Read Manikion LUKAS 24 Bible Online

LUKAS 24 - Manikion bible

LUKAS 24

¹Doba edebeij Ari lonamenmen, kaba, ligida graga len lodo aremoung mohu gedig len lesedeb gibecohob. Hanoba len leihwedan dig aremogougb moda.

²Sug len ledebeij deinyorohob, kaba, len leiya, doba igdohos meh eila dau debohob.

³Dangga len leinesa naugb lehilon dougwo maman Adehsud Yesus maga, doba len lemeiya en maga ginero.

⁴Doba yen youman deigeigouhw. Irir sug len lesa naugb louma merdocesero, kaba, lasud lahwai gedig lan lag sansun mohw esesilo lagunyen naugb lasa desij leni.

⁵Sug len leiya lan, kaba, len merirgo omnen, anai len lahau dau lan namcir. Doba lasud lahwai gini lan laho marir debin len, landagai: Dagiro, naugwe hang, yen yehilon sud hom maireseb se leng lomom merufu gina?

⁶Anai en eisa dau gomom ucugwohob, hang en moongga sugin touwero. Augwan gini aimo dau areg en en dou yen se Galilea sug nosohob, endagai: Se lona daiyamo, kaba, Allah esedeb Lusud Meraguna Mebin dan naugb sug lusud lohw dan se leng lebesesar merisira. Hanoba len letob dan se sogo salib toua. Doba lona hwai debin gin, kaba, dan deisa dau gomom ucugwohob. Yen meigdoc eiseisan en mer ginohobei? Era yen meigdoc moc dougwohobei?

⁷

⁸Sug lan lan Yesus mer dag gin dou lenohob, kaba, lan marir eica len merdoc mes namcir.

⁹Dangga sug len lecicugb dau aremogougb modohob, kaba, len lecic dau areg len leiya graga augwan asesa dou Yesus men logodeh merug sisa hobjerem, dara Yesus men logodeh gus laugwan toua.

¹⁰Doba ligida gedig len ledecic dau aremer graga augwan dou Yesus men logodeh gin, kaba, len meroho dag Mariam dau cinogo Magdala, dara Yohana, dara Yakobus mem, moho Mariam, an ligida gus gedig len laicira len toua.

¹¹Doba sug Yesus men logodeh len louman dau gin, kaba, len lemod merna debsa len anero. Doba len loudesa dag len lecic huhugb mer dous.

¹²Doba Petrus, kaba, en eisa bobga dig aremogougb moda deit. Sug en edebeijohob, kaba, en ou mergo bogug se igdohos mes. Doba en eiya minc meti mogud dous eng inggeb se igdohos mes deb gini. Areg gus augwan, kaba, en emeiya hom dau ginero. Dangga sug en ecicugb dig men tu, kaba, en eija medocesa an augwan gin terimda.

¹³Se Ari gin toua, kaba, Yesus men logodeh lahwai lac asa ucina geihwededau Yerusalem dig meren cinogo, moho Emaus. Cinogo Emaus gini, kaba, lusud lec merohora se ijam homoiyahabi, len lemdebeij.

¹⁴Sug lan lac asa ucina gini, kaba, lan lacic aremer graga doum toua.

¹⁵Doba sug lan lacic aremer gin doum, dara laiso marir an ginaba, kaba, Yesus acu lan sungga. Hanoba len lec hom.

¹⁶Doba Allah ouf lan mairiresi dougwo namcir. Hang lan lameiya Yesus mocbobaga asesa touwero.

¹⁷Dangga sug len lec asa ucina gin, kaba, Yesus eijidougwo lan, endagai: Sug yan yac asa ucina graga, kaba, yan yacicara areng doum graga? Sug lan lauman Yesus eijidougwo lan dag gin, kaba, lan lasa dara lan marsdemaga esisug namcir.

¹⁸Hanoba sud hom dau lan, en moho Kleopas, en eijidougwo bauwun en mer, bendagai: Ban hom gin ben daugiro, hang bemecinaga aremer gin augwanbumei? Anai leng loucimdeb se Yerusalem gin, kaba, len laugwan lecinaga areg acgunog gini se lona gacinohob.

¹⁹Doba Yesus eijidougwo lan deit, endagai: Aremer dag ara? Dangga lan launi dou en, landagai: Aremer eisaugb sud hom, moho Yesus, dau cinogo Nasared. Anai en, kaba, en esai Allah moro dou emen dara goubesa namcir. Dara en eic ganusbus einyana debin gin dou emen touohob. Dangga hang, emen emecinaga dag Allah eigdoumesa en moho naugb ginohob. Dara emen toua emeigdoumesa en moho dag en esai Allah moro dou emen dag misen touohob.

²⁰Dobnaro. Anai maman gembala gesa taij meren mougtir, dara maman mougt mera gouji len lohw en dou leng Roma meren mougt mera, moho Pilatus, naugb en ogod aremer gomom dou en. Hang len letob en bomom taiba sogo salib gin touohob.

²¹Doba emen, kaba, emen emod emina debsa en dag enin eng sud hom gedig en eigdoc emen meijouhuda Israel dau leng Roma merisira gin terimda. Dara gin dousero. Doba irogini, kaba, loba hwai debin sug len letob en taiba sogo salib gin touohob.

²²Dara merug hosa dau emen ligida, kaba, len leic emen emdoc omom an areg len len dou emen gini. Anai se lonamenmen greb, kaba, len leihweda se aremogougb moda naugb len ledeiya Yesus gini se igdohos mes.

²³Doba len lemeiya en magero. Hang sug len lecicugb aud emenohob, kaba, len leden dou emen dag len lemeiya en magero. Doba len leiya malaikad hwai dous. Hanoba malaikad hwai lanara dou len dag Yesus en emomom namcirero. Doba en eisa maireseb ucugb touohob.

²⁴Dangga sug emen emsir merug hosa len toua leihweda naugb ledogod dougwo aremogougb moda, kaba, len leiya, doba areg ligida len dou emenohob, kaba, dag misen namcir. Anai len toua lemeiya Yesus maga se igdohos mes touwero.

²⁵Sug Yesus ouman dau ginohob, kaba, en enara bauwun lan marir an, endagai: Dagiro, naugwe hang, yan maigdoc emebdebin an areg leng lesai Allah moro sug nosa len log deb se Surad Injil Meb Mohon deb nosahabero, anara? Yan maiju edgomei?

²⁶Anai Allah esedeb naugb sug Sud Hom Geigdoc Yen Dau Meijen Gogom Augwan gin, kaba, en aimo ucina mog erij nosahabi, en emdeinesa men gogouf cucugb daiyamo.

²⁷Sug Yesus enara bauwun lan dauwohob, kaba, en ens dau areg len log deb se Surad Injil Meb Mohon deb eisaugb en meijouhw augwan asesa dou lan deit, ebiji dau areg Musa en og se men surad deb nosohob, terimda bedebeij areg len lesai Allah moro nosa len log deb touohob.

²⁸Sug Yesus ens meijouhw augwan dou lanohob, kaba, len ledebeij deinyor cinogo Emaus touohob. Dangga Yesus eic mos barerei lan mairiresi dag en ouwan ekirsa landa.

²⁹Doba lan lan dougwo en, landagai: Ban bemekirsero, doba ban bin matou suginahabi. Anai deinyor sug igda obsaresohob naugb sug loba osun ban namcir ingga. Dangga Yesus en aimo lan marir naugb en atou desij lan sungga.

³⁰Sug len leigtou naugb letara, kaba, Yesus os roti. Sug en en sijo dou Allah naugb ginohob, kaba, en ekris roti. Hanoba en eic dou lan toua.

³¹Sug en eic roti dou lanohob, kaba, Allah esga lan mairiresi naugb lan lacinaga en asesohob. Doba Yesus ediyebeiya dau lan namcir.

³²Sug en ediyebeiya dau lanohob, kaba, lan lahadahadim ucucugb, landagai: Nanan nacinaga en Yesus dag misenohob. Anai sug en enara dou nanan, dara en ens dau Surad Injil Meb Mohon men meijouhw eisaugb enin augwan asesa dou nanan se ucina mogums graga, kaba, eic dag nanan nandoc erleij namcir.

³³Sug lan lan gin doum dangga inegohob, kaba, lan laisa lac naugb loba ingga ucugb dig Yerusalemeda. Dangga sug lan ladebeijohob, kaba, lan leiya, doba Yesus men logodeh merug sisa hobjerem an men logodeh gus gus toua, len laugwan loucimdebohob.

³⁴Doba sug lan lameigtou debin marihebma, kaba, len ingga len dou lan, lendagai: Emen emecinaga maman Adehsud Yesus en eisa dau gomom dag misen. Anai en ens enin ainyes dou Simon grebohob.

³⁵Sug lan lauman dau ginohob, kaba, lan toua lacic dau Yesus men geicara dou lan se ucina mogumsi. Dara lan lacic dou len dag lan ladecinaga Yesus ogdoc sug en ekris roti dou lan toua.

³⁶Sug lan lacic dau aremer graga augwan dou lenaba, kaba, Yesus enin agunyen augwougb debin len toua. Hanoba en enara dou len, endagai: Allah eic gesgigouhwesa dou yen dougwo areg gecgu augwan namcir.

³⁷Sug len leijesan en dangga, kaba, len laugwan lehimahama. Dareg len lahau medam namcir, anai len loudesa eni dag mena dous.

³⁸Doba Yesus oho mer debin len, endagai: Dagiro, naugwe hang, yen yahau? Dara yen yeija meigdocesa dan, anara?

³⁹Anai mena, kaba, mori dara mog emeb se touwero. Doba yen yeiya dan gin, kaba, dan induri dara dan indug inggeb se gini. Dangga yen yen naugb yen yeiya dan insira dara indohora mera inggini. Dara yen yousousa dan indus toua, dauntoba yen yecinaga dan demedag mernero. Doba danin indug asesa eng deisa ucugb ginohob.

⁴⁰Sug Yesus enara dag gin dou lenohob, kaba, en ens mesira mera dara mohora mera dou len laugwan toua.

⁴¹Doba men logodeh gini, kaba, len merdoc emebdebin an enbuma. Anai len merdoc agahugouhw dara atij an ganusbus gin dougwodaha. Dangga Yesus eijidougwo len, endagai: Meijen ared ingma inggebgei?

⁴²Sug en eijidougwo len an aredohob, kaba, len leic hosei gedig len locro teitei mehir hom dou en. Sug en eic dau len merisirohob, kaba, en et abeba len meriresi sungga toua.

⁴³

⁴⁴Sug en et hosei abeba len meriresohob, kaba, en enara dou len, endagai: Dagiro, naugwe hang, yen yeija meijuwesa dan an aremer augwan gina? Anai areg Musa dara leng lesai Allah moro sug nosa, dara leng lerba Ugwaremer len log deb se meren surad eisaugb dan deb nosohob, kaba, dan demedu gin dau yen touwero. Doba dan dens augwan gini asesa dou yen sug dan indugwengga dara yen sug nosohob. Anai augwan gini aimo dau areg Allah en esedeb naugb danohob.

⁴⁵Sug Yesus enara dou len dauwohob, kaba, en edidib dau areg leng nosa len log deb se meren surad eisaugb en men meijouhw mougwa hom ucan dou len deit. Dauntoba len lecinaga augwan gini dag misen namcir toua.

⁴⁶Hanoba en edidib dag gin dou len, endagai: Areg leng nosa len log deb eisaugb dan kaba, dag gini: Sug dan dedag Sud Hom Geigdoc Lusud Dau Meren Gogom Augwanohob, kaba, dan daimo ucina mog erij aud gomom nosa touahabi. Doba lona hwai debin gin, kaba, dan deisa dau gomom ucugwohob. Anai augwan gini aimo dau areg Allah enin mer ogod an deb naugb dan touohob.

⁴⁷Dara leng log ingma deit dag yen yeperwei dan induhw, hanoba yen yesai dan induro dou leng se cinogo gin augwan. Dauntoba sug len lesga meren sesar moho asesa, dara len lahau an dougwo namcirohob, kaba, Allah aigdougwo meren sesar augwan dau len toua. Anai augwan gini aimo dau areg Allah enin mer ogod an naugb yenohob. Dangga hang, yen yebiji se Yerusalem gin nosahabi, emeihwedesa cinogo guseda.

⁴⁸Anai yen, kaba, yen yeiya aremer augwan gini se yen meijiresohob.

⁴⁹Dara dan demesa Mena Gogoufu gedig dan Indina Allah os deb dou yen aud yen toues. Dangga hang, yen yemeihwedesa cinogo guserobma. Doba yen yeigtou se Yerusalem gini terimda Allah esa Mena Gogoufu dau bogaden an men goubesa aud yen touahabi, yen yemeihwedanda.

⁵⁰Sug Yesus esulou men logodeh eisaugb aremer augwan dauwohob, kaba, en einoisa len deinyor cinogo hom, moho Betania. Sug len ledebeij deinyor cinogo inggohob, kaba, en ou mesira aga len naugb en acgeij Allah, dauntoba en eic geigouhw dou len terimda.

⁵¹Sug Yesus acgeij Allah naugb en eic geigouhw dou len ineg, kaba, Allah eigdoumesa en dig bogo dau len namcir.

⁵²Sug len leiya, doba Allah eigdoumesa Yesus dig bogo dau lenohob, kaba, len lesa lesijaresa en. Sug len lesijaresa en dauwohob, kaba, len lecicugb dig Yerusalem dara len merdoc agahugouhw asa ucina an en toua.

⁵³Hanoba len leinesa Allah Men Tuari naugb len len sijo dou en an Yesus astesda lona toua terimda.