Read Manikion LUKAS 11 Bible Online

LUKAS 11 - Manikion bible

LUKAS 11

¹Se lona hom deit, kaba, Yesus en edocuncum se usi hom. Sug en ocuncum ouwohob, kaba, sud hom dau men logodeh en acgeij en, endagai: Adehsud, ban barautut emen naugb sug emen emocuncum asesa dou Allah touahabi. Aninim dag Yohanes arautut men logodeh naugb sug len locuncum asesa dou Allah sug nosa touohob.

²Dangga Yesus auni dou en, endagai: Sug yen yocuncum dou Allah, kaba, yen yocuncum dag gini, yendagai: Akeinya, emen emouwan naugb lusud laugwan leigdoumesa dara lesijaresa ban hom dous, anai bani ecabeci namcir. Dara emen emacgeij ban ben naugb boiharaga emen se cinogo gin toua.

³Dara ban beic ared edeinyum astesda lona augwan dou emen toua.

⁴Dara ban baigdougwo emen sesar augwan dau emen, aninim dag emen emaigdougwo len gus meren geicara gecgu dou emen dau len toua. Dara ban bemesa areg ainyen emen aud sesar touwero. Doba ban beseyeiyo emen dougwo augwan gin terimda.

⁵Sug Yesus arautut men logodeh se gocuncumohob, kaba, en eic gainyenara hom debin gin dou len dag len lemarges dau gocuncum gin touwero, doba len locuncum esesa terimda. Hanoba en enara dou len, endagai: Sud hom dau yen, kaba, en eihwedaud mesi hom se lobeingmod naugb en edacgeij en, endagai: Insi, ban beic roti mogo homoi dou danahabi. Anai dan insi hom en en iteitograga naugb en atou desij dan se indan tuohob. Doba indan ared ingmemeb naugb sug demeic dou en deitero.

⁶

⁷Doba en mesi ingga, kaba, en auni dau dimei mes dou en, endagai: Ban abir emebirker emen ucucugblo. Anai dan douf misis bagadgeijohob. Dara dan dacogo dan indihir se aboti hom touadaha. Dangga hang, dan demeisa naugb demeic ared dou ban dagiro?

⁸Sug Yesus eic gainyenara dag graga dou men logodehohob, kaba, en eijidougwo len ucan gin deit, endagai: Sug sud hom gini en eisa dau gatouda naugb eic ared dou en, kaba, yen youdesa en eic dou en dag en mesi misenei? Naro, doba yen youman deigeigouhw, anai en eija merebin en terimda. Hang en emeisa naugb emeic augwan dou en toua.

⁹Dangga hang, dan den dou yen, dendagai: Sug yen youwan yacgeij ara ara dau Allah, kaba, yen yemouf yen meijirs an gin touwero. Doba yen yacgeij en an ucucugb terimda. Dara sug yen meigdoc etrij icira ara ara dau Allah, kaba, yen meigdoc emtereta dau ginero. Doba yen meigdoc esrougb an gin namcir. Dara sug yen youwan youma misis se Allah men tu naugb en ousa yen toua, kaba, yen yemarges dau gin touwero. Doba yen youma misis dougwo en terimda toua.

¹⁰Anai gareg en emouf mers an areg en acgeij dau Allah enero, doba en medoc esrougb an gin namcir, kaba, cum, Allah emeic dou ens. Dara gareg en medoc emtereta dau sug en acgeij ara ara dau Allah, doba en medoc etrij icira gin namcir, kaba, cum, yen yemesma dau ens. Dara gareg en emesa doc dau sug en ouma misis se Allah men tuero, doba en ouma misis dougwo en toua terimda, kaba, cum, Allah emousa en toues.

¹¹Anai gareg dau yen sug yen meijihir, len lacgeij hosei dau yen, kaba, yen yeic hinogo dou lenei? Era sug len lacgeij berougb mougb dau yen, kaba, yen yeic arou dou lenei? Naro, yen yemeicara dag gin dou lenero.

¹²

¹³Dangga sug yen yeic ara geigouhw dou yen meijihir dag ginohob, kaba, yen Meijina se bogo en toua emeic areg gecgu dou yen touwero. Doba en eic Mena Gogoufu dag mogud dou yen dous. Anai yen, kaba, meijen geicara einyana dag mog mog namcir. Doba en, kaba, men geicara augwan ecabeci mogud an yen dous.

¹⁴Se lona hom deit, kaba, Yesus ocirma mena mog mog dau sud hom gosum. Sug mena mog mog eihwededau enohob, kaba, sud hom graga enara moho ucugb deit. Dangga sug lusud leiya dau gin, kaba, len leimiman namcir.

¹⁵Doba ligbum, kaba, len lesbes an Yesus men goubesa namcir, lendagai: En ocirma merna mog mog dau lusud ogdoc Allah men goubesero. Doba ogdoc merna mog mog meren mougt mera medam, moho Belsebul, men goubesa dous.

¹⁶Dara ligbum deit, kaba, len louwan lainyen en. Hanoba len lenara dou en, lendagai: Ban bens ganusbus ingma dau bogo dou emenahabi. Dauntoba emen emecinaga dag aban goubesa, kaba, en dau Allah enin eng dag misenohobei? Era naroei?

¹⁷Doba Yesus en ecinaga len merdoc mes an ginohob. Dangga hang, en enara dou len, endagai: Sug lusud se hancob hom lenin lebemocedoum, cum, kaba, len lemedag hom deitero. Doba len leigdaum laisoboro namcir. Era sug lusud se tu hom len lohw merir doum, cum, kaba, len toua lemedag hom deitero. Doba len leigdaum laisoboro dangga toua.

¹⁸Dangga toua, sug Setan enin ebemoc dou men logodeh, kaba, men goiharaga ebsugebei? Naro, emebsugeb deitero. Doba cum, kaba, len leigdaum laisoboro dangga toua. Dara yen yowun dan indoho dag dan docirma Setan men logodeh dau lusud merdoc mes ogdoc Setan, era Belsebul, men goubesa gin dous.

¹⁹Doba sug dan docirma merna mog mog dau lusud ogdoc Belsebul men goubesa dag gin, kaba, dagiro eisaugb yenin meijen lusud gina? Len toua locirma merna mog mog dau lusud ogdoc Belsebul men goubesa ginei? Hang len lenin lemowun yen meijoho dag areg yen yenara eisaugb danohob, doba augwan gini dag yen yauwam an didi namcirohob. Anai len lecinaga dag len lemocirma merna mog mog dau lusud emogdoc Belsebul men goubesa ginero, doba ogdoc Allah enin men goubesa gin dous. Dangga hang, sug len locirma merna mog mog dau lusud ogdoc Allah men goubesa gin, kaba, gini ansins dag dan docirma merna mog mog gini dau lusud ogdoc men goubesa gin touohob. Doba sug dan toua docirma merna mog mog dau lusud ogdoc Allah men goubesa gin, kaba, gini ansins dag Allah men lona naugb sug en oiharaga lusud ucugb edebeij touohob.

²⁰

²¹Sug Yesus owun len dag gragohob, kaba, en eic gainyenara hom ucan dou len deit, dag en emocirma merna mog mog emogdoc Setan men goubesero, doba ogdoc Allah men goubesa dous. Hanoba en enara dou len, endagai: Sug sud hom mobisamougb en esedougwo enin men tu, kaba, lusud lemeinesa naugb lemeida aremougb dau men tu touwero. Anai en os men aregog augwan naugb ebehnehino dougwodaha.

²²Doba sug sud hom mobisamougb namcir en en naugb esara dara sud hom graga, kaba, men disij owun en an men aregog augwan gin obsara dau en namcir. Dangga sug en esma men aregog augwan dau enohob, kaba, en eida men ariloboc augwan leisum namcir.

²³Sug Yesus eic gainyenara dag graga dou len dauwohob, kaba, en esulou len ucan deit, endagai: Gareg dau yen en emesan danero, kaba, en ebemoc dou danohob. Dara gareg dau yen en emousa dan naugb aman amehilon lusud aud Allah men goiharaga gin touwero, kaba, gini aninim dag en ocirma len dau Allah men goiharaga ginohob.

²⁴Sug Yesus esulou lusud dag gragohob, kaba, en esulou len dougwo merna mog mog ecicugb se len merdoc mes deit, endagai: Sug mena mog mog hom en agunya dau sud hom medoc mesohob, kaba, en ohw acec miseda mougb, dauntoba en ehilon usi naugb sug en atousa. Doba sug en emesma ingmaro, kaba, en enara dou enin se medoc mes, endagai: Dan decicugb se indan tu mohon gedig dan den dau graga ucugb deit.

²⁵Dangga sug en ecicugwohob, kaba, en edeiya, doba sud hom men tu ingga, kaba, ecabeci deb namcir. Dara aremougb augwan debinim toua dauwohob.

²⁶Hang en emedehilon mesir merug senggai gedig len merug mog edreg dau en namcir naugb len leinesa leigtou se sud hom men tu gin deit. Dangga, kaba, sud hom men geicara ecgu edreg medam dau nosa deit toua.

²⁷Sug Yesus esulou len dougwo merna mog mog bouwohob, kaba, gida hom se len ingga merufu en omi an en, endagai: Gida hom gouwaden ban dara geic arij bauwaha ban gini, kaba, Allah eic geigouhw dou en namcir.

²⁸Doba Yesus ousa deisa en mer an gini. Hanoba en enara, endagai: Areg ban ben gini, kaba, misen namcir. Doba gareg en ouman Allah mer, dara eicara baimo toua, kaba, Allah eic geigouhw medam bedreg dau gin dou en namcir.

²⁹Doba sug lusud louwa debin en eiseisaugb namcir, kaba, en owun len meroho. Hanoba en enara dou len, endagai: Yen youwan naugb dan deic ganusbus hom dou yen deit. Doba dan demens ganusbus hom deit dag Yunus dou yen dous. Anai meijen geicara augwan ecgu namcirohob.

³⁰Dangga aninim dag Yunus en edag gansins dou leng se Niniwe sug nosohob, kaba, Lusud Meraguna Mebin dan toua demedag gansins dou yen meijug mog gin toues.

³¹Hang se Lona Sug Allah Ogod Aremer Aga Lusud Laugwan deit, kaba, gida mougt mera medam dau dig dum mer, kaba, en toua emesa desij yen naugb emehin meresa yen an meijen geicara dou dan gin toues. Anai en, kaba, sug en ouman dau Solaiman en mou ouforoho naugb en edidib aremeijouhw asesa dou lusud, kaba, en medoc emesbesero. Doba en en aigus dau sug cinogo moc ougbdesa naugb en edouman areg en edidib gin toua. Doba areg dan desai dou yen gini, kaba, mera eisaugb namcir dau areg Solaiman en edidib dou lusud sug nosohob. Doba yen yemen aud dan naugb yen youman dau areg dan desai dou yen ginero. Hang en emehin meresan yen se lona ingga toues.

³²Dara se Lona ingga, kaba, leng se cinogo Niniwe len toua lemesa desij yen naugb len lemehin meriresa yen an meijen geicara dou dan gin toues. Anai sug Yunus ebedbed Allah mer dou len, kaba, len lemaiyan merdocesem an meren sesarero. Doba len lesga dara lahau an dougwo dedemeda namcir. Doba areg dan desai dou yen gin, kaba, mera eisaugb namcir dau areg Yunus en esai dou leng se Niniwe sug nosohob. Doba yen yemesga meijen sesar dara yen yemahau an dougwo touwero. Doba yen yaiyan meigdocesem terimda. Hang len lemehin meriresan yen se lona ingga gin toues. Yen youman dan indir an areg dan den dou yen deigeigouhw namcir. Anai augwan gini asesa dag misen toua.

³³Sug Yesus owun lusud an meren geicara dauwohob, kaba, en eic gainyenara dau meren geicara, dag mouf gaisema lusud ucan dou len deit. Hanoba en esulou len, endagai: Sug sud hom en ei men smougwohob, kaba, en emecgoneh dara emeic ara gus bemaihiron dougwo mouf gin touwero. Doba en ob mouf gin deb ainyes. Dauntoba sug lusud gus leinesa men tu, kaba, mouf gini aisema len laugwan toua.

³⁴Dara yen meijires gin toua aninim dag mouf naugb yen meigdoc mes. Dangga sug yen meijires esgiraha, kaba, areg geb se yen meigdoc mes augwan toua edag mouf esesilo namcir. Doba sug yen meijires dag lobeigbogo, kaba, areg geb se yen meigdoc mes toua dag lobeigbogo namcirohob.

³⁵Dangga hang, yen yesedougwo yen meijires deigeigouhw dau areg gecgu namcir. Dauntoba lobeigbogo emaihiron dougwo mouf gin deitero.

³⁶Anai sug areg gecgu hom emeb dougworo, doba meijen geicara augwan dag mouf ginohob, kaba, mouf esgiraha baisema yen meigdoc mes augwan toua. Aninim dag lampu sug areg gogor emeb dougworo, kaba, mouf aisema yen toua terimda.

³⁷Sug Yesus eic gainyenara dag graga dou lusud bouwohob, kaba, sud hom dau leng Parisi en acgeij Yesus naugb ladetara se men tu. Sug lan ladebeij tuohob, kaba, lan laigtou naugb latara.

³⁸Sug Yesus etara dara en gin, kaba, en emaimo Musa men gomnomna naugb en emedu mesira dauwahabero. Doba en eic mesira gogor batara dous. Dangga, kaba, sud hom dau leng Parisi gini en eimiman dau gin namcir.

³⁹Doba maman Adehsud enara bauni dou en an en mesir, endagai: Yeng Parisi, kaba, yen yeic meijuwemougb esesa naugb yen yedu areg geb dig medigo augwan terimda. Doba yen meigdoc mes, kaba, atij an gagungunara, dara areg mog mog namcir.

⁴⁰Yen meiju edgomei? Anai yen youdesa endag sud hom gesinsin areg geb dig medigo, kaba, en emesinsin areg se mes touweroei? Naro. En emesinsin se medigo dousero. Doba en esinsin areg geb se mes toua.

⁴¹Dangga hang, yen yeic areg yen yagungun len gus an ginohob, kaba, yen yagaha yen meisira ingma dou len merunggwereij dag mogud toua. Anai sug yen yeicara dag gini, kaba, emeic yen meijaga emecabeci deseino Allah dousero. Doba eic yen meigdoc mes augwan ecabeci deseino en toua.

⁴²Dara yen yekeba hom dau ara sisa dag garemogus, dara mohumos, dara ara gus gus gedig lahurim dara seingmera moto dou Allah toua. Doba naugb lusud, kaba, yen meigdoc emedag beim an laugwanero. Doba yen yesi sud hom yom aiyei dous. Dara yen meigdoc gororougb Allah naugb yen yemaimo areg asesa enin medoc mes touwero. Dangga eigouhw naugb yen yaimo gin terimda. Dara yen yemasid yenin dau sug yen yekeba hom dau areg sisa dag graga dou Allah touwero. Dobnaro, kaba, Allah esedeb gogom medam deinaugb yen icira gin touohob.

⁴³Dara sug yen yeinesa tuari, kaba, yen meiju ehigehi naugb yen yeigtousa maija moc geb ino. Dara sug yen yec meijohora se us mougb gedig lusud lohwaresa, kaba, yen meiju ehigehi naugb len leigdoumesa yen meijoho dara lecguna dou yen toua. Dangga Allah esedeb gogom medam deinaugb yen icira gin touohob.

⁴⁴Dara yen yedag aremogougb moda gedig lusud lemohud tu meij dougworo. Dangga sug len lesogwesa, kaba, eic gogor dou len deseino Allah enohob. Anai len lemecinaga gin dag aremogougb modero.

⁴⁵Sug Yesus esa mer debin leng Parisi dag graga ouwohob, kaba, sud hom dau leng meru ouforoho se Musa men gomnomna, en enara baised Yesus ucugb, endagai: Adehsud, areg ban ben dou leng Parisi gin, kaba, aninim dag ban bowun emen emoho touohob.

⁴⁶Doba Yesus auni dou en, endagai: Yeng meiju ouforoho se Musa men gomnomna, kaba, Allah esedeb gogom medam deinaugb yen touohob. Anai yen meigdoc emeineg an lusud naugb yen yemeic Musa men gomnomna dag eijouhw dou lenero. Doba yen meigdoc agadgeij an len, kaba, yen yeic men gomnomna gini dag aguci medam bogomcin len dous.

⁴⁷Dara yen toua yemasid yenin dau yen meijemouwer meren geicara gecgu touwero. Doba yen yousa deisa len an, dara yen yos debin meren geicara gecgu gin terimda. Anai len, kaba, len leic gomom dou leng lesai Allah moro sug nosa leinyanohob. Dara yen, kaba, yen yohud tu meij dougwo leng lomom gini ucucugb terimda. Dangga Allah esedeb gogom medam naugb yen icira gini touohob. Anai sug yen yobungma dara tu meij gini, kaba, gini ansins dag yen meigdoc aninim se yen meijemouwer meren geicara gin touohob.

⁴⁸

⁴⁹Augwan gini aimo dau areg Allah en og deb se men surad, moho Allah Men Aremeijouhw, deb sug nosa touohob, endagai: Cum, kaba, dan demesa indan logodeh ligbum aud len meijemouwer naugb len lemesai dan induro dou len. Dara dan demesa indan logodeh ligbum aud len naugb len lemens areg asesa danin indoc mes augwan dou len toues. Doba ligbum, len gin, kaba, len lemeic gomom dou len. Dara ligbum deit, kaba, len lemeic mog erij dou len toues.

⁵⁰Dangga hang, ebiji dau sug Allah en ahasesei cinogo ginohob, kaba, gareg yen meijemouwer leic gomom dou lenohob, kaba, Allah en emacgeij naugb yen yeic yenin meijugwihi yemaohw len merugwihi augwan dou en ucugb toues. Ebiji dau sug yen meijemouwer leic gomom dou Habel, terimda sug len leic gomom dou gembala gesa taij, moho Sakarias, se boromei gouwaharo dara Allah Men Tuari maraufu gin touwero. Dara dan den dou yen deit. Allah emacgeij naugb yen yeic yenin meijugwihi yemaohw len merugwihi augwan dag misen dara en toues. Anai meijen geicara augwan dag yen yousa deisa yen meijemouwer an meren geicara gin touohob. Yen youman dan indir an areg dan den dou yen gin deigeigouhw namcir. Anai augwan asesa dag misen terimdohob.

⁵¹

⁵²Dara yeng meiju ouforoho se Musa men gomnomna gini, kaba, Allah esedeb gogom naugb yen toua. Anai areg yen yedidib dau Surad Injil Meb Mohon gini, kaba, yen yemens se geica dou lusudero. Doba yen yens didi dou len dous. Dangga hang, yenin yemecinaga areg asesa Allah enin medoc mesero. Dara yen yedag sogo maga dougwo len gus naugb len lemecinaga areg asesa Allah enin medoc mes gin touwero.

⁵³Sug Yesus owun leng Parisi dara leng meru ouforoho se Musa men gomnomna dag graga dauwohob, kaba, en agunya dau sud hom dau leng Parisi graga men tu. Doba sug en ec mohora gini, kaba, len graga toua leila ucan en namcir. Hanoba len lowun en an areg en en dou lenohob. Anai len merdoc esrougb an en namcir. Dara len leijidougwo en laung magai dougwo ara ara se Musa men gomnomna toua. Dauntoba sug en auni, doba en edreg dau Musa men gomnomna gin, kaba, len lehin merisira en icira gin namcir.