Read Manikion LUKAS 13 Bible Online

LUKAS 13 - Manikion bible

LUKAS 13

¹Sug Yesus esulou lusud dag graga bouwohob, kaba, merug hosa dau len ledebeij en deit. Hanoba len lecic dau leng Galilea meren geicara sug nosa dou en, lendagai: Sug nosa, kaba, merug hosa dau leng Galilea len leic aremeta naugb lauwaharo dou Allah. Dangga, kaba, mougt mera, moho Pilatus, en arougb men sadodor leinesa Allah men igtia naugb len leic gomom dou len debin gin toua. Anai meren geicara gecgu dou en nosohob. Sug len merugwihi ohu baihirir dara aremeta mogwihi touohob, kaba, dagiro naugb len gin toua?

²Doba Yesus mou obga dagasa len merir an areg len leijidougwo en an ginohob. Hanoba en enara dou len, endagai: Yen youdesa sug Pilatus ogod len lomom debin meren geicara se Allah men igtia ginohob, kaba, leng gin dous eng meren sesar edreg dau leng Galilea gus meren sesarohobei? Naro.

³Dangga yen youman dan indir deigeigouhw namcir. Anai sug yen yemesga meijen sesar naugb yemahau an dougworo, kaba, Allah eic mor mor dou yen se dum smougb, aninim dag len gin toua.

⁴Era, dagiro sug tu gagas deinyor cinogo Siloam eij bogod merug sorama hobjeromoi nagama lomom nosohoba? Yen youdesa len gini toua meren sesar edreg dau lusud gus se Yerusalem laugwanohobei? Gin toua naro.

⁵Dangga yen youman dan indir deigeigouhw namcir. Anai sug yen yemesga meijen sesar naugb yen yemahau an dougworo, kaba, Allah eic mor mor dou yen se dum smougb, aninim dag len gin toua.

⁶Sug Yesus esulou len eisaugb areg graga dag ginohob, kaba, en eic gainyenara dau sug len lera mera geigouhw debin gin ucan dou len deit, endagai: Sud hom men sogo ara gesesa men lo, kaba, en ebeibei astesda lona terimda se arisogomoc homoi, doba en emesma mera homero.

⁷Hanoba en arougb men sogougb gesedougwo men lo ingga, endagai: Ban bouman dan indir deigeigouhw. Anai dan debeibei se arisogomoc homoiyohob, doba dan demesma sogo ara gin mera hom touwero. Dangga ban behi sogo gin dau indan lo gin namcir. Anai en esuan meh mogud dougwo indan lodaha.

⁸Doba sud hom gesedougwo lo ingga, kaba, en auni ucugb dou sud hom men lo gini, endagai: Adehsud, ban bamsoho besa se arisogomoc hom gin deitahabi. Dauntoba dan dogod cinogo daihi dara dahariou deitahabi. Sug era mera, kaba, en emesa dangga. Doba sug emera merero, kaba, eigouhw naugb ban bemehi dau namcir.

⁹

¹⁰Se Lona Gemeicaresero hom, kaba, Yesus eni moongga se leng Yahudi meren tuari naugb en edidib Allah mer men meijouhw dou len toua.

¹¹Dara gida hom gedig mena mog mog ogod en medgomori agabgebi se arisogomoc sorama hobjeromoi nagama edeisohob, kaba, en toua moongga dara len. Dangga en emec dobosbororo, doba en ec dag ounyana mogud dous.

¹²Sug Yesus eiya en dangga, kaba, en enara dou en, endagai: Daneh, iteitogin, kaba, ban beigouhwohob. Dangga sug Yesus ou mesira aga en deitohob, kaba, en medgomori obosboro se mohw ucugb namcir. Hanoba en agahugouhw an Allah terimda.

¹³

¹⁴Doba sug sud hom gesedougwo tuari ingga en eiya gini, kaba, en medoc esrougb medam an Yesus namcir. Anai en emeic geigouhw dou gida ingga se lona gusero, doba se Lona Gemeicaresero ginohob. Hanoba en enara debin lusud laugwan, endagai: Se lona senggem, kaba, yen yemen naugb en emeic geigouhw dou yenero, anara? Anai lona hom gin, kaba, emedeinyum naugb maman mameicaresero. Doba maman maicara ogdoc lona senggem dous.

¹⁵Doba maman Adehsud en owun sud hom ingga en moho an men lusud laugwan namcir, endagai: Dagiro hang, yen yeicara yarerei lusud meriresi dag gina? Anai astesda Lona Gemeicaresero, kaba, yen yaugwan yesga aumagan meijen sapi dara keledai. Hanoba yen yerei len aud duhu naugb len leg se lona gin touohob.

¹⁶Sug yen yeicara dangga se lona ginohob, kaba, Allah emouwan naugb dan desga gida gedig Setan ohud en se arisogomoc sorama hobjerem nagama edeisohob gin toua. Anai en toua Abraham medebeito enohob.

¹⁷Sug Yesus owun len dag ginohob, kaba, igdebeseba len gin namcir. Doba len gus, kaba, len merdoc agahugouhw medam an Yesus men geicara ganusbus gin terimda.

¹⁸Sug Yesus eic gainyenara dau sogo gemera merero dou lusud bouwohob, kaba, en eic gainyenara dau lona sug Allah oiharaga lusud ucugb dou len ucan deit, endagai: Sug Allah oiharaga lusud ucugb, kaba, gini aninim dag ara? Era dan deic dainyen dau ara dou yena?

¹⁹Sug Yesus eijidougwo len dag ginohob, kaba, en enara dou len, endagai: Lona sug Allah oiharaga lusud ucugb, kaba, dan deic dainyen dau sud hom geba sawi meij mogo mogurei hom se men lo dou yen. Anai sug eij bagasohob, kaba, mon ebeibeij namcir. Dangga sug eiji edag magohob, kaba, ba len len, dauntoba len loho mererumesa se men mesira augwan toua.

²⁰Sug Yesus eic gainyenara dag graga dou lenohob, kaba, en eijidougwo len deit, endagai: Lona sug Allah oiharaga lusud ucugb, kaba, dan deic dainyen dag ara dou yen deita?

²¹Sug Yesus eijidougwo len dag ginohob, kaba, en enara dou len, endagai: Lona sug Allah oiharaga lusud ucugb, kaba, dan deic dainyen dau gida hom sug en eic areg mogo mogurei, moho ragi, naugb baihiriri roti mor geb se bleg homoi dou yen. Anai aimougtut, kaba, mogo mogurei dous. Doba cum, kaba, ohu mougwesa. Dangga roti mor augwan berisa medam namcir.

²²Gin dauwohob, kaba, Yesus dara men logodeh len lec merohora aud Yerusalem deit. Doba sug len lec merohora gini, kaba, len leinesa beimes. Dara cinogo mogurei einyana naugb sug en edidib Allah mer men meijouhw augwan asesa dou len toua.

²³Dangga sud hom en en beijidougwo Yesus, endagai: Adehsud, se Lona Sug Allah Ogod Aremer Aga Lusud, kaba, en eigdoc lusud laugwan dau meren gogomei? Era en eigdoc sud hom yom dousei?

²⁴Dangga Yesus esulou len laugwan, endagai: Yen youwan Allah eigdoc yen dau meijen gogom, kaba, yen yeic meijuwemougb esesa naugb yen yeinesa misis geinyim gin dous. Anai leinyana louwan naugb leinesa, doba emedeinyumero. Anai ogom naugb len leinesa misis geinyim gindaha. Hang len lemeinesa touwero. Yen youman dan indir gin deigeigouhw namcir.

²⁵Hang yen yemeisan gurog dau ginlo. Doba yen yeic meijuwemougb esesa naugb yen yeinesa misis gin terimda. Anai sug sud hom men tu en eisa naugb oung misis dougwo yenohob, kaba, emedeinyum naugb yen yemeinesa deitero. Dangga yen yesa dig medigo naugb youma misis terimda, yendagai: Adehsud, ban bec misis dau emen touahabi. Doba en auni dou yen dig medigo, endagai: Yen yen daugiro, inggina? Anai dan demecinaga yenero.

²⁶Dangga yen toua yauni dou en, yendagai: Sug nosa, kaba, emen emetara dara emegara desij ban se aban tu. Dara ban bedidib Allah mer men meijouhw dou emen se emen cinogo gin touohob.

²⁷Doba sud hom men tu graga en auni dou yen ucugb deit, endagai: Yen yen daugiro inggina? Anai dan demecinaga yenero. Hang yen yeihwededau indan tu maga ginda. Anai yen yaugwan meijen geicara dag meijug mog namcirohob.

²⁸Hanoba yen yeiyogoseser an yenin. Dara yen yeg meijugta an sud hom graga. Anai yen yeiya yen meijemouwa Abraham, dara Isag, dara Yakub, dara leng lesai Allah moro sug nosa len laugwan leigtou se Allah men goiharaga ginohob. Doba yenin, kaba, sud hom men tu graga en ouf misis dougwo yen deb dig medigo namcir.

²⁹Dara yen yeiya lugmahara dau igda eisaugb, dara igda obsaresa, dara dau dig dum mer, dara dau dig dum moho len toua leinesa Allah men goiharaga gin naugb len letara dara en toua. Doba yen, kaba, yen yeigtou dig medigo dous. Dangga hang, se lona ingga, kaba, leng ledag mahara iteitogin, kaba, len ledag mebin. Doba leng ledag mebin iteitogin, kaba, len ledag mahara. Yen youman dan indir gin deigeigouhw namcir.

³⁰

³¹Se lona hom sug Yesus moongga se leng Galilea meren hancobaba, kaba, merug dau leng Parisi len len aud en naugb lococ en. Dangga sug len ledebeij enohob, kaba, len lenara dou en, lendagai: Ban bemen suginlo, doba ban beihweda se cinogo guseda. Anai Herodes ococ men logodeh deb naugb len les banohob.

³²Doba Yesus auni dou len ucugb, endagai: Yen yeden dou sud hom mohotimei ebeh ingga, yendagai: Ban boumanahabi, anai dan demarges dau indan geicara ginero. Doba irogini dara lona mougwa hosa debin deit, kaba, dan docirma merna mog mog dau lusud dara dan deic geigouhw dou lenaba. Anai cum, kaba, indan geicara gin augwan ouwohob.

³³Sug Yesus enara dou leng Parisi naugb Herodes dag ginohob, kaba, en enara badedeij leng se Yerusalem an meren geicara ucan dou len deit, endagai: Sud hom gareg en esai Allah moro dou lusud, kaba, en emdomom deisa cinogo gus gusero, doba en omom deisa Yerusalem hom dous. Dangga cum, kaba, dan toua deihweda sungga naugb len leic gomom dou dan toua. Anai gini aimo dau areg Allah esedeb naugb dan danggohob.

³⁴Sug Yesus enara badedeij Yerusalem dangga dou leng Parisiohob, kaba, en ou Yerusalem deseino len laugwan, endagai: Ayou, yeng se cinogo Yerusalem. Anai Allah en esa men lusud leinyana dou yen naugb len lesai en moro dou yenohob, doba yen yeic gomom dou len dous. Dara en esa leng lens dau areg asesa enin medoc mes leinyana dou yen touohob, doba yen yeic igdahabi yad len namcir toua. Dara dan toua douwan doiharaga yen mougwa einyanohob, aninim dag berougb mem gerba mebera debin motor. Doba yen yoguro dan namcir.

³⁵Dangga yen youman dan indir deigeigouhw. Anai Allah emoiharaga yen deitero. Doba en arges yen deb dou yenin dous. Dara dau iteitogini terimda lona sug yen yeigdoumesa dan indoho deit, kaba, yen yemeiya dan toua deitero. Anai se lona ingga, kaba, yen yagahugouhw an Allah an dan, yendagai: Allah, ban beic geigouhw dou sud hom gin namcir. Anai en en se Adehsud, ban aboho, naugb emenohob.