Read Manikion LUKAS 1 Bible Online

LUKAS 1 - Manikion bible

LUKAS 1

¹Adehsud, Teopilus, lusud leinyana leic meruwemougb esesa naugb len log dau areg emen emdoc ebdebin an gini augwan deb se surad sug nosohob, aimo dau areg leng nosa len len dou emenohob. Anai len gin, kaba, len leiya aremer augwan gini dau sug aimougtut, terimda edebeij sug ouwedoc toua. Dara len lesai augwan gini dou lusud sungga sungga touohob.

³Dangga hang, dan toua indoc emesgirahesa naugb dan demog augwan gini audud dou ban toua. Dauntoba ban bemeija abuwesa gin touwero. Doba ban becinaga dag areg len lesai dou ban gini, kaba, misen namcir. Anai dan toua deic induwemougb esesa naugb dan dehilon aremer augwan gini ucugb se meiyo deit. Doba dag misen namcirohob.

⁴

⁵Se lona sug Herodes en edag mougt mera medam naugb leng Yudea, kaba, gembala gesa taij hom, moho Sakarias, en toua moongga. Eni Abia men gedeijan naugb en eicara se Allah Men Tuari. Dara en mesouwa Elisabed, en toua dau Harun medebeito hom gini.

⁶Lan gin, kaba, lan lamedreg dau maman Adehsud men gomnomna dara areg en arougb lan an gini mougwa hom touwero. Doba lan laimo areg asesa Allah enin medoc mes augwan terimda.

⁷Doba Elisabed, kaba, en edebdena namcir. Dara iteitogin, kaba, lan lahwas ladag lasudbod touohob.

⁸Dangga ebeij sug Abia an men logodeh leicaresa se Allah Men Tuari, kaba, Sakarias en eng eicaresa naugb en ec areg men ouwadebeda se boromei geb se Tuari men Dimei Gecabeci deseino Allah toua. Anai sug len lerba nomor, kaba, ens en naugb ginohob.

⁹

¹⁰Dangga sug Sakarias einesa Tuari men Dimei Gecabeci gini naugb en ec areg men ouwadebeda deseino Allah enohob, kaba, len gus locuncum dig medigo gabinda toua.

¹¹Doba sug en ec areg men ouwadebeda se boromei gin, kaba, maman Adehsud men malaikad hom en agunya debin en besa desij boromei dig en mesira misen.

¹²Sug Sakarias eiya en ineg, kaba, en medoc eijesa dara en ahau medam namcir.

¹³Doba malaikad ingga oho mer debin en, endagai: Sakarias, ban bemahaulo. Anai Allah en ouman ban abirohob. Dangga cum, kaba, ban absouwa Elisabed, en ouwadan ban abisi hom dou ban, hanoba ban beija en moho toua dag Yohanes.

¹⁴En, kaba, emeic ban abdoc eigouhw medam dou bans. Dara sug mem ouwadan enohob, kaba, emeic lusud leinyana merdoc emagahugouhw an en toues.

¹⁵En, kaba, en moho agas medam deseino maman Adehsud. Dara en emeg anggur mohu dara areg gedougdaha touwero. Anai dau sug mem ouwadan en inegohob, kaba, Mena Gogoufu edag mougt se en medoc mes teiteiyohob.

¹⁶Dangga hang, en emahwan leng Israel leinyana aud meren Adehsud Allah ucugb deit.

¹⁷Anai en ino meren Adehsud en men se Elias men mobisamougb gini. Dauntoba en esedeb lusud merdoc mes naugb sug en en aud len toua. Hang en emenara emaic merner merdoc mes emeineg an mehir ucugb deit. Dara en arougb leng lohoiya meren Adehsud en mer ginohob naugb len lemedreg areg en arougb len an gin toua deitero. Doba meren gauwamara aninim dag leng laimo areg asesa meren Adehsud enin medoc mes gin toua terimda.

¹⁸Doba sug Sakarias ouman dau ginohob, kaba, en enara bauni malaikad mer ucugb, endagai: Ban beic gansins dag ara dou dan, dauntoba dag decinaga gini acgunog dag misen, anai dan insouwa aman amedag lasudbodohob gina?

¹⁹Dangga malaikad esa mer debin en, endagai: Dagiro naugb ban besbes an dan indira? Anai dan gini Gabriel. Dara dan desa desij Allah se bogo naugb dan dousa en toua. Dara enin dous eng esa dan aud ban naugb dan dens dau mer geigouhw gin dou ban toua.

²⁰Dangga hang, ban bouman dan indir deigeigouhw. Dau iteitogin, terimda lona sug augwan gini ebijohob, kaba, ban bemenara moho hom deitero. Doba ban bedag bosum namcir, anai areg dan den dou ban gin, kaba, acgunog dag misen namcirohob. Doba ban abdoc emebdebin an areg dan den dou ban ginerohob.

²¹Doba sug lusud leigtou dig medigo, kaba, len merdoc ebehibeh naugb Sakarias terimda. Dangga sug en emagunya dedemeda aud lenero, kaba, len merdoc omom dau gin namcir. Hanoba len lenara doum, lendagai: Areg edeba Sakarias se Dimei Gecabeci gaba? Hang en emdeinana gina?

²²Doba sug Sakarias agunya dau dimei mes aud lenohob, kaba, en emenara moho dou len deitero. Doba en eic mesira ainyenara dou len dous, anai eni osum namcir. Hang len lecinaga dag ganusbus agunya debin en se dimei mesohob.

²³Doba Sakarias, kaba, en eicara se Allah Men Tuari edebeij men lona augwan ouwa dauwohob. Hanoba en ecicugb dig men tu deit.

²⁴Lona hosa debin gin, kaba, Sakarias mesouwa Elisabed en maga ogom naugb menuhwohob. Dangga en emeic maga ainyes touwero, doba en ecgoneh maga an gini se igda sergem se men tu dous. Hanoba en eimiman enin an gini deseino men lusud, endagai: Allah medoc eineg an danohob. Hang en emamsoho dan touwero. Doba se lona gin, kaba, en eic dan indih dou dan naugb bogod dougwo len gus merir sug len lesmesman dan dag gini terimda.

²⁵

²⁶Sug Elisabed en menuhwa se igda senggemohob, kaba, Allah arougb malaikad Gabriel naugb en einesa cinogo Nasared se leng Galilea meren hancob deit.

²⁷En einesa sungga naugb en edenara dou gidob hom, en moho Mariam. Gidob hom gin, kaba, sud hom Yusub dau mougt mera medam, moho Daud, medebeito, en erba ara debin enohob.

²⁸Dangga sug Gabriel edebeij enohob, kaba, en enara dou en, endagai: Abiresou. Maman Adehsud eseyeiyo ban dougwo areg gecgu augwan terimda. Anai en, kaba, en eigdoumesa ban aboho agas medam deseino en. Dara en eigtou desij ban touohob.

²⁹Sug Mariam ouman gin, kaba, en medoc eijesa medam. Hanoba en eija medocesa, endagai: Areg en enara dou dan gin, kaba, men meijouhw dagiro inggina?

³⁰Doba malaikad oho mer debin en deit, endagai: Mariam, ban bemahaulo. Anai Allah medoc esgiraha se banohob.

³¹Dangga hang, ban boc abums naugb areg dan den dou ban gin deigeigouhw namcir. Anai cum, kaba, ban abinuhwa. Hanoba ban bemouwadan ban abisi hom, kaba, ban bemeija en moho dag Yesus.

³²Eni sud hom moho agas medam. Anai Allah Gedig En Moho Eb Taiba Augwan, kaba, en emeija en dag en Meisi toues. Dangga hang, maman Adehsud Allah en eigdoumesa en moho dag mougt mera medam naugb en eperwei en meijemouwa Daud en mohw naugb en edag leng Israel meren mougt mera medam gin deit. Anai sug nosa, kaba, Daud gini en edag mougt mera medam naugb len dag gin touohob.

³³Dara men goiharaga gini, kaba, emobsara toua deitero. Doba en edag mougt mera medam naugb en esedougwo Yakub medebeitor len laugwan dag gin beb huhugb namcir.

³⁴Doba Mariam en eijidougwo malaikad ucugb deit, endagai: Dan demouwadan dan indisi augwougb dagiro? Anai dan digdobaba gina?

³⁵Doba malaikad enara bauni en mer ucugb, endagai: Sug Mena Gogoufu, kaba, en emedebeij bans. Hanoba Allah men goubesa emoiharaga ban naugb en emousa ban an gins, anai en moho eb taiba augwanohob. Dangga hang, godeh gedig ban bouwadan gini, kaba, Allah emouci en debinim naugb enin men geicara dara emeija en edag en Meisi gin toues.

³⁶Dara ban becinaga dau ban abdamouwa Elisabed, dag nosa, kaba, lusud lowun en moho dag gida hom gedebdena namcir. Dara en edreg dau sug en ouwadan meh gin toua. Doba iteitogini, kaba, en menuhwa se igda senggem ginohob.

³⁷Anai dara Allah, kaba, aremer hom emedreg dau men goubesero. Doba men goubesa edeinyum naugb augwan namcir.

³⁸Sug Mariam ouman gin, kaba, en ousa deisa malaikad mer an, endagai: Dan indoc esgirahesa, anai dan dedag maman Adehsud men sogougwohob. Dangga hang, areg ban ben dou dan gin, kaba, en emeic dou dan toues. Sug Mariam ousa deisa malaikad mer an ginohob, kaba, malaikad eihwededau en namcir.

³⁹Sug Mariam ouman dag en medamouwa Elisabed menuhwohob, kaba, en ec dedemeda aud en se men cinogo gebsa menmod hom se leng Yudea meren hancob.

⁴⁰Sug en edebeij se cinogo inggohob, kaba, en einesa Sakarias men tu. Hanoba en ou Elisabed, endagai: Allah eic gesgigouhwesa dou ban dougwo areg gecgu augwan namcir.

⁴¹Sug Elisabed ouman Mariam ou en dag gin inegohob, kaba, Mena Gogoufu atij en medoc mes toua namcirohob. Hang meh geisa Elisabed menuhwa ingga einyeinya dag agahugouhw medam namcir. Dara Mena Gogoufu atij en medoc mes toua.

⁴²Dau kaba, en esa mer medam an dou en, endagai: Allah en eic geigouhw dou ban namcirohob edreg dau ligida gus laugwan. Dara en eic geigouhw dou ban abih geisa ban abinuhwa ingga touohob.

⁴³Dangga dagiro, naugwe hang, indan Adehsud en mem, ban bedebeij dantog gina?

⁴⁴Anai ban bouman deigeigouhw. Sug ban bou dan iteitograga, kaba, godeh geisa se dan indinuhwa gini, en agahugouhw beinyeinya medam naugb banohob.

⁴⁵Dara maman Adehsud eic geigouhw dou ban toua, anai ban bemohoiya en merero. Doba areg en os dou ban ginohob, kaba, ban bod abina debsa en an dag en emeic augwan gini dou ban toues.

⁴⁶Sug Elisabed agahugouhw an Mariam dag graga ouwohob, kaba, Mariam en ohwaresgwemer bagahugouhw an Allah deseino Elisabed an men lusud deit, endagai: Dan deigdoumesa indan Adehsud en moho agas namcir.

⁴⁷Dara dan indoc agahugouhw an indan Allah Gedig En Eigdoc Dan Dau Sesar Men Gogom Augwanohob toua.

⁴⁸Anai en medoc moc dougwo dantog indoho eb tainya gin touwero. Doba en medoc eineg an dantog ginohob. Dangga ban bouman deigeigouhw. Dau lona gin, kaba, lusud laugwan lagahugouhw an Allah men geigouhw geb dou dan gin terimda toua.

⁴⁹Anai len leiya, doba Allah Gedig En Mobisamougb namcir, kaba, en eic areg mera eisaugb namcir dou danohob. Hang dan deigdoumesa en moho toua dag ecabeci.

⁵⁰Dara en medoc emeineg an maman gin dousero. Doba gareg dau maman mamehir dara maman mamdebeitor en ahau dau en, kaba, en medoc eineg an toua terimda.

⁵¹Doba lusud areg len leimiman lenin an meren geicara deseino len gus, kaba, en os len laugwan bargehilo. Dara areg len lauwam an deb gini, kaba, en ougb sogo maga dougwo merbes an gin toua namcir. Anai en mobisamougb dau augwan namcirohob.

⁵²Hang en emamsoho lusud areg len leigdoumesa len meroho eb taiba gin touwero. Doba en owun len dau meren maija moc beb tainya namcir. Doba leng meroho eb tainya, kaba, en eigdoumesa len meroho eb taiba deit.

⁵³Dara en eic geigouhw dou leng merunggwereij. Doba leng merisoho mougb, kaba, en ecicugb len leihweda dau en dara len merisira mogud dous.

⁵⁴Dara en medoc eineg an men sogougb mamang Israel naugb en ousa maman terimda. Anai en medoc moc dougwo areg en os dou maman mamjemouwer dara Abraham en medebeitor maman touwero. Doba en eiseisan areg en os dou maman gini beb huhugb terimda.

⁵⁵

⁵⁶Dangga sug Mariam eigtou desij Elisabed edebeij igda homoiyohob, kaba, en ecicugb dig men cinogoda.

⁵⁷Sug Mariam eihwedau Elisabed ginohob, kaba, Elisabed men igda edeinyum naugb sug en ouwadan meisi hom.

⁵⁸Dara Elisabed mena mehir, dara mem mehir, an mosur gus gus, sug len louman dag maman Adehsud en medoc eineg an Elisabed dag ginohob, kaba, len laimo en naugb len lagahugouhw medam an maman Adehsud en toua namcir.

⁵⁹Dangga lona senggai debin sug Elisabed ouwadan meh ginohob, kaba, en mosur laugwan, len len aud en naugb sug len lec meisi gin en mos dau. Sug len lec mos dauwohob, kaba, len louwan leic mena moho dag Sakarias debin gin dou en toua.

⁶⁰Doba Elisabed en en dougwo len, endagai: Yen yemeic en moho dag Sakarias, isnaro. Doba yen yeic en moho dag Yohanes dou en dous.

⁶¹Doba len lenara launi dou en ucugb, lendagai: Ban abusur lingma meroho dag Yohanes gini, dauntoba ban beic baija danggero.

⁶²Dobnaro, kaba, len leic merisira lainyenara dou en mena Sakarias naugb laijidougwo en deit, lendagai: Ban beic ban abisi gini en moho baija ara?

⁶³Dangga Sakarias en eic mesira ainyen igdahab naugb len ledeic dou en. Sug len leic dou enohob, kaba, en og meisi moho dag Yohanes debsa dou len toua. Hang len laugwan leimiman dau gin namcir.

⁶⁴Doba sug en og meisi en moho gin inegohob, kaba, Allah agaha en mers iteito sungga. Dara en metemouwu einyeinya naugb en enara moho toua. Hanoba en agahugouhw an Allah namcir.

⁶⁵Doba sug len marsir leiya dau gin, kaba, len merdoc eijesa dara len lahau dau gin namcir. Dara len lecic dau aremer gin bagaha se menmod se leng Yudea meren hancob augwan toua.

⁶⁶Dangga lusud sug len louman dau gin, kaba, len leis deisa merdoc mes namcir. Anai len lecinaga dag maman Adehsud men goubesa oiharaga Yohanesohob. Hanoba len lauwam se merdoc mes, lendagai: Godeh gini sug edag sud, kaba, emedag aresa.

⁶⁷Doba Yohanes mena, Sakarias, kaba, Mena Gogoufu einesa en medoc mes deit. Hanoba en eic mou ouforoho dou Sakarias naugb en esai Allah en mer eisaugb Yesus men geicara augwan asesa dou leng se men tu deb toua. Dangga en eic aresgwemer bahu dou len endagai:

⁶⁸Eigouhw naugb maman magahugouhw an maman Adehsud Geis Huhugb gedig en edag mamang Israel maman Allah. Anai en ouwaden dau bogo naugb en encoho aga mamanohob.

⁶⁹Hanoba en eigdoumesa men sogougb Daud en medebeito hom en moho toua naugb en eigdoc maman dau sesar men gogom augwan dareg mobisamougb namcir.

⁷⁰Anai en os dou maman ogdoc leng lecabeci gedig len lesai en moro sug nosa deb dag en eigdoc maman dau maman moc meren goubesa. Dara en esga maman dau leng merdoc mog mog an maman len merisira gin touohob.

⁷¹

⁷²Dara en enara dou maman dag en medoc moc dougwo men gos dou gecabeci dou maman mamjemouwer gin touwero. Doba en aimo areg en os dou len naugb en eic geigouhw dou len an maman toua terimda.

⁷³Hanoba en ouwara debin gin dou maman mamjemouwa Abraham dau sug en esga maman dau maman moc merisira dag ginohob, kaba, dag maman mamahau dau len toua deitero.

⁷⁴

⁷⁵Doba maman maicara maimo areg gecabeci dara areg asesa enin medoc mes terimda Lona Sug Ouwedoc deseino en toua.

⁷⁶Sug Sakarias ens dau Yesus men geicara dou leng leigtou se men tu dag ginohob, kaba, en ens dau en meisi Yohanes men geicara se lona daiyamo gacin dou len ucan deit. Hanoba en eic aresgwemer bahu dou len deit, endagai: Doba dan indisi, ban, kaba, Allah Gedig En Moho Eb Taiba augwan namcir en emeigdoumesa ban aboho naugb ban besai en moro dou lusud laugwan toua. Anai en arougb ban naugb ban beino maman Adehsud, dauntoba ban besedeb len merdoc mes naugb sug en en aud len. Aninim dag lusud lesedeb ucina naugb mougt mera medam sug en en aud len toua.

⁷⁷Dangga hang, sug ban bedebeij lenohob, kaba, ban bedens meijouhw asesa dou len dag sug maman Allah aigdougwo meren sesar augwan dau len. Hanoba en emeigdoc len dau sesar men gogom augwan toues.

⁷⁸Anai sug en medoc eineg an maman dag ginohob, kaba, en esedeb sud hom dag igda gerba mohora naugb sug en ouwaden dau bogo naugb maman, dauntoba men mouf gini, kaba, einyedei lusud areg len leigtou se lobeigbogo dara gomom meniha. Hanoba men mouf gini, kaba, aisema maman se ucina naugb sug maman maic gesgigouhwesem ucucugb terimda toua.

⁷⁹

⁸⁰Doba Yohanes gin, kaba, en mog eiloboro namcir. Dara en medoc agadgeij dougwo aremer augwan toua. Dangga hang, en emeigtou desij lusudero. Doba en eigtou dou enin se lomougwisa terim edebeij lona sug en ens enin ainyes dou leng Israel laugwan naugb sug en esai Allah moro dou len toua.