Read Manikion YOHANES 14 Bible Online

YOHANES 14 - Manikion bible

YOHANES 14

¹Sug Yesus esulou men logodeh dag graga bouwohob, kaba, en enara bad len merdoc mes ucan gin deit, endagai: Yen meigdoc emeijesa ucan danlo. Doba yen yod meijina debsa dan an areg dan den dou yen terimda. Aninim dag yen yod meijina debsa Allah sug nosa touohob.

²Anai se dan Indina men tu, kaba, dimei einyana inggebga. Dangga dan deihwedaud en naugb dan desedeb areg geb se dimei gini augwan naugb yen toua. Gini misenero, kaba, dan demen dau gin dou yen touwero. Doba misen namcir.

³Dara dan demeihwededau yen terimda touwero. Doba sug dan desedeb ara ara se dimei naugb yen debohob, kaba, dan demecicugb aud yen deits. Hanoba dan dedahwan yen aud indan dimei graga. Dauntoba sugiro dan indugwengga, kaba, yen toua meijugwengga desij dan terimda.

⁴Dara dan Indina men tu gedig dan deihwedaud gin, kaba, yen yecinaga ucina aud gin touohob.

⁵Doba Tomas en eijidougwo ucina gini bagod dougwo Yesus mer an, endagai. Adehsud, emen ememecinaga ucina sug ban beraga aud dimei ginbuma. Dagiro, naugwe hang, emen emeraga ucina aud dimei gina?

⁶Dangga Yesus enara dou en, endagai: Danin dous eng sud hom gedig en ens areg asesa Allah enin medoc mes augwan dag misen dou lusud. Dara danin dous eng sud hom gedig en eic maireseb menau geb huhugb dou lusud toua. Dangga gareg en emeraga danin dag ucina ginero, kaba, en emedebeij dan Indina se bogo touwero. Doba en eigtou dig medigo dau gin beb huhugb namcir.

⁷Sug Yesus ens enin dag gini dou Tomasohob, kaba, en enara dou men logodeh laugwan deit, endagai: Doba yen gin, kaba, yen yeiya dara yen yecinaga areg geb se dan Indina enin medoc mes augwan dag misen namcir. Anai yen yecinaga dan touohob. Dangga hang, dau iteitogini, kaba, yen yeiya en dara yen yecinaga en toua terimda.

⁸Doba sud hom dau Yesus men logodeh, moho Pilipus, en medoc emobgesa Yesus mer an ginbuma. Hanoba en acgeij Yesus, endagai: Adehsud, ban bens ban Abina gin dou emenahabi, dauntoba emen emeiya en dara emen emiresi. Anai gini edeinyum naugb emenohob.

⁹Doba Yesus auni en mer an gini, endagai: Dan deigtou desij yen yaugwan igda einyanohob. Doba ban bemecinaga areg asesa danin indoc mes augwan dag misen touebma, anara? Anai gareg en ecinaga areg asesa danin indoc mes augwan dag misenohob, kaba, en ecinaga areg asesa dan Indina enin medoc mes augwan dag misen touohob. Dangga dagiro, naugwe hang, Pilipus, ban benara dou dan dag dan dens dan Indina ainyes dou yena?

¹⁰Ban abdoc emebdebin an dag dan Indina aman amahwas amedag hom gineroei? Era ara? Anai areg dan desai dou yen gin, kaba, dan demeic ara moho hom dau danin indoc mes dou yen touwero. Doba dan Indina enin eng ens dau geicara augwan dou dan, hang dan demaimo toua. Anai eni moongga dara dan terimda.

¹¹Dangga sug dan denara dou yen dag dan Indina aman amahwas amdoc dag hom naugb augwanohob, kaba, yen meigdoc ebdebin dan an dan indir gin toua terimda. Anai augwan misen namcir. Dobnaro, kaba, yen meigdoc ebdebin an areg dan den dou yen gini ogdoc indan ganusbus dou yen dous.

¹²Dangga gareg dau yen en medoc ebdebin an dan, kaba, men geicara augwan aninim dag indan geicara augwan gin toua. Dara gin dousero, doba men geicara einyana edreg dau gin deit. Anai dan demeihwedaud dan Indina se bogo naugb gin toues. Yen youman dan indir an areg dan den dou yen gini deigeigouhw. Anai augwan gini asesa dag misen namcir.

¹³Dangga areg yen yacgeij se dan indoho dau dan Indina se lona ingga, kaba, dan demeic dou yens. Dauntoba dan deigdoumesa dan Indina en moho agas medam icira gin deseino yen namcir.

¹⁴Hang areg yen yacgeij se dan indoho dau en, kaba, dan demeic dou yen toues. Anai yen yedag indan logodehohob.

¹⁵Sug Yesus enara dag graga dou men logodeh bouwohob, kaba, en esulou len deit, endagai: Sug yen meigdoc gororougb dan dag misen, kaba, yen yemohoiya dan indir an areg dan darougb yen an touwero, doba yen yeicara yaimo augwan gin toua terimda.

¹⁶Dara sug yen yaimo dan indir dag gin, kaba, dan dacgeij dan Indina naugb en esa sud hom gus dou yen. Dauntoba en eperwei dan induhw naugb en ousa yen se aremer graga augwan toua terimda. Anai en emamsoho yen debero, doba en eigtou desij yen beb huhugb namcir.

¹⁷En, kaba, Mena Gogoufu gedig Allah emesa en aud yens, hang en ens areg asesa Allah enin medoc mes augwan dag misen dou yen toues. Doba lusud gedig Bilis oiharaga len se cinogo gin, kaba, emedeinyum naugb Mena Gogoufu gini einesa len merdoc mes ginero. Anai len lemeiya dau en dara len lemecinaga areg geb se en medoc mes augwan asesa touebma. Doba yen, kaba, cum, yen yecinaga areg geb se enin medoc mes augwan asesa terimda. Anai sug en enohob, kaba, en emamsoho yen debero. Doba en eigtou desij yen se yen meigdoc mes beb huhugb namcir.

¹⁸Sug Yesus enara eisaugb Mena Gogoufu gini dou men logodeh dauwohob, kaba, en enara ad len merdoc mes ucan deit, endagai: Lona hom debin gin, kaba, lusud gedig Bilis oiharaga len se cinogo gini len lemeiya dan deitero. Anai dan domom dau lenohob. Doba yen, kaba, yen yemeiya dan deits. Anai sug dan deisa dau gomom ucugwohob, kaba, dan demens danin ainyes dou yen naugb dan demeic maireseb menau geb huhugb dou yens. Aninim dag dan deisa dau gomom aud maireseb menau geb huhugb se lona ingga touohob. Dangga hang, sug dan dededau yen, kaba, dan demamsoho yen dag adougwen deb touwero. Doba cum, kaba, dan demecicugb aud yen deits.

¹⁹

²⁰Dara se lona ingga, kaba, yen yemeija meijuwesa dan toua deitero. Doba sug yen yeiya dan deisa dau gomom ucugb dag ginohob, kaba, yen yecinaga dag dan Indina aman amdoc dag hom. Aninim dag yen meigdoc dag hom dara dan, dara dan indoc dag hom dara yen touohob.

²¹Gareg dau yen en ebin areg dan darougb yen an ginohob, hanoba en eicara baimo toua, kaba, enin eng sud hom gedig en medoc gororougb dan dag misen namcir. Dara gareg en medoc gororougb danohob, kaba, dan Indina aman amdoc gororougb en. Hanoba dan demens dau areg geb se danin indoc mes augwan asesa dou en toues.

²²Doba sud hom dau Yesus men logodeh, moho Yudas, sug en ouman dag Yesus ens enin ainyes dou len dous, kaba, en eija mouwesa gin namcir. Dangga, kaba, en eijidougwo Yesus an gini, endagai: Adehsud, sug ban bens dau aban gogouf cucugb ainyes dou emen, kaba, emen dous eng emeiya dau gin se lona inggei? Doba dagiro, naugwe hang, len gedig Bilis oiharaga len se cinogo gini len lemeiya dau ginero, anara? Anai len toua merugwengga desij emen gina? (Yudas geijidougwo Yesus an gin, kaba, eni Yudas dau cinogo Keriod, isnaro. Doba en Yudas dau len gus dous.)

²³Doba Yesus auni dou en deit, endagai: Gareg en medoc gororougb dan, kaba, en emohoiya dan indir an areg dan desai dou yen touwero. Doba en eicara baimo gin terimda. Dara gareg en aimo areg dan dens dou enohob, kaba, dan Indina medoc gororougb en toua. Dara aman amen aud en naugb aman amaigtou desij en se en medoc mes gin toua namcir.

²⁴Doba gareg en medoc gororougb danero, kaba, en emeicara emaimo dan indir an areg dan den dou yen gin touwero. Dara areg dan den dou yen gin, kaba, dan demen dau danin indoc mes dou yenero. Doba en dau dan Indina gedig en esa dan aud yenohob en dous.

²⁵Dan dens dau areg graga augwan dou yen sug dan indugwengga dara yenaba.

²⁶Doba sug Mena Gogoufu enohob, kaba, en ens dau areg dan den dou yen gin augwan asesa dou yen. Dara en edidib aremeijouhw debin gin dou yen toua. Anai cum, kaba, dan Indina emesa en aud yen naugb en eperwei dan induhw, dauntoba en emousa yen se aremer augwan deits.

²⁷Doba sug dan demeihwededau yen dag ginbuma, kaba, dan douwan deic medoc agadgeij dougwo augwan dou yen toua. Dara medoc gebtou gini, kaba, susugb dau len gedig Bilis oiharaga len se cinogo gini len leic dou yen. Doba aimo dag danin toua indoc agadgeij dougwo augwan gin touohob. Dangga hang, yen meigdoc momogo dau sug dan deihwededau yenero. Dara yen meigdoc emeijesa dara yemahau dau augwan gin touwero, doba ebtou namcir.

²⁸Anai dan den dou yen dag dan demamsoho yen debero. Doba sug dan deihwededau yenohob, kaba, dan demecicugb aud yen toues. Dangga sug yen meigdoc gororougb dan dag misenohob, kaba, yen meigdoc momogo an dan sug dan deihwededau yen aud dan Indina touwero. Doba yen meigdoc agahugouhw an gin namcir. Anai dan Indina en moho agas bedreg dau danohob. Doba yen meigdoc gororougb dan dag misenbuma. Hang yen meigdoc emagahugouhw an dan sug dan deihwededau yen aud dan Indina touwero, doba yen meigdoc momogo namcir.

²⁹Dan dens dau augwan gini dou yen sug emedebeijbuma. Dauntoba sug acgunog, kaba, yen yemeija meijuwesa gin deitero. Doba yen yod meijina debsa dan an areg dan den dou yen gin dag misen namcir.

³⁰Dara dan denara dou yen dag gin deit, doba gurereito dous. Anai sud hom goiharaga lusud se cinogo gin, kaba, en en aud dan naugb en moho aiga dan. Dobnaro. En men goubesa emedeinyum naugb ginero.

³¹Doba dan douwan naugb lusud se cinogo gin, kaba, len lecinaga dag dan indoc gororougb dan Indina dag misen namcirohob. Hang dan demaimo en mer an areg en arougb dan an gin toua. Dangga eigouhw naugb maman maihwededau suginda.