Read Manikion LUKAS 10 Bible Online

LUKAS 10 - Manikion bible

LUKAS 10

¹Sug maman Adehsud enara dou merug homoi graga dauwohob, kaba, en eigdoumesa merug sud homoi sisedeisu dag men logodeh deit. Hanoba en ohw lahwai lagugum naugb len leino en men se astesda beimes dara astesda cinogo sug en ouwan eisasa toua.

²Sug en emarges len debma, kaba, en esulou len, endagai: Yen yocuncum dou sud hom men lo gini, dauntoba en esa lingma dara yen naugb yec men meij augwan deb naugb en toua. Anai men meij gin einyana inggebga, doba leng lec, kaba, lemeinyanerodaha.

³Dara sug yen yeihweda, kaba, yen yesedougwo deigeigouhw namcir. Anai dan darougb yen dag domba se leng ledag mihiloro mog mog merufu dangga.

⁴Doba sug yen yeihweda, kaba, yen yemoho meijen i moto an aregoufu, dara i aga lusud. Dara yen yemodo hwigbeimos hom dara yen touwero, doba yen yecus dous. Dara sug yen yagasa lusud se ucina mogumsi, kaba, yen yemenara yemaciduhim touwero. Doba yen meijohora esesa naugb yen yesai Allah moro dou lusud terimda.

⁵Dara sug yen yeinesa sud hom en men tu, kaba, yen yemesai Allah moro dou len sug nosa touwero. Doba yen you len dag Allah eic gesgigouhwesa dou len dougwo augwan nosahabi.

⁶Sug len lebin yen meijir an Allah men gesgigouhwesa gin, kaba, gesgigouhwesa eb naugb len toua. Doba sug len lemebin yen meijir an ginero, kaba, yen yeic yen meijir an gin ucugb dau len toua.

⁷Dara sug len lebin yen an Allah men gesgigouhwesa ginohob, kaba, yen yemeihwedesa tu ingma dau lenlo. Doba yen yeigtou se tu hom ingga namcir dous. Dara areg len leic dou yen naugb yen yetara era yen yegara, kaba, yen yemoguro debin lenlo. Doba yen yeic yet dara yeg namcir. Anai sug yen yesai Allah moro dou len, kaba, edeinyum naugb sug len lousa yen toua.

⁸Dara areg lusud len lougwan deb naugb yen, kaba, yen yemesilo. Dangga sug yen yeinesa beimes homohob, hanoba lusud lebin yen naugb letara desij len, kaba, yen yetara aibibrida namcir.

⁹Dara yen yeic geigouhw dou leng areber se cinogo ingga toua. Hanoba yen yesai Allah mer debin gin dou len toua, yendagai: Allah men lona naugb sug en oiharaga yen ucugb, kaba, ebeij deinyorohob.

¹⁰Doba astesda beimes sug yen yeinesohob, doba len lemebin yenero, kaba, yen yeic meijaga se meren ucina augwan.

¹¹Hanoba yen yeijara dou len, yendagai: Allah esedeb naugb en oiharaga yen ucugb touohob, doba yen yemouwanero. Dangga yen yauweila, anai emen emasid emenin dau meijen ara ara dousero. Doba emen emetitir emen emohora an meijen cinogo mor geira emohora ucugb aud yen ginbo toua. Dauntoba yen yecinaga dag emen emarges yen deb namcirohob. Anai emen emeic cumougt geigouhw dou yenohob, doba yen yoguro namcirdaha.

¹²Sug Yesus esulou men logodeh graga debin gin bouwohob, kaba, en eic medagas hom dau leng Sodom bogod cinogo dou len deit, endagai: Yen youman deigeigouhw. Anai se Lona Sug Allah Ogod Aremer Aga Lusud, kaba, cinogo areg len lemebin yenero gini, kaba, Allah eic gogom medam edreg dau leng Sodom dou len laugwan namcir.

¹³Sug Yesus esulou men logodeh icira meren geicara dauwohob, kaba, en ahandenda dau cinogo homoi an meren geicara, ucan deseino len deit, endagai: Ogom medam naugb yeng se cinogo Korasin, dara yen se cinogo Bedsaida. Anai dan dens dau ganusbus einyana daos debin Allah mer dou yenohob. Doba yen yemesga meijen sesar naugb yemahau an dougworo. Doba yen meigdoc agadgeij dougwo namcir. Dangga hang, se Lona Sug Allah Ogod Aremer Aga Lusud, kaba, en medoc eineg an leng se cinogo Tirus dara Sidon gini edreg dau en medoc eineg an yen toua. Anai dan decinaga dau sug dan demdens ganusbus ingma dag gin dou len sug nosa, kaba, len merdoc emagadgeij dag yen ginero. Doba len merdoc eijesa an meren sesar namcir. Hanoba len leg sansun morgor, dara leiyoiyo se hirog debin gin lansins dag len merdoc obsara dau sesar touohob.

¹⁴

¹⁵Dara yeng se cinogo Kapernaum yen yeigdoumesa yenin meijoho bedebeij se bogo danggei? Naro. Allah owun yen meijoho naugb en erba yen se dum smougb dous.

¹⁶Sug Yesus ahandenda dau cinogo homoi deseino men logodehohob, kaba, en esulou men logodeh graga debin gin deit, endagai: Gareg en ouman yen meijir an areg yen yesai dou en gin, kaba, gini aninim dag en aimo dan indir touohob. Doba gareg en otogoto yen an gin, kaba, gini aninim dag en otogoto dan touohob. Dara gareg en otogoto dan indir gin, kaba, aninim dag otogoto sud hom gesa dan aud yen gini touohob.

¹⁷Sug Yesus men logodeh merug sud homoi sisedeisu graga len ledecicugb dau sug len lesai Allah moro dou lusudohob, kaba, len lecicugb dara merdoc agahugouhw an namcir. Hanoba len ledeimiman dou Yesus, lendagai: Adehsud, emen emesai Allah moro dou lusud. Dara ememeic geigouhw dou leng areber aiyei dousero. Doba sug emen emeic ban aboho naugb emocirma merna mog mog geisa se lusud merdoc mesohob, kaba, len laimo emen emir naugb lougb dau lusud merdoc mes namcir toua.

¹⁸Doba Yesus ousa len merir an gini. Hanoba en esulou len, endagai: Yen youman deigeigouhw. Anai dan deic goubesa dou yen naugb yen yaiyan hinogo dara arou mog mog augwan. Dara dan deic goubesa dou yen, dauntoba yen yes agadgeij dougwo meijen moc Setan gin toua. Anai dan deiya Allah ahacugb en dau bogo obsara abeba dan indires bedag lehinyeinya terimda se cinogo ginohob. Dangga sug meren gogom en bainyen yen, doba yen yemeijeijero.

¹⁹

²⁰Doba yen yemeimiman dau sug merna mog mog laimo yen meijir ginlo. Doba yen meigdoc agahugouhw an Allah, anai en og yen meijoho se bogohob. Hang yen yagahugouhw an en an gin dous.

²¹Sug Yesus ens augwan dag graga dou men logodeh merug sud homoi sisedeisu gin dauwohob, kaba, Mena Gogoufu eic medoc agahugouhw an gin dou en toua. Hanoba en en sijo dou en Mena Allah, endagai: Akeinya, ban bedag mougt mera medam naugb areg geb se bogo, dara areg geb se cinogo gin augwan toua. Dangga hang, dan demen sijo medam dou ban. Anai aban aremer areg ban besedebohob, kaba, ban bemens meijouhw augwan dou leng meru ouforoho dara leng lecinaga aremeijouhw augwanohob len touwero. Doba ban abdoc esgirahesa naugb ban bens augwan gini dou leng meroho emaiyero dous. Anai gini aimo asesa areg banin bouwan danggohob.

²²Sug Yesus en sijo dou en Mena bouwohob, kaba, en enara dou lusud laugwan, endagai: Areg dan Indina en esinsin se bogo dara cinogo ginohob, kaba, en ogugwo augwan dou dan. Dangga hang, sud hom ingma, kaba, en emecinaga areg asesa danin indoc mes augwan asesa touwero. Doba dan Indina enin eng ecinaga dau augwan gini asesa namcir. Dara sud hom ingma, kaba, en emecinaga areg asesa Allah enin medoc mes augwan touwero. Doba en Meisi dara gareg dan dens dau areg asesa Allah enin medoc mes dou enohob, kaba, emenin dous eng emecinaga dau augwan gini dag misen dous.

²³Sug Yesus enara dou lusud laugwanohob, kaba, en ed men logodeh laugwan debinim. Hanoba en enara dou len, endagai: Yen youman deigeigouhw. Allah eigdoumesa yen meijoho edreg dau lusud laugwanohob. Anai leng lesai Allah moro sug nosa, dara leng Israel meren mougt mera medam sug nosa, kaba, len laugwan merdoc eisa naugb len leiya dan an indan geicara. Dara len louwan louman dau areg dan desai dou yen gin toua. Dobnaro. Yenin dous eng yeiya dan an augwan gin dous.

²⁴

²⁵Se loneinda deit, kaba, sud hom dau leng meru ouforoho se Musa men gomnomna en eic en maga ainyes deseino Yesus naugb enara baineino Yesus men. Hanoba en eijidougwo, endagai: Bani sud hom mou ouforoho naugb bens aremeijouhw augwan asesa dou lusud. Hang ban bemens dau indan geicara areg dan daimo naugb sug Allah eic maireseb huhugb dou danahabi.

²⁶Doba Yesus auni en mer ucugb, endagai: Sug ban becic se Musa men gomnomna, kaba, ban becic meijouhw eisaugb ara naugb sug Allah eic maireseb huhugb dou bana?

²⁷Dangga sud hom mou ouforoho gini en ecic dau areg geb se Musa men gomnomna dou Yesus ucugb, endagai: Ban abdoc gororougb Allah, aban Adehsud, dara ban abdoc augwan, dara aban geicara augwan, dara aban goubesa augwan, dara aban gauwamara augwan toua. Dara ban abdoc gororougb len gus, aninim dag ban abdoc gororougb banin abaga toua.

²⁸Sug Yesus ouman en mer an gini, kaba, en ousa deisa en mer an, endagai: Areg ban becic moho augwan gin, kaba, asesa dag misen namcir. Dangga sug ban beicara besogwesa moho gin augwan namcir, kaba, Allah eic maireseb huhugb dou ban toua.

²⁹Doba sud hom mou ouforoho graga, kaba, en eija Yesus baugb magai dougwo enin deit, endagai: Dan indoc gororougb insi, kaba, gara lena?

³⁰Dangga Yesus eic gainyenara hom ucan gin dou en deit, endagai: Se lona hom, kaba, sud hom en ouwaden dau Yerusalem dig Yeriko. Sug en edebeij se ucina mogumsi, kaba, lusud merug mog logod en naugb lesma men aremougb augwan dau en. Doba len larges en maga namcir bahauwouwa se ucina mes deb.

³¹Arenggos, kaba, gembala gesa taiji hom, en toua ouwaden asa ucina hom gini. Doba sug en eiya sud hom graga ahauwouwa dougwo ucina, kaba, en emousa enero. Doba en eitig dig ucina nagama beihwededau en namcir.

³²Cum cum deit, kaba, sud hom dau Lewi merdebeitor, en toua eragasa ucina gini. Dangga sug en edebeij irir sud hom gahauwouwa ginohob, kaba, en emousa enero. Doba en esa bauweila dangga dous. Hanoba en eitig dig ucina nagama bededau en toua namcir.

³³Doba cum cum, deit, kaba, sud hom dau leng Samaria, en toua edebeij se usi ingga deit. Dangga sug en eiya sud hom graga, kaba, en esogwa dau keledai medgomori naugb ousa en toua. Anai en medoc erij an en medamdaha.

³⁴Dangga sug en edebeij enohob, kaba, en eir anggur mohu badu en meramera augwan. Dara en eir mani dag ariawen debin mera gini toua. Hanoba en eic minc meti, bahud dougwo meramera augwan namcir. Dauwohob, kaba, en eigdoumesa en se men keledai medgomori. Hanoba en en naugb ahwan en se tu dagam hom. Sug lan ladebeij tu ginohob, kaba, en esedougwo sud hom gin se loba hom sungga toua.

³⁵Sug edebeij lonamenohob, kaba, sud hom dau leng Samaria graga, en eic aregoufu perag mogo hwai dou sud hom gesedougwo tu dagam gini. Hanoba en esulou en debin gini, endagai: Ban bagauwesa sud hom gin deigeigouhw namcir. Sug ban beic aban ara ara edreg dau aregoufu perag mogo hwai gin dou en, kaba, dan democ aban moc ingga ucugb dou bans sug dan decicugwen gin toues.

³⁶Sug Yesus eic gainyenara dag gin dou sud hom mou ouforoho gragohob, kaba, en eijidougwo en ucan, endagai: Ban boudesa dagiro? Dau merug homoi gin, kaba, gareng medoc eineg an en dag en mesi misena?

³⁷Doba sud hom mou ouforoho gini en auni ucugb dou Yesus, endagai: Dan doudesa sud hom gedig en medoc erij an en naugb ousa enohob, kaba, gin eng en mesi misen. Dangga Yesus ousa deisa en mer an gini, endagai: Areg ban ben gini misen. Hang ban toua beihweda naugb beicara dag gin toua.

³⁸Sug Yesus dara men logodeh len lec merohora aud dig Yerusalem deit, kaba, len ledebeij se cinogo hom. Sug len ledebeijohob, kaba, gida hom, moho Marta, ebin len se men tu.

³⁹Marta medemeito hom, en moho Mariam, en moongga toua se tu ingga. Dangga sug Yesus edidib Allah mer men meijouhw dou lusud, kaba, en emousa medamouwa an ared gougwanero. Doba en eigtou desij maman Adehsud Yesus naugb ouman dau areg en edidib gin dous.

⁴⁰Doba Marta en moms meijog icira ared gen ougwan namcir. Dangga, kaba, en mer aic Yesus, endagai: Adehsud, ban barougb dan indameito Mariam en ousa naugb aman amougwan ared an yenahaba. Anai danintodaha gina? Era ban abdoc emerij an daneroei?

⁴¹Doba maman Adehsud en enara bauwun en mer, endagai: Marta, Marta, ban abdoc eijesa dara ban abums meijog icira aremer einyana, anara? Anai aremer hom dous eng esloulougb edreg dau aremer gus augwan namcir. Dangga sug Mariam en ouci aremer hom geigouhw ginohob, kaba, lusud lemesma dau en deitero, doba ebsugeb naugb en namcir toua.