Read Manikion MARKUS 8 Bible Online

MARKUS 8 - Manikion bible

MARKUS 8

¹Se lona sug Yesus moongga se Galilea meberaba, kaba, lusud leinyana louwa debin en deit sungga toua. Doba sug len louwa debin en gini, kaba, meren ared ingmaro. Dangga en eija men logodeh naugb len len aud eni. Sug len len aud enohob, kaba, en enara dou len, endagai:

²Dan indoc erij an lusud leinyana gini. Anai len leigtou desij dan se lona homoiyohob. Hang meren ared toua ouwa dau lenohob.

³Dara ligbum dau len, kaba, len len dau aigusi. Dangga dan demarougb len naugb len lemeihweda dara len merinuhwa mes mogud touwero. Anai sug dan darougb len leihweda, kaba, cum, len ledahauwa se ucina namcir.

⁴Doba Yesus men logodeh, len launi en mer ucugb, lendagai: Gareg en ehilon ared edeinyum naugb en eic dou leng leinyana gougwina? Anai sugin lomougwisadaha.

⁵Doba Yesus eijidougwo len, endagai: Meijen ared hosaiya inggebga? Dangga len launi dou en, lendagai: Emen roti mogo senggai dous.

⁶Sug Yesus en ouman len merir an dag ginohob, kaba, en arougb lusud laugwan naugb len laugwan lecguna leigtou se cinogo. Sug len leigtouohob, kaba, Yesus os roti mogo senggai icira mesirahabi, en emen sijo dou Allah. Sug en en sijo dou en dauwohob, kaba, en ekris roti. Sug en ekrisohob, kaba, en ohu dou men logodeh. Hanoba en arougb len, endagai: Yen yohw roti gin an lusud gin laugwan. Dangga, kaba, men logodeh laimo en mer an toua.

⁷Dara men logodeh len lodo hosei maga hosa toua inggebga. Dangga sug Yesus en sijo dou Allah naugb hosei gin touohob, kaba, en arougb men logodeh deit, endagai: Yen yohw hosei gini an lusud laugwan toua.

⁸Hang lusud laugwan let roti dara hosei beicer namcir. Dara men logodeh len louci ared mougwu debin se aigdaga mes goujeiji mogud maga senggai batij namcir toua. Doba lusud gedig len let roti dara hosei gin, kaba, edebeij dag merug ribu hogu.

⁹

¹⁰Sug lusud letara dauwohob, kaba, Yesus arougb len laugwan naugb len leihweda. Sug en arougb len leihwededau en inegohob, kaba, eni dara men logodeh, len leisa ij dig nagama aud leng Dalmanuta meren hancob toua deit.

¹¹Sug Yesus edebeij nagamohob, kaba, merug hosa dau leng Parisi len len audi eni. Dangga sug len ledebeij enohob, kaba, len lenara merir laised en namcir an areg en ebedbed dou lusudohob. Dara len lainyen en naugb en ens ganusbus ingma dau bogo dou len toua. Dauntoba len lecinaga dag Allah esa en dau bogo dag misen aud lenohob.

¹²Sug Yesus ouman dag len lacgeij ganusbus ingma dau en deit, kaba, en medoc aham an len merir namcir. Hanoba en auni dou len ucugb, endagai: Anara, hang, yen youwou dan an ganusbus terimda? Dangga yen youman dan indir an deigeigouhw. Anai dau iteitogini, kaba, dan demens ganusbus dou yen deitero. Areg dan den gini misen namcir.

¹³Sug Yesus enara dou len dag gin inegohob, kaba, en eihwededau len. Hanoba eni dara men logodeh, len leisa ij dig nagama gacda dau len namcir.

¹⁴Doba sug len leisa ij dedemeda dau len dag gin, kaba, men logodeh merdoc moc dougwo meren ared deb. Dangga len leiya, doba meren roti mogo hom inggeb se ing mes dous.

¹⁵Doba Yesus esulou len, endagai: Yen yebehnehino yenin meigdoc mes dougwo leng Parisi dara Herodes meren gugdo mougb gin terimda.

¹⁶Sug len louman eisaugb gini, kaba, len meru laiso en mer an gini. Hanoba len lenara doum ucucugb, lendagai: En enara baugtarera dougwo maman mamir, anara? Anai maman mamoho roti ingmaro ginei?

¹⁷Doba Yesus en ecinaga areg len len doum ingga. Hanoba en etaha len merir an gini, endagai: Dagiro, naugwe hang, yen yenara doum dag ared ingmaro, anara? Yen meiju edgom namcir, hang yen yemecinaga meijouhw dara yen meigdoc emobgesa touweroei?

¹⁸Yen meijires ai. Dangga, dagiro yen yemeiya asesero. Dara yen meijums ai. Dangga, dagiro yen yemouman touwero?

¹⁹Anai sug dan dekris roti mogo sergem dou lusud merug ribu sergem sug nosa, kaba, yen youci mougwu deb se aigdaga mes hosaiya? Doba len launi dou en, lendagai: Emen emouci deb se aigdaga mes sisa hobjerai.

²⁰Dara sug dan dekris roti mogo senggai dou lusud merug ribu hogu sug nosa, kaba, yen youci mougwu deb se aigdaga mes hosa toua? Doba len launi dou en, lendagai: Emen emouci deb se aigdaga mes senggai.

²¹Sug len launi dou Yesus dag ginohob, kaba, en enara debin len deit, endagai: Gedangga, kaba, dagiro, hang yen meigdoc emobgesa areg dan den dou yen gragero, anara?

²²Sug Yesus dara men logodeh leisa ij ledebeij cinogo Bedsaidohob, kaba, lusud lahwan sud hom mairesmougb aud en. Sug len ledebeij enohob, kaba, len leiyagarij en, lendagai: Ban bos sud hom gini, dauntoba en maires esga naugb en eiya lo asesahabi.

²³Doba Yesus os sud hom ingga en mesira. Hanoba en ahwan en dou lanin dig liga geb acec cinogo medigo. Sug lan laihwedig medigohob, kaba, Yesus eigdores aih en maires hwas. Sug en eigdores aihohob, kaba, en ob mesira hwas deb se en maires toua. Sug en ob deisohob, kaba, Yesus eijidougwo eni, endagai: Ban beiya mena erjeijohobei?

²⁴Doba sug sud hom ingga, en oho mergohob, kaba, en auni dou Yesus, endagai: Dan deiya lusud, doba len ledag sogo gecec se dan indires dousaba.

²⁵Dangga Yesus ob mesira se en maires hwas deit. Sug Yesus eicara dag gin dou en deitohob, kaba, en maires esga naugb en eiya lo asesa deit toua. Hang en emeiya lusud ledag sogo gecec toua deitero. Doba en eiya augwan dag misen namcir.

²⁶Sug Yesus esga en maires dag ginohob, kaba, en dougwo eni, endagai: Ban bemeinesa cinogo Bedsaida deitlo. Doba ban beihwedig aban tu dous.

²⁷Sug Yesus dara men logodeh, len leihwededau cinogo Bedsaidohob, kaba, len leihweda se cinogo geb acec cinogo Kaisarea Pilipi augwan deit. Dangga sug len leraga asa ucina aud cinogo augwan ingga, kaba, Yesus eijidougwo men logodeh, endagai: Yen youman sug lusud lecic dan indoho doum, kaba, len leija dan dag garena?

²⁸Hang len launi dou en, lendagai: Ligbum, kaba, len leija ban aboho dag Yohanes gogun lusud se duhu. Doba ligbum, kaba, len leija ban aboho dag Elias. Dara ligbum, kaba, len leija ban aboho dag sud hom dau leng lesai Allah moro sug nosohob.

²⁹Sug len launi dau len gus merir dou enohob, kaba, Yesus eijidougwo len deit, endagai: Doba dagiro eisaugb yen yaugwana? Doba Petrus auni dou en, endagai: Bani Sud Hom Geigdoc Lusud Dau Meren Gogom Augwan.

³⁰Sug Yesus ouman, doba Petrus auni gasesa dag ginohob, kaba, en oungben len, dauntoba len lemedecic en moho gini se loro.

³¹Sug Yesus oungben len dag graga dauwohob, kaba, en ens dau sug lusud leic gomom dou en ucan dou len deit, endagai: Allah esedeb naugb sug leng Yahudi meren mougtir, dara gembala gesa taij meren mougtir, dara leng meru ouforoho se Musa men gomnomna, len laugwan leic mog erij aingma aingma dou dan, dara lotogoto dan daum. Hanoba len leic gomom dou Lusud Meraguna Mebin dan toua. Doba lona hwai debin, kaba, dan deisa indireseb ucugb deitohob.

³²Sug Yesus enara moho dou men logodeh danggohob, kaba, Petrus asbij Yesus aud en. Hanoba en oungben en dougwo, endagai: Ban bemenara moho dag ginlo.

³³Sug Yesus ouman Petrus en mer ginohob, kaba, en eineg medoc susugb aud men logodeh gus. Dara en ei maires dara len toua. Hanoba en enara debin Petrus deseino len laugwan toua, endagai: Setan, ban bihwededau dan namcir. Anai areg ban bauwam an gini, kaba, emaimo areg asesa Allah medoc mesero. Doba aimo dau areg lusud lauwam an dou lenin dous.

³⁴Sug Yesus enara debin Petrus bouwohob, kaba, en eija lusud gus len toua len len aud en an men logodeh sungga toua. Sug len laugwan lacinimohob, kaba, en esulou len, endagai: Gareg en ouwan aimo dan, kaba, en emaimo areg enin ouwan deitero. Doba en ogod se enin medoc mes naugb en aimo ucina mog erij aud gomom ucan dan terimda.

³⁵Anai gareg dau yen en ebehnehino enin mena naugb en maireseb dous, kaba, cum, en mena toua ediyebeiya dau en namcir. Doba gareg dau yen en emebehnehino enin menero, doba en omom icira sug en aimo dan, dara icira sug en esai Mer Geigouhw eisaugb dan dou len gus, kaba, en mena emediyebeiya touwero. Doba en edesma mena maireseb menau geb huhugb namcir.

³⁶Dangga yen yemeic yenin meijina naugb yen yemamcirac icira areg geb se cinogo ginlo. Doba yen yasid yenin dau namcir. Anai sug yen yeic yen meijina naugb yen yamcirac icira areg geb se cinogo gini. Doba cum, maireseb huhugb ediyebeiya dau yenohob, kaba, ara ingma emeb naugb yen deita? Naro, ara ingmemeb naugb yen deitero, anai augwan ediyebeiya dau yenohob.

³⁷Dara sug yen yebeda maireseb huhugb bomom dau yenohob, kaba, yen yemeic ara naugb yen yemauma ucugb deita? Naro, yen yeic ara ara naugb gin touwero.

³⁸Dangga igdebes emeba yen naugb sug yen yos yadi dan indoho dara areg dan desai dou yenohob deseino leng merdoc aihagab Allah dara leng ledis en mer touwero. Doba yen yeic meijus naugb yen yos yadi dan indoho dou len terimda. Anai sug igdebeseba yen, kaba, Lusud Meraguna Mebin dan toua igdebeseba dan dau sug dan demos demadi yen meijoho deseino lusud se lona sug dan demecicugb touwero. Anai se lona ingga, kaba, dan den dara dan Indina men gogouf cucugb erbacec dan. Dara men malaikadir gecabeci loucan dan toua.