesus sungga toua. Anai len louwaden dau Yerusalem naugb ginohob.

²Dangga sug len ledebeij enohob, kaba, len leiya, doba merug hosa dau Yesus men logodeh len letara dara len merisira ogor deseino Allah namcir. Anai len lemedu len merisira lemaimo leng Parisi len merir an ginero.

³Hang len lemeijidougwo Yesus an gini, lendagai: Dagiro, naugwe hang, aban logodeh len lemaimo maman mamjemouwer meren gomnomna ginero. Doba len letara dara len merisira ogor deseino Allah dag gin dousa? Anai sug len lemedu len merisira dag ginero, kaba, len ledreg gomnomna gin namcir touohob. Len leija loung magai Yesus dag gini, anai leng Parisi dara leng Yahudi gus len laugwan, kaba, len los debin len merjemouwer meren gomnomna an gin terimdaba. Dangga sug len louwan letara, kaba, len ledu len merisira nosa dauwahabi. Dauntoba len letara dara len merisira ecabeci deseino Allah. Doba sug len lemedu len meresirabuma, kaba, len lemet ared touwero. Dangga toua, sug len lecicugb dau usi gedig lohwaresohob, kaba, len lemet ared an ogorero. Doba len ledu len merisira dauwahabi, len lemet ared. Dara len lemaimo len merjemouwer meren gomnomna hom gin dousero. Doba len laimo meren gomnomna aingma aingma deit naugb len ledu areg len letaresa, dara legaresa dag mog naugb duhu, dara dabei, dara debecij dau ker(...)

⁴

⁵

⁶Doba Yesus enara bauni len merir ucugb, endagai: Allah enara eisaugb yen ogdoc sud hom moho Yesaya deb nosohob, endagai: Lusud gini len leigdoumesa dan indoho augwougb se len merirs dous. Doba len merdoc mes, kaba, aigus gougwa dau dan namcir.

⁷Dangga eigouhw naugb len lemesijaresa danlo. Anai len len dou lusud dag areg len lomnomnan dou len gini, kaba, dau dan ingga. Dobnaro. Areg len lomnomnan gini, kaba, dag lusud lenin meren gomnomna dous.

⁸Dangga areg en og gin, kaba, misen namcir. Anai yen toua yarges Allah men gomnomna deb namcirohob. Hanoba yen yeicara yaimo lusud meren gaben dous. Hang meijen geicara augwan toua, dag yen yeicara yarerei lusud meriresi terimda.

⁹Sug Yesus owun leng Parisi dara leng meru ouforoho se Musa men gomnomna dag gragohob, kaba, en enara ceg ceg len deit, endagai: Yen meiju ouforoho namcir naugb yen yehilon ucina, dauntoba yen yemaimo Allah men gomnomna gin terimdero. Doba yen yaimo yenin meijen gaben gin dous.

¹⁰Anai Musa en og deb se Surad Injil Meb Mohon deb nosohob, endagai: Yen yagauwesa yen meijiner dara yen meijimir dara deigeigouhw namcir. Dara en og ingma debin gin toua deit, endagai: Gareg dau yen, en ouwareij mena dara mem, kaba, len gus leic gomom dou en toua.

¹¹Doba yen, kaba, yen yesulou lusud dag gini, yendagai: Gareg dau yen en enara dou mena dara mem dag areg en esedeb naugb ousa lan, doba en es moro dou Allah enohob, kaba, gini dag en emousa lan toua deitero. Doba en arges dau namcirohob.

¹²

¹³Hang meijen gaben gini aiyan Allah men gomnomna graga dau len namcirohob. Dara yen yemeperwei Allah men gomnomna hom gin dousero. Doba yen yeperwei men gomnomna gus gus einyana dag gin touohob. Hanoba yen yomnomnan gin dous eng dou yen meijihir, dara len gus toua terimda.

¹⁴Sug Yesus enara dou leng Parisi dag gragohob, kaba, en eiya lusud leinyana len len naugb loucimdeb dara en deit. Sug len laugwan lou acec enohob, kaba, en esulou len ucan deit, endagai: Yen yaugwan youman dan indir an areg dan den dou yen gini deigeigouhw namcir. Dauntoba yen yecinaga meijouhw asesa toua.

¹⁵Anai areg yen yet se yen meijirs, kaba, emeic gogor dou yen deseino Allah enero. Doba areg gen dau meigdoc mes naugb agunya se meijirs, kaba, gin eng eic gogor dou yen deseino Allah dous. [

¹⁶Gareg dau yen, en moms ai, kaba, en ouman areg dan den dou yen gini deigeigouhw namcir.]

¹⁷Sug Yesus eic gainyenara dag graga dou len bouwohob, kaba, en eihwededau len ingga deb. Hanoba en einesan men logodeh se tu hom. Sug len leinesohob, kaba, men logodeh leijidougwo en, lendagai: Gainyenara graga, kaba, men meijouhw dagiro? Ban bens dau gin dou emenahabi.

¹⁸Doba Yesus enara debin len, endagai: Areg sud hom en et, kaba, emeic gogor dou enero. Anai emeinesa medoc mesero. Doba einesa menuhwa. Hanoba edagunya dig gaihida dous. Dagiro hang, yen yemecinaga ginero? Yen toua, meiju edgom, aninim dag len gusei? Dangga sug Yesus enara dag ared augwan emeic gogor dou lusudero, kaba, en eigdoumesa ared augwan dag ecabecohob naugb lusud let toua.

¹⁹

²⁰Sug Yesus enara debin len dag ginohob, kaba, en ens dau areg eic gogor dou lusud graga men meijouhw asesa dou len deit, endagai: Areg agunya dau sud hom medoc mes, kaba, inggang eic gogor dou en.

²¹Anai sud hom men gauwamara ecgu emen dau menuhwero. Doba agunya dau medoc mes dous. Hang ahwan en naugb en ohw en maga aibibrida dou len gus, dara en eiyohora, dara en es len gus, dara en mesirebsa.

²²Dara en agungunara, dara en einegnegara, dara en erba mohoisa, dara en ogo ara gaihim naugb en aimo areg gecgu aibibra terimda. Dara en ediseij len gus, dara en ecic len gus meroho gouhw genes, dara en eimiman enin, dara en medoc emarjaga touwero. Doba en aimo areg enin ouwan terimda.

²³Aremer augwan gini emagunya dau en menuhwero, doba agunya dau en medoc mes, hang emeic gogor dou en toua.

²⁴Sug Yesus ens meijouhw dag graga dou men logodeh bouwohob, kaba, len leihwededau sungga dig cinogo Tirus dara Sidon maran hancob deit. Dangga sug len ledebeij sunggohob, kaba, Yesus einesa tu hom naugb en ecgoneh en mog dau lusud. Anai en emouwan naugb len lemecinaga dag en edebeij sunggohob touwero. Dobnaro.

²⁵Dangga sug gida hom en ouman, doba Yesus edebeij tu ginohob, kaba, en en dedemeda aud en naugb eden dou en. Anai en mehida godeh hom, kaba, mena mog mog einesa en medoc mesohob.

²⁶Sug en edebeij Yesusohob, kaba, en ecguna dou en. Hanoba en eiyagarij en, endagai: Ban bocirma mena mog mog dau dan indihidahabi. Doba gida hom gini, kaba, dau leng Yahudiero. Doba en gun se Pinisia se leng Siria meren hancob. Dara en emec Ibrani mer touwero, doba en ec leng Grika merir dous.

²⁷Dangga Yesus en dougwo en, endagai: Emeigouhw naugb dan demeic dan indihir meren ared naugb dan demerba dou mihero. Doba dan deic dou indihir, len let nosahabi.

²⁸Doba gida ingga, kaba, en enara bauni Yesus mer ucugb, endagai: Adehsud, sug sud hom ingga en mehir len letara se boromei, kaba, cum, moslos ebrera dou mihi gesesa boromei meniha let toua.

²⁹Sug Yesus ouman en mer an gini, kaba, en auni dou en, endagai: Ban abdoc ebdebin an dan dag ginohob, kaba, dan dousa deisa ban abir an gin toua. Hang ban becicugb dig aban tu, anai mena mog mog eihwededau ban abihidohob.

³⁰Dangga sug gida ingga en ecicugb bedebeij men tuohob, kaba, en eiya mehida sug atou se boromei. Doba mena mog mog eihwededau en dag misenohob.

³¹Sug Yesus en ecicugb dau leng Tirus meren hancob, kaba, en eragasa leng Sidon meren cinogo aud Cinogo Sisa meren hancob terimda en edebeij Galilea mebera ucugb deit.

³²Sug en edebeij Galilea mebera deitohob, kaba, lusud lahwan sud hom moms etub dara ec mamaha aud eni. Sug len ledebeij enohob, kaba, len leiyagarij en, lendagai: Ban bou ban absira aga sud hom gini, dauntoba en ouman lo ucugb deit. Dara en enara moho asesa touahabi.

³³Doba Yesus, kaba, en ahwan en dau lusud leinyana ingga. Sug en ahwan en dau lenohob, kaba, en ou mesira mob se sud hom ingga moms mes hwas. Gin dauwohob, kaba, en eigdores se mesira mob baugb metemouwu toua.

³⁴Sug Yesus eicara dag ginohob, kaba, en eised mergo aud dig bogo dara en etin menesa namcir. Hanoba en enara dou sud hom ingga, endagai: Epata. Gini aninim dag, yen yisga namcir.

³⁵Dangga sud hom gin, kaba, en moms hwas esga naugb en ouman lo asesa deit. Dara en metemouwu eijouhw naugb en enara moho asesa toua. Doba Yesus oungben len laugwan, dauntoba len lemecic dau sug en eic geigouhw dou sud hom gini dou lusud hom touwero. Doba edag en edarougb len naugb len lemecic aremer gini bagaha dou lusud gus laugwanero, kaba, len lagaha aremer gini becinten dou lusud laugwan toua terimda.

³⁶

³⁷Dangga sug len gus louman dau gin, kaba, len leimiman dag len merdoc omom dau gin namcir. Hanoba len lenara doum, lendagai: Sud hom gini men geicara augwan eigouhw namcir. Anai en emousa aremer mogurei dousero. Doba en esinsin leng merums esga naugb len louman lo ucugb deit. Dara en esinsin leng losum naugb len lenara moho asesa ucugb deit toua.