Read Manikion LUKAS 15 Bible Online

LUKAS 15 - Manikion bible

LUKAS 15

¹Doba sug Yesus edidib Allah mer men meijouhw dou lusud, kaba, leng lacgeij lusud naugb len lohw cinogo dou leng Roma dara leng leicara gecgu, kaba, len laugwan len len naugb louman sug Yesus ebedbed dou len toua.

²Dangga leng Parisi dara leng meru ouforoho se Musa men gomnomna, sug len leiya dau gin, kaba, len lenara doum ucucugb an Yesus, lendagai: Dagiro, naugwe hang, sud hom gin en emocirma len ginero, doba en ebin len lebesesar gini naugb len letara dara en dag gina?

³Sug Yesus ecinaga dag len lenara ucucugb an enohob, kaba, en eic gainyenara eisaugb domba hom gediyebeiya dou len ucan deit, endagai:

⁴Sug sud hom dau yen en men domba maga huntun hom, doba hom ediyebeiya dau len, kaba, yen youdesa dagiro? En amsoho domba hom gin namcirei? Naro, en arges men domba gedig maga mos senggegu senggegu edeisu se lomougwisa deb. Hanoba en edehilon hom gediyebeiya graga naugb edesma ucugb touahabi.

⁵Dangga sug en esma ucugwohob, kaba, en medoc agahugouhw medam an namcir. Hanoba en odo domba gini se mebera aud men tu deb.

⁶Sug en edebeij men tuohob, kaba, en eija mesir dara leng geb acec len laugwan toua. Hanoba en enara dou len, endagai: Yen meigdoc agahugouhw medam dara dan. Anai indan domba hom gediyebeiya gin, kaba, dan desma ucugwohob.

⁷Dangga toua sug sud hom gebesesar en esga men sesar, dara en ahau an dougwo namcir, kaba, leng se bogo len laugwan lagahugouhw medam an en edreg dau leng merug mos senggegu senggegu edeisu gedig meren sesar ingmaro. Anai len laimo areg asesa Allah enin medoc mesohob. Yen youman dan indir an areg dan den dou yen deigeigouhw namcir.

⁸Era sug gida hom men aregoufu dau perag mogo sisa moonggeb naugb en. Doba hom obsara se aremoslos, kaba, en amsoho deb touei? Naro, en asaih lampu mouf aisema. Hanoba en ocirma aremoslos geb se dimei mes augwan debinim hom toua. Dauwohob, kaba, en ehilon aremoslos ingga deigeigouhw dougwo terimda en esma aregoufu gobsara graga ucugwohob.

⁹Dangga sug en esma aregoufu hom gobsara graga ucugwohob, kaba, en eija mesir, dara leng geb acec, len laugwan toua. Hanoba en enara dou len, endagai: Yen toua, yen meigdoc agahugouhw medam dara dan. Anai indan aregoufu hom gobsara, doba dan desma ucugwohob.

¹⁰Dangga toua sug sud hom gebesesar en esga men sesar, dara en ahau an dougwo namcir, kaba, Allah men malaikad laugwan len lagahugouhw medam aninim dag gin toua. Yen youman dan indir an areg dan den dou yen gini deigeigouhw namcir.

¹¹Sug Yesus eic gainyenara hwai dag graga dou leng Parisi dara leng meru ouforoho se Musa men gomnomna ouwohob, kaba, en eic gainyenara hom dara ucan dou len deit, endagai: Sud hom en meisi lahwai. Dangga meisi godeh enara dou en mena, endagai: Akeinya, ban bekeba aban mecigbougb dobuc amanahabi. Hang mena aimo en mer naugb ekeba men mecigbougb dobuc lan toua.

¹³Lona hosa debin gini, kaba, meis godeh ohw men mecigbougb graga augwan bauma aregoufu. Hanoba en eihwedan augwan se gus medam. Sug en edebeij cinogo gen eihwedaud inggohob, kaba, en eic men aregoufu augwan ingga bamcirac icira gogo ara gaihim, dara geicara gecgu augwan toua terimda.

¹⁴Doba sir medam einesa cinogo ingga. Dangga sug men aregoufu augwan ouwa dau en enohob, kaba, sireben bahauwa namcir.

¹⁵Dangga sug en eihweda naugb edeicara dou sud hom sunggohob, kaba, sud hom ingga arougb en naugb en edesedougwo men hweij se men lo dous.

¹⁶Doba sug sireben namcir, kaba, en ouwan et ared mougb hweijeba. Dobnaro. Sud hom ingma emeic ared dou en touwero.

¹⁷Doba se lona hom, kaba, en edouma medocesero. Hanoba en enara dou enin, endagai: Dag gin, kaba, dan indina men sogougwir laugwan letara beicer dau, hanoba mougweb inggina? Doba dan sugini, kaba, sireba dan dahauwa namcir.

¹⁸Sug en enara dangga dau medocohob, kaba, en enara dou enin deit, endagai: Dan decicugb aud akeinya ucugbda. Hanoba dan dedenara dou en, dendagai: Akeinya, dan debesesar an Allah se bogo dara ban touohob.

¹⁹Hang emedeinyumero naugb sug ban bemeija dan dag ban abisi deitero. Doba ban beija dan dag aban sogougb dous.

²⁰Sug en enara dag gin dau medoc inegohob, kaba, en ecicugb aud meneda. Doba sug en ebeij se aigusaba, kaba, mena ed maires beiya enohob. Dangga en obga dagaseni. Hanoba en ani eni. Dara ou mouhwesa en toua. Anai en medoc erij an en namcirdaha.

²¹Doba meisi gin, kaba, en en dougwo mena, endagai: Akeinya, dan debesesar an Allah se bogo, dara ban touohob. Dangga hang, dan demedeinyum naugb sug ban beija dan dag ban abisi deitero.

²²Doba mena arougb men sogougwir bogod dougwo en mer an gini. Hanoba en arougb len, endagai: Yen yobga dedemeda naugb yen yedeic sansun geigeigouhw hom naugb yen yeg seni. Dara yen yeic cincin naugb yen yeg se en mesira mob. Dara yen yeg hwigbeimos se en mohora toua.

²³Dauwohob, kaba, yen yedeic sapi meijaba mering moto moto hom. Hanoba yen yougwan, dauntoba maman maugwan matara, dara magahugouhw medam an en toua.

²⁴Anai dan indisi hom gin, kaba, en edag omom dau danohob. Doba iteitogin, kaba, en edeisa ucugwohob. Dara en edag sud hom gediyebeiya dau dan touohob. Doba iteitogin, kaba, en edagunya ucugb deitohob. Sug mena agahugouhw an en meis gin dag ginohob, kaba, len lebiji naugb letara aninim dara en toua.

²⁵Irir sug magto en en gin, kaba, en maguna eni moongga se lo. Dangga sug en en dau lona, hanoba en edebeij deinyor tu magohob, kaba, en ouman, doba len lohw aresgwemer dara len leinuhwera dugmougb.

²⁶Dangga en eija mena men sogougb hom dougwo, endagai: Len lohwaresgwemer dara len leinuhwera dugmougb anara inggina?

²⁷Doba sogougb ingga en auni dou en, endagai: Ban abagto en ecicugwohob. Dangga ban abina en ogug sapi meijaba gedig mering moto moto hom naugb ougwanara debin en. Anai en ecicugwen dara mena agauwohob.

²⁸Sug maguna ouman dau gini, kaba, en medoc esrougb medam an mog mog namcir. Hanoba en emeinesa se dimei mes touwero. Doba en eigtou dig medigo dous. Dangga sug en mena en aud enohob, kaba, en enara bahumohumeseni, endagai: Ban toua, beinesa dimei mes en.

²⁹Doba meisud gin en ebara moumougb dou mena namcir, endagai: Dan deic indug erij dag sogougb dou ban se arisogomoc einyanohob. Dara dan demedreg ban abir mougwa hom touwero. Doba ban beic ara dou dan naugb ginohoba? Naro, ban bemeic kambing meh hom naugb dan didougwan an dan insir touwero.

³⁰Doba ban abisi hom gin, kaba, en eic aban aremougb augwan naugb oucira ligida dous. Doba sug en ecicugb, kaba, ban bogug sapi meijaba gedig mering moto moto hom naugb baugwanara debin enohob.

³¹Doba mena enara bahumohumesa en terimda, endagai: Dan indisi, ban mebin, kaba, ban beigtou desij dan terimda. Dangga areg geb se indan tu augwan ebdodo banohob.

³²Doba ban abagto gin, kaba, en edag omom dau mamanohob. Doba iteitogin, kaba, en eisa ucugwohob. Dara en edag sud hom gediyebeiya dau maman touohob. Doba iteitogin, kaba, en edagunya ucugwohob. Dangga hang, eigouhw naugb maman maugwanara debin en naugb maman magahugouhw an en toua.