Read Manikion LUKAS 9 Bible Online

LUKAS 9 - Manikion bible

LUKAS 9

¹Sug Yesus ebir Yairus mehida dau gomomohob, kaba, en eija men logodeh merug sisa hobjerai len loucimdeb desij eni. Sug len len aud enohob, kaba, en eigdoumesa len meroho naugb len locirma merna mog mog dau lusud. Dara en eic goubesa dou len naugb len leic geigouhw dou leng areber aingma aingma toua.

²Sug en eic goubesa dou lenohob, kaba, en arougb len naugb len lesai Allah moro dau sug en oiharaga lusud ucugb. Dara len leic geigouhw dou len debin gin toua.

³Doba sug len lemeihwedebma, kaba, en en dougwo len, endagai: Sug yen yesai Allah moro dou lusud, kaba, yen yemodo ijouhugwa, dara yen yemoho i naugb yen yemohwiaga lusud an ara ara, dara yen yemodo ared, dara aregoufu augwan gin dara yenlo. Dara yen yemeg sansun hwai debinim touwero. Doba yen yec dag yecus dous.

⁴Dara sug sud hom en ebin yen se men tuohob, kaba, yen yemeihweda se tu gus dau enlo. Doba yen yeigtou desij en se men tu ingga, terimda edebeij lona sug yen yeihweda se cinogo gus dau en deit.

⁵Dara astesda cinogo sug lusud lemebin yenero, kaba, yen yemeigtou desij len touwero. Doba yen yeihwededau len namcir. Dara sug yen yeihwededau len, kaba, yen yetir yen meijohora an meren cinogo mor dag ansins dou len toua. Dauntoba len lecinaga dag yen yemeic cumougt dou len deitero, doba yen yarges len deb namcirohob.

⁶Sug Yesus esulou len bouwohob, kaba, len leihweda naugb len lesai Mer Geigouhw dau Allah men lona sug en oiharaga lusud ucugb se astesda cinogo augwan. Dara len leic geigouhw dou leng areber astesda cinogo sug len ledebeij gin toua.

⁷Sug leng Galilea meren mougt mera, moho Herodes, en ouman dau Yesus dag en eic geigouhw dou lusud leinyana, dara en ouman dag Yesus eigdoumesa merug hosa dau gomom touohob, kaba, en eija mouwesa len merir an gini. Anai ligbum, kaba, len leden, lendagai: Sud hom gin, kaba, Yohanes Gogun Lusud Se Duhu gia eng Allah ebir en ucugb deit gini.

⁸Dara ligbum, kaba, len leden deit, lendagai: Yesus gin, kaba, Elias ingga dogun gini. Doba ligbum deit, kaba, len leden, lendagai: Sud hom gin, kaba, en edag sud hom dau leng lesai Allah moro nosa dous eng eisa dau gomom ucugwohob.

⁹Sug Herodes en ouman lusud lenara aingma aingma dag gin, kaba, en medoc aihagab len merir an namcir. Hanoba en enara se enin medoc mes, endagai: Dan decinaga sud hom gin, kaba, Yohanes, isnaro. Anai en, kaba, dan darougb sud hom sug nosa naugb en edougb en mougt dauwohob? Dangga sud hom geicara dag gin, kaba, gara en inggina? Hang en toua ouwan naugb edeiya Yesus se enin mairesahabi.

¹⁰Sug Yesus men logodeh merug sisa hobjerai len lecicugb aud enohob, kaba, len ledecic dau sug len leic geigouhw dou lusud. Dara sug len locirma merna mog mog dau len. Dara areg len lens meijouhw dou len ginohob augwan asesa dou en toua. Sug men logodeh lecic augwan gin dou enohob, kaba, en enara dou len, endagai: Yen yisa, maihwededau lusud gin se losneseba naugb madehig debin mamug sunggahabi. Sug en enara dou len danggohob, kaba, en einoisa len merin se lomougwisa hom deinyor cinogo Bedsaida.

¹¹Sug len gus louman, doba Yesus edan men logodeh se losnesebohob, kaba, len toua loucucan en sungga toua. Sug len ledebeij enohob, kaba, en emesenagan len naugb en emecicugb len touwero. Doba en ebin len dara medoc eigouhw an len. Hanoba en edidib dau lona sug Allah oiharaga len ucugb men meijouhw asesa dou len. Dara gareg dau len en areba, kaba, en eic geigouhw dou en toua.

¹²Doba deinyor sug igda obsaresohob, kaba, men logodeh merug sisa hobjerai graga len len aud Yesus naugb ledenara dou en, lendagai: Ban barougb lusud leinyana gini naugb len leihweda se cinogo dara tu geb acec maman gininda naugb len ledatou dara len ledetara desij len sungga touahabi. Anai sugin, kaba, losneseba namcir an aredaha.

¹³Doba Yesus auni dou len ucugb, endagai: Lenin lemdehilon aredero. Doba yen eng yeic ared dou len dous. Dangga len lenara lawun Yesus mer an gini, lendagai: Ban boudesa endag emen emob aregoufu einyana deb, kaba, emen emouma ared emedeinyum naugb len laugwansei? Anai aredto geb gin, kaba, roti mogo sergem dara hosei hwai dousdaha, gina?

¹⁴Len lenara dag gin dou en, anai len lecic len ingga, doba ledebeij ligiji merug ribu sergemohob. Gini len lemecic ligida dara logodeh dara touwero. Doba Yesus arougb men logodeh merug sisa hobjerai gini, endagai: Yen yekeba merug sud hwai sisedeisu len leigtou debinim hom, astesda len laugwan dangga.

¹⁵Dangga men logodeh lekeba lusud laugwan gin leigtou debinim aimo dag Yesus arougb len an ginohob.

¹⁶Sug len laugwan leigtouohob, kaba, Yesus os roti mogo sergem, dara hosei maga hwai graga icira en mesira. Hanoba en eised mergo augb bogo, dauntoba en en sijo dou Allah naugb gini. Sug en ocuncum dou Allah dauwohob, kaba, en ekris roti. Hanoba en eic dou men logodeh naugb len lohw an len ingga laugwan toua.

¹⁷Dangga len laugwan let beicer namcir. Hanoba Yesus men logodeh ledouci ared mougwu augwan debinim se aigdaga mes sisa hobjerai batij an namcir.

¹⁸Se lona hom deit sug Yesus en ocuncum se usi hom dou enin, kaba, men logodeh leigtou dougwo en sungga toua. Dangga sug en ocuncum gini, kaba, en eijidougwo len, endagai: Yen youman sug lusud lecic dan indoho doum, kaba, len leija dan dag garena?

¹⁹Doba len launi dou en, lendagai: Ligbum, kaba, len leija ban dag Yohanes Gogun Lusud Se Duhu. Dara ligbum, kaba, len leija ban dag Elias. Doba ligbum deit, kaba, len leija ban dag sud hom dau leng lesai Allah moro sug nosa geisa dau gomom ucugwohob.

²⁰Dangga Yesus eijidougwo len deit, endagai: Doba yenin, kaba, yen youdesa dani garena? Doba Petrus en auni dou Yesus, endagai: Ban, kaba, Allah ouci ban deb naugb sug ban beigdoc emen dau emen gogom augwan namcir.

²¹Sug Petrus auni dag gin dou Yesusohob, kaba, en oungben len dougwo namcir, endagai: Yen yemedecic dau gin dou sud hom ingma touwero.

²²Dauwohob, kaba, en enara dou len deit, endagai: Lusud Meraguna Mebin dan daimo ucina mog erij einyana dauwahabi. Dara leng Yahudi meren mougtir, dara gembala gesa taij meren mougtir, dara leng meru ouforoho se Musa men gomnomna len laugwan letogoto dara leic gomom dou dan touahabi. Doba lona hwai debin gin, kaba, Allah eigdoumesa dan dau gomom ucugwohob. Anai augwan gini aimo dau areg Allah esedeb naugb danohob.

²³Sug Yesus oungben men logodeh dougwohob, kaba, en esulou len laugwan ucan deit, endagai: Gareg dau yen en ouwan aimo dan, kaba, en emaimo areg enin ouwan deitero. Doba en ogod se enin medoc mes naugb en aimo ucina mog erij aud gomom ucan dan astesda lona terimda.

²⁴Anai gareg dau yen en ebehnehino enin mena naugb en maireseb dous, kaba, cum, en mena toua ediyebeiya dau en namcir. Doba gareg dau yen en emebehnehino enin menero, doba en omom icira sug en aimo dan, kaba, en mena emediyebeiya touwero. Doba en esma mena maireseb geb huhugb namcir.

²⁵Dangga yen yemeic yenin meijina naugb yen yemamcirac icira areg geb se cinogo ginlo. Doba yen yasid yenin dau namcir. Anai sug yen yeic yen meijina naugb yen yamcirac icira areg geb se cinogo ginohob. Doba cum, kaba, maireseb huhugb ediyebeiya dau yen namcir, kaba, ara ingma emeb naugb yen deita? Anai augwan ediyebeiya dau yenohob.

²⁶Dara igdebes emeba yen naugb yen yos yadi dan indoho deseino lusud dara sug yen yesai dan induro dou len touwero. Anai gareg dau yen igdebesebeni naugb en emos emadi dan indoho dara dan indir gin deseino lusudero, kaba, Lusud Meraguna Mebin dan demos demadi en moho deseino dan Indina se Lona Sug Dan Decicugwen gin touwero. Doba dan damsoho en toua terimda. Anai se Lona ingga, kaba, dan den dara dan Indina men gogouf cucugb erbacec dan dara men malaikadir gecabeci loucan dan toua.

²⁷Doba yen youman deigeigouhw. Anai ligbum dau yen, kaba, yen yemomom dau lona sug Allah oiharaga yen ginbuma. Doba yen yeiya augwan gini dara yen meijiresahabi, yen yemomom dau toua. Augwan gini asesa dag misen namcir.

²⁸Ari hom debin sug Yesus esulou men logodeh dag gragohob, kaba, en eisaugb an Petrus, dara Yohanes, dara Yakobus, se menmod hom naugb en edocuncum sungga.

²⁹Sug en ocuncum gin, kaba, en mebes eperwei. Dara men sansun toua ogouf cucugb mouf esesilo namcir.

³⁰Doba ban bouman deigeigouhw. Sug Yesus men gogouf cucugb erbacec en dag gin, kaba, lasud lahwai, lan maroho Musa dara Elia, lan toua lans lanin desij Yesus se gogouf cucugb gin toua. Sug lan lagunya debin enohob, kaba, lan lanara dou en, landagai: Cum, kaba, ban bomom se cinogo Yerusalem, anai gini aimo dau areg Allah enin mer ogod deinaugb banohob.

³¹

³²Irir sug Yesus en ocuncum gin, kaba, Petrus dara en mesi lahwai, len cicireber leinyeinyaha dau enohob. Dangga sug len lesga meriresohob, kaba, len leijesan, doba gogouf cucugb erbacec Yesus. Hanoba lasud lahwai lasa desij en toua.

³³Dangga sug len leiya, doba lan graga lad maraga naugb lan laihwededau Yesus engga, kaba, Petrus enara dou Yesus, endagai: Adehsud, eigouhw naugb emen toua emugwenggini. Dauntoba emen emahud tu meij homoi bedeinyum naugb yen. Hom naugb banin. Hom naugb Musa. Hom naugb Elias toua. (Doba areg en enara gin, kaba, dag augwougb dous, anai en emoudesan meijouhw nosahabero.)

³⁴Irir sug Petrus enara dag graga dou Yesus, kaba, umer mogo hom agunya debin len naugb oiharaga len. Sug umer osun lenohob, kaba, Yesus men logodeh lahau namcir.

³⁵Dangga hang, len louman, doba sud hom enara dau umer dou len, endagai: Yen youman dan Indisi gin en mer dara geigouhw namcir. Anai dan douci en naugb en eigdoc lusud dau meren gogom augwanohob.

³⁶Sug sud hom graga enara dau umer dou len bouwohob, kaba, len lemeiya lingma lemesa desij len deitero. Doba len leiya Yesus enin dous. Dangga se lona sug Yesus en moongga dara lenaba, kaba, len lemdecic dau aremer gin dou len gus touwero. Doba len letin augwan se len merdoc mes namcir.

³⁷Loba hom debin sug Yesus ens dau men gogouf cucugb dou merug homoi ginohob, kaba, eni dara men logodeh graga len louwaden dau menmod ingga dig dougb deit. Sug len louwaden se dougwohob, kaba, lusud leinyana lagasa eni.

³⁸Sug len ledebeij Yesusohob, kaba, sud hom dau len ingga en eiyagarij en, endagai: Adehsud, dan dacgeij ban naugb ban bedeiya dan indisi mohora hom ginahabi.

³⁹Anai sug mena mog mog eic mesireseni ineg, kaba, en eiyaga medam. Dara en os en betirker terimda. Hanoba en meigdores mahac toua. Dara mena mog mog emarges dau en dedemeda touwero. Doba eic mesiresa en terimda en mos ohu becbec namcirohob.

⁴⁰Dangga dan dahwan en aud aban logodeh suginohob naugb len locirma mena mog mog dau en, doba meren goubesa emedeinyum naugb ginero.

⁴¹Sug Yesus ouman dau gin, kaba, en omi debin len. Hanoba en enara medam dou len, endagai: Dan deigtou desij yen, dara deigtou dateteij yen se lona hosa deitohoba? Anai dan dens dau Allah mer dara men goubesa augwan bedeinyum dou yen touohob. Doba yen yemod meijina debsa en an aremer ginbuma. Dara yen yemaimo en mer touwero. Doba yen meigdoc aihagab en mer gin terimdaba. Sug Yesus enara gouji dangga dou lenohob, kaba, en arougb godeh en mena ucan deit, endagai: Ban bedahwan ban abisi dou dan suginahabi.

⁴²Sug godeh graga en en aud Yesus en, kaba, mena mog mog os en bad cinogo mougb. Hanoba os en betirker namcir toua. Doba Yesus esa mer debin mena gogor ingga, endagai: Ban beihwededau godeh gin namcir. Sug Yesus ocirma mena gogor dau en beigouhwohob, kaba, en ou mesira an godeh ingga dou mena ucugb deit.

⁴³Sug lusud leiya dau gin, kaba, len leimiman dau Allah namcir. Anai en ens Allah men goubesa ainyes dou len dag edreg dau augwanohob. Sug lusud leimiman dau Yesus men geicara gin doumaba, kaba, Yesus ens dau sug en omom mougwa hom dou men logodeh deit, endagai: Cum, kaba, sud hom en emohw Lusud Meraguna Mebin dan deb se leng gus merisira naugb len lemeic gomom dou dans.

⁴⁴Dan douwan naugb yen meigdoc moc dougwo ginlo. Doba yen meigdoc eiseisan gin terimda.

⁴⁵Doba men logodeh, len meru emobgesa en mer an areg en en dou len ginero. Anai Allah ecgoneh meijouhw gin dou lenaba. Dara len lemeic merus naugb leijidougwo en an meijouhw touwero. Anai len lahau dau sug len leijidougwo en andaha.

⁴⁶Se lona hom deit, kaba, Yesus men logodeh lenin merir lauwim icira meroho endag gareng dau maman en moho agas edreg dau maman maugwanda?

⁴⁷Doba Yesus en ecinaga len merdoc mes an areg lenin merir lauwim an gin touohob. Dangga hang, en os godeh hom desij en maga.

⁴⁸Hanoba en ens meijouhw eisaugb gin ucan dou len toua, endagai: Gareg dau yen en eperwei dan indoho, hanoba en owun enin medoc mes arjaga naugb en ebin godeh gedig en medoc ebdebin an dan gin, kaba, en eng moho agas bedreg dau lusud se Allah men goiharaga len laugwan namcir. Anai en owun enin medoc mes eb tainya lusud laugwan dag ginohob. Dangga toua, gareg en ebin godeh bedag gin, kaba, gini aninim dag en ebin dan. Dara gareg en ebin dan, kaba, gini aninim dag en ebin sud hom gesa dan aud yen gin touohob.

⁴⁹Doba Yohanes eijidougwo Yesus an ara gus, bogod dougwo Yesus mer an areg en en graga. Hanoba en enara dou en, endagai: Adehsud, emen emeiya sud hom eic ban aboho bocirma merna mog mog dau lusud. Dangga hang, emen emen dougwo en an gini, anai en emaimo mamanero.

⁵⁰Doba Yesus enara bauni en mer ucugb dou en dara men logodeh gus, endagai: Gareg en emeicara ecgwan yenero, doba men geicara ucan yen, kaba, ban bemen dougwo enlo. Anai en toua eigdara yen se meijouhuda homohob.

⁵¹Sug lona edagasohob naugb sug Allah eigdoumesa Yesus aud bogo ucugb, kaba, en aiyan medocesem naugb en eihwedig Yerusalem. Sug en ogod dag gin se en medoc mesohob, kaba, en ebiji naugb en ec mohora aud cinogo gin toua.

⁵²Doba sug len leraga asa ucina gin, kaba, Yesus arougb men logodeh lingma laimo en men. Hanoba en enara dou len, endagai: Yen yaimo dan indir naugb yen yesedeb tu hom se leng Samaria meren hancob naugb danahabi. Sug en arougb len dag ginohob, kaba, len leinesa leng Samaria meren cinogo hom naugb len lesedeb ara ara naugb Yesus toua.

⁵³Doba sug leng Samaria louman dag Yesus emougdoc sunggaro, doba en esedeb naugb eihwedig Yerusalem toua, kaba, len len dougwo men logodeh ingga, lendagai: Emen ememouwan naugb sud hom gini en emen suginero.

⁵⁴Dangga hang, sug Yesus men logodeh lahwai, lan maroho Yakobus dara Yohanes, lan lauman dau gin, kaba, lan lanara lases Yesus medoc mes, landagai: Adehsud, ban bouwan, kaba, aman amacgeij Allah naugb en esa smougb dau bogaden naugb ait lusud ingga laugwanda.

⁵⁵Sug Yesus ouman gin, kaba, en eineg aud len. Hanoba en enara bauni lan merir ucugb, endagai: Yan yamenara dag ginero.

⁵⁶Sug Yesus en dougwo len dag ginohob, kaba, en eihwedan len laugwan se cinogo gus deit.

⁵⁷Sug Yesus dara men logodeh len ledec merohora deit aud Yerusalem, kaba, sud hom acgeij Yesus naugb aimo en, endagai: Adehsud, ban bouwan, kaba, dan daiseisa ban sug ban beihweda sugiro sugiro toua.

⁵⁸Doba Yesus auni dou en ucugb, endagai: Mihiloro, kaba, meren igdohos mes inggebga naugb len latousa. Dara ba toua len mererum inggebga naugb len leigtousa. Doba Lusud Meraguna Mebin dan, kaba, indan ara ara ingmemeb naugb sug dan dareb touwero.

⁵⁹Dara sug len lagasa sud hom gus deitohob, kaba, Yesus eija en, endagai: Ban ben naugb baimo dan iteitogini. Doba sud hom ingga en enara bauwun dou Yesus endagai: Adehsud, ban beic cumougt dou dan naugb sug dan dedec dan indina gomom dauwahabi, dan demen naugb demaiseisa ban toua.

⁶⁰Doba Yesus enara bogod dougwo en mer, endagai: Ban bemeihwedero. Doba ban bogugwo ban abina gomom gin deb se lusud areg len ledag lomom dau Allah merisira naugb len lec en dous. Doba ban, kaba, ban beihwedig sungga sungga naugb ban besai Allah en moro dau sug en ouwan oiharaga lusud ucugb gin dou len dous.

⁶¹Dara sud hom gus deit, kaba, en acgeij dau Yesus naugb aimo en toua, endagai: Adehsud, ban bouwan, kaba, dan toua daiseisa ban. Doba ban beic cumougt dou dan naugb sug dan dedou leng leigtou desij dan se indan tuahabi, dan demen naugb sug dan demaiseisa se ban toua.

⁶²Doba Yesus enara bauni en mer ucugb, endagai: Sud hom gareg en ebiji naugb en aimo ucina homohob. Doba cum, kaba, en medoc etrij icira ara ara dau gini terimda, kaba, emedeinyum naugb sug Allah oiharaga en se lona daiyamo gacin touwero. Doba en eigtou au gusi dau en beb huhugb namcir.