Read Manikion LUKAS 8 Bible Online

LUKAS 8 - Manikion bible

LUKAS 8

¹Lona hosa debin sug Yesus etara se Simon men tuohob, kaba, eni dara men logodeh merug sisa hobjerai len lec merohora se beimes dara cinogo mogurei augwan naugb en esai Mer Geigouhw dau Allah sug en oiharaga lusud ucugb dou len toua.

²Dara ligida merug hosa, kaba, len toua laimo len isisi. Anai sug nosa, kaba, Yesus ocirma merna mog mog dau lingma. Dara lingma deit, kaba, en eic geigouhw dou len touohob. Len gin, kaba, hom en moho Mariam dau cinogo Magdala. En, kaba, Yesus ocirma merna mog mog merug senggai dau enohob.

³Dara hom deit, kaba, Kusa mesouwa Yohana. Kusa gin, kaba, en esedougwo mougt mera medam, moho Herodes, men tu an men aremougb augwan. Dara hom deit dau ligida ingga, kaba, en moho Susana. Dara ligida gus gus toua laimo dara len. Ligida gin laugwan, kaba, len leic lenin meren aregoufu naugb lausa Yesus an men logodeh sug lasai Allah moro gin toua.

⁴Se lona hom, kaba, lusud leinyana len len dau cinogo dingan dingan naugb ledebeij Yesus. Dangga sug en eiya, doba leinyana gougwa louwa debin enohob, kaba, en eic gainyenara hom dou len, endagai: Sud hom sug en eihwedaud men lo, kaba, en edeic meij bargehilo se men longga dous. Doba sug en eic meij bargehilo gin, kaba, meij ingma obsara se ucina. Dangga sug lusud laiyan meij ginohob, kaba, ba let augwan bouwa namcir toua.

⁵

⁶Dara ingma, kaba, obsara deisa cinogo geb se igdahab moc taiba. Dangga meij gin eij dara geigouhw. Doba cum, kaba, agac ucugb, anai mohu ingma naugb sug mom emeicero.

⁷Dara meij ingma, kaba, obsara se ara mog mog meda. Dangga sug meij dara ara mog mog lahwas laiji iririmohob, kaba, ara mog mog eij baiyan meij geigouhw gin bagac namcir.

⁸Doba meij igbum, kaba, obsara se cinogo mog geigouhw. Dangga sug meij gini eiji dara orbesbes namcirohob, kaba, men mera edebeij huntun hom toua. Sug Yesus eic gainyenara dag gin dou len bouwohob, kaba, en esulou len ucan gin deit, endagai: Gareg dau yen en moms ai, kaba, en ouman areg dan den dou en gin deigeigouhw namcir.

⁹Doba Yesus men logodeh, kaba, len leijidougwo en an ucugb deit, lendagai: Areg ban bainyen dou lusud graga, kaba, men meijouhw dagiro?

¹⁰Dangga Yesus enara auni dou len, endagai: Yen, kaba, Allah eigdoumesa yen meijoho naugb en ens dau sug en oiharaga lusud ucugb men meijouhw augwan asesa dou yen. Anai en ens dau augwan gin dou lusud sug nosa touebma. Doba naugb len gus, kaba, dan dens augwan gini se gainyenara dou len dous. Dauntoba sug len leiya dau indan geicara dag ganusbus, doba len lemeiya augwan asesa terimdero. Dara sug len louman dau sug dan desai Allah moro dou len, doba len lemecinaga meijouhw augwan asesa touwero.

¹¹Sug Yesus esulou men logodeh dag graga bouwohob, kaba, en enara dou len deit, endagai: Gainyenara graga, kaba, men meijouhw dag gini: Meij gin, kaba, aninim dag Allah mer.

¹²Meij gobsara se ucina, kaba, aninim dag lusud sug len louman Allah mer dag en ouwan oiharaga lusud ucugb, kaba, len lemecinaga men meijouhw ginero. Dangga hang, Bilis en en naugb en esma mer augwan dau len merdoc mes deit. Dauntoba sug len merdoc emebdebin an Allah enero, kaba, en emeigdoc len dau sesar men gogom aud maireseb menau geb huhugb touwero.

¹³Dara meij gobsara se cinogo geb se igdahab moc taiba, kaba, aninim dag lusud sug len louman dau Allah mer an areg graga, kaba, len lebin en mer gini se len merdoc dara gagahugouhw an namcir. Doba mer gin, kaba, emaga len merdoc mesero. Hanoba len merdoc emebdebin an Allah en mer terimda touwero. Doba sug aremer gogom ainyen len, kaba, len lobsara dau namcir.

¹⁴Dara meij gobsara se ara mog mog, kaba, aninim dag lusud sug len louman dau Allah mer, kaba, len lebin en mer gini se len merdoc mes namcir toua. Doba cum, kaba, ara mog mog gini aiyan Allah mer augwan dau len merdoc mes deit. Anai len lemarges dau sug len merdoc ebdebin an areg geb se cinogo ginero. Doba sug len merdoc eijesa icira areg len let dara areg len lohw gin terimda, kaba, len merdoc etrij naugb sug len merisoho mougb namcir. Dara len lauwam an areg geic len merdoc eigouhw dou len toua terimda. Hang meren mera augwan emedebeij dag eijogoij touwero. Doba eb dag mobouhw terimda dous.

¹⁵Doba meij gobsara se cinogo mog, kaba, aninim dag lusud sug len louman Allah en mer gin, kaba, len lecinaga meijouhw asesohob. Hanoba len lemebin en mer se len merdoc mes dousero. Doba sug len merdoc eigouhw an en mer dag ginohob, kaba, len laiyan meigdocesem naugb len laimo augwan toua terimda. Hang len lemedag meij maga mogud touwero. Doba len lera mera einyana namcir.

¹⁶Sug Yesus ens meijouhw dau sud hom geic meij bargehilo dou men logodeh bouwohob, kaba, en eic gainyenara dau sug Allah ens areg geb se lusud merdoc mes ainyes ucan dou lusud ingga deit. Hanoba en enara dou len, endagai: Sug sud hom ei men smougwohob, kaba, en emeic ara gus emaihiron dougwo mouf gin deitero. Dara en emecgoneh mouf gini se boromei meniha touwero, doba en ob mouf gini deb ainyes. Dauntoba sug lusud len leinesa men tu, kaba, mouf gini aisema len laugwan toua.

¹⁷Hang yen yesedougwo areg dan den dou yen gini deigeigouhw namcir. Anai se lona sug Allah oiharaga yen ucugb, kaba, en eic areg yen yecgoneh se yen meigdoc mes augwan naugb ens ainyes. Dara areg yen yod se simei, kaba, en agaha simei dau naugb lusud lecinaga toua. Dangga gareg dau yen en era mera geigouhwohob, kaba, Allah eic ingma aos dou en toua. Doba gareg dau yen en emera mera geigouhw ingmaro, kaba, areg en od mena debsa endag ingma emeb naugb ens, doba Allah eic augwan dau en namcir.

¹⁸

¹⁹Sug Yesus ens meijouhw dau areg graga dou men lusud gini, kaba, en mem dara en magtor, len len naugb ledeiya en, doba lusud leinyana lohudebesim dougwo lendaha.

²⁰Dangga leng lesa desij Yesus, kaba, len len dou en, lendagai: Ban abim dara ban abagtor, len merugwengga se medigo naugb len ledeiya ban.

²¹Doba Yesus enara auni len merir ucugb, endagai: Len gedig len louman Allah mer, dara len leicara laimo toua, kaba, len ginin eng dan deija len dag dan indim dara dan indagtor len dous.

²²Se lona hom deit, kaba, Yesus en dou men logodeh, endagai: Maman maihwedig nagama gacda. Dangga sug len leisa ijohob, kaba, len logo duhu naugb leihweda toua.

²³Doba sug len logo duhu naugb leihweda, kaba, loungmen medam eisa obsara se duhu mod. Hang duhu mogo medam erba se ing mes, kaba, ij ebiji naugb omdia an len namcir. Doba Yesus, kaba, en atouda.

²⁴Dangga hang, men logodeh lebir en sug en atou gini. Hanoba len lenara dou en, lendagai: Adehsud, ban bisa. Anai ij omdian maman maugwan dangga. Doba sug Yesus eisohob, kaba, en etaha loungmen dara duhu mogo, endagai: Yan yadina namcir. Sug en enara ineg danggohob, kaba, loungmen edina. Dara duhu mogo toua ogor terimda.

²⁵Sug loungmen dara duhu mogo edinohob, kaba, Yesus enara debin men logodeh, endagai: Dagiro, naugwe hang, yen yemod meijina debsa danero? Doba Yesus men logodeh sug len leiya dau gin, kaba, len merug omom an namcir. Dara len leimiman dau gin toua. Hanoba len lenara doum, lendagai: Sud hom gini garena dag loungmen dara duhu mogo aimo en mer, hang emedina gina?

²⁶Sug Yesus etaha loungmen dara duhu mogo edinohob, kaba, men logodeh leisa ij terimda len ledebeij nagama se leng Gerasa meren hancobohob.

²⁷Doba sug Yesus ouwaden dau ij dig mebera, kaba, sud hom merna mog mog einesa en medoc mesohob, en en aud en. Sug nosa, kaba, sud hom gini en atou se men cinogo. Doba iteitogin, kaba, en ematou se men tu sungga deitero, doba en atou se aremogougb moda dous. Dara en emeg sansun touwero, doba en ec an meihw agaga se lona einyanohob, anai merna mog mog leic meresiresa en ucucugb terimda.

²⁸Dangga men lusud leic kermum naugb lohud en mesira dara mohora hwas darem mougwa einyana sug nosohob. Dara len lesedougwo en dara geigouhw touohob. Doba en eic magan kermum augwan etrij dau en namcir. Dangga, kaba, merna mog mog lerba en se lomougwisa toua, ucucugb terimda. Sug sud hom gini en eiya Yesus, kaba, en eiyaga medam dougwo en dara en ecguna deseino en toua. Hanoba en enara dou Yesus dara mer medam, endagai: Yesus, ban ben sugini naugb bedeberou dana? Ban ben naugb beic mog erij dou danei? Anai dan decinaga ban, kaba, Adehsud Gen Moho Eb Taiba Augwan en Meisi ban ginohob. Dangga dan dacgeij naugb ban bemeic mog erij dou danlo. Sud hom graga enara dag gini dou Yesus, anai en ecinaga Yesus arougb merna mog mog geigtou se en medoc mes ingga naugb len leihwededau en danggohob.

²⁹

³⁰Doba Yesus eijidougwo sud hom gin deit, endagai: Ban aboho dagiro? Sug Yesus eijidougwo en dag ginohob, kaba, en auni dou en, endagai: Dan indoho dag emeinyana. En enara dag gin dou Yesus, anai merna mog mog leinyana leinesa en medoc mesohob.

³¹Dara hweij leinyana letara se men maga desij len sungga. Dangga hang, merna mog mog len laugwan leiyaga dougwo Yesus, lendagai: Ban bemocirma emen se ijou mes, isnaro. Doba ban barougb emen emeinesa hweijir gada merdoc mes dous. Sug Yesus ousa len merir anohob, kaba, len lagunya dau sud hom gin medoc mes. Hanoba len ledeinesa hweijir graga merdoc mes toua. Hang hweijir ingga len laugwan lougb lesogwa se duhu bogor lomom namcirda.

³²

³³

³⁴Sug leng lesedougwo hweijir graga len leiya dau gini, kaba, len lougb dig meren guseda naugb len leden dau aremer augwan gini dou leng sungga, dara leng geb acec len laugwan toua.

³⁵Dangga, kaba, len len naugb ledeiya aremer ingga se lenin merires touahabi. Sug len ledebeij Yesusohob, kaba, len leiya, doba sud hom graga eng eg sansun ucugb. Dara en mecdemaga esgiraha. Hanoba en eigtou desij Yesus mohora deb gini, anai merna mog mog laugwan leihwededau enohob. Sug len leiya dau gin, kaba, len lahau namcir.

³⁶Dara leng leiya aremer augwan gini se len meriresohob, kaba, len lecic dau sug Yesus eic geigouhw dou sud hom gedig merna mog mog einesa en medoc mesohob meijouhw augwan asesa dou len toua deit.

³⁷Sug leng se Gerasa meren hancob len louman dau gin, kaba, len lahau medam namcir deit. Hanoba len lecicugb Yesus, lendagai: Ban bemeigtou suginlo, doba ban beihwededau emen namcir. Dangga Yesus aimo len merir. Hanoba en eisa ij ucugb dig nagama dau len namcir toua.

³⁸Sug Yesus ouwan eisa ij dau len, kaba, sud hom gedig merna mog mog esogwa dau en gragohob en acgeij Yesus, dauntoba en toua aimo dara enda. Doba Yesus arougb en, endagai: Ban becicugb dig aban cinogoda naugb ban bedecic dau areg Allah eic geigouhw dou ban gin augwan dou aban lusud ucugb deitahabi. Dangga sug sud hom gin en ecicugb se men cinogohob, kaba, en edecic dau Yesus men geicara dou en gini augwan asesa dou len toua.

³⁹

⁴⁰Sug Yesus en ecicugb dig nagamohob, kaba, lusud leinyana ledagaseni dara lagahugouhw naugb en namcir. Anai len log ucina deb naugb enohob.

⁴¹Dangga sud hom gedag mougt mera naugb leng Yahudi meren tuari se cinogo ingga, en moho Yairus, en en aud Yesus sungga toua. Sug en edesan Yesusohob, kaba, en ecguna dou en toua. Hanoba en eiyagarij an Yesus medam, endagai: Ban bucan dan se indan tu naugb ben bedeic geigouhw dou dan indihidahabi. En enara dou Yesus dag gini, anai en mehida mohora hom, gedig en men arisogomoc sisa hobjeraiyohob, en areba medam deinyor sug en omom ingga. Sug Yesus ouman gin, kaba, en aimo en dig men tueda. Doba sug Yesus oucan en gin, kaba, lusud leinyana leila ucan en toua. Hanoba len lesa lomdi en namcir.

⁴²

⁴³Dara gida hom gos mogwihi se arisogomoc sisa hobjeraiyohob, kaba, en toua oucan Yesus dig medigo. Anai en acgeij leng meru ouforoho, dauntoba len louci aremougb naugb en terimdohob. Doba meren aremougb gin, kaba, hom emousa enero. Dangga hang, sug en acu Yesusohob, kaba, en ou mesira naugb os sansun mobroro icira Yesus mos.

⁴⁴Sug en eicara dag gin inegohob, kaba, en mogwihi toua edina doc namcir.

⁴⁵Dangga Yesus eijidougwo leng leila ucan gini, endagai: Gareg dau yen, en os dan gina? Doba len laugwan laideido dougwo. Dara Petrus toua, sug en ouman Yesus mer an danggohob, kaba, en enara bauni en mer ucugb, endagai: Adehsud, ban beijidougwo len dag gin, anara? Anai lusud leinyana lec lomdi ban, gin eng los ban ginei?

⁴⁶Doba Yesus ohoiya en mer, endagai: Naro. Dan decinaga sud hom os danohob naugb sug dan deic geigouhw dou en. Anai indan goubesa ingma eihwededau dan naugb ginohob.

⁴⁷Sug gida hom ingga en ecinaga dag men aremer eb ainyes dou Yesus naugb en ecinagohob, kaba, en en aud en dara en eijeijesa namcir. Dangga sug en ecguna deseino Yesusohob, kaba, en ecic men aremer meijouhw augwan asesa dou Yesus deseino len laugwan, lendagai: Adehsud, dan dos ban, anai dan indugwihi ohw se arisogomoc sisa hobjeraiyohob. Doba sug dan dos ban inegohob, kaba, dan indugwihi edina namcir.

⁴⁸Sug Yesus ouman dau gin, kaba, en oho mer debin en, endagai: Dan indihida, ban bod abina debsa danohob, hang ban bemeigouhw gini. Dangga ban beihweda, dara Allah eic gesgigouhwesa dou ban dougwo augwan toua.

⁴⁹Sug Yesus enara dou gida gragaba, kaba, sud hom dau mougt mera, moho Yairus, men tu en en naugb enara dou en. Sug en edebeij enohob, kaba, en enara dou en, endagai: Ban bemagogod Adehsud, en deitlo, anai ban abihida omomohob.

⁵⁰Doba sug Yesus en ouman dau gini, kaba, en oho mer debin Yairus, endagai: Ban abdoc emeijesero. Doba ban bod abina debsa dan, kaba, ban abihida en mena emagau ucugb deits.

⁵¹Sug len ledebeij Yairus men tuohob, kaba, Yesus ouci Petrus, dara Yohanes, dara Yakobus, dara gida gomom graga mena dara mem len gin dous eng leinesa dimei aud gidob gomom ingga. Doba len gus, kaba, en ecicugb len laugwan deb naugb len leigtou dig medigo dous.

⁵²Dara en en dougwo leng leigtou se medigo gin naugb len lemeb dara lemeiyogoseser deitlo. Anai len laugwan leicara laimo dag gin terimda. Hanoba en enara dou len, endagai: Gidob gin, kaba, en emomomero, doba en atou dous.

⁵³Sug len louman Yesus mer an gin, kaba, len lobohuba dagasges an en namcir. Anai len lecinaga, doba gidob gini en omom namcirohob.

⁵⁴Doba sug Yesus en edesa desij en magohob, kaba, en os en mesira. Hanoba en ebir en, endagai: Dan indihirija, ban beisa besa namcir.

⁵⁵Dangga godeh gini en mena ecij se gidob en maga ucugb. Hanoba en eisa dedemeda toua. Sug en eisohob, kaba, Yesus arougb len gus naugb len leic ared dou en bet.

⁵⁶Sug mena dara mem lan laiya dau gin, kaba, lan laimiman dau gin namcir. Doba Yesus en en dougwo lan, endagai: Yan yamecic dau aremer gini dou sud hom touwero.