Read Manikion LUKAS 20 Bible Online

LUKAS 20 - Manikion bible

LUKAS 20

¹Se lona hom sug Yesus edidib Allah mer meijouhw dou lusud se Allah Men Tuari, dara en esai Allah moro dou len toua, kaba, gembala gesa taij meren mougtir, dara leng meru ouforoho se Musa men gomnomna, dara leng Yahudi meren mougtir len len aud en.

²Hanoba len leijidougwo en, lendagai: Ban beicara gin augwan, kaba, ban bos bad ara? Era gareng arougb ban naugb gina? Ban bens meijouhw augwan asesa dou emenahabi.

³Doba Yesus auni dou len, endagai: Dan toua, deijidougwo yen an aremer ginahabi. Sug Yohanes ogun lusud se duhu sug nosa, kaba, gareng en arougb en gina? Allah se bogoei? Era lusud se cinogo gin eng larougb en an gin dousei? Yen yauni dou danahabi.

⁴

⁵Sug len mougtir louman dau gini, kaba, len lococim, lendagai: Sug maman mauni dou en dag Allah eng eigdoumesa Yohanes moho naugb ginohob, kaba, en auni dou maman endag dagiro, naugwe hang, yen meigdoc emebdebin an en touwero?

⁶Doba sug maman mauni dou en dag lusud eng arougb en dous, kaba, lusud laugwan gini leic igdahab lad maman momom namcir. Anai len louma debin en endag sud hom gesai Allah moro dou lendaha.

⁷Dangga, kaba, len launi dou Yesus, lendagai: Emen ememecinaga gareng arougb Yohanes naugb en ogun lusud se duhu gin touwero.

⁸Dangga hang, Yesus auni dou len, endagai: Yen yemens dau sud hom gareng en arougb Yohanes en moho dou danero, kaba, dan demens sud hom garougb dan naugb indan geicara augwan gin en moho dou yen touwero.

⁹Sug Yesus auni dou mougtir graga dauwohob, kaba, en eic gainyenara hom debin gin dou lusud deit. Hanoba en enara dou len, endagai: Sud hom es anggur meda mogud se men lo hom. Sug en es bouwohob, kaba, en ehilon lusud merug hosa naugb en og ingma dou len, dauntoba len lesedougwo men ingma deb naugb en toua. Sug en og dou len dauwohob, kaba, en eihwedig cinogo gus dau lenda. Hanoba en eigtou sungga se lona einyana toua.

¹⁰Dangga sug edebeij igda goho anggur mera ginohob, kaba, mougt graga en esa men sogougb hom aud len, dauntoba len lec men mera nagama ingma dou endahabi. Doba leng lesedougwo lo gin, kaba, len lagaigeij en naugb logod en dous.

¹¹Gin, kaba, mougt mera en esa men sogougb hom aud len deit. Doba len logod en dara leic igdebes dou en. Hanoba len lecicugb en beihweda dara mog mogud aud men mougt mereda toua.

¹²Gin deit, kaba, mougt mera en esa men sogougb ingma dara aud len deit. Doba len logod en mogwihi ororo namcir. Hanoba len lerba en toua dig liga medigoda.

¹³Dangga mougt gedig men lo gin, kaba, en enara se enin medoc mes, endagai: Dan dehilon ucina dagiro naugb len gin deitahaba? Eigouhw, kaba, dan desa dan indisi mohora hom gedig dan indoc gororougb eni aud len deitahabi. Anai dan decinaga dag len lemeigdoumesa en mohos.

¹⁴Dobnaro. Sug leng lesedougwo lo graga len leiya en, kaba, len lococim, lendagai: Sud hom gin, kaba, cum, en mena ogugwo mecigbougb geb se lo augwan dou en. Dangga hang, yen yin naugb maman maic gomom dou enda, dauntoba mecigbougb augwan gini eb dou maman dous.

¹⁵Dangga sug len lagaigeij enohob, kaba, len lohugouhw en dig liga medigo. Hanoba len ledeic gomom dou en deb sungga toua. Sug Yesus eic gainyenara dou len bouwohob, kaba, en eijidougwo len ucan deit, endagai: Yen youdesa dagiro? Sug mougt mera naugb lo gini en ecicugwen, kaba, en eb ara dou leng lesedougwo lo gina? En eic geigouhw dou lenei?

¹⁶Naro. Sug en en, kaba, en eic gomom dou len laugwan namcir. Hanoba en ogugwo lo gini deb se len gus merisira naugb len lesedougwo deit. Sug lusud laugwan louman gin, kaba, len leiyaga dougwo en, lendagai: Adehsud, dangga, isnaro.

¹⁷Doba Yesus auweila len toutou. Hanoba en ei mairesi dara len, bendagai: Gedangga, kaba, areg sud hom en erba Ugwaremer debin nosohob, kaba, men meijouhw dagiro? Anai en og dag gin debohob, endagai: Igdahab hom areg leng lohud tu lerbahaba debohob, kaba, Allah enin eng eigdoumesa dag buc mandeij ucugwohob.

¹⁸Dangga gareg en obsara bad igdahab gini, kaba, en mor ohurohw. Doba sug igdahab gini obsara bakebin eni, kaba, eic mor mor dou en namcir.

¹⁹Sug leng meru ouforoho se Musa men gomnomna dara gembala gesa taij meren mougtir, len louman gainyenara gin inegohob, kaba, len louwan lagaigeij en. Anai len lecinaga, doba Yesus eic gainyenara gini oho irir meren geicarohob. Doba len lahau dau lusud leinyana lesa dougwodaha. Dangga hang, len lemagaigeij en touwero.

²⁰Doba mougtir, kaba, len lehilon ucina ingma deit naugb sug len leic gomom dou Yesus. Dangga hang, len lemohud sihwa ai len gus. Hanoba len lococ len, lendagai: Yen yeihwedaud Yesus naugb yen yerba mohoisa en dag yen meigdoc hom dara en. Dauntoba sug en enara didi bedreg dau leng Roma meren gomnomna, kaba, yen yeden dou emen naugb maman mahwan en aud leng Roma meren mougt mera, dauntoba en eic gomom dou en namcir. Anai en men goubesa edeinyum naugb ginohob.

²¹Dangga sug leng lohud sihwa ai len gus gini, len ledebeij Yesusohob, kaba, len lenara louseij merir dou en namcir, lendagai: Adehsud, emen emecinaga ban bemereiyara dou lusudero. Doba areg ban bedidib, dara areg ban ben dou lusud, kaba, ban ben augwan asesa dag misen namcir. Dara emen emecinaga dag ban bemesi leng meroho agas aiyei dau leng meroho eb tainya touwero. Doba ban bens dau areg asesa Allah enin medoc mes augwan asesa dou len se geica dous.

²²Dangga hang, emen ememeijidougwo ban sug emen emohw cinogo dou leng Roma meren mougt mera gouji, kaba, emen emedreg dau Allah men gomnomnohobei? Era naroei? Ban bens meijouhw asesa eisaugb gin dou emen touahabi.

²³Doba Yesus ecinaga dau areg len leija en an gini, kaba, dag len lerba mohoisa en dous.

²⁴Dangga hang, en emarougb len, endagai: Yen yeic aregoufu perag mogo hom naugb yen yens dou dan didiyahabi. Dangga sug len leic dou en beiyohob, kaba, en eijidougwo len ucugb, endagai: Gareng mena dara moho geb se aregoufu gina? Doba len launi dou en, lendagai: Leng Roma meren mougt mera medam eng mena dara moho inggeb se ingga.

²⁵Dangga Yesus en dou len, endagai: Gedangga, kaba, areg mougt mera medam meni, kaba, yen yohw dou en. Doba areg Allah meni, kaba, yen yeic dou en toua.

²⁶Sug len louman dag gin, kaba, len leimiman dau gin namcir. Hanoba len lemeijidougwo en an ara ara deitero. Doba len leigtou dag lodinanir namcir. Anai len lerba mohoisa en naugb en enara didi deseino lusud laugwan. Dobnaro. En emenara didi mougwa homero.

²⁷Sug Yesus auni dou leng Parisi dag graga dauwohob, kaba, leng Saduki merug hosa len len aud Yesus naugb lainyen en eisaugb leng leisa dau gomom toua. Anai len gini, kaba, meren gauwamara dag lusud lemeisa dau gomom ucugb deitero, doba lomom namcir.

²⁸Dangga sug len ledebeij Yesusohob, kaba, len leijidougwo en, lendagai: Adehsud, Musa arougb emen se men gomnomna, endagai: Sug sud hom maguna en omom dau mesouwa sug lan lameic marih hom touebma, kaba, magto geiseni eic maguna mesouwa ingga deit. Dauntoba sug lan laic marih, kaba, lan marih gini es maguna moro deb.

²⁹Sug leng Saduki lens dau Musa men gomnomna dou Yesusohob, kaba, len leic gainyenara hom debin gin dou en deit, lendagai: Naro, kaba, sud hom en mehir ligiji mogud merug senggai merugwengga. Lona hom, kaba, meis eng sud en eic mesouwa, doba en omom dau en sug lan lameic marihebma.

³⁰Dangga magto geiseni en eic gida ingga deit, doba en toua omom dau en sug lan lameic marih touebma. Dangga magto mogumsi geisu lan, kaba, eic en deit. Doba en toua omom dau en sug lan lameic marih touebma. Gini eb naugb merug senggai graga len laugwan leic gida hom gini. Doba len laugwan lomom teitei dau en namcir.

³¹

³²Sug len laugwan lomom dau enohob, kaba, gida en toua omom ucan len.

³³Sug leng Saduki len leic gainyenara dag gin dou Yesusohob, kaba, len leijidougwo en ucan deit, lendagai: Edebeij lona sug lusud leisa dau gomom ucugb, kaba, gareg dau len gin eng emeic gida gin deita? Anai len laugwan lougb dag mersouwohob.

³⁴Doba Yesus auni len merir an gini, endagai: Lusud se cinogo gin dous eng len leicim. Doba leng meroho edeinyum naugb sug Allah eigdoumesa len dau gomom. Dara leng meroho edeinyum naugb sug en oiharaga len ucugb, kaba, len lemeicim deitero.

³⁵

³⁶Doba len ledag malaikadir dous. Dangga, kaba, len lemomom toua deitero. Doba Allah eigdoumesa len dag en mogwihi mogo len dag misen beb huhugb namcir. Anai en eigdoumesa len dau gomom ucugwohob.

³⁷Dara Musa en toua eic gansins ainyes dou maman dag maman Adehsud eigdoumesa lusud dau gomom deb naugb maman touohob. Anai sug en og se Surad Injil Meb Mohon dau sug maman Adehsud gini en ens enin dou en se lisug mon gedig smougb mouf ebsa deb nosohob, kaba, en eigdoumesa Allah en moho dag Abraham, dara Isag, dara Yakub meren Allah gin toua.

³⁸Sug Musa eigdoumesa Allah en moho dag meren Allah dag ginohob, kaba, gini ansins dag len gin lemomom deitero. Doba len merireseb huhugb terimda. Anai Allah, kaba, en emedag Allah naugb leng lomomero. Doba en edag Allah naugb len merireseb dous. Anai deseino Allah, kaba, sud hom en emomomero, doba len laugwan merireseb terimda.

³⁹Sug leng meru ouforoho se Musa men gomnomna len louman dau areg Yesus auni dou leng Saduki ginohob, kaba, merug hosa dau len gin, kaba, len lousa deisa en mer an gini. Hanoba len lenara dou en, lendagai: Adehsud, areg ban bauni dou len ingga, kaba, asesa namcir.

⁴⁰Dangga ogdoc gin, kaba, lingma lemeic merus naugb leijidougwo en an ara ara deitero.

⁴¹Doba Yesus eijidougwo len ucugb deit, endagai: Dagiro, naugwe hang, yen yenara dou lusud dag Mesias gedig en eigdoc yen dau meijen gogom, kaba, en edag Daud medebeito dousa?

⁴²Anai Daud enin eigdoumesa sud hom gini dag en medebeitoro, doba dag men Adehsud dous. Dangga hang, en emerba Ugwaremer an en, endagai: Maman Adehsud Geis Huhugb en enara dou indan Adehsud, endagai: Ban beigtou dig dan insira misen naugb ban bedag mougt mera medam desij dan toua. Dara ban beigtou desij dan dag gini terimda dan dowun aban moc augwan dag hotingga deb tainya ban abohora namcirahabi.

⁴³

⁴⁴Sug Daud eigdoumesa Sud Hom Geigdoc Yen Dau Meijen Gogom gini dag men Adehsudohob, kaba, dagiro, naugwe hang, Mesias gini Daud medebeito gina?

⁴⁵Sug Yesus eijidougwo leng meru ouforoho se Musa men gomnomna dag graga bouwohob, kaba, en enara ceg ceg leng Parisi dara leng Saduki dou men logodeh deseino lusud laugwan ucan deit, endagai:

⁴⁶Yen yebehnehino yenin meigdoc mes dougwo len gini meren geicara namcir. Anai sug len lec, kaba, len meru ehigehi naugb len lesebesan meren sansun gagas gogouf cucugb terimda. Dara len lec se usmougb gedig lusud lohwaresa. Anai len louwan naugb lusud leigdoumesa len meroho. Dara lecguna dou len toua. Dara sug len leinesa tuari, kaba, len leigtou se maija moc geb ino. Dara sug lusud lougwanara, kaba, len louwan naugb letara desij leng meroho agas dous.

⁴⁷Dara len merdoc emeineg an debdes touwero. Doba len lerba mohoisa len an meren aremougb augwan namcir. Hanoba len leicara launun dougwo meren geicara gini, kaba, len locuncum an debdes dagasges ucan debin gin toua. Dangga hang, se Lona Sug Allah Ogod Aremer Aga Lusud, kaba, meren gogom medam edreg dau len gus namcir.