Read Manikion LUKAS 22 Bible Online

LUKAS 22 - Manikion bible

LUKAS 22

¹Doba sug leng Yahudi meren Ari Gouji naugb sug len let roti gemerisero ebeij deinyorohob, kaba, gembala gesa taij meren mougtir dara leng meru ouforoho se Musa men gomnomna len lehilon ucina naugb sug len leic gomom dou Yesus. Doba len louwan ledu meru dau leng gus, anai len lahau dag cum, kaba, lusud leic gogom dou len icira gindaha. Dara lona sug lusud let roti gemerisero gini, kaba, len leija lona gin toua dag Lona Gohw Bedreg.

³Sug len lehilon ucina dag gin, kaba, Setan outi se sud hom dau Yesus men logodeh merug sisa hobjerai, en moho Yudas dau cinogo Keriod, medoc mes naugb en edohw Yesus se mougtir ingga merisira.

⁴Dangga sug en eihwedaud gembala gesa taij meren mougtir dara sadodor gedig len lesedougwo Allah Men Tuari meren mougtirohob, kaba, en eijidougwo len, endagai: Sug dan dohw Yesus dou yen, kaba, maman mahilon ucina dagiro naugb ena?

⁵Sug len louman en mer an gin, kaba, len merdoc agahugouhw medam an en namcir. Hanoba len los dou en, lendagai: Sug ban bohw en dou emenohob, kaba, emen toua ememeic aregoufu ingma dou bans.

⁶Sug Yudas ouman gini, kaba, en toua ousa deisa len merir. Hanoba en ehilon ucina naugb sug en edohw Yesus deb se len merisira toua. Doba en edu mou dau len gus, dauntoba len lemecinagero.

⁷Dangga edebeij lona naugb sug leng Yahudi lerba roti gerisa augwan dau meren tu debin meren Lona Gohw Bedreg gini. Hanoba len logug domba en morc an mogwihi debin lona gin toua, kaba, Yesus arougb Petrus dara Yohanes naugb lan lasedeb ared, dauntoba eni, dara Petrus, dara Yohanes, an Yesus men logodeh gus merug sisa len laugwan let ared gini debin meren Lona Gohw Bedreg gin toua. Hang Yesus emenara dou lan, endagai: Yan yaihweda yasedeb roti gemerisero an ared gus debin Lona Gohw Bedreg gin deb naugb sug maman mat toua. Doba lona naugb sug leng Yahudi logug domba debin meren lona gin, kaba, lona hom se meren Ari Gouji sug len let roti gemerisero toua. Anai gini aimo dau areg Allah arougb len an sug nosohob.

⁸

⁹Sug en arougb lan danggohob, kaba, lan laijidougwo en, landagai: Ban bouwan aman amedesedeb ared gin deb sugiro?

¹⁰Doba Yesus auni dou lan, endagai: Sug yan yainesa dig ginda aud Yerusalem, kaba, yan yamagasa sud hom godo debecij hom an duhwes. Yan yaucan en terimda en edebeij tu sug en einesa, kaba, yan yaijidougwo sud hom men tu ingga an dimei hom, yandagai: Aman Adehsud eijidougwo ban an dimei hom naugb sug emen emetara debin Lona Gohw Bedreg gini.

¹¹

¹²Sug yan yaijidougwo en an dag ginohob, kaba, en emens dimei gouji hom se taiba gen esedeb augwan meij mogudohob dou yans. Sug en ens dimei dou yanohob, kaba, yan yasedeb maman ara ara naugb sug maman matara debin Lona Gohw Bedreg gin toua.

¹³Sug Petrus dara Yohanes lan laihwedohob, kaba, lan ladesma augwan asesa dag Yesus en dou lan graga namcir. Hanoba lan lasedeb ared augwan deb naugb sug len letara debin Lona Gohw Bedreg gin toua.

¹⁴Dangga ebeij sug leng Yahudi let ared debin Lona Gohw Bedreg gini ebeijohob, kaba, Yesus dara men logodeh merug sisa hobjerai, len leigtou se boromei naugb letara aninim.

¹⁵Sug len leigtouohob, kaba, Yesus enara dou len, endagai: Dan indoc ebehibeh naugb dan det ared debin Lona Gohw Bedreg gini dara yen sug dan demaimo ucina mog erijbuma.

¹⁶Anai yen youman dan indir deigeigouhw. Dan demet ared debin Lona Gohw Bedreg dag gin dara yen deitero, terimda edebeij lona sug Allah oiharaga yen ucugb. Anai se lona ingga, kaba, Lona Gohw Bedreg gin men meijouhw augwan edougdocohob.

¹⁷Sug Yesus enara dag graga dou men logodeh dauwohob, kaba, en os mog an anggur mohu. Hanoba en en sijo dou Allah naugb gin toua. Sug en en sijo dou Allah dauwohob, kaba, en ens meijouhw debin anggur mohu gini dou men logodeh deit, endagai: Yen yeic mog an mohu gin doum. Hanoba yen yaugwan yeg toua. Anai ebiji dau irogini, terimda edebeij lona sug Allah oiharaga lusud ucugb, kaba, dan demeg anggur mohu dag gin dara yen deitero. Yen youman dan indir an areg dan den dou yen gin deigeigouhw namcir.

¹⁸

¹⁹Sug Yesus eic mog an mohu dou men logodeh dauwohob, kaba, en os roti mogo hom icira en mesira deitahabi, en emen sijo dou Allah naugb gin toua. Sug en en sijo dou Allah enohob, kaba, en ekrisahabi, en emohw an dou men logodeh. Hanoba en ens meijouhw debin gin dou len toua, endagai: Roti gini dag danin indaga gedig dan demeic demauwaharo dou Allah naugb meijen sesar augwans. Hang astesda sug yen yet roti gin, kaba, yen meijina eiseisan indan geicara geb dou yen terimda.

²⁰Dangga toua sug len letara bouwohob, kaba, Yesus os mog an anggur mohu deit. Hanoba en eic an dou men logodeh toua, endagai: Mog an mohu gin, kaba, Allah men gos dou menau gedig dan indugwihi ororo naugb dauma debin gin dou yen toua.

²¹Doba yen youman dan indir deigeigouhw. Sud hom gohw dan deb se leng merug mog merisira, kaba, eni moongga desij dan se boromei ginohob.

²²Dangga cum, kaba, dan daimo ucina mog erij aud gomom aimo dau areg Allah ogod an naugb Lusud Meraguna Mebin dan deb nosohob. Doba naugb sud hom gohw dan gin, kaba, gogom medam eb naugb en namcir.

²³Sug men logodeh louman gini, kaba, len leijidougwom ucucugb, lendagai: Dau maman gini, kaba, gareng en ohw enohoba?

²⁴Se lona hom, kaba, Yesus men logodeh merir laisedim icira meroho dag gareg dau len, kaba, en mesir gus leigdoumesa en moho agas edreg dau len gus laugwana?

²⁵Doba Yesus enara bogod dougwo len merir an gini, endagai: Lugmahara meren mougt mera medam, kaba, len merdoc emedag beim an meren logodehero. Doba len leic gogom dou len terimda. Dara meren lusud gedig len meroho eb taiba len, kaba, len louwan meren lusud naugb len leigdoumesa len meroho dag adehsud naugb len toua.

²⁶Doba naugb yen, kaba, emedanggaro. Anai gareg dau yen en moho dag adehsudohob, kaba, en emaresbes len gusero. Doba en owun en moho dag logodeh naugb len dous. Dara gareg dau yen en edag mougt merohob, kaba, en owun enin moho dag sogougb naugb len toua.

²⁷Dangga hang, dan toua dedag meijen mougtohob, doba dan demeigdoumesa dan indoho an ginero. Doba dan dowun danin indoc mes arjaga dag sogougb naugb dan deicara dou yenohob. Anai sug lusud letara, kaba, gareng en moho agasa? Sud hom geigtou se boromei, era sud hom gohw ared dou enei? Naro. Yen yecinaga sud hom geigtou se boromei eng en moho agas dous. Doba sud hom gohw ared dou en, kaba, en moho eb tainya enohob.

²⁸Doba yen, kaba, yen yowun yenin meigdoc arjaga naugb yen yaimo dan se ucina mog erij gin terimdohob. Hang dan demeigdoumesa yen meijoho dag mougt mera naugb yen yemesedougwo Allah men lusud laugwans. Aninim dag dan Indina Allah eigdoumesa dan indoho naugb sug dan desedougwo men lusud laugwan touohob.

²⁹

³⁰Dangga edebeij lona sug dan dedag mougt mera naugb dan doiharaga lusud ucugb, kaba, yen yeigtou desij dan naugb yen yetara dara yegara dara dan. Dara yen yeigtou se maija moc naugb yen yesedougwo leng Israel meren meijouhuder sisa hobjerai laugwan toua.

³¹Sug Yesus esulou men logodeh merug sisa hobjerai dag graga bouwohob, kaba, en esulou Simon an men logodeh gus ucan debin gin deit, endagai: Simon, ban bouman dan indir deigeigouhw namcir. Anai Allah mer aiyan yen dou Setan naugb en ainyen yen yaugwanohob. Dauntoba en ecinaga dag yen meigdoc akebin en terimda danggei? Era naroei? Aninim dag lusud letitir aigdaga mes an tramdad, dauntoba len leiya endag augwan dag mogo misenei? Era merila mogud touei?

³²Sug Yesus esulou len laugwan dauwohob, kaba, en esulou Simon dou enin deit, endagai: Simon, dan docuncum dou Allah naugb banohob, dauntoba ban abdoc emobsara dau dan namcirlo. Doba cum, kaba, ban beineg aud dan deit. Dangga sug ban abdoc ebdebin an dan naugb ban beineg aud dan ucugwohob, kaba, ban benara bad ban absi len gus merdoc mes toua. Dauntoba len lemobsara dau danero, doba len merdoc ebdebin an dan namcir.

³³Doba Simon ehirirmo dou Yesus, bendagai: Adehsud, sug lusud louf ban se tu gesisug, era sug len leic gomom dou ban, kaba, dan dogod se dan indoc mesohob naugb dan daimo ban se ucina augwan gin toua terimda.

³⁴Doba Yesus enara bauwun en mer ucugb deit, endagai: Petrus, ban bouman dan indir ginahabi. Anai se loba gini sug berougwu emeba mer mougwa hombuma, kaba, ban baideido dan mougwa homoi icira deseino lusudohob.

³⁵Sug Yesus esulou Petrus an merir dag graga bouwohob, kaba, en eijidougwo men logodeh laugwan ucan gin deit, endagai: Sug dan darougb yen naugb yen yesai Allah moro dou lusud sug nosa, kaba, dan den dougwo yen naugb yen yemodo meijen hwigbeimos an aregoufu, dara yen yemoho i an meijen sansunero, dara dan den dougwo yen naugb yen yemeg hwigbeimos dougwo yen meijohora touwero. Doba dan darougb yen naugb yen yeihwedan meijug mogud dous. Dangga sug yen yeihwedan meijug dag gini, kaba, yen yemdesma ara ara ingma touweroei? Doba len launi dou en, lendagai: Naro. Sug emen emesai Allah moro dou len dag gini, kaba, emen emesma augwan edeinyum namcirohob.

³⁶Doba Yesus auni dou len deit, endagai: Iteitogini, kaba, yen yemeic dangga deitero. Doba gareg dau yen men hwigbeimos an aregoufu moongga, kaba, en odo. Dara gareg dau yen men i an sansun toua moongga, kaba, en oho. Dara gareg dau yen men krawan ingmaro, kaba, en ohw men sansun naugb auma toua.

³⁷Anai yen youman dan indir ginahabi. Areg sud hom en og deb se Surad Injil Meb Mohon deb sug nosohob dag lusud lowun dan indoho dag sud hom dau leng merug mog gin, kaba, lusud lesedeb naugb len leicara lesogwesa gin an dan. Anai augwan gini aimo dau areg Allah en esedeb naugb danohob. Hang emedreg toua deitero, doba esogwesa namcir.

³⁸Sug Yesus men logodeh louman en mer an ginohob, kaba, len launi ucugb dou en, lendagai: Adehsud, ban beiya krawan hwai inggini. Doba Yesus etaha len merir an gini, endagai: Yen yin, teiyengga. Yen yemeiso yen meijir an gin terimdero.

³⁹Sug len letara debin Lona Gohw Bedreg gin bouwohob, kaba, Yesus eihwededau sungga naugb en eisaugb dig usi hom se mengarougb Saitun Meda dag moung mougb deit. Dara men logodeh toua laimo en.

⁴⁰Sug len ledebeij se us ginohob, kaba, Yesus esulou men logodeh, endagai: Yen yocuncum dou Allah esesa terimda. Dauntoba en eseyeiyo yen dougwo sug Bilis ainyen yen.

⁴¹Sug Yesus esulou men logodeh dag gragohob, kaba, en asid eninto aigus dau len, dag les hu homahabi, emdebeij. Sug en edebeij sunggohob, kaba, en ecgun mohorbrida badedeij cinogo.

⁴²Hanoba en ocuncum dou Allah, endagai: Akeinya, sug ban bouwan, kaba, ban bedug mog an gogom geb naugb dan gini dau danahabi. Doba areg danin dogod anohob, kaba, naro. Doba dan daimo areg banin bogod anohob, gin dous. [

⁴³Doba sug en ocuncum dag gin, kaba, en medoc toua enmohomoho namcir. Dara mengebouf bororo dag mogwihi bed cinogo toua, kaba, en ocuncum termum edreg dau nosa namcir. Dangga malaikad hom en ouwaden naugb enara bad en medoc mes, dauntoba en medoc ongkogos naugb aimo gin terimda.]

⁴⁴

⁴⁵Sug en ocuncum bouwohob, kaba, en eisa besa. Hanoba en en aud men logodeh ucugb. Dangga en eiya, doba len laugwan latou lamumi dau enohob. Anai len merdoc momogo medam namcirdaha.

⁴⁶Doba Yesus ebir len. Hanoba en enara debin len, endagai: Dagiro, naugwe hang, yen yatou dag gina? Yen yisa yocuncum dou Allah esesa terimda, dauntoba yen yemobsara se gainyenarero.

⁴⁷Sug Yesus esulou men logodehaba, kaba, sud hom dau Yesus men logodeh merug sisa hobjerai, en moho Yudas, esan lusud leinyana len len aud len. Dangga sug en edebeij deinyor Yesusohob, kaba, en eic mos aud en namcir. Hanoba en ou moufeseni.

⁴⁸Doba Yesus enara debin en, endagai: Ban bohw Lusud Merguna Mebin dan deb se leng merug mog merisira ogdoc sug ban bou abuhwesa danei?

⁴⁹Sug Yesus men logodeh gedig len lesa desij en sungga len leiya, doba len louwan lagaigeij Yesus, kaba, len leijidougwo en, lendagai: Adehsud, ban bouwan, kaba, emen emogodir dara krawan gindei?

⁵⁰Sud hom dau men logodeh eic krawan bagod Gembala Gesa Taij Meren Mougt Mera Medam men sogougb hom en moms dig mesira misen edug dau namcir.

⁵¹Doba Yesus esa mer debin en dougwo, endagai: Ban barges abinadoc. Sug en esa mer debin en dag ginohob, kaba, en eic sud hom graga moms badra ucugb deisa mohw deit.

⁵²Sug Yesus eic sud hom graga en moms badra ucugb deisa mohwohob, kaba, en enara debin gembala gesa taij meren mougtir, dara sadodor gedig len lesedougwo Allah Men Tuari meren mougtir, dara leng Yahudi meren mougtir toua an meren krawan dara kebtemaga, bendagai: Yen youdesa dani aninim dag sud hom mog mog. Hang yen yemodo krawan dara kebtemaga naugb yen yemdagaigeij dang ginei?

⁵³Anai dan indugwengga desij yen se Allah Men Tuari astesda lona terimdohob. Doba yen yemagaigeij dan sunggaro, anara? Doba inggaida. Anai se lona gini, kaba, cumougt naugb sud hom gesedougwo lobeigbogo men geicara. Hang en out se yen meigdoc mes naugb yen yemagaigeij dan gini.

⁵⁴Sug len louman Yesus mer dag gin, kaba, aisa len merisira naugb len lagaigeij en namcir. Dangga len lahwan en se Gembala Gesa Taij Meren Mougt Mera Medam men tueda, kaba, Petrus en toua edoumouma len dig meridigo.

⁵⁵Doba se Gembala Gesa Taij Meren Mougt Mera Medam men igtia gini, kaba, len lec smougb taigemosis se tu magohob. Dangga Petrus en toua eihweda naugb en edehin naugb smougb desij len ingga.

⁵⁶Doba sogougb gida hom sug en eiya Petrus dag en ehin naugb smougb gini, kaba, en auweila en toutou. Hanoba en enara dou men lusud, endagai: Yen yeiya sud hom gini. Anai dan deiya, doba en toua aiseisa Yesus ginohob.

⁵⁷Doba Petrus aideido dou gida ingga, endagai: Daneh, dan demecinaga sud hom gin touwero.

⁵⁸Cum cum deit, kaba, sud hom gus toua auweila Petrus toutou. Hanoba en ehin mereseni, bendagai: Bang gin toua, Yesus men logodehohob. Doba Petrus etaha en mer an gini, endagai: Insiya, ban bemens danlo. Anai danes men logodehero.

⁵⁹Cumbahau deit, kaba, sud hom gus en toua ogo meresa Petrus namcir, endagai: Indeic, dan decinaga sud hom gin toua dau Yesus men logodeh. Anai en toua dau leng Galilea.

⁶⁰Doba Petrus etaha en mer an gin toua namcir. Hanoba en auni dou en, endagai: Ban abu dagiro, hang ban bemowun dan dag gina? Anai dan demecinaga areg ban ben gin touwero. Sug Petrus en aideido dou en dag gini inegohob, kaba, berougwu eba mer agod dougwo en mer namcir.

⁶¹Sug berougwu eba merohob, kaba, maman Adehsud eineg bauweila Petrus toutou. Dangga Petrus medoc eiseisan areg maman Adehsud en en dou en deb sug nosohob, endagai: Se lona gini sug berougwu emeba mer mougwa hombuma, kaba, ban baideido dougwo dan mougwa homoi icirohob.

⁶²Sug Petrus eiseisan Yesus mer ginohob, kaba, en eihwedig medigo naugb en eb medam sungga namcir.

⁶³Doba leng lesedougwo Yesus se mougt mera medam men tu ingga, kaba, len leic en moho lacecim namcir. Dara len logod en toua.

⁶⁴Hanoba len leic minc meti naugb lahud dougwo en maires toua. Dangga sug len logod en mog erijohob, kaba, len leijidougwo en, lendagai: Ban bedag sud hom gedig en ecinaga areg ebdededelo augwanohob, kaba, ban bens leng logod ban gin meroho dou emenahabi.

⁶⁵Dara len lesbes an en se aremer einyana debin gin toua.

⁶⁶Sug edebeij lonamenohob, kaba, leng Yahudi meren mougtir, dara gembala gesa taij meren mougtir, dara leng meru ouforoho se Musa men gomnomna len laugwan loucimdeb hom naugb sug len logod aremer deb naugb Yesus. Hanoba len lahwan Yesus aud len sungga toua.

⁶⁷Sug len ledahwan Yesus deseino lenohob, kaba, len leijidougwo en, lendagai: Ban gin eng beigdoc emen dau emen gogom augwanei? Ban bauni asesa dou emenahabi. Doba Yesus auni ucugb dou len, endagai: Dan dauni dagiro dou yen deita? Anai sug dan dens danin ainyes dou yen dag dani Sud Hom Geigdoc Yen Dau Meijen Gogom Augwan toua, kaba, yen meigdoc emebdebin an danero. Era sug dan deijidougwo yen an gin ucugb, kaba, yen yemauni dag misen dou dan touwero.

⁶⁸

⁶⁹Doba dau lona gin dig gacda, kaba, yen yemeiya Lusud Meraguna Mebin dan demeigtou desij Allah Gedig En Mobisamougb en mesira misen naugb dan dedag mougt mera medam desij en toua.

⁷⁰Sug leng Majelis louman gini, kaba, len merir lauwi en namcir, lendagai: Indeic. Ban ben dag bang gin eng Allah Meisi misenei? Dangga Yesus ousa deisa len merir an, endagai: Areg yen yen ingga, kaba, moongga.

⁷¹Sug len louman gin, kaba, len lenara doum, lendagai: Maman mahilon ara deita? Anai mamanin maumanara dau enin mers teisisohob.