Read Manikion LUKAS 3 Bible Online

LUKAS 3 - Manikion bible

LUKAS 3

¹Sug leng Roma meren mougt mera medam, moho Tiberius, en esedougwo men lusud se arisogomoc soramohob, kaba, Allah esa mer dou Sakarias meisi, moho Yohanes, sug en eigtou se lomougwisa naugb en esai Allah en moro dou lusud. Augwan gini ebiji se lona sug Pontius Pilatus esedougwo leng se Yudea, dara Herodes esedougwo leng se Galilea, dara en maguna Pilipus esedougwo leng se Iturea dara Trakonitis, dara Lisanias esedougwo leng se Abilene. Dara Hanas dara Kayapas, lan ladag Gembala Gesa Taij Meren Mougt Mera Medam naugb leng Yahudi toua.

³Dangga Yohanes ec mohora se cinogo geb acec duhu Yordan naugb en esai Allah en mer gin dou lusud toua, endagai: Yen yesga meijen sesar moho asesa dou Allah. Dara yen yahau an dougwo naugb en aigdougwo meijen sesar augwan dau yenahabi, dan demogun yen se duhu dag ansins debin gin toua.

⁴Augwan gini esogwa deisa areg sud hom gesai Allah moro sug nosa, en moho Yesaya, en og deb sug nosa touohob, endagai: Se lona daiyamo deit, kaba, sud hom en emen se lomougwisa naugb en eija mer esesa dou lusud, endagai: Yen yesa yen meigdoc mes obosboro naugb maman Adehsud sug en en. Aninim dag lusud lesa ucina obosboro naugb meren mougt mera medam sug en einesa aud len toua.

⁵Dangga sug yen yeiya dougb mei, kaba, yen yerba cinogo debin bedouder augwan aninim namcir. Dara sug yen yeiya menmod dara menmougb, kaba, yen yogod augwan dag bedouder aninim. Dara sug yen yeiya areg gagabgebi, kaba, yen youti augwan bobosboro namcir. Era sug yen yeiya doba areg edougougblo, kaba, yen yesinsin augwan becabeci aninim toua.

⁶Anai sug yen yesedeb augwan asesa dag gin debohob, kaba, Allah emens enin ainyes dou lusud se cinogo gin augwan naugb sug en eigdoc len dau meren sesar augwan namcir toua.

⁷Dangga lusud leinyana sug len louman Yohanes en mer an gini, kaba, len len dau meren cinogo aud en sungga naugb en ogun len se duhu. Doba dag augwougb dous. Hang en esa mer debin len, endagai: Gareg en dau Allah men gogom dou yen, hang yen yemougwin aud dan gina? Anai meijen geicara augwan dag hinogo mehir yen smougb mougwaba.

⁸Dangga yen yens dau meijen geicara dag yen yesga meijen sesar dag misenohob dou dan nosahabi, dan demogun yen se duhu debin gin toues. Dara yen yemenara doumlo, dau sug Abraham en edag yen meijemouwa, kaba, dag Allah men gogom emeb naugb yen touwero. Doba yen yesa doc dau namcir. Anai sug Allah en ouwan, kaba, en eic igdahabi augwan gini beperwei dag Abraham medebeitor misen dau yen deit. Yen youman dan indir gini deigeigouhw namcir.

⁹Dangga hang, yen yera mera geigouhw bansins dag yen yesga meijen sesar dara yahau an dougwo dag misen toua terimda. Anai Allah esedeb keita se sogo meiyo debohob. Gareg dau yen en emera mera geigouhwero, kaba, en eh en, aninim dag en eh sogo gemera merero naugb en ec se smougb toua.

¹⁰Sug len louman gini, kaba, len merdoc momogo icira gin namcir. Hanoba len leijidougwo Yohanes an gin ucugb deit, lendagai: Ban benara dag gin, kaba, emen emeicara dagiro, dauntoba emen emera mera geigouhw deseino Allah?

¹¹Dangga Yohanes auni dou len, endagai: Gareg dau yen men sansun hwai, kaba, en eic homa dou mesi gedig men sansun ingmaro. Dara gareg dau yen men ared ingmanggebga, kaba, en ekeba ingma naugb en eic dou mesi gedig men ared ingmaro toua.

¹²Dara leng lacgeij lusud naugb len lohw meren cinogo dou leng Roma, kaba, merug hosa dau len toua, len len aud Yohanes naugb en ogun len se duhu. Sug len louman dau areg Yohanes en dou lusud dag gragohob, kaba, len toua leijidougwo en an meren geicara, lendagai: Adehsud, emen toua emeicara dagiro, dauntoba emen emera mera geigouhw deseino Allah?

¹³Dangga Yohanes auni dou len toua, endagai: Sug yen yacgeij lusud naugb len lohw meren cinogo dou leng Roma, kaba, yen yemacgeij emedreg dau areg pemerintah ogod deinaugb lenlo. Doba yen yacgeij asesa areg pemerintah ogod an deb naugb len dous.

¹⁴Dara leng sadodor len toua leijidougwo en an meren geicara, lendagai: Emen, kaba, emen toua emeicara dagiro dauntoba emen emera mera geigouhw deseino Allah? Dangga Yohanes auni dou len toua, endagai: Yen yemogod len gus, dara yen yemenara yematagaij len an meren aremougb dau len touwero. Doba yen meigdoc ebtou an areg pemerintah eic dou yen dous.

¹⁵Doba leng leigtou lateteij naugb lona sug Allah eigdoc len dau meren gogom augwan, sug len louman Yohanes mer an gin, kaba, len lenara se merdoc mes, lendagai: Sud Hom Geigdoc Maman Dau Maman Gogom Augwan inggeng ginei? Era naroei?

¹⁶Doba Yohanes ecinaga dag lusud leinyana leigtou lateteij lona sug Allah eigdoc len dau meren gogom dag ginohob. Hang en emen dougwo len, endagai: Dan, kaba, dan dogun yen se duhu misen dous. Doba cum, kaba, sud hom gus en emaimo ucan dan aud yens. En moho agas medam edreg dau dan namcir. Dangga hang, emedeinyum naugb sug dan demesga aumaga dau men hwigbeimos icira en mohora touwero. Doba dan darges dau namcir. Anai en gin, kaba, en emesa Mena Gogoufu dara smougb aud yen toues.

¹⁷Hanoba en emekeba yen daums, aninim dag sud hom os aigdaga mes an tramdad naugb os berban augb bogo, dauntoba loungmen ohu merila eitrij dau mogo misen eb se aigdaga mes. Dangga gareg en edag mogo misen, kaba, en ouci en debinim naugb en, aninim dag sud hom en ob mogo misen se mougwa mes naugb enin toua. Doba gareg en edag merila, kaba, en erba en se smougb gedig lusud lemob touwero, aninim dag sud hom erba merila mogud augwan se smougb toua.

¹⁸Dara Yohanes emeic gainyenara hom gin dou lusud touwero. Doba sug en esai Mer Geigouhw eisaugb Krisdus dou len gin, kaba, en edidib meijouhw einyana debin gin dou len toua. Hanoba en esulou len naugb len lemaimo meren geicara dag mohon toua deitero. Doba len leineg dau naugb len laimo areg geigouhw gin dous.

¹⁹Dara Yohanes emesai Mer Geigouhw eisaugb Krisdus gin dou leng Yahudi dousero. Doba en owun leng Galilea meren mougt mera medam, moho Herodes, en moho an men geicara gecgu einyana. Dara en en dougwo en an maguna mesouwa Herodias, sug en eihwa dau en touohob. Doba Herodes en mos emobsara an ginero. Hang en eic mos ehig deit naugb en ouf Yohanes se tu gesisug debin men geicara gecgu mohon augwan gin toua.

²⁰

²¹Sug Yohanes ogun len gus se duhuohob, kaba, en ogun Yesus se duhu toua. Dangga sug Yesus enin ocuncum debin gin, kaba, bogo ec dau. Hanoba Mena Gogoufu en mocbobaga aninim dag bohobei ohw dau bogaden aud en toua. Dauwohob, kaba, Allah enara dau bogo ucan dou en toua, endagai: Bani dan Indisi gedig dan indoc gororougb ban namcir. Dara ban beic dan indoc agahugouhw an ban toua.

²²

²³Sug Yesus men arisogomoc edebeij deinyor sud hom sisedeisohob, kaba, en ebiji naugb sug en esai Allah mer dou lusud. Doba lusud, kaba, len loudesa Yusub en Meisi Yesus, kaba, Eli en meisi Yusub.

²⁴Matat en meisi Eli. Lewi en meisi Matat. Malki en meisi Lewi. Yanai en meisi Malki. Yusub en meisi Yanai.

²⁵Matica en meisi Yusub. Amos en meisi Matica. Nahum en meisi Amos. Hesli en meisi Nahum.

²⁶Nagai en meisi Hesli. Maat en meisi Nagai. Matica en meisi Maat. Simei en meisi Matica. Yoseg en meisi Simei. Yoda en meisi Yoseg.

²⁷Yohanan en meisi Yoda. Resa en meisi Yohanan. Serubabel en meisi Resa. Sealtiel en meisi Serubabel. Neri en meisi Sealtiel.

²⁸Kaba, Malki en meisi Neri. Adi en meisi Malki. Kosam en meisi Adi. Elmadam en meisi Kosam. Er en meisi Elmadam.

²⁹Yesua en meisi Er. Eleasar en meisi Yesua. Yorim en meisi Eleasar. Matat en meisi Yorim. Lewi en meisi Matat.

³⁰Simeon en meisi Lewi. Yehuda en meisi Simeon. Yusub en meisi Yehuda. Yonam en meisi Yusub. Eliakim en meisi Yonam.

³¹Melea en meisi Eliakim. Mina en meisi Melea. Matata en meisi Mina. Natan en meisi Matata. Daud en meisi Natan.

³²Kaba, Isai en meisi Daud. Obed en meisi Isai. Boas en meisi Obed. Sarmon en meisi Boas. Nahason en meisi Sarmon.

³³Aminadab en meisi Nahason. Admin en meisi Aminadab. Arni en meisi Admin. Hesron en meisi Arni. Peres en meisi Hesron. Yehuda en meisi Peres.

³⁴Yakub en meisi Yehuda. Isag en meisi Yakub. Abraham en meisi Isag. Terah en meisi Abraham. Nahor en meisi Terah.

³⁵Serug en meisi Nahor. Rehu en meisi Serug. Peleg en meisi Rehu. Eber en meisi Peleg. Salmon en meisi Eber.

³⁶Kenan en meisi Salmon. Arpagsad en meisi Kenan. Sem en meisi Arpagsad. Nuh en meisi Sem. Lameg en meisi Nuh.

³⁷Metusalah en meisi Lameg. Henog en meisi Metusalah. Yared en meisi Henog. Mahalelel en meisi Yared. Kenan en meisi Mahalelel.

³⁸Enos en meisi Kenan. Sed en meisi Enos. Adam en meisi Sed. Allah en meisi Adam.