Read Manikion YOHANES 10 Bible Online

YOHANES 10 - Manikion bible

YOHANES 10

¹Sug Yesus enara dou leng Yahudi meren mougtir dag graga dauwohob, kaba, en eic gainyenara hom eisaugb gembala dara men domba ucan dou len deit. Hanoba en enara dou len, endagai: Yen youman dan indir an areg dan den dou yen gin deigeigouhwahabi. Gareg en emeinesa misis aud dombaro, doba en aiga uro mes aud len, kaba, en edag sud hom geiyohora dara gesma dous.

²Doba gareg en einesa misis mandeij aud domba, kaba, en eng meren gembala misen ginohob. Augwan gini asesa dag misen namcir.

³Dangga hang, sud hom gesedougwo misis, kaba, en emoung misis dougwo en touwero, doba en ec misis dau en. Anai en ecinaga eni gembala misenohob. Dara sug en eb men domber meroho astesda len laugwan, kaba, len louman en mer. Hanoba en ahwan len dig medigo toua.

⁴Sug en ahwan len dig medigohob, kaba, en einoisa len. Hanoba len toua loucan en, anai len lecinaga en mer dag misenohob.

⁵Doba sug sud hom gus, kaba, len lemoucan enero. Doba len lougbdedau en namcir. Anai len lemecinaga en mer asesa ginero.

⁶Doba areg Yesus eic bainyen dou len gini, kaba, len meru emobgesa mougwa hom touwero.

⁷Sug len meru emobgesa gainyenara gragero, kaba, Yesus ens meijouhw dau gin ucan dou len deit, endagai: Yen youman dan indir gin deigeigouhw deitahabi. Danin dous eng dedag misis naugb domber.

⁸Dangga gembala areg len leino dan indin sug nosa, kaba, domber len lemouman len merir touwero. Anai len laugwan ledag leng leiyohora dara leng lesma aremougb dou domba len dous.

⁹Dan dedag misis. Gareg en einesa uro mes ogdoc dan, kaba, sesar men gogom emeb naugb en toua deitero. Doba dan deigdoc en dau gogom augwan toua namcir. Dara dan deic ared edeinyum dou en, anai en einesa. Hanoba en agunya ucucugb naugb gin toua namcir.

¹⁰Doba sud hom gedig en ouwan eiyohora lusud meren aremougb, kaba, en en aud len naugb en esma meren ara ara dau len dous. Hanoba en eic gomom, dara en eic mor mor dou len toua. Doba dan, kaba, dan den aud yen naugb dan demeic maireseb menau geb huhugb dou yen dousero. Doba dan deic maireseb gini batij bobdaga dou yen toua terimda.

¹¹Dan dedag domber meren Gembala Misen gini. Anai dan demesedougwo dan indina agau ginero. Doba dan dohw dan indugt edug naugb len terimda.

¹²Doba sud hom gedig lusud lohw momsi dou en dous, kaba, en emesa naugb emebehnehino domber ginero. Doba sug en eiya mihiloro mog mog en agunyen, kaba, en arges maga bougbdedau len namcir. Anai en emedag meren gembala misen dara en moho aiga len touwero. Dangga hang, sug mihiloro en einesa uro mes debin domber ginohob, kaba, en au len. Dara en eic dag len lougb laisoboro dau uro mes gin toua namcir.

¹³

¹⁴Doba dan, kaba, dan dedag gembala misen naugb domber ginohob. Hang dan decinaga areg geb se len merdoc mes. Dara len lecinaga areg geb se dan indoc mes augwan. Aninim dag dan Indina ecinaga areg geb se dan indoc mes. Hanoba dan decinaga areg geb se en medoc mes augwan toua. Dangga hang, dan demougbdedau indan domber gin touwero. Doba dan dohw dan indugt edug naugb len namcir.

¹⁵

¹⁶Dara indan domber gus gedig len lemeinesa uro mes ginbuma, kaba, len toua merugwengga. Dangga hang, dan Indina en arougb dan naugb dan dedehilon lenahabi, dan dedahwan len se uro mes gini. Dauntoba len laugwan dag hom dara meren gembala hom gin toua. Dara len gin, kaba, len lemohoiya dan indir touwero. Doba len laimo dan an areg dan darougb len an gin toua terimda.

¹⁷Sug dan dohw dan indugt edug aud gomom naugb indan domber dag gini, kaba, dan Indina medoc gororougb dan toua terimda. Hanoba en emeic dan indireseb ucugb dou dan toues.

¹⁸Dangga sud hom ingma, kaba, men goubesa naugb sug en eic gomom dou dan touwero. Doba dan daimo ucina gomom dau danin indoc mes aud gin dous. Anai indan goubesa inggebga naugb sug dan deic gomom dou danin. Dara indan goubesa inggebga naugb sug dan deic maireseb dou danin ucugb toua. Augwan gini aimo dau areg dan Indina enin eng ogod deinaugb dan deb sug nosa touohob.

¹⁹Sug lusud louman Yesus mer an gin, kaba, len lenara laisedim eisaugb areg Yesus en dou len gin deit.

²⁰Leinyana, kaba, len len dougwo leng gus, lendagai: Dagiro, naugwe hang, yen youman sud hom en mer gina? Anai merna mog mog einesa en medoc mes, hang merei emeba en naugb en emenara aibibra dag gini toua.

²¹Doba ligbum loto len gin merir, lendagai: Sud hom merna mog mog einesa en medoc mesohob, kaba, en emenara dag ginero. Dara mena mog mog men goubesa inggebga naugb sug en esga leng meriresmougb toua dag ginei? Naro, mena mog mog men goubesa emedeinyum naugb gin touwero.

²²Lona hom deit, kaba, Yesus en esebesa se lomod geb acec Allah Men Tuari se cinogo Yerusalem, moho Solaiman. Anai leng Yahudi len loucimdeb se cinogo ingga naugb len merna eiseisan len merjemouwer sug len leigdoumesa Allah Men Tuari dag ecabeci ucugb. Anai leng Siria, kaba, leic gogor dou Allah Men Tuari gin sug nosohob. Doba lona naugb sug len lougwan ared debin len merjemouwer meren geicara gin, kaba, igda goho dugurij namcirohob.

²³

²⁴Dangga sug Yesus esebesa se lomod ingga, kaba, leng Yahudi len len naugb louwa debin en sungga deit. Hanoba len leijidougwo en, lendagai: Ban beigtou se lona hosa deitahabi, hang ban bemens areg se misen dou emena? Anai sug ban bedag Sud Hom Geigdoc Emen Dau Emen Gogom Augwan dag misenohob, kaba, ban bens dou emen iteitogini. Dauntoba emen emeija emuwesa ban deitero.

²⁵Doba Yesus enara dougwo len merir, bendagai: Dan dos dadi danin dag Sud Hom Geigdoc Yen Dau Meijen Gogom augwan mougwa einyana deseino yenohob. Anai ganusbus areg dan daben deseino yen ogdoc dan Indina men goubesa, kaba, auma debin gin dou yenohob. Doba yen meigdoc emebdebin an dan indir an ginero.

²⁶Anai yen, kaba, yen yemedag indan domba misenero. Hang yen meigdoc aihagab gin toua namcir.

²⁷Anai indan domber misen, kaba, len merdoc emaihagab dan indirero. Doba len louman dan indir naugb len laimo dan terimda. Dara dan decinaga len toua.

²⁸Hang len lemomom toua deitero, doba dan deic maireseb menau geb huhugb dou len terimda. Dara sud hom ingma, kaba, en emesma len dau dan insira mes touwero.

²⁹Anai dan Indina gedig en eic len dou danohob, kaba, men goubesa edreg dau augwan namcir. Hang sud hom en emesma len dau en mesira mes touwero, doba en esedougwo len beb huhugb terimda.

³⁰Anai dan Indina aman amahwas dag hom naugb augwan gin touohob.

³¹Sug leng Yahudi louman Yesus mer an gin, kaba, len louwan leic igdahab naugb led en toua deit.

³²Doba Yesus eijidougwo len, endagai: Dan dens dau indan geicara geigouhw areg dan Indina mer ogod an deb sug nosa einyana dou yenohob. Dangga se indan geicara geigouhw augwan gin, kaba, ogdoc aremer ara, hang yen meigdoc emehin naugb yen yemed dan icira gina?

³³Doba leng Yahudi launi ucugb dou en, lendagai: Ogdoc aban geicara geigouhw augwan gin, kaba, emen ememed ban icirero. Doba ogdoc sug ban beic Allah moho bacecim, hang emen ememed ban icira gini. Anai ban, kaba, lusud misen dous. Doba ban beigdoumesa banin aboho dag Allah toua.

³⁴Doba Yesus enara bauwun len merir an gin deit, endagai: Allah enara se meijen gomnomna sug nosohob, endagai: Yen meijoho toua, dag dan indoho Allah gin touohob. Gini misenei? You, gini misenohob.

³⁵Dara maman macinaga dag areg len log se Surad Injil Meb Mohon deb ginohob, kaba, hom emouwedoc touwero, doba augwan ebsugeb beb huhugb namcir. Dangga sug Allah eija len dag Allah gin touohob, kaba, dagiro, naugwe hang, yen yowun dan indoho dag dan deic Allah en moho dacecim sug dan deigdoumesa dan indoho dag en Meisi gina? Anai len, kaba, Allah esa en mer dou len dous. Doba eisaugb danin, kaba, dan Indina enin eng ouci dan. Hang en emesa dan aud lusud se cinogo gini naugb dan desai en mer dou len toua.

³⁶

³⁷Dangga sug yen yeiya, doba dan demeicara demaimo areg dan Indina arougb dan an gini asesero, kaba, eigouhw naugb yen yemod meijina debsa dan an touwero.

³⁸Doba sug dan deicara daimo augwan gini dag misen namcirohob, kaba, eigouhw naugb yen yod meijina debsa dan ogdoc indan geicara gin toua terimda. Dauntoba yen yemeija meijuwesa dan deitero. Doba dau iteitogin, kaba, yen yecinaga se misen dag dan Indina aman amahwas amdoc anim dag hom namcirohob. Dan dacgeij dau yen dangga, anai yen yemouwan naugb yen meigdoc ebdebin an dan ogdoc areg dan desai dou yen gin touwero. Doba yen meigdoc oududa dan an gin terimda.

³⁹Sug leng Yahudi louman Yesus mer an gin deit, kaba, len louwan lagaigeij en. Doba en arges maga bec dau len namcir.

⁴⁰Sug Yesus arges maga beihwedau lenohob, kaba, en emeigtou sungga deitero. Doba en eihwedig duhu Yordan mebera nagama deit, aud usi sug Yohanes en ogun lusud se duhu sug nosa. Sug en edebeij us ginohob, kaba, en eigtou sungga toua.

⁴¹Doba lusud leinyana, kaba, len ledebeij en sungga toua deit. Dangga sug len lehigdecin en an men geicara dag ganusbus gini, kaba, len lenara doum, lendagai: Yohanes, kaba, en emens ganusbus ingma dag gin dou mamanero. Doba areg en os badi sud hom gin an men geicara dou maman sug nosa, kaba, augwan gini asesa dag misen namcirohob.

⁴²Hang lusud leinyana dau len ingga, kaba, len lod merna debsa Yesus toua terimda.