Read Manikion LUKAS 4 Bible Online

LUKAS 4 - Manikion bible

LUKAS 4

¹Sug Mena Gogoufu atij Yesus medoc mesohob, kaba, en einoisa Yesus dau duhu Yordan mebera dig lomougwisa naugb Bilis ainyen en sungga se lona sud hwai debin gin toua. Dara se lona augwan gin, kaba, en eigtou menuhwa asesa namcir toua. Dangga sug lona sud hwai gin ouwohob, kaba, en sireba namcir.

³Hang Bilis emarougb en, endagai: Bang Allah Meisi misen, kaba, ban benara dou igdahab gini beperwei dag roti naugb ban bet.

⁴Doba Yesus auni dou en, endagai: Musa en og deb se Surad Injil Meb Mohon deb nosohob, endagai: Lusud lemeic merireseb dau sug len let ared misen dousero.

⁵Dobnaro, kaba, Bilis ahwan Yesus aud menmod gagas medam hom naugb en ens dau mougt mera medam se cinogo gin augwan meren hancob dou en deit. Sug lan ladebeij menmodohob, kaba, Bilis ens cinogo augwan dedemeda dag mericicib ehinyahinya dou en.

⁶Hanoba en ainyen en deit, endagai: Sug ban becguna dou dan naugb besijaresa dan, kaba, dan deic areg dan dens dou ban gragohob augwan dou ban dag banin aban namcir. Dara dan dogugwo areg geb se cinogo augwan gini an men gogouf cucugb dou ban toua. Anai Allah eic gin augwan dou dan dag danin indan sug nosohob. Dangga hang, edeinyum naugb sug dan deic dou gareg dan douwan toua.

⁷

⁸Doba Yesus auni dou en, endagai: Musa en og deb eisaugb gin toua se Surad Injil Meb Mohon deb nosohob, endagai: Yen yesijaresa yecguna dou meijen Adehsud Geis Huhugb. Dara yen yeicara yaimo en dous. Anai enin dous eng meijen Allah gin.

⁹Dobnaro, kaba, Bilis ahwan Yesus dig Yerusalem naugb lan ladeisaugb se Allah Men Tuari medgomori deit. Sug lan ladeisaugwohob, kaba, Bilis arougb Yesus, endagai: Bang Allah Meisi misen, kaba, ban bahacugb banin dau sugin dig cinogo gaihida.

¹⁰Anai sud hom en erba Ugwaremer se Surad Injil Meb Mohon deb sug nosohob, endagai: Allah emarougb men malaikadir naugb len lemesedougwo bans.

¹¹Hang len lemoc merisira naugb ban, dauntoba ban abaga dara ban abohora augwan emoc igdahab touwero.

¹²Doba Yesus auni dou en deit, endagai: Musa en og deb eisaugb gin se Surad Injil Meb Mohon deb touohob, endagai: Yen yemainyen Adehsud, meijen Allah enlo.

¹³Sug Bilis ainyen Yesus se aremer homoi ginohob, kaba, Bilis aisacij dau Yesus namcir. Hanoba en eigtou naugb lona ingmahabi, en emdainyen en deit.

¹⁴Sug Bilis aisacij dau enohob, kaba, Yesus en toua eihwededau sungga dig leng Galilea meren hancob. Dara Mena Gogoufu eic goubesa dou en naugb en ens Allah mer men meijouhw dou leng Yahudi se meren tuari augwan toua. Dangga hang, lusud lemeigdoumesa en moho an gin namcir. Dara len lagaha merir an en dou len geb acec cinogo ingga len laugwan toua.

¹⁵

¹⁶Sug Yesus ens meijouhw dou len sungga sungga, kaba, en edebeij men cinogo gedag sud deisa Nasared toua. Dangga sug leng Yahudi meren Lona Gemeicaresero edebeijohob, kaba, en einesa meren tuari naugb en esai Allah moro dou len sungga toua. Anai en eicara dangga terimdohob.

¹⁷Sug en eisa besa naugb en ebedbed dou len, kaba, len leic sud hom gesai Allah moro nosa, moho Yesaya, men surad dou en naugb en ecic toua. Sug en ehohob, kaba, en esma medagas hom geb se surad ingga. Hanoba en ecic dag gin dou len, endagai:

¹⁸Maman Adehsud en esa Mena Gogoufu eigtou desij danohob. Anai en eigdoumesa dan indoho naugb sug dan desai en mer geigouhw dou leng merunggwereij laugwan. Dara en esa dan naugb dan desai en moro bagaha dou sogougwir se cinogo augwan toua. Dauntoba len lemedag sogougb deitero, doba len lecinaga dag lona naugb sug en ancoho len dau gin toua enohob. Dara en esa dan naugb dan desga lusud meriresmougb naugb len leiya lo asesa ucugb deit. Dara dan deigdoumesa aguci dau leng gedig gogom geb debin lenohob dau len.

¹⁹Dara dan desai dou len dag maman Adehsud medoc eineg an len naugb sug en eicara dag gin an len, kaba, ebeij deinyor touohob.

²⁰Sug en ecic gin dou lenohob, kaba, en oud surad ingga debinim. Hanoba en eic surad dou sud hom gedeijan mougt se tuari ingga ucugb deit. Sug en eic dou en dauwohob, kaba, en ecguna beigtou se maija moc naugb en edidib meijouhw ucan dou len toua. Doba lusud, kaba, len laugwan len merires eb debin en toutou namcir.

²¹Doba Yesus, kaba, en eic mos naugb ens meijouhw dou len namcir. Hanoba en enara dou len, endagai: Medagas gedig yen youman gini, kaba, ebiji naugb yen se lona sug yen youman irogini toua.

²²Sug len louman en mer an gini, kaba, len laugwan largomun, lendagai: Indeic, areg en ens dou maman gini, kaba, misen dara eigouhw namcir. Doba dagiro, hang, en ecinaga augwan gina? Anai eni Yusub meisi dous.

²³Doba Yesus auni len mer an ucugb, endagai: Dan decinaga yen youwan naugb dan dens ganusbus areg yen youman dan dens dou leng se Kapernaumohob ingma dou yen se indan cinogo gin touahabi. Anai dan decinaga yen yesedeb yen meigdoc mesohob naugb yen yens dau maman aremeijouhw dou dan, yendagai: Bani sud hom mou ouforoho naugb ban beic geigouhw dou len gusohob, kaba, ban beic geigouhw dou banin toua.

²⁴Doba dan demeic ganusbus ingma dou yenero. Anai yen youman dan indir deigeigouhw. Sud hom gesai Allah moro dou men lusud se enin men cinogo, kaba, len lemeigdoumesa en moho an ginero. Doba len lowun en moho an gin dous. Augwan gini asesa dag misen namcir.

²⁵Anai yen yecinaga dau lona sug Elias en esai Allah moro dou maman lusud sug nosa, kaba, Allah ouf bogo dougwo los an len se cinogo augwan se arisogomoc homoi mougwu. Dangga sug sir gogoufu einesa cinogo augwan, kaba, debdes leinyana toua merugwengga se mamang Israel maman hancob gin toua.

²⁶Doba Allah emesa Elias naugb emousa sud hom dau len ginero. Doba en esa en naugb en ousa debdes hom dau lugmahara se cinogo Sarpad se leng Sidon meren hancob gin dous.

²⁷Dangga toua, sug Elisa en esai Allah moro dou maman lusud sug nosa, kaba, aremos ogoufu et lusud leinyana se mamang Israel maman hancob toua. Doba Allah emarougb en naugb en emeic geingmos agauwesa dou sud hom dau len ginero. Doba en arougb en naugb en eic geingmos agauwesa dou sud hom dau lugmahara, moho Naaman, se leng Siria meren hancob gin toua dous. Yen youman dan indir an areg dan den dou yen gini deigeigouhw. Anai augwan gini asesa dag misen namcirohob.

²⁸Sug len louman, doba Yesus owun len dag ginohob, kaba, leng se tuari mes ingga len laugwan merdoc obgos an en namcir.

²⁹Hanoba len leisa lesa naugb locirma Yesus dau meren cinogo dig medigo. Dangga sug len lagaigeij en mesirohob, kaba, len lohugouhw en se menmod naugb sug len ledahacugb en se cigaha toua. Anai len lohud meren tu se cigaha mondudi ginohob.

³⁰Doba Yesus ehin maga se merisira mes dig len meridigo namcir. Hanoba en eihwededau len toua.

³¹Dangga, kaba, Yesus en emeigtousa Nasared deitero. Doba en eisa dau namcir. Hanoba en eihweda se cinogo Kapernaum naugb en eigtou sungga dag en gun deit. Dangga sug leng Yahudi meren Lona Gemeicaresero ebijohob, kaba, en toua einesa meren tuari naugb en edidib Allah mer men meijouhw dou len sungga toua.

³²Doba sug len louman dau areg en edidib dou len gin, kaba, len leimiman dau gin. Anai en emenara dag emeses meresa dou lenero. Doba en os badi augwan dara goubesa dag misen dou len namcir.

³³Dara sug Yesus edidib meijouhw dou len gin, kaba, sud hom mena mog mog eisa en medoc mesohob, kaba, en toua moongga desij len se tuari mes ingga. Dangga sug en eiya Yesusohob, kaba, en esa mer medam debin en, endagai:

³⁴Ayou, Yesus dau cinogo Nasared. Ban ben sugin naugb bedeberou emen eng, gina? Ban ben naugb beic mor mor dou emen namcir danggei? Anai dan decinaga Allah ouci ban douwoswos debinim naugb ginohob.

³⁵Doba Yesus esa mer debin en, endagai: Abiresou. Ban beihwededau sud hom ingga namcir. Dangga mena mog mog os sud hom ingga badro abeba len laugwan meriresi. Hanoba en eihwededau en namcir. Dara en emeic sud hom ingga en mog emerij touwero.

³⁶Doba sug leng se tuari mes ingga len leiya dau gin, kaba, len merug omom dau gin namcir. Hanoba len leijidougwom ucucugb, lendagai: Areg geb se sud hom gin mers, hang merna mog mog lemaimo en mer naugb lemeihwededau sud hom gina? Anai en emenara dara mer garjaga dou lenero. Doba en edag sud hom moho agas naugb en enara se mer goubesa dou len dous.

³⁷Dangga len lecic Yesus men geicara gin doum terimda agaha becinten se cinogo geb acec cinogo Kapernaum ingga augwan namcir.

³⁸Sug Yesus ocirma mena mog mog dau sud hom gragohob, kaba, en eihwededau tuari aud Simon se men tu deit. Doba se Simon men tu gin, kaba, en memba toua areba mos esrougb medam namcir. Dangga, kaba, len lacgeij Yesus naugb en eic geigouhw dou en toua.

³⁹Sug Yesus einesa en men dimeiyohob, kaba, en esa desij en mougt. Hanoba en ocirma men gesrougb ingga beihwededau en namcir. Sug en mos gesrougb graga edinohob, kaba, en eisa dedemeda naugb ousa len toua.

⁴⁰Dangga ebeij deinyor sug igda obsaresohob, kaba, leng sungga loho leng areber aingma aingma aud Yesus naugb eic geigouhw dou len. Sug len loho len gin aud enohob, kaba, en ob mesira deisa astesda sud hom yom. Hanoba en eic geigouhw dou len laugwan toua.

⁴¹Sug en eic geigouhw dou leng areber ginohob, kaba, merna mog mog leihwededau len gus toua. Hanoba sug len lagunya dau len ineg, kaba, len leija en moho dagasges, lendagai: Bang Allah Meis mohora hom graga eng ban ben gini. Doba Yesus esa mer debin len, dauntoba len lemeigdoumesa en moho gin tairirlo. Anai len lecinaga eni Sud Hom Geigdoc Lusud Dau Meren Gogom Augwanohob.

⁴²Sug Yesus atou terimda lona esgohob, kaba, en eisa beihwededau Kapernaum naugb en edeigtou se losneseba dou enin dous. Doba leng se cinogo ingga len ledocigei en se losneseba gin toua. Sug len ledebeij en sunggohob, kaba, len ledenara lad en medoc mes, lendagai: Ban bemeihweda se cinogo gus dau emenlo. Doba ban beigtou an emen sugin dous.

⁴³Doba Yesus enara bauni len merir ucugb, endagai: Naro. Allah en ouwan naugb dan desai en Mer Geigouhw dau lona sug en oiharaga lusud ucugb dou len se cinogo gus gus toua, anai gin, hang, en emesa dan se cinogo gini.

⁴⁴Dangga hang, en eihweda naugb en esai Mer Geigouhw gin astesda se leng Yahudi meren tuari geb se leng Yudea meren hancob augwan namcir.