Read Manikion LUKAS 2 Bible Online

LUKAS 2 - Manikion bible

LUKAS 2

¹Se lona sug Elisabed ouwadan Yohanes gin, kaba, leng Roma meren mougt mera medam, moho Agusdus, en esa mer dou men lusud gen moho oiharaga len laugwan, dauntoba len lecicugb se meren cinogo naugb sug len ledeic len meroho dou en toua. Anai en ouwan naugb len lohw cinogo dou en.

²Len lebiji naugb sug len leic meroho aimougtut gini sug leng Roma meren mougt mera medam, moho Agusdus, men gedeijan, moho Kerenius, en edag leng se Siria meren mougt mera medam se meren hancob augwan gini.

³Dangga astesda sud hom yom, kaba, en eihweda se enin men cinogo naugb sug en edeic en moho toua.

⁴Dara Yusub dara Mariam, kaba, lan toua laiwhedau Nasared se leng Galilea meren hancob dig Daud men cinogo Bedlehem, geb se leng Yudea meren hancob naugb lan ladeic maroho sungga. Anai eni dau Daud men meijouhuda, dara Daud medebeito, en misen toua.

⁵Dara Mariam, kaba, Yusub moho aiga en dousaba. Doba en menuhwa edag goujohob.

⁶Dangga sug lan ladebeij se Bedlehemohob, kaba, Mariam men lona edagasa naugb sug en ouwadohob.

⁷Hanoba en ouwadan meis mebin hom. Dara en eic minc adinggon eni deb se mohoi aremeta letaresa. Anai tu misen augwan atij dougwo lanohob. Hang lan latou se tu meij garemeta meren dous.

⁸Dara se loba ingga, kaba, leng gembala merug hosa len lesedougwo meren domba se lomougwisa geb acec cinogo Bedlehem gin toua.

⁹Doba sug len lesedougwo meren domba gin, kaba, maman Adehsud men malaikad hom, en ens enin ainyes dou len. Dara men gogouf cucugb erbacec len toua. Dangga hang, len lahau dara leijesa medam namcir.

¹⁰Doba Allah men malaikad gin, kaba, en oho mer debin len, endagai: Yen yemahaulo. Anai mer gedig dan doho dou yen gin, kaba, eic yen yaugwan meigdoc agahugouhw dou yen dara naugb lusud se cinogo gin augwan toua.

¹¹Anai se loba gin, kaba, gida hom en ouwadan meisi hom se Daud men cinogo gini naugb en eigdoc yen dau meijen gogom augwan namcir. En moho Krisdus, meijen Adehsud.

¹²Dara yen yemeiya mem en eic minc adinggon deb se mohoi debohob, dag ansins dou yen toua.

¹³Sug malaikad hom graga en enara dou len dauwohob, kaba, malaikad leinyana gougwa dau bogo len lens lenin ainyes desij en deit.

¹⁴Hanoba len lagahugouhw an Allah, lendagai: Maman magahugouhw an Allah se surga, Allah se bogo. Grag eigtousa goucucugb mohw gada, gecabec meb gada. Moho agas gougwa, moho agas gouji. Dangga, kab, murid Krisden magahugouhw an Allah se surga, Allah se bogo an. Eic geigouhw naugb ma, ou geigouhw dou ma.

¹⁵Sug malaikadir lecicugb se bogo dau lenohob, kaba, leng lesedougwo domba gini, len len doum, lendagai: Yen yin, maihwedig Bedlehem naugb maman madeiya areg Adehsud ens dou maman ginahabi. Anai aremer gini acgunog se Bedlehem dag indeicohob.

¹⁶Dangga len lobga dedemeda se Bedlehem, kaba, len lesma Mariam dara Yusub, lan ladesedougwo mahaniheni atouda se mohoi deb gini.

¹⁷Sug len leiya, doba augwan asesa namcirohob, kaba, len lecic dau areg malaikad en dou len eisaugb mahaniheni gini dou lusud laugwan toua.

¹⁸Dangga sug len louman dau gin, kaba, len leimiman namcir.

¹⁹Doba Mariam, kaba, en eic len merir an gin augwan se medoc mes. Hanoba en auwam an gin toua terimda.

²⁰Dara gembala sug len lecicugb aud meren domba se lomougwisa deit, kaba, len lagahugouhw an Allah. Hanoba len leigdoumesa en moho an areg len leiya dara loumanohob gin ucucugb terimda. Anai augwan gini asesa dag malaikad enara dou lenohob.

²¹Sug edebeij lona gedig senggemoiyohob, kaba, gembala gesa taij en en naugb en ogod godeh en mos dau. Hanoba len leic en moho dag Yesus dou en toua. Anai gini aimo dau areg malaikad en dou Mariam sug godeh gini emeb se en menuhwebma.

²²Dangga toua, edebeij lona sud hwai debin sug Mariam ouwadan en meisi dauwohob, kaba, Yusub dara Mariam lan laihwedesa Allah Men Tuari se Yerusalem naugb gembala gesa taij eic gecabeci dou Mariam ucugb deit. Anai gini aimo dau areg Musa men gomnomna en ogod an gin deb nosohob. Dara lan laho Yesus naugb lan laic dou maman Adehsud sungga toua.

²³Anai maman Adehsud ogod an dangga dou Musa se men gomnomna deb sug nosohob, endagai: Astesda sug ligida louwadan merih ligiji mebin, kaba, yen yeic len dou meijen Adehsud dan nosa dauwahabi.

²⁴Dangga sug lan ladebeij Yerusalemohob, kaba, lan laic bohobei hwai naugb lauwaharo dou maman Adehsud, dauntoba Mariam en ecabeci deit. Anai maman Adehsud en mer gin, kaba, ogod an deb se gomnomna deb nosohob, endagai: Gareg en ogor deseino dan, kaba, en eic bousugb hwai, era bohobei moto hwai naugb auwaharo dou dan, kaba, gini dag en ecabeci deseino danohob.

²⁵Dara se lona ingga, kaba, sud hom, moho Simeon, en toua moongga se Yerusalem gini. Anai en eigtou ateteij naugb lona sug Allah esa sud hom aud leng Israel naugb sug en ahahumohumesa len debin gogom deb debin lenohob. Dauntoba len merdoc ebtou dag nosa ucugb deit. Sud hom gin, kaba, en aimo areg asesa Allah enin medoc mes namcir. Dara en esijaresa dara agahugouhw an Allah esesa terimda. Dangga Mena Gogoufu eigtou desij en toua namcir.

²⁶Doba sug en eigtou ateteij naugb lona ingga, kaba, Mena Gogoufu en dou en deb dag en emomom dedemedero. Doba en eigtou terimda en eiya maman Adehsud men sud hom geigdoc leng Israel dau meren gogom se en mairesahabi, en emomom toua.

²⁷Dangga sug Yusub dara Mariam laimo Musa men gomnomna naugb sug lan laho Yesus mahaniheni aud Allah se Men Tuari, kaba, Mena Gogoufu arougb Simeon naugb en eihweda se Allah Men Tuari gin toua.

²⁸Sug en agasa lan se Tuari an godeh ginohob, kaba, en eigdoumesa Mariam en meisi, moho Yesus, gini en dau mem mesira. Hanoba en agahugouhw an Allah namcir, endagai:

²⁹Adehsud, iteitogin, kaba, dan indoc obsarohob. Anai sud hom gedig ban besedeb naugb en eigdoc lusud dau meren gogom, kaba, dan deiya en se dan indiresohob.

³⁰

³¹Dara ban bemecgoneh en touwero. Doba ban bens en ainyes dou lusud laugwanohob naugb en ens ban abir dag mouf gaisema lugmahara, dauntoba len len aud ban toua. Dangga len leigdoumesa aban meijouhuda emeng Israel emoho an gin toua terimda. Hang dan indires emeb deitero. Doba ban barges aban sogougb dan domom dara indoc ebtou, ingginda.

³²

³³Sug Yesus mena dara mem lan lauman Simeon mer an gin, kaba, lan laimiman dau gin namcir.

³⁴Sug Simeon en agahugouhw an Allah eisaugb Yesus dauwohob, kaba, en ocuncum aga Yusub, dara Mariam, dara lan maraisi gini naugb Allah eic geigouhw dou len toua. Hanoba en esulou Yesus mem Mariam ucan deit, endagai: Ban bouman deigeigouhw. Allah esedeb ban abisi hom gini naugb sug en eigdoumesa dara en owun leinyana dau mamang Israel len meroho. Anai maman mainyana, kaba, maman mamdoc erleij aud Allah ogdoc men geicara gini. Doba ligbum dau maman, kaba, len merdoc esges en naugb len lasid lenin dau Allah toua. Dara Allah esedeb en dag gansins dou maman, dauntoba maman macinaga en en dau Allah enohob. Doba maman mainyana, kaba, maman mawun en moho an gin namcir.

³⁵Hang Allah esedeb en naugb sug en ens dau areg geb se lusud leinyana merdoc mes augwan beb ainyes toua. Doba ban, kaba, lusud leinyana meren geicara dou en gini kaba, eic dag augwan gini eic dag ketemei mec ogod ban abdoc gorougb mobog, obogougb namcir.

³⁶Dara gida debdes hom gedig en esai Allah moro, moho Hana, eni moongga se Allah Men Tuari gin. Eni Panuel mehida dau meijouhuda Haser. Dara eni sudbod namcir touohob. Sug nosa, kaba, en es mesuwohob, doba edebeij arisogomoc senggai dous, kaba, en omom dau enohob.

³⁷Dangga dau lona ingga, terimda edebeij men arisogomoc sud hogu hogu edeisu, kaba, en emes mesuwa deitero. Doba en ehig dag debdes bedag sudbod gin namcirohob. Hang en emarges dau Allah Men Tuari gin mougwa hom deb touwero. Doba en ehig dau ared naugb en ocuncum dou Allah dara esijaresa en astesda lona loba terimda toua.

³⁸Dangga se lona sug Yusub dara Mariam, lan laho Yesus aud Allah se men Tuari ineg, kaba, Hana toua en en aud lan. Sug en edebeij lanohob, kaba, en agahugouhw an Allah, endagai: Allah, dan den sijo medam dou ban. Anai ban besa godeh gini dou emenohob naugb en eigdoc emen dau emen gogom augwan namcir. Hanoba en ens meijouhw eisaugb godeh gini dou lusud se Yerusalem ucan dou len toua. Anai leinyana dau len ingga, kaba, len leigtou lateteij naugb lona sug Allah eigdoc len dau meren gogom augwan namcir.

³⁹Doba sug Yusub dara Mariam, lan laimo areg maman Adehsud ogod an deb se men gomnomna eisaugb lan dauwohob, kaba, lan lacicugb se maran cinogo, moho Nasared, se leng Galilea meren hancob ucugb deit.

⁴⁰Dara maran godeh gin, kaba, Allah ousa en naugb sug en eic mou ouforoho eiseisaugb dou en. Hang en emeic dag en ousa en naugb sug en ecinaga areg asesa Allah enin medoc mes augwan toua terimda. Anai Allah medoc eigouhw an en namcir.

⁴¹Doba edebeij astesda arisogomoc, kaba, Yesus mena dara mem lan laihwedig Yerusalem naugb lan mardoc eiseisan lona sug Allah esga lan marjemouwer dau cinogo Mesir sug nosohob. Dara lan lougwan ared debin lona gin toua.

⁴²Dangga sug Yesus men arisogomoc edebeij sisa hobjeraiyohob, kaba, en toua aimo lan naugb len laimo aremeijouhw eisaugb Lona Gohw Bedreg gin augwan dag nosa deit.

⁴³Sug len merdoc eiseisan lona gin ouwa dauwohob, kaba, Yesus mena dara mem lan lacicugb dig maran cinogoda. Doba Yesus, kaba, en eigtou se Yerusalem deb. Dangga lan lamecinaga dau sug en eigtou deb gin touwero.

⁴⁴Anai lan laudesa en aimo lan marusur, era lan marsir aimimoba. Doba sug lan lac marohora terimda edebeij sug loba osun lanohob. Hanoba lan lameiya en mog touebma, kaba, lan laijidougwo lan marusur dara lan marsir gini an en. Doba en emaimo len touwero.

⁴⁵Dangga sug lan laijidougwo, doba lan lamesma enero, kaba, lan lacicugb dig Yerusalem naugb ladogod dougwo en sunggahabi.

⁴⁶Sug lan ladebeij Yerusalemohob, kaba, lan ladehilon en se lona homoiyahabi, lan lamdesma en se Allah Men Tuari. Anai en eigtou desij leng meru ouforoho se Musa men gomnomna sungga naugb en ouman dau areg len ledidib dou lusud. Dara en eijidougwo len an areg len ledidib dou len gin toua deb gini.

⁴⁷Dangga lusud laugwan sug len louman dau areg en eijidougwo len an, dara auni dou len gin, kaba, len leimiman dau en namcir. Anai areg en auni gin, kaba, ens dag en mou ouforoho naugb en ecinaga Musa men gomnomna men meijouhw augwan asesa namcirohob.

⁴⁸Dara Yesus mena dara mem sug lan laiya dau gin, kaba, lan laimiman dau en namcir toua. Hanoba mem en omi debin en, endagai: Indihigba, ban berei aman dag gini, anara? Anai ban abina aman amehilon ban se lona homoi, dara aman amdoc momogo medam an ban ginohoba?

⁴⁹Doba Yesus auni mem mer ucugb, endagai: Yan yahilon dan, anara? Anai dan Indina en arougb dan naugb dan den se men Tuari gina? Yan yamecinaga dau ginbumei?

⁵⁰Doba mena dara mem lan maru emobgesa en mer an areg en en dou lan ginero.

⁵¹Sug Yesus auni mem mer ucugb dou lanohob, kaba, en emohoiya lan marir debero. Doba en eisa baimo lan dig meren cinogo Nasared ucugbda. Dara sug len ledebeij cinogo ingga, kaba, en emohoiya lan marir touwero. Doba en owun enin medoc arjaga deseino lan naugb eicara dou lan terimda. Dara Yesus mem, kaba, en medoc moc dougwo aremer augwan graga touwero. Doba en eic augwan gin se en medoc mes namcir.

⁵²Doba Yesus, kaba, en edag sud se maga, dara en mou ouforoho ededau mohmoh namcir. Dangga emeic Allah medoc emesgiraha se en dousero. Doba eic lusud laugwan merdoc esgiraha an en toua terimda.