Read Manikion YOHANES 17 Bible Online

YOHANES 17 - Manikion bible

YOHANES 17

¹Sug Yesus esulou men logodeh dag gin dauwohob, kaba, en eised mergo dig bogo naugb en ocuncum dou en Mena ucan gin deit. Hanoba en enara dou en, endagai: Akeinya, lona edagasa namcirohob. Dangga hang, ban bens dau ban Abisi indan gogouf cucugb dou lusud, dauntoba ban Abisi dan dens dau aban gogouf cucugb dou len toua.

²Anai ban beigdoumesa ban Abisi dan indoho dag mougt mera medam naugb lusud se cinogo augwanohob. Dauntoba gareg ban beic dou dan, kaba, dan demeic maireseb menau geb huhugb dou len laugwan toua.

³Dangga gareg en ecinaga ban dag misen dara en ecinaga Yesus Krisdus dan dag misen touohob, kaba, maireseb menau geb huhugb eb naugb enohob. Anai banin dous eng Allah misen hom dous. Dara ban eng besa dan aud lusud gini naugb dan deigdoc len dau meren gogom augwan toua.

⁴Hang dan demens dau aban gogouf cucugb augwan dou len se cinogo ginohob. Anai areg ban beic dou dan naugb dan desai dou len gini, kaba, dan deicara daimo augwan bedeinyum an len touohob.

⁵Dangga, Akeinya, iteitogin, kaba, ban beigdoumesa dan indoho desij ban se gogouf cucugb deit. Aninim dag dan deigtou se gogouf cucugb sug ban bemesinsin cinogo dara bogo gin touebma.

⁶Dara dan dens dau areg geb se banin abdoc mes augwan dou indan logodeh gin touohob. Anai ban bouci len laugwan debinim dau cinogo gini naugb banohob. Hang len lemedag lenin deitero, doba len laugwan ledag aban namcir. Dara len gin, kaba, ban bogugwo len laugwan deb se dan insira naugb dan dagauwesa len toua. Dangga areg dan desai dou len, kaba, len lemesbes an touwero. Doba len leicara laimo augwan gin terimda.

⁷Anai iteitogin, kaba, len lecinaga dag areg dan desai gin, kaba, emen dau daninero. Doba augwan en dau banin dous.

⁸Dangga areg ban beic dou dan naugb dan desai dou len, kaba, len lemotogoto dan indir an touwero. Doba len lebin se len merdoc namcir. Anai len lecinaga dag dan den dau ban aud len dag misenohob. Hang len lod merna debsa dan dag areg dan desai dou len gini, kaba, dan demeic dau danin indoc mes dou lenero. Doba banin eng besa dan aud len naugb dan desai dou len toua.

⁹Dangga dan democuncum naugb lusud gedig Bilis oiharaga len se cinogo ginero. Doba dan docuncum naugb len gedig ban beic dou dan len gin dous. Anai len gin, kaba, aban logodehohob.

¹⁰Dara aban dousero. Doba len gin, kaba, indan logodeh touohob. Anai areg geb naugb dan, kaba, aban. Dara areg geb naugb ban, kaba, indan toua. Hang len lemens dau indan gogouf cucugb dou lusud laugwan toua terimda.

¹¹Doba iteitogini, kaba, dan demeigtou an len se cinogo gin deitero. Anai cum, kaba, dan den aud ban ucugb dau lenohob. Doba len, kaba, len merugwengga se cinogo ginaba. Dangga hang, Akeinya Gedig Ban Becabeci Namcir, kaba, dan dacgeij ban naugb ban aboho oiharaga len dougwo areg gecgu augwan terimda. Dauntoba len ledag hom, aninim dag nanan nandoc dag hom toua. Anai ban aboho gin, kaba, mobisamougb namcir. Hanoba ban bogugwo dou dan touohob.

¹²Dangga sug dan indugwengga an len se cinogo ginaba, kaba, sud hom ingma dau len en emobsara dau dan insira mes touwero. Doba sud hom gedag dum smougb meh teiteiyohob, kaba, enin eng obsara dau dan insira mes dous. Dauntoba areg len log deb se Surad Injil Meb Mohon deb sug nosohob, kaba, acgunog toua. Doba len gus, kaba, dan deseyeiyo len laugwan namcirohob. Hang len lemobsara dau dan insira mes touwero. Doba dan desedougwo len ogdoc ban aboho men goubesa gin terimda. Anai ban bogugwo ban aboho gin dou dan naugb lenohob.

¹³Doba iteitogin, kaba, dan desedeb naugb sug dan deihwededau len aud banohob. Dangga hang, sug dan indugwengga desij len se cinogo ginaba, kaba, dan dacgeij augwan gin dau ban. Dauntoba sug len louman gin, kaba, eic dag len merdoc atij an gagahugouhw terimda. Aninim dag dan indoc atij an gagahugouhw gin toua namcirohob.

¹⁴Dara areg ban bens dou dan, kaba, dan desai gin augwan dou len touohob. Hang lusud se cinogo gin, kaba, len merdoc emesgiraha an len dag nosa deitero. Doba len merdoc esrougb an len namcir. Anai sug len louman ban abir ginohob, kaba, len merdoc dag hom dara len toua deitero. Aninim dag dan indoc dag hom dara len touwero.

¹⁵Dara dan demacgeij ban, dauntoba ban bemeigdoumesa len dau cinogo gin, isnaro. Doba dan dacgeij naugb ban beseyeiyo len dougwo Sud Hom Mobgos Maha dous.

¹⁶Anai indan logodeh gin, kaba, len merdoc dag hom dara lusud gedig Bilis oiharaga len se cinogo gin deitero. Aninim dag dan indoc dag hom dara len gin touwero.

¹⁷Dangga hang, ban beic ban abir misen gini, hanoba ban bouci len debinim naugb banin ogdoc ban abir misen gin toua. Anai ban abir gin, kaba, geica namcir.

¹⁸Dara dan desa len naugb len lesai ban aburo dou lusud se cinogo gini. Aninim dag ban besa dan naugb dan desai ban aburo dou len se cinogo gini sug nosa touohob.

¹⁹Dangga hang, dan dohw dan indugt edug dou ban naugb dan deicara daimo ban abir misen gini dag ansins dou len toua. Dauntoba sug len leiya, kaba, len lohw len merugt edug naugb sug len leicara laimo ban an areg ban barougb len an gin toua terimda. Anai ban abir gin, kaba, geica namcir.

²⁰Dara dan democuncum naugb indan logodeh gin dousero. Doba dan docuncum dou ban deb naugb len gedig merdoc ebdebin an dan se lona daiyamo gacin ogdoc sug indan logodeh gini len lesai dan induro dou len toua.

²¹Akeinya, dan dacgeij naugb ban bousa len gini dara leng se lona daiyamo gacin gin toua. Dauntoba len laugwan merdoc emedregimlo, doba len laugwan merdoc dag hom namcir. Dara dan dacgeij naugb ban bousa len. Dauntoba len laugwan merdoc emedreg nanan touwero, doba len merdoc dag hom dara nanan terimda. Aninim dag nanan toua nandoc dag homohob. Dauntoba sug lusud se cinogo gini len leiya dau gin, kaba, len lod merna debsa dan dag ban besa dan aud lenohob.

²²Dangga hang, dan dogugwo gogouf cucugb areg ban bogugwo dou dan sug nosohob ingma dou indan logodeh gin toua. Dauntoba len merdoc emedregim touwero, doba len merdoc aninim dag hom terimda. Aninim dag nanan nandoc dag hom toua namcirohob.

²³Anai sug dan dedag hom dara indan logodeh gini, hanoba nanan nandoc dag hom toua terimda, kaba, eic dag len merdoc emedregim touwero. Doba len laugwan merdoc dag hom terimda. Hang len se cinogo gin, kaba, len lemeija meruwesa dan toua deitero. Doba len lod merna debsa dan dag ban besa dan aud len. Dara ban abdoc gororougb indan logodeh gini, aninim dag ban abdoc gororougb dan dag misen touohob.

²⁴Akeinya, ban beic logodeh augwan gini dag indanohob. Dangga hang, dan demacgeij dau ban, dauntoba len laugwan ledeigtou desij dan se indan usi naugb len ledeiya indan gogouf cucugb areg ban bogugwo dou danohob augwan toua namcir. Anai ban abdoc gororougb dan sug ban bemahasesei cinogo touebma. Hang ban bemogugwo aban gogouf cucugb gini dou dan touohob.

²⁵Akeinya, lusud se cinogo gin, kaba, len lemecinaga areg geb se banin abdoc mes augwan dag misen touebma. Doba danin, kaba, dan decinaga areg geb se ban abdoc mes augwan dag misenohob. Dara indan logodeh gin, kaba, len lecinaga dag ban besa dan aud len dag misen touohob. Anai ban, kaba, ban bedag beim an augwan namcir.

²⁶Dara dan demarges dau sug dan dens dau areg geb se banin abdoc mes augwan dou len gini touwero. Doba dan deicara daimo dangga dou len terimda bouwedoc gin toua. Dauntoba len merdoc gororougwim, aninim dag ban abdoc gororougb dan touohob. Dara emen emdoc toua dag hom namcir.