Read Manikion YOHANES 12 Bible Online

YOHANES 12 - Manikion bible

YOHANES 12

¹Sug lona senggem debin Lona Gohw Bedreg ginohob, kaba, Yesus en toua eisaugb dau cinogo Epraim dig cinogo Betania geb deinyor Yerusalem nosahabi. Anai cinogo gin, kaba, sud hom moho Lasarus gedig Yesus eigdoumesa en dau gomom nosohob, men cinogo ingga.

²Sug en edebeij Betania ginohob, kaba, len sungga lougwan ared dou en an men logodeh toua. Dara Marta en toua ousa len sungga naugb ohw ared an len toua. Doba Lasarus, kaba, en eigtou desij len gus se boromei naugb letara desij Yesus dous.

³Sug len letara, kaba, Mariam en edeic ampo taitaij hom an aremoung mohu men ouwedebeda. Men ouwedebeda gin, kaba, mera eisaugb namcir, anai len lemeic aremoung mohu gus lemed se touwero, doba len leic enin mohu mogud dous. Mohu gin, kaba, len lesinsin dau sogo mom gedig men ouwedebeda gini. Dangga sug en edebeij Yesusohob, kaba, en eir aremoung mohu men ouwedebeda gini se en mohora. Hanoba en eic enin mougt modi baihin aremoung mohu gin se Yesus mohora toua. Hang men gouwedebeda gin, kaba, ecinten se tu mes ingga augwan namcir.

⁴Doba sud hom dau Yesus men logodeh, en moho Yudas dau cinogo Keriod, sug en eiya dau gini, kaba, en enara debin Mariam, endagai:

⁵Ban beicara dag gin, anara? Eigouhw naugb maman maic mauma aregoufu, hanoba maman maohw an leng merunggwereij dousa? Anai mani men ouwadebeda gin, kaba, mera eisaugb namcir dag len leic aregoufu perag mogo huntun homoiyahabi, len lemauma gina?

⁶Yudas en enara dag gini anai en medoc emerij an leng merunggwereij dag misenero. Doba en en len meroho baiyeiyo dougwo dous. Dauntoba sug len leic aregoufu dou len, kaba, en esedi ingma naugb enin. Anai en eng oho i moto an meren aregoufu augwan toua. Dara eni sud hom gedig en ehin magan Yesus dou leng Yahudi meren mougtir gini.

⁷Doba sug Yesus ouman Yudas mer an gin, kaba, en en dougwo en, endagai: Ban bemen dougwo en danggero. Anai leng merunggwereij, kaba, len merugwengga desij yen terimda. Doba dan, kaba, dan demeigtou desij yen deitero. Anai lona hosa deit, kaba, dan domom dau yenohob. Dangga hang, men geicara gin, kaba, naugb lona sug len ledec dan dag gini touohob.

⁸

⁹Sug leng Yahudi louman, doba Yesus en edebeij se Betaniohob, kaba, len toua leihweda sungga naugb ledeiya eni. Dara len lemeihweda sungga naugb lemedeiya Yesus hom dousero. Doba len leihweda se Betania gini naugb ledeiya Lasarus toua. Anai len louman dag Yesus eigdoumesa eni dau gomom sug nosohob.

¹⁰Dangga sug gembala gesa taij meren mougtir len leiya, doba Lasarus en maireseb ucugwohob, kaba, len lohw merdocedoum naugb len lemeic gomom dou Yesus dousero. Doba len lohw merdocedoum naugb len leic gomom dou Lasarus en toua.

¹¹Anai lusud leinyana sug len leiya dau Lasarus dag Yesus eigdoumesa en dau gomom ucugwohob, kaba, len louwa dau mougtir gin namcir. Hanoba len merdoc ebdebin an Yesus dous.

¹²Doba leng areg len lesa lauweila Yesus sug en eija Lasarus en en dau igdohos mes naugb maireseb deitohob, kaba, len ledecic dau gin dou leng louwa debin Lona Gohw Bedreg se cinogo Yerusalem len laugwan toua. Dangga se loneinda sug len louman, doba Yesus en toua en en aud cinogo Yerusalem engga, kaba, len leinyana len logod duleg meh. Hanoba len leihwedan naugb len ledagasa en se ucina mogumsi. Anai sug len louman dau men ganusbus dag ginohob, kaba, len merdoc erleij naugb len ledeiya en toua. Dangga sug len lec merohora aud en dag gini, kaba, len lagahugouhw an Allah, lendagai: Allah, emen emen sijo dou ban eisaugb sud hom gini. Dangga hang, ban beic geigouhw dou en terimda. Anai en en se Adehsud, ban aboho, naugb en eperwei ban abuhw, dauntoba en edag mougt mera medam naugb emeng Israel deit. Doba sug leng Parisi len leiya dau gin, kaba, len lomi an doum, lendagai: Maman mameba dagiro deita? Anai lusud se cinogo gin augwan len louwa audi en dau mamandohob gina? <pb/(...)

²⁰Se lona sug leng Yahudi louwa debin Lona Gohw Bedreg se Yerusalem, kaba, merug hosa dau leng Grika len toua merugwengga desij len naugb len lesijaresa Allah toua.

²¹Dangga len ledebeij sud hom dau Yesus men logodeh, moho Pilipus, dau cinogo Bedsaida se leng Galilea meren hancob. Sug len ledebeij enohob, kaba, len lacgeij dau en, lendagai: Emen toua emouwan naugb emdeiya Yesusahabi.

²²Sug Pilipus ouman len merir an ginohob, kaba, en eihwedaud mesi hom, moho Andreas. Hanoba en eden aremer gin dou en, kaba, lan lahwas laihweda naugb ledecic aremer gin dou Yesus toua.

²³Doba Yesus auni dou len ucugb, endagai: Yan yamenara dou danlo. Anai lona naugb sug Allah eigdoumesa Lusud Meraguna Mebin dan indoho ainyes deseino lusud laugwan, kaba, ebeij deinyorohob.

²⁴Anai tramdad mogo hom, doba lusud lemeba se gos habero, kaba, mogo hom smougb mougb, dangga dous. Doba sug len leba mogo hom gin se gos, hanoba en etaha, kaba, era mera einyana toua. Yen youman dan indir gin deigeigouhwahabi, anai augwan gini asesa dag misen namcir.

²⁵Dangga gareg dau yen en ebehnehino enin maga dougwo sug omom, kaba, cum, en mena toua ediyebeiya dau en namcir. Doba gareg dau yen, en eic enin maga baseslo se cinogo gini, kaba, en emdesma mena maireseb menau geb huhugb namcir toua.

²⁶Dara gareg dau yen en ouwan aimo dan, kaba, en emaimo enin men ucina deitero. Doba esloulougb naugb indan sogougb gin, kaba, en esogwa deisa dan induhw asa ucina gedig dan daimo gin terimda toua. Dauntoba sugiro dan indugwengga, kaba, en toua moongga desij dan sungga toua. Dara gareg en eicara baimo dan asa ucina gini terimda, kaba, dan Indina emeigdoumesa en moho agas an gin toues.

²⁷Sug Yesus esulou len laugwan dag graga dauwohob, kaba, en ens dau en omom mougwa hom dara dou len deit, endagai: Lona naugb sug lusud leic dan indug erij aud gomom dou dan, kaba, edagasa namcirohob. Dangga dan indoc eijesa medam an gin toua. Hang dan demacgeij ara ara dau dan Indina ena? Dan dacgeij dag en eigdoc dan dau ucina mog erij gindei? Naro, dan demeicara danggero. Doba dan daimo ucina gin terimda edebeij sug ouwedocahabi. Anai dan Indina enin eng esa dan sugini naugb dan daimo ucina aud gomom ginohob.

²⁸Sug Yesus enara dau sug en omom dag graga dou len bouwohob, kaba, en ocuncum dou en Mena ucan deit, endagai: Akeinya, ban bens banin aboho ainyes deseino len ginahabi, dag ban aboho gini agas medam namcirohob. Sug Yesus enara dag gin ineg dou en Menohob, kaba, en Mena auni dau bogaden dou en ucugb deit, endagai: Dan dens dau danin indoho dag agas medam ainyes dou len sug nosohob. Dara dan demens danin indoho ainyes dag gini dou len deit toues.

²⁹Sug leng lesa desij Yesus len louman mer gin, kaba, ligbum len lenara, lendagai: Yen youman bagar mougb engga. Doba ligbum, kaba, len loto merir, lendagai: Bagar mougb, isnaro, doba malaikad hom enara dou en.

³⁰Doba Yesus enara dou len, endagai: Mer dau bogo gin, kaba, naugb dan, isnaro. Doba naugb yen dous.

³¹Anai lona naugb sug Allah ogod aremer gogom deinaugb lusud se cinogo gini, dara sug en owun meren mougt mera medam, moho Bilis, bobsara dau len toua, kaba, edagasa namcirohob.

³²Dangga sug lusud leigdoumesa dan taiba ainyes se cinogo ginohob, kaba, dan debin lusud se cinogo augwan naugb len louwa aud dan toua.

³³Sug Yesus enara dag graga, kaba, en ens dau ucina areg lusud laimo an en naugb sug len leic gomom dou en dou len toua.

³⁴Doba lusud graga, kaba, len lenara dougwo en mer an gin, lendagai: Maman gomnomna enara deb, bendagai: Sug Sud Hom Geigdoc Emen Dau Emen Gogom Augwan en enohob, kaba, en emomom dau emen deitero. Doba en esan emen beb huhugb namcir. Dangga dagiro ban ben dou emen dau sug Lusud Meraguna Mebin en enohob, kaba, dag lusud leigdoumesa en beb ainyes se cinogo gini naugb en omom toua deita? Lusud Meraguna Mebin gin, kaba, eni garena?

³⁵Doba Yesus auni dou len, endagai: Iteitogini, kaba, mouf inggebga naugb aisema yenaba. Dangga yen yec meijohora se ucina gin dedemeda sug mouf ebaba, dauntoba loba emogod dougwo yenero. Anai gareg en ainyen naugb ec mohora se loba gin, kaba, en emecinaga ucina touwero.

³⁶Dangga hang, yen yemesbes an mouf gini touwero. Doba sug en moongga desij yen gin, kaba, yen yod meijina debsa en terimda. Dauntoba yen yemedag lobeigbogo men logodeh deitero, doba yen yedag mouf men logodeh dous. Sug Yesus enara dag graga dou len bouwohob, kaba, en emens enin dou len deitero. Doba en en oud enin maga dau len namcir. Anai en aben ganusbus einyana abeba len meriresi ginohob. Doba len merdoc emebdebin an en dag en eng Sud Hom Geigdoc Len Dau Sesar Men Gogom Augwan gin touwero. Doba len lou duata en namcir.

³⁷

³⁸Augwan gini aimo asesa dau areg sud hom gesai Allah moro sug nosa, en moho Yesaya, en omi an dou Allah sug nosa touohob, endagai: Adehsud, emen emesai ban aburo dou len terimdohob. Doba gareg en emod mena debsa gina? Dara aban goubesa mougb, kaba, ban bemens dou gara en deita? Anai, lingmaro.

³⁹Dangga hang, sug leng Yahudi graga leicara dag gini an Yesus toua terimdohob, kaba, Allah eic len meriresmougb dara len merdoc agadgeij dougwo Yesus en mer dou len toua. Hang emedeinyum naugb sug len merdoc ebdebin an en touwero. Doba len lotogoto en mer gin namcir. Augwan gini aimo dau areg maman Adehsud Allah en enara deb dou Yesaya gin sug nosa touohob, endagai:

⁴⁰Len lemod merna debsa dan indir ginero, kaba, dan deic dag len meriresmougb dougwo dan namcir. Dauntoba sug len leiya, doba len lemecinaga meijouhw asesero. Dara dan deic len merdoc agadgeij dougwo dan dou len toua. Dauntoba sug len lecinaga, doba len meru emobgesero. Anai dan demouwan naugb sug len lecicugb aud dan, dauntoba dan deic geigouhw dou lenlo.

⁴¹Doba areg Yesaya en ens gin, kaba, en emens eisaugb men lusud se lona ingga dousero. Doba en og augwan gini eisaugb Yesus sug Allah eigdoumesa en moho agas medam se lona daiyamo gacin toua. Anai en eiya augwan gin deb sug nosohob.

⁴²Dangga hang, edag mougtir, kaba, len leinyana lohoiya en mer namcir. Doba leinyana dau len, kaba, len merdoc ebdebin an Yesus touohob. Doba len ledu meruwedau lenin dous, anai len lemouwan naugb sug leng Parisi lemerba len dau meren goucimdebero. Hang len lemos lemadi Yesus moho deseino lusud touwero.

⁴³Anai len louwan naugb lusud se cinogo gini leigdoumesa len meroho dous. Doba Allah, kaba, inggaida.

⁴⁴Sug Yesus esulou lusud naugb len merdoc ebdebin an mouf dag graga bouwohob, kaba, en enara se mer medam debin gin dou len deit, endagai: Gareg dau yen, en od mena debsa dan indir an areg dan desai dou yen gin, kaba, en emod mena debsa dan dousero. Doba en od mena debsa sud hom gedig en esa dan aud yen gin touohob.

⁴⁵Dangga toua, gareg dau yen en eiya dau indan geicara, kaba, en medoc eica sud hom gesa dan aud yen men geicara gini touohob.

⁴⁶Anai dan douwaden dau bogo dag mouf se cinogo gini. Dauntoba gareg en medoc ebdebin an areg dan desai dou en gini, kaba, en emeigtou se lobeigbogo deitero. Doba en ecinaga areg se geica men meijouhw augwan asesa namcir toua.

⁴⁷Gareg dau yen en ouman dau areg dan desai dou yen gini, doba en emaimoro, kaba, dan demasij gogom debin en touwero. Doba ara ara gus inggebga naugb sug ogod gogom deinaugb en. Ara ara gin, kaba, dag areg dan desai dou enohob. Dangga gareg en otogoto dan, hanoba en emebin dan indir an areg dan desai dou en touwero, kaba, dan indir gini emogod gogom deinaugb en se Lona Gouwedoc gin toues. Anai dan, kaba, dan demouwaden dau bogo naugb dogod gogom debin lusudero. Doba dan douwaden dau bogo naugb dan deigdoc len dau meren gogom augwan dous.

⁴⁸

⁴⁹Augwan gini misen namcir. Anai areg dan desai dou yen gin, kaba, dan demeic dau danin indoc mes dou yenero. Doba dan Indina gedig en esa dan aud yen gin, kaba, enin eng ens dau areg dan denara dou yen augwan dou danohob. Hanoba en arougb dan naugb dan desai dou yen toua.

⁵⁰Dara dan decinaga dau areg en mer ogod an dou dan naugb dan desai dou yen gin, kaba, eic maireseb menau geb huhugb dou yen toua. Dangga areg dan desai dou yen gin, kaba, dan demeic dau danin indoc mesero. Doba dan daimo dau areg dan Indina en mer ogod an deb naugb danohob dous.