Read Manikion LUKAS 16 Bible Online

LUKAS 16 - Manikion bible

LUKAS 16

¹Sug Yesus eic gainyenara dag graga dou leng Parisi dara leng meru ouforoho se Musa men gomnomna bouwa dauwohob, kaba, en eic gainyenara dau sug maman mamdoc ouforoho naugb mauhw areg geb se cinogo gini dou men logodeh ucan deit. Hanoba en enara dou len, endagai: Sud hom mesoho mougb en eigdoumesa sud hom dau men sogougwir naugb en esedougwo men aremougb augwan. Doba se lona hom, kaba, ligbum ledeineg dou en, lendagai: Sud hom gesedougwo aban aremougb augwan, kaba, en esedi aban aremougb einyana daudohob.

²Sug mougt mera ouman gini, kaba, en eija men sogougb hom graga aud eni. Hanoba en eijidougwo en, endagai: Dan douman, doba ban besedi indan aremougb augwan dauwohob. Dangga hang, ban bemecic dau indan aremougb areg ban besedougwo ginohob meijouhw augwan asesa dou dan iteitoginahabi. Anai dan demouwan naugb ban bemesedougwo indan aremougb gin deitero.

³Dangga sud hom gesedougwo aremougb graga, kaba, en enara se enin medoc mes, endagai: Indan mougt mera asid danohob. Gin, kaba, dan deicara dagiro deita? Anai sug dan dedeic lo, doba indan goubesa emedeinyum naugb ginero. Era sug dan dedohwiaga len gus an ared, kaba, igdebeseba dan an gin touadaha.

⁴Dangga eigouhw naugb dan dehilon ucina naugb deic dan insir merdoc eigouhw an dan. Dauntoba sug mougt mera erba dan namcir, kaba, len lebin dan se meren tu toua.

⁵Sug en oudesa se enin medoc mes edeinyum danggohob, kaba, en eija leng areg men mougt mera men aremeij eb dou lenohob len laugwan naugb len len aud eni. Sug len laugwan lacinimohob, kaba, en eijidougwo sud hom gaimougtut, endagai: Indan mougt mera men aremeij geb dou ban, kaba, hosaiya?

⁶Dangga sud hom ingga en auni dou en, endagai: Aban mougt mera eic men mani se debecij huntun hom dag aremeij dou danohob. Dangga mougt mera men sogougb gini en auni dou en, endagai: Ban beigtou sugaih. Hanoba ban bog surad menau dedemeda iteitogini dag indan mougt mera men aremeij dou ban gini, kaba, dag debecij mos sergem dous.

⁷Gin dauwohob, kaba, en eijidougwo sud hom gus deit, endagai: Indan mougt mera men aremeij geb dou ban toua, kaba, hosaiya? Dangga sud hom ingga en auni dou en, endagai: Aban mougt mera en eic men tramdad se karon maga huntun sisa dag aremeij dou danohob. Dangga mougt mera men sogougb gini en auni dou en, endagai: Aban surad an aremeij inggang gini. Hanoba ban bog surad menau dag indan mougt mera men aremeij geb dou ban, kaba, dag tramdad karon huntun senggemoi dous.

⁸Sug mougt mera en ouman gini, kaba, en eimiman dau men sogougb hom gesedi men aremougb gin namcir. Anai en mou ouforoho naugb en ehilon ucina naugb enin terimda.

⁹Sug Yesus eic gainyenara dag graga dou men logodeh bouwohob, kaba, en esulou len ucan deit, endagai: Dangga yen toua yemecgun yen meisira debin meijen aremougb geb se cinogo ginlo. Doba yen yagaha meisira an ingma dou len gus terimda. Anai sug yen yeicara dag gin, kaba, leng se bogo leigdoumesa yen meijoho dag len mersi misen namcir. Dangga sug meijen aremougb augwan ediyebeiya dau yenohob, kaba, len lebin yen deisa meren dimei maireseb huhugb gin toua. Hang yen meiju emedgomlo. Doba yen meiju ouforoho naugb yen yauhw meijen aremougb geb se cinogo gin toua. Anai len gedig Bilis oiharaga len se cinogo gin, kaba, len meru ouforoho namcir, edreg dau leng leb se mouf naugb len lohw meren ara geb se cinogo gin toua terimda. Yen youman dan indir an areg dan den dou yen gin deigeigouhw namcir.

¹⁰Dangga esloulougb naugb yen yesedougwo areg mera ouwada geb se cinogo gini dara yen meigdoc hom namcir. Anai sug yen yeicara dangga, kaba, yen yesedougwo areg mera eisaugb gen dau bogo dara yen meigdoc hom toua. Doba sug yen meigdoc dag hwai an areg mera ouwada geb se cinogo gin, kaba, yen meigdoc dag hwai an areg mera eisaugb gen dau bogo toua.

¹¹Hang Allah emod mena debsa yen naugb en ogugwo areg mera eisaugb gen dau bogo se yen meisira touwero.

¹²Anai sug yen yemesedougwo Allah men aremougb geb se cinogo gini dara yen meigdoc homero, kaba, en emeic yenin meijen dou yen toua dagiro?

¹³Dangga yen yemeicara naugb mougt hwai daremlo. Doba yen yeicara naugb mougt hom dous. Anai sug yen yeicara naugb mougt hwai, kaba, cum, yen meigdoc gororougb homa. Doba yen meigdoc esges homa. Era sug yen meigdoc edag beim naugb yen yaimo mougt homa mer, kaba, cum, yen yohoiya mougt homa en mer gin toua. Dangga emedeinyum naugb yen yemeicara dou Allah dara aremougb lahwas daremero. Doba yen yeicara dou mougt hom dous.

¹⁴Sug leng Parisi len louman, doba Yesus esulou men logodeh dag len lemeigdoumesa aremougb emedag mougt naugb lenero, kaba, len leic Yesus mer lacecim namcir. Anai len merdoc gororougb aremougb namcirdaha.

¹⁵Dangga Yesus enara bauwun len merir an gini, endagai: Sug len gus leiya yen meijaga debin, kaba, len leigdoumesa yen meijoho dag yen yaimo Musa men gomnomna augwanohob. Doba areg lusud leimiman dau cinogo gin, kaba, Allah ocuc an, hang owun bobsara namcir toua. Anai en ecinaga areg se lusud merdoc mes augwan dag misenohob.

¹⁶Doba Musa men gomnomna gini, dara areg leng lesai Allah moro sug nosa len log deb se Surad Injil Meb Mohon debohob, kaba, augwan gini edougdoc sug Yohanes en ebedbed dou lusud se lomougwisa dous. Dangga dau lona ingga, kaba, lusud lemos debin Musa men gomnomna gin deitero. Doba len leic meruwemougb esesa naugb sug Allah oiharaga len ucugb deit. Anai ebiji dau lona sug Yohanes ebedbed dou lusud se lomougwisa gin, kaba, lusud lesai mer geigouhw dau sug Allah oiharaga len ucugb dou lenohob.

¹⁷Dara areg Allah en ens deb se Surad Injil Meb Mohon deb eisaugb ginohob, kaba, mer mohw hom emediyebeiya touwero, doba eb huhugb namcir. Dangga bogo dara cinogo lamediyebeiyes. Doba Allah en mer gin, kaba, emediyebeiya terimdero.

¹⁸Gareg dau yen en ogod ameiji dougwo en mesouwa, hanoba en edeic gida hom deit, kaba, gini dag en mesirebsa en dous. Dara gareg dau yen, en edeic gida gedig mesuwa ogod ameiji dougwo en deb ingga, kaba, gini dag en mesirebsa en toua.

¹⁹Sug Yesus owun leng Parisi dag graga ouwohob, kaba, en eic gainyenara hom ucan dou len deit, endagai: Sud hom mesoho mougb sug nosa, kaba, en eg sansun geirir dara garjeijaga gedig mera eisaugb namcir. Dara en ogo ara gaihim naugb eic medoc eigouhw dou en astesda lona terimda toua.

²⁰Dara sud hom monggwereij, moho Lasarus, en toua eigtou deinyor sud hom mesoho mougb men misis moc.

²¹Anai en oudesa endag sud hom mesoho mougb gini en etara dau moslos, kaba, en emeic ingma dou en toues. Dara sud hom Lasarus gini, kaba, geilet en toua namcir. Dangga sug en eigtou se misis moc gini, kaba, mihi len lomna en meramera augwan gin toua.

²²Doba sug sud hom monggwereij gini en omom, kaba, malaikad ledahwan en naugb en eigtou desij Abraham dig en mesira misen se bogo. Dara lona hosa debin gin deit, kaba, sud hom mesoho mougb en toua omom ucan Lasarus. Hanoba len ledec en toua.

²³Doba en, kaba, en edeic mog erij medam se dum smougb namcir. Dangga sug en oho en mergo ginohob, kaba, en eiya Abraham eigtou aigusi dau en namcir. Dara en eiya Lasarus en toua eigtou dig Abraham mesira misen toua.

²⁴Sug en eiya lan, kaba, en eiyagarij Abraham, endagai: Injemouwa Abraham, ban abdoc eineg an dan. Hang ban barougb Lasarus naugb en ogun mesira mob se duhu naugb en edargeh dan intemouwahabi. Anai smougb ait dan indaga augwan erij dara esrougb medam namcirdaha.

²⁵Doba Abraham auni en mer ucugb, endagai: Dan indebeito, sug ban abireseb se cinogo gaih, kaba, ban besma areg geigouhw mogud naugb eic ban abdoc eigouhw anohob. Doba absitog Lasarus, kaba, esma areg mecicgu mogud dous. Ban abdoc eiseisan ginohobei? Dangga iteitogini, kaba, Lasarus en eigtou se geigouhw dara medoc ebtou namcir. Doba ban, kaba, ban beigtou se dum smougb naugb beic ban abug erij sungga terimda.

²⁶Toua, Allah en esinsin cigaha gebehibera medam bogod dougwo mamandaha. Dangga emedeinyum naugb sug emen sugini emedebeij yen sunggaro. Dara yen sungga, kaba, yen yemedebeij emen sugin touwero.

²⁷Sug sud hom mesoho mougb en ouman dag gini, kaba, en eiyagarij Abraham deit, endagai; Injemouwa, Abraham, dan dacgeij naugb ban barougb Lasarus en eihweda naugb en eden dou dan indaguner dara indagtor merug sergem merugwengga se dan indina men tu naugb en edesulou len dougwo ginahabi, dauntoba len lemaimo ucina gedig dan daimo ginlo. Anai sugin, kaba, mog erij medam namcirdaha.

²⁸

²⁹Doba Abraham enara bauni en mer ucugb deit, endagai: Ban abaguner dara ban abagtor, kaba, Musa men gomnomna inggebga naugb lenohob. Dara areg leng lesai Allah moro nosa len log deb se surad deb nosohob, kaba, eb deinaugb len touohob. Dangga eigouhw naugb len louman areg len len dougwo len an meren surad ingga nosahabi, dauntoba len lemedebeij usi ban beigtou sungga touwero.

³⁰Doba sud hom mesoho mougb en auni dou Abraham ucugb, endagai: Dan injemouwa, Abraham, dan doudesa gin, kaba, emedeinyumero. Doba sug sud hom gomom eihweda naugb edendara dou len, kaba, edeinyum naugb len lesga meren sesar dara lahau an dougwo namcir.

³¹Doba Abraham enara bauni en mer ucugb namcir, endagai: Sug ban abaguner dara ban abagtor len merdoc emebdebin an areg Musa dara leng lesai Allah moro len log deb se Surad Injil Meb naugb lenero, kaba, len merdoc emebdebin an sud hom sug en eisa dau gomom gin touwero.