Read Manikion LUKAS 17 Bible Online

LUKAS 17 - Manikion bible

LUKAS 17

¹Sug Yesus eic gainyenara dou leng Parisi dag graga dauwohob, kaba, en esulou men logodeh ucan deit. Dauntoba meren geicara emaugwohosa men logodeh gedig len ledag mahanihenaba touwero. Doba len larges dau namcir. Hanoba en enara dou len, endagai: Areg eic lusud naugb len merdoc emebdebin an dan deitero, doba len lobsara dau dan icira gin, kaba, emagunya debin yen dag misen toues. Anai lusud merdoc etrij icira, hang arautut len naugb len leicara larses indan logodeh gin toua terimda. Doba gareg men geicara eic dag sud hom dau indan logodeh gin en obsara dau dan, kaba, Allah eic gogom medam dou en toua namcir.

²Dangga eigouhw dau sug en emeicara bemaimo dag gin an enbuma, kaba, dag lusud lera aumaga an igdahab gouji se en morcahabi, len lemerba en se dum mohu toua. Anai sug len lamsoho en, hanoba en eicara baimo dag gin an indan godeh hom gedig en medoc ebdebin an danohob, kaba, Allah eic gogom edreg medam dau gin dou en deit. Hang yen yebehnehino yenin meigdoc mes dougwo meijen geicara augwan toua deigeigouhw namcir.

³Dangga sug yen meijaguna, era yen meijagto hom, en eicara gecgu an yen, kaba, yen yen dougwo en. Doba sug en esga men sesar dou yenohob, kaba, yen meigdoc emagadgeij an en touwero. Doba yen yaigdougwo men aremer dag mogud namcir.

⁴Dara yen yemaigdougwo men aremer mougwa hom gin dousero. Doba sug en ebesesar an yen mougwa senggai icira se lona hom, hanoba en en aud yen naugb en acgeij dag yen yesgigouhwesem, kaba, yen meigdoc emagadgeij an en touwero. Doba yen meigdoc an en naugb yen yaigdougwo men aremer mougwa senggai icira dag mogud dou en toua.

⁵Sug maman Adehsud men logodeh len louman dau gin, kaba, len lacgeij en, lendagai: Adehsud, ban bousa emen, dauntoba emen emdoc ebdebin an Allah edreg dau mohw deit.

⁶Doba maman Adehsud en auni ucugb dou len, endagai: Yen meigdoc ebdebin an Allah aninim dag sawi mogo mogurereito dous, kaba, edeinyum naugb yen yenara dou sogo berjag gini dag en ohoma enin dau sugini naugb en edesesa dum mohu deit. Hanoba en aimo yen meijir asesa dangga toua.

⁷Sug Yesus auni men logodeh merir an areg len lacgeij en an graga dauwohob, kaba, en esulou len. Dauntoba len ledag Allah men sogougb, kaba, len lemeigdoumesa lenin meroho an meren geicara dou en touwero. Hanoba en enara dou len, endagai: Sug sud hom dau meijen sogougb en ecicugb dau sug en eicara se meijen lo. Era dau sug en esedougwo meijen domba, kaba, yen yenara dou en dag en eigtou se boromei dedemeda naugb en etarahabei? Naro, yen yemenara dangga dou enero. Doba yen yarougb en naugb en ougwan ared naugb yenahabi. Gin dauwohob, kaba, yen yarougb en deit, yendagai: Ban beg sansun menau naugb ban bodo ared ingga dou dan. Hanoba ban behigdodo dan naugb dan degara dara detara bouwa dauwahabi, ban bemet aban ared deit.

⁸

⁹Dara sug en aimo yen meijir an ginohob, kaba, yen yen sijo dou en touei? Naro, yen yemen sijo dou en touwero. Anai gini aimo areg yen yogod an deb naugb en danggohob.

¹⁰Dangga yen toua, sug yen yaimo areg Allah arougb yen anohob, kaba, yen yemeigdoumesa yenin meijoho an ginero. Doba yen yowun yenin meigdoc mes arjaga an gin dous. Hanoba yen yenara dou yenin, yendagai: Maman madag sogougb gemera mera hom dou maman mougtero. Anai maman maicara maimo areg en arougb maman an dousaba.

¹¹Sug Yesus esulou men logodeh dag graga bouwohob, kaba, en eraga audud dig Yerusalem deit. Sug en edebeij se Samaria dara Galilea maraufuohob, kaba, en eraga aud cinogo hom sungga. Sug en edebeij deinyor cinogo hom ginohob, kaba, leng aremos gogoufu et len merug sisa len agasa en sungga. Doba len lesa aigus dous. Anai sug aremos gogoufu et len dag gin, kaba, emedeinyum naugb sug len lemesijaresa Allah. Dara sug len gus los len, kaba, eic dag len lemesijaresa Allah touwero. Hang len leigtou aigusi dau len namcir. Dangga hang, len leiyagarij Yesus, lendagai: Adehsud Yesus, ban abdoc emeineg an emeneroei?

¹²

¹³

¹⁴Sug Yesus eiya lenohob, kaba, en arougb len, endagai: Yen yeihweda naugb yen yedens yenin meijaga an aremos gogoufu ingga dou meijen gembala gesa taij ginahabi. Dangga sug len leihweda asa ucina, kaba, aremos gogoufu get len graga augwan ediyebeiya dau len namcir.

¹⁵Sug sud hom dau leng merug sisa graga, en eiya enin maga, doba aremos gogoufu augwan obsara dau enohob, kaba, en agahugouhw an Allah medam namcir. Hanoba en ecicugb aud Yesus.

¹⁶Sug en edebeij Yesusohob, kaba, en eijeboho bamuhumlo deseino en mohora naugb en en sijo dou en toua. Sud hom gin, kaba, dau leng Yahudi misenero, doba lugmahara dau leng Samaria dous.

¹⁷Sug Yesus eiya, doba lugmahara gin eng ecicugb aud en, kaba, en eimiman dau gin dou men logodeh. Hanoba en eijidougwo len, endagai: Dagiro, naugwe hang, sud hom dau lugmahara enin dous eng en ecicugb naugb agahugouhw an Allah? Anai dan deic geigouhw dou merug sisohob graga. Dangga merug senggegu dau maman Israel, kaba, len merugwenggeroda?

¹⁸

¹⁹Sug Yesus enara dangga dou men logodeh dauwohob, kaba, en arougb sud hom ingga, endagai: Ban beisa besa naugb beihwedig aban tueda. Anai ban bod abina debsa dani. Hang aremos gogoufu emobsara dau ban toua namcirohob.

²⁰Se lona ingma deit, kaba, leng Parisi leijidougwo Yesus, lendagai: Se lona giro, kaba, Allah ebiji naugb sug en oiharaga maman ucugb deita? Doba Yesus auni dou len, endagai: Sug Allah oiharaga yen ucugb, kaba, lusud lemens dau sug ebiji sugini dara sugaba dou yen touwero. Anai Allah men goiharaga gini, kaba, ebiji se yen meigdoc mesohob. Dangga hang, yen yemeiya gansins augwan gini dara yen meijires touwero.

²¹

²²Sug Yesus auni dou leng Parisi dag graga bouwohob, kaba, en esulou men logodeh dougwo len gus, dauntoba len lemaugwohosa len dau men Lona Sug En Ecicugwen gin touwero. Hanoba en enara dou len, endagai: Se lona gacin, kaba, lusud leden dou yen, lendagai: Lusud Meraguna Mebin en moongga ouwada deb ginohob. Dara ligbum, kaba, len leden dou yen, lendagai: En moongga ouwada deb gadohob. Len len dangga dou yen, anai yen meigdoc ebehibeh naugb yen yeiya dan se lona homahabi. Doba yen yemeiya dan se lona inggaro. Dangga yen yemaimo len merir naugb yen yehilon dan augwougblo.

²³

²⁴Anai se Lona Sug Lusud Meraguna Mebin Dan Decicugwen, kaba, dan demecgoneh dan indugt dau yenero. Doba dan dens danin ainyes abeba lusud laugwan meriresi. Aninim dag bagar mouf gehinya se bogo, kaba, sud hom dous emeiya gin touwero. Doba lusud dau sug igda agunya terimda sug igda obsaresa, len laugwan leiya gin toua.

²⁵Doba sug Lona gini emedebeijbuma, kaba, lusud lasidged dan dara len leic mog erij medam dou dan nosahabi.

²⁶Dara se Lona Sug Lusud Meraguna Mebin Dan Decicugwen, kaba, lusud lemesedeb len merdoc mes naugb dan touwero. Doba meren geicara aninim dag leng se Nuh men lona meren geicara gin toua terimda.

²⁷Anai len toua lemesedeb len merdoc mes naugb lona sug duhu en baiyan cinogo an len touwero. Doba len merdoc obdaranim naugb len letara, dara legara, dara leicim toua. Dara len leicara dag gini terimda edebeij lona sug Nuh einesa ingmes dau lenohob. Hang duhu eij baiyan len laugwan lomom louwa namcir toua.

²⁸Dara meren geicara toua, aninim dag leng se Lud men lona meren geicara toua terimda. Anai len toua lemesedeb len merdoc mesero. Doba len merdoc obdaranim naugb len letara, dara legara, dara len lohwara dara len loumara daum ucucugb, dara len lesara, dara lahud tu menau. Dara len leicara laimo dag gin, terimda edebeij lona sug Lud eihwededau cinogo Sodom an len toua. Hang smougb ait len laugwan louwa namcir. Anai len lemecinaga dau lona sug Allah esa igdahab gohoseri an smougb dau bogo touwero.

²⁹

³⁰Augwan gini toua, aninim se Lona Sug Lusud Meraguna Mebin Dan Decicugwen gin toua. Anai se Lona ingga, kaba, lusud lemesedeb lenin merdoc mes deinaugb lona sug dan dens danin ainyes dou len touwero. Doba meren geicara esogwa deisa leng se Nuh dara Lud maran lona meren geicara toua terimda.

³¹Dangga se Lona ingga sug sud hom dau yen eni moongga se uf medgomorohob, kaba, en emouwaden naugb emdeic men aremougb geb se dimei mes deitlo. Doba en esogwa bougb dau namcir. Dara gareg dau yen en edeba se lo, kaba, en emecicugb se men tu touwero. Doba en toua esogwa bougb dau namcir.

³²Hang yen meigdoc moc dougwo Lud mesouwa touwero. Doba yen meigdoc eiseisan en terimda.

³³Anai gareg dau yen en ebehnehino enin mog dougwo sug gomom, kaba, en mena ediyebeiya dau en namcir. Doba gareg dau yen en emebehnehino enin mog dougwo sug en omomero, kaba, en mena emdagaus.

³⁴Dangga se Lona ingga sug lahwai lacogom se boromei hom, kaba, malaikad ledahwan laingmeda. Doba laingma, kaba, latou se boromei deb dous.

³⁵Era sug lagida lahwai laoci tramdad mor desijim, kaba, malaikad ledahwan laingmeda. Doba laingma, kaba, laigtou deb. [

³⁶Era sug lahwai ladeba se lo hom, kaba, malaikad ledahwan laingmeda. Doba laingma, kaba, laigtou deb toua.]

³⁷Sug Yesus ens dau men lona dou men logodeh dag ginohob, kaba, len leijidougwo en eisaugb lona ingga deit, lendagai: Adehsud, areg ban ben gini, kaba, ebiji deb sugiro? Doba Yesus auni aremeijouhw gen dou len, endagai: Lusud laugwan lecinaga dau gin dag misen namcir. Aninim dag sug lusud leiya bougena leinyana, kaba, len lecinaga aremeiyema ingmemeb sungga touohob.