Read Manikion YOHANES 1 Bible Online

YOHANES 1 - Manikion bible

YOHANES 1

¹Sug Allah emahasesei augwanbuma, kaba, Sud Hom, moho Gesai Moro, en toua moongga sug nosohob. Dara en emehig dou enin touwero. Doba lan lahwas lais huhugb sug nosohob. Dangga maran geicara augwan toua emeba dahamero. Doba maran geicara augwan aninim namcir. Dara en moho ingma susugb dau Allah touwero, doba en moho toua dag Allah dau huhugwohob.

²Dangga sug acgunog, kaba, Sud Hom Gesai Moro en toua moongga desij Allah enohob.

³Hang areg Allah en auwam an deb naugb sug en ahasesei, kaba, en emahasesei hom dou eninero. Doba lan laohw maruwedoum naugwahabi, lan lamahasesei augwan emogdoc Sud Hom Gesai Moro gin toua.

⁴Dara maireseb menau geb huhugb, kaba, emen dau len gus touwero, doba en dau Sud Hom Gesai Moro enin dous. Dangga gareg en einesa maireseb menau geb huhugb ginohob, kaba, en emeigtou se lobeigbogo deitero. Doba en ecinaga areg misen augwan toua. Anai maireseb menau geb huhugb gini edag mouf aisema enohob.

⁵Hang lobeigbogo men goubesa emedeinyum naugb sug etohoi mouf dau lusud merdoc mes touwero. Doba mouf gini aisema len beb huhugb terimda.

⁶Dara Allah arougb sud hom, moho Yohanes, naugb en esai mer geigouhw eisaugb Sud Hom Gesai Moro gini dou lusud toua deb nosahabi. Dauntoba sug len louman dau mer gin, kaba, len lesedeb merdoc mes deb naugb sug len merdoc ebdebin an Sud Hom Gesai Moro gin toua.

⁷Dangga sug Yohanes edebeij lenohob, kaba, en enara dou len, endagai: Cum, kaba, sud hom gedag mouf edebeij yen naugb en ens areg asesa Allah enin medoc mes augwan dou yen toua.

⁸Dangga Yohanes gin, kaba, en emedag sud hom geic mouf dou lusudero. Doba en en naugb en esedeb lusud merdoc mes naugb sud hom geic mouf dou lusud gin dous.

⁹Doba Sud Hom Gesai Moro gedig en ouwaden dau bogo naugb aisema lusud se cinogo gin augwan, kaba, enin dous eng edag mouf misen gini.

¹⁰Doba lusud, kaba, len lemeigdoumesa en moho dag mouf gaisema len touwero. Doba len letogoto en namcir. Dangga hang, Allah esinsin lusud laugwan ogdoc Sud Hom Gesai Moro ginohob. Doba sug en edebeij len, kaba, len merdoc emebdebin an en touwero.

¹¹Dara sug en en aud enin men meijouhuder, kaba, len lemebin en touwero.

¹²Doba gareg en ebin Sud Hom Gesai Moro gini, hanoba en medoc ebdebin an en toua, kaba, Allah eigdoumesa len meroho dag en mogwihi mogo len dag misen namcir.

¹³Hang len lemedag Allah mehir emogdoc dau sug merna lauwam an, dara merimir louwadanir, dara lusud logod an deb touwero. Doba len ledag Allah mehir gini dau Allah enin medoc mes dous.

¹⁴Dara emen toua emeiya dau Sud Hom Gesai Moro men gogouf cucugb gedig en Mena ogugwo dou en Meisi mohora hom gin touohob. Anai en emeigtou se bogo dou eninero. Doba en ouwaden dau bogo naugb en eigtou desij maman. Dara en emedag mena touwero, doba en mocbobaga toua dag lusud misen. Dangga emen emeiya dau men geicara sug en medoc eineg an lusud ucucugb terimda. Dara emen emecinaga areg asesa Allah enin medoc mes. Anai en Meisi gin, kaba, en ens augwan gini asesa dou emen touohob.

¹⁵Dara Yohanes gedig en ogun lusud se duhu, kaba, en toua ouma debin Sud Hom Gesai Moro ginohob. Anai sug en eiya Sud Hom Gesai Moro en en aud en sug nosa, kaba, en eija mer dou men logodeh, endagai: Dan den dou yen sug nosa dag cum, kaba, sud hom en emaimo ucan dan naugb en emeperwei dans. Dara dan den dou yen dag en moho agas medam edreg dau dan namcir touohob. Sug Yohanes enara dou men logodeh dag ginohob, kaba, en ens Sud Hom Gesai Moro enin mog dou len deit, endagai: Sud hom gedig dan den dou yen graga, kaba, inggada.

¹⁶Dara sug Sud Hom Gesai Moro gini en ouwaden dau bogohob, kaba, en emecgun mesira debin areg geigouhw dau maman touwero. Doba en agaha mesira an dou maman naugb en eic geigouhw aingma aingma dou maman terimda.

¹⁷Dangga areg Allah eic dou lusud ogdoc Musa sug nosa, kaba, dag men gomnomna dous. Doba areg asesa Allah enin medoc mes, kaba, en ens augwan gini dou maman ogdoc Yesus Krisdus enin. Anai en medoc eineg an maman namcirohob.

¹⁸Dara sud hom ingma, kaba, en emeiya Allah dara en maires touebma. Doba en Meisi mohora hom gin dous eng ens areg geb se Allah enin medoc mes augwan asesa dou maman. Anai enin dous eng en moho aninim dag Allah. Dara enin dous eng eigtou bogodgod Mena maga an areg gin augwan sug nosohob.

¹⁹Sug Yohanes ogun lusud se duhu sug nosa, kaba, leng Yahudi meren mougtir larougb merug hosa dau gembala gesa taij dara Lewi medebeitor naugb len leihwedaud Yohanes. Hanoba len lenara dou len, lendagai: Yen yeihweda naugb yen yedeijidougwo Yohanes en eng Sud Hom Geigdoc Maman Dau Maman Gogom Augwan enei? Era naroei? Dangga sug len ledebeij enohob, kaba, len leijidougwo en, lendagai: Ban eng Sud Hom Beigdoc Emen Dau Emen Gogom Augwanei?

²⁰Doba Yohanes, kaba, en emaunun dougwo enin dou lenero. Doba en ens meijouhw asesa dag misen dou len namcir. Hanoba en enara dou len, endagai: Dani Sud Hom Geigdoc Yen Dau Meijen Gogom Augwan ginero, doba sud hom gus dous.

²¹Dangga hang, len leijidougwo en deit, lendagai: Gedangga, kaba, ban, kaba, garena? Bang Elias eng beisa dau gomom ucugb ginei? Doba Yohanes auni len merir ucugb dou len, endagai: Dang Elias touwero. Sug len louman dau gini, kaba, len leijidougwo en deit, lendagai: Bani Eliasero, kaba, bani sud hom gesai Allah moro eisaugb Mesias sug en en dou emen, ingginei? Doba Yohanes auni len merir ucugb dou len toua, endagai: Dani sud hom gesai Allah moro eisaugb Mesias sug en en dou yen touwero.

²²Dangga len lenara dou en deit, lendagai: Ban bemauni areg emen emeijidougwo ban an gragero, kaba, ban beigdoumesa ban aboho dag garena deseino emena? Ban bens meijouhw asesa dou emen, dauntoba emen emedecic augwan asesa dou emen mougtir touahabi.

²³Doba sug Yohanes auni dou len, kaba, en ecic dau areg sud hom gesai Allah moro nosa, moho Yesaya, en og deb se Surad Injil Meb Mohon deb sug nosohob. Hanoba en enara dou en, endagai: Dan dedag sud hom geija mer esesa dou lusud se lomougwisa, endagai: Yen yesa yen meigdoc mes bobosboro deb naugb maman Adehsud sug en en. Aninim dag lusud lesinsin ucina obosboro naugb meren mougt mera medam sug en einesa aud len toua.

²⁴Sug lusud gedig leng Parisi lesa len aud Yohanes graga len louman en mer an gini, kaba, len len dougwo en, lendagai: Ban bemedag Sud Hom Emeigdoc Emen Dau Emen Gogom, dara ban bemedag Elias, dara ban bemedag sud hom gesai Allah moro eisaugb Mesias sug en en dou emen deit touwero, kaba, ban bogun lusud se duhu deb anara?

²⁵

²⁶Dangga Yohanes auni dou len, endagai: Dan, kaba, dan dogun yen se duhu, doba duhu misen dous. Doba cum, kaba, sud hom en emaimo ucan dan aud yens.

²⁷En, kaba, dan indoho emedeinyum naugb sug dan demesga aumagan dau men hwigbeimos icira en mohora touwero. Dara en moongga se yen meijufu touohob, doba yen yemecinaga enbuma.

²⁸Aremer augwan gin, kaba, ebiji deinyor Betania dig duhu Yordan nagama aud dig igda eisaugb. Anai us gin, kaba, sug Yohanes ogun lusud se duhu deb se ingga.

²⁹Se loneinda deit, kaba, Yohanes en eiya Yesus sug en en aud en. Hanoba en enara dou men logodeh, endagai: Yen yeiya sud hom gagunya gaden, kaba, en eng Allah Men Domba naugb en aigdougwo lusud se cinogo augwan meren sesar.

³⁰Eni sud hom gedig dan den dou yenohob, dag en emaimo ucan dans. Dara en moho agas edreg medam dau dan touohob. Anai en eis huhugb sug dan touebma.

³¹Aimougtut, kaba, dan demecinaga sud hom goucan dan gin dag misenbuma. Doba sug Allah arougb dan naugb dan dogun lusud se duhu sug nosa, kaba, en esulou dan ucan deit, endagai: Sug ban bogun lusud se duhu gini, kaba, ban bemeiya Mena Gogoufu emouwaden dau bogo naugb en eigtou desij sud hom dau len gini. En gin eng emesa Mena Gogoufu se lusud merdoc mes toues.

³²Dangga dan demecinaga sud hom goucan dan gini sug nosa touwero. Doba dan den naugb dan dogun lusud se duhuahabi. Dauntoba sug dan deiya Mena Gogoufu eigtou desij sud hom dau len gini, kaba, dan dens en dou mamang Israel dag en emeigdoc maman dau maman gogom augwans. Sug Yohanes ens Yesus dou men logodehohob, kaba, en ouma debin en ucan dou len deit, endagai: Sug dan dogun en se duhu, kaba, dan deiya Mena Gogoufu ohw dau bogaden dag bohobei eigtou desij enohob.

³³

³⁴Dangga hang, dan decinaga en edag Allah Meisi mohora hom gini. Anai dan deiya areg graga augwan se dan indires dag misen touohob.

³⁵Lona hom debin gin deit, kaba, Yohanes en moongga se usi sug en ogun lusud se duhu. Dara men logodeh lahwai lan marugwengga desij en sungga toua.

³⁶Dangga sug en eiya Yesus oudreg len, kaba, en ens en dou men logodeh lahwai gini, endagai: Yan yaiya Allah men Domba graga inggadeinda.

³⁷Sug lan lauman Yohanes mer an gin, kaba, lan larges en deb sungga. Hanoba lan laucan Yesuseda.

³⁸Dangga sug Yesus eineg dig medigo, kaba, en eiya lan laucan en. Hanoba en eijidougwo lan, endagai: Yan yaucan dan naugb ara? Hang lan launi dou en, landagai: Adehsud, ban bedatou sugiro?

³⁹Sug Yesus ouman, doba lan laijidougwo en dag gin, kaba, en oho mer debin lan, endagai: Yan yaucan danahabi, yan yamedeiyes. Doba sug Yesus oho mer debin len dag gin, kaba, igda edeisameni deinyor lobohob. Dangga sug lan laucan en terimda, kaba, lan ladeiya sug en atoudohob. Hanoba lan laigtou desij en sungga terimda loba namcirahabi, lan lamecicugb.

⁴⁰Doba lang lauman Yohanes mer graga, dara laucan Yesus gini, kaba, laingma maroho dag Andreas, Simon Petrus magto.

⁴¹Dangga sug lan lacicugb dau Yesus inegohob, kaba, Andreas en edehilon en maguna Simon. Sug en edesma enohob, kaba, en en dou en, endagai: Aman ameiya Sud Hom Geigdoc Maman Dau Maman Gogom Augwan enohob. (Meijouhw gini se leng Grika meren leci dag Krisdus.)

⁴²Sug en en dou en danggohob, kaba, en ahwan en aud Yesus toua. Sug Yesus eiya Simonohob, kaba, en auweila en augwougwu. Hanoba en enara dou en, endagai: Iteitogini ban aboho Simon, Yohanes meisi. Doba dan desagai ban aboho deit dag Kepas. (Kepas gini, kaba, men meijouhw se leng Grika meren leci aninim dag Petrus, era igdahab gouji gototo.)

⁴³Se loneinda deit, kaba, Yesus esedeb naugb en eihwedig leng Galilea meren hancob deit. Dangga sug en ec mohora asa ucina gin, kaba, en eiya sud hom moho Pilipus. Sug en edeiya enohob, kaba, en enara dou en, endagai: Ban toua bin, baimo dan.

⁴⁴Pilipus gini, dara Andreas, dara Simon, len laugwan dau cinogo Bedsaida.

⁴⁵Sug Yesus enara dou Pilipus naugb en aimo enohob, kaba, Pilipus edehilon en magto Nataniel toua. Sug en edebeij enohob, kaba, en enara dou en, endagai: Emen emesma sud hom areg Musa dara leng lesai Allah moro nosa len log deb se Allah men gomnomna eisaugb en sug nosa touohob. Eni Yusub meisi, moho Yesus, dau cinogo Nasared.

⁴⁶Doba sug Nataniel en ouman dag Yesus en dau cinogo Nasaredohob, kaba, en esbes Pilipus mer an gin namcir, endagai: Ara geigouhw hom ingma emen dau Nasaredei? Naro, areg geigouhw hom ingma emen dau Nasared ginero. Doba Pilipus enara ehin mougtai en, endagai: Ban bemenara danggerobma. Doba banin bin naugb bideiya en se ban abiresahabi.

⁴⁷Sug Yesus eiya Nataniel edagunyohob, kaba, en eigdoumesa en moho deseino len gus, endagai: Yen yeiya sud hom gen gaben. Eni edag sud hom dau leng Israel gedag beim namcir. Anai en aimo maman gaben augwan dag misenohob. Dangga hang, men geicara augwan, kaba, dag en emarerei lusud meriresi touwero.

⁴⁸Sug Nataniel ouman Yesus mer dag ginohob, kaba, en eijidougwo en, endagai: Gareng edecic indan geicara dou ban, hang ban bemecinaga gina? Doba Yesus auni dou en, endagai: Sug Pilipus emedebeij banbuma, doba dan deiya ban sug ban beigtou se sogo ara meiyohob.

⁴⁹Sug Nataniel en ouman Yesus mer dag gin deitohob, kaba, en ousa deisa Yesus mer an, endagai: Adehsud, ban beiya dan dag ginohob, kaba, gini ansins dag ban bedag Allah Meisi mohora hom dag misenohob. Dara ban bedag mamang Israel maman mougt mera medam touohob.

⁵⁰Doba Yesus enara bauni ucugb dou en, endagai: Ban abdoc ebdebin an dan ogdoc sug dan den dou ban dag dan deiya ban se sogo ara meiyo graga dousei? Doba hom gin dousero. Anai cum, kaba, dan demens aremer einyana edreg dau gin dou ban deit.

⁵¹Sug Yesus os dangga dou Nataniel dauwohob, kaba, en os dou men logodeh laugwan ucan deit, endagai: Yen youman dan indir gin deigeigouhwahabi. Anai cum, kaba, yen yemeiya misis se bogo emec dau Allah men malaikadir lemeisaugb lemouwada naugb len lemesedougwo Lusud Maraguna Mebin dans. Augwan gini asesa dag misen namcir.