Read Manikion YOHANES 15 Bible Online

YOHANES 15 - Manikion bible

YOHANES 15

¹Sug Yesus esulou men logodeh eisaugb aremer graga augwan dauwohob, kaba, en eic gainyenara hom ucan dou len deit, endagai: Danin eng dedag anggur maga misen hom dous. Dara dan Indina, kaba, en edag mougt naugb en esedougwo sogo gin toua.

²Dangga astesda mesira gemera merero, kaba, en eigteh dau. Doba astesda mesira gera mera, kaba, en aos meh dau becabeci namcir. Dauntoba era mera geigouhw edreg dau nosa deit.

³Doba yen gin, kaba, yen yecabeci ogdoc areg dan desai dou yenohob.

⁴Dangga hang, yen yemasid yenin dau dan touwero. Doba yen yedag hom dara dan namcir. Aninim dag dan demasid danin dau yen touwero, doba dan dag hom dara yen toua terimda. Anai sug yen yedag hom dara dan dag gini, kaba, yen yera mera geigouhw toua. Doba sug yen yasid yenin dau dan, kaba, yen yemera mera geigouhw deitero. Aninim dag sogo mesira sug eigteh dau maga, kaba, emera mera touwero. Doba sug mesira gini eb se maga, kaba, era mera geigouhw toua terimda.

⁵Dan dedag sogo maga, dara yen yedag mesira. Gareg dau yen en edag hom dara dan. Hanoba dan dedag hom dara en toua, kaba, enin eng era mera geigouhw einyana namcir. Anai yen yemera mera dau yeninero, doba ogdoc danin dous.

⁶Doba gareg dau yen en asid enin dau dan namcir, kaba, dan Indina erba en dau men lo gini, hanoba en agac namcir. Aninim dag lusud sug len lerba sogo mesira dig medigo, kaba, sogo mesira agac toua. Hanoba len louci mesira gin augwan debinim naugb len lec se smougb toua namcir.

⁷Doba sug yen meigdoc dag hom dara dan terimda, dara yen yebin areg dan desai dou yen gini se yen meigdoc mes toua, kaba, yen yacgeij dan Indina an areg yen youwan. Hanoba en emeic dou yen toues.

⁸Anai sug yen yera mera geigouhw einyana dag gini, kaba, yen yeigdoumesa dan Indina en moho deseino lusud. Dara yen yens yenin ainyes dou len dag yen yedag indan logodeh misen ginohob.

⁹Dan indoc gororougb yen aninim dag dan Indina medoc gorougb dan touohob. Dangga hang, yen yemobsara dau sug yen yaimo areg dan darougb yen an gin touwero. Doba yen yeicara dag gini terimda, dauntoba dan indoc gororougb yen toua namcir.

¹⁰Anai sug yen meigdoc edag beim an areg dan darougb yen an gini, kaba, dan demobsara dau sug dan indoc gororougb yen touwero. Doba dan deicara daimo dangga an yen namcir, aninim dag dan Indina emobsara dau sug en medoc gororougb dan touwero. Doba en eicara dangga toua terimda, anai dan daimo areg en arougb dan an ginohob augwan gin toua namcirohob. Doba sug yen yemaimo areg dan darougb yen an ginero, kaba, dan indoc gororougb yen toua deitero.

¹¹Dan dens dau areg graga augwan dou yen, dauntoba yen meigdoc momogo an ara hom touwero. Doba yen meigdoc agahugouhw an augwan mogud namcir. Aninim dag dan indoc momogo touwero, doba dan indoc agahugouhw an augwan touohob.

¹²Dara dan deic gomnomna hom ucan dou yen toua dag yen meigdoc gororougwim namcir, aninim dag dan indoc gororougb yenohob.

¹³Dara aremer gororougb edreg dau aremer gororougb gus augwan, kaba, dag sud hom eic en mougt edug aud gomom naugb en mesir gini. Anai aremer gus ingma emedreg dau sug en ohw en mougt edug naugb len ginero.

¹⁴Dangga hang, sug yen yaimo dan indir an areg dan desai dou yen gin namcir, kaba, gini ansins dag yen yedag dan insir misen touohob.

¹⁵Dara dan demeija yen dag sogougb toua deitero. Anai sogougb, kaba, en emecinaga dau men mougt mera men geicara meijouhw augwanero. Doba dau iteitogini, kaba, dan deija yen dag dan insir misen dous. Anai dan dens dau areg dan Indina en en dou dan meijouhw augwan asesa dou yenohob.

¹⁶Dara yen yemedag dan insir dau sug yen yenin youci dan touwero. Doba dan danin douci yen. Hanoba dan deigdoumesa yen meijoho naugb yen yera mera einyana toua. Dara mera gin, kaba, emetaha dau yen touwero, doba eb naugb yen beb huhugb namcir. Sug yen yera mera dag gin, kaba, yen yacgeij ara ara dau dan Indina, hang en emeic dou yen toues. Anai yen yedag dan insir ginohob.

¹⁷Dangga hang, areg dan darougb yen an gin, kaba, dag yen meigdoc gororougwim namcir.

¹⁸Sug Yesus enara dou men logodeh dag graga bouwohob, kaba, en esulou len ucan gin deit, endagai: Sug lusud gedig Bilis oiharaga len se cinogo gini len merdoc obgos an yen, kaba, yen meigdoc eiseisan dag len merdoc obgos an dan touohob.

¹⁹Anai sug yen meigdoc dag hom dara len, kaba, len merdoc mog mog an yenero. Doba len leigdoumesa yen meijoho dag meren lusud toua. Hanoba len merdoc gororougb yen toua namcir. Doba dan douci yen debinim dau len naugb danohob. Dangga hang, len merdoc gororougb yen toua deitero. Doba len merdoc mog mog an yen dous, anai yen meigdoc aninim dag len deit touwero.

²⁰Dara yen meigdoc moc dougwo areg dan denara dou yen sug nosa gin touwero. Doba yen yeiseisan terimda. Anai dan den dou yenohob dag sogougb, kaba, en moho emagas emedreg dau men mougt mera touwero, doba eb tainya namcir. Dangga hang, sug len leic mog erij dou dan sug nosa, kaba, len lemeic mog erij dou yen. Dara sug len laimo dan indir an areg dan desai dou len ginohob, kaba, len lemaimo yen meijir an areg yen yesai dou len toues.

²¹Dara gecgu areg len leic dou yen gin, kaba, len leicara dangga an yeni, anai yen meigdoc aninim dara len deitero. Doba yen meigdoc dag hom dara dan dau lenohob. Dara len lemecinaga sud hom gesa dan aud len en medoc mes asesa touwero.

²²Sug dan demen aud len naugb dan demesai dan Indina en moro dou lenero, kaba, sesar men gogom ingmemeb naugb len touwero. Doba iteitogin, kaba, dan desai dan Indina en moro augwan dag misen dou lenohob. Hang meren ara ara naugb sug len launun dougwo meren sesar, kaba, ingmemeb naugb len toua deitero.

²³Gareg en medoc obgos an dan, kaba, en medoc obgos an dan Indina gin touohob.

²⁴Dangga toua, sug dan demaben ganusbus einyana debin areg dan desai gin dou lenero, kaba, sesar men gogom emeb naugb len touwero. Doba iteitogin, kaba, len leiya augwan gini dag misenohob. Hang meren ara ara naugb sug len launun dougwo meren sesar, kaba, ingmemeb naugb len toua deitero. Anai areg dan daben deseino len, kaba, sud hom ingma en emaben touebma. Dobnaro. Len merdoc emobgos an dan dousero. Doba len merdoc obgos an dan Indina en touohob.

²⁵Doba meren geicara dou dan gin, kaba, augwan esogwa deisa areg mougt mera medam, moho Daud, en eiyagarij Allah se men Surad Ugwaremer deb sug nosa touohob, endagai: Indan aremer naugb sug len merdoc ecgwan dan icira gin, kaba, hom ingma touwero. Doba len merdoc ecgwan dan se gedis maga dous.

²⁶Doba cum, kaba, dan demesa sud hom dau dan Indina aud yen ucugb naugb en ousa yen se aremer augwan toua. En, kaba, Mena Gogoufu gedig en ens dau areg geb se Allah enin medoc mes augwan asesa dou yen, anai en en dau en aud yen. Dangga hang, sug en edebeij yenohob, kaba, en emens dau areg geb se danin indoc mes augwan asesa dou yen toues.

²⁷Dara yen, kaba, dan douwan naugb yen yens dau areg yen yeiya dara youman dau danohob augwan asesa dou lusud toua. Anai yen yaimo dan dau sug acgunog ginohob.