Read Manikion YOHANES 18 Bible Online

YOHANES 18 - Manikion bible

YOHANES 18

¹Sug Yesus ocuncum dangga dou en Mena dauwohob, kaba, en ouwadan men logodeh dau tu ingga aud lo medam hom geb dig duhu Kidron mebera nagama. Sug len ledebeijohob, kaba, len leinesa toua.

²Doba sud hom gohw Yesus se leng Yahudi meren mougtir merisirohob, en moho Yudas, kaba, en ecinaga lo gin debohob. Anai sug nosa, kaba, Yesus dara men logodeh len loucimdeb debinbin sunggohob.

³Dangga hang, en esan leng Roma meren sadodor merug aibibra aud lo ingga. Dara gembala gesa taij meren mougtir dara leng Parisi len toua lohw merug aibibra dau leng lesedougwo Allah Men Tuari naugb laicira len toua. Sug len leihweda, kaba, ligbum len lodo meren pelita. Dara ligbum, kaba, len lei hiraga. Dara len lodo meren kebtemaga dara krawan edeinyum len laugwan toua.

⁴Doba Yesus en ecinaga areg acgunog debin en gini augwan sug nosa debohob. Dangga sug len laugwan ledagunya debin en an men logodeh se lo gragohob, kaba, Yesus enin eisa dau men logodeh aud len. Hanoba en eijidougwo len, endagai: Yen yehilon garena?

⁵Doba len launi en mer, lendagai: Emen emehilon sud hom, moho Yesus dau cinogo Nasared. Dangga Yesus ens enin ainyes. Hanoba en enara dou len, endagai: Dan indugwenggini. Dara Yudas gohw en gini, kaba, en toua moongga desij lengga.

⁶Sug Yesus ens enin ainyes dag gin dou lenohob, kaba, len laugwan laisacij. Hanoba len leijeboho dig meridigo debinim se cinogo gabeda namcir.

⁷Dangga Yesus eijidougwo len ucugb deit, endagai: Yen yehilon garena? Doba len launi ucugb dou en, lendagai: Emen emehilon sud hom moho Yesus dau cinogo Nasared.

⁸Hang Yesus enara dou len dougwo, endagai: Sug yen yehilon danin dous, kaba, yen yamsoho indan logodeh gini. Dauntoba len laugwan leihwededauwahabi, anai dan dens dan indug ainyes dou yenohob.

⁹Yesus enara dag gin dougwo men logodeh, dauntoba esogwa deisa enin mogtimei mohw an areg en ocuncum dou en Mena naugb len sug nosohob, endagai: Akeinya, indan logodeh gedig ban bogugwo dou danohob, kaba, sud hom ingma dau len en emobsara dau dan insira mes touwero.

¹⁰Doba Simon Petrus en eigdesa men krawan dau meihw naugb en ogod Gembala Gesa Taij Meren Mougt Mera Medam men sogougb, moho Malkus, en moms dig mesira misen edug dau en namcir. Anai men krawan inggeb se meihw isisga.

¹¹Doba Yesus en dougwo Petrus, endagai: Ban bes aban krawan se meihw ucugb. Ban bauwam endag dan demeg areg gedougdaha geb se mog gin touweroei? Naro, areg dan Indina en esedeb naugb danohob, kaba, dan deg toua.

¹²Sug Yesus enara dag gin inegohob, kaba, leng Roma meren sadodor, dara meren mougt, dara leng Yahudi gedig len lesedougwo Allah Men Tuari len laugwan lagaigeij Yesus. Hanoba len lahud en mesira hwas darem namcir.

¹³Sug lan lahud enohob, kaba, len lahwan en dou Kayapas maba, Hanas, se men tu nosahabi. Anai sug nosa, kaba, en edag Gembala Gesa Taij Meren Mougt Mera Medam naugb lenohob. Doba se arisogomoc ingga, kaba, en maba Kayapas en edag mougt mera medam naugb gembala gesa taij len laugwan deit.

¹⁴Sud hom Kayapas gin, kaba, en eng esulou leng Yahudi meren mougtir laugwan sug nosa touohob, endagai: Eigouhw naugb sud hom en omom dous. Dau gedag maman lusud laugwan lemomom, isnaro.

¹⁵Sug leng sadodor lahwan Yesus aud Hanas se men tu gin, kaba, Petrus dara sud hom gus dau Yesus men logodeh lan toua laucan len. Doba Yesus men godeh hom gin, kaba, eni Hanas mesi misen toua. Hang en emeinesa Hanas men tu oucan Yesus gin toua.

¹⁶Doba Petrus, kaba, en esa se misis moc dig medigo deb. Sug Yesus men godeh hom graga en eiya dag gini, kaba, en ecicugb naugb en edenara dou gida hom gesedougwo misis ingga. Sug en enara dou en dauwohob, kaba, en ahwan Petrus dig uro meseda.

¹⁷Sug lan lainesa uro mesohob, kaba, gida gesedougwo misis maga en enara bauwi Petrus, endagai: Ban eng giag baimo sud hom gada touohob. Doba Petrus enara bauwun en mer, endagai: Dan, isnaro.

¹⁸Sug Petrus aideido dou en dauwohob, kaba, en eihweda naugb en edesa desij Hanas men sogougwir dara leng lesedougwo en men tu se smougb mebera naugb smougb esij en toua. Anai igda goho dugurij, hang len lemouci sisguraha debinim naugb lec se smougb debohob. Hanoba len lesa acec, dauntoba smougb esij len laugwan toua.

¹⁹Sug len lahwan Yesus deseino Hanasohob, kaba, Hanas enara dou en, endagai: Ban bens dau aban logodeh dara areg ban besai dou lusud augwan asesa dou danahabi.

²⁰Doba Yesus enara bauni en mer ucugb, endagai: Sug dan desai Allah moro dou lusud sug nosa, kaba, dan demecgoneh dan indug aingma dau lenero. Doba dan desai augwan se meren tuari dara Allah Men Tuari dou len laugwan loumanohob. Anai se tuari gin, kaba, leng Yahudi len loucimdeb astesda lona terimda.

²¹Dangga ban bemeijidougwo danlo. Doba ban beijidougwo leng louman dan indir anohob dous. Anai len lecinaga areg dan desai dou len augwan dag misen namcirohob.

²²Sug Yesus auni dag graga dou Hanasohob, kaba, sud hom dau leng lesedougwo Hanas en men tu ingga, kaba, en oto Yesus namcir. Hanoba en enara debin en, endagai: Dagiro, naugwe hang, ban beic abus naugb ban bauni Gembala Gesa Taij Meren Mougt Mera Medam en mer dag gina?

²³Doba Yesus auni dou en, endagai: Dan denara didi, kaba, ban bens augwan gini asesa dou leng se dimei mes gin len laugwan toua. Dauntoba len toua lecinaga dag misen namcir. Dobnaro, kaba, dagiro, naugwe hang, ban bogod dan gina?

²⁴Sug Yesus auni dag gin dou sud hom graga ginohob, kaba, Hanas arougb leng sadodor naugb len lahwan Yesus aud Gembala Gesa Taij Meren Mougt Mera Medam, en moho Kayapas, se men tu deit. Doba aumaga, kaba, eb se Yesus mesira terimdaba.

²⁵Doba Petrus, kaba, eni moongga desij len se smougb meberaba. Dangga leng lesa desij en se smougb mebera ingga, kaba, len lenara lauwi en deit, lendagai: Ban eng baimo sud hom graga en touohob. Doba Petrus aideido dougwo dou len namcir, endagai: Dan, isnaro.

²⁶Sug len lemenara merir emedug anbuma, kaba, sogougb hom dau Gembala Gesa Taij Meren Mougt Mera Medam en toua enara baised Petrus deit, endagai: Dan deiya dag ban toua abugwengga desij sud hom graga se lo gaihohoba. Sud hom gin, kaba, mesi eng Petrus en ogod moms edug dau gragohob.

²⁷Doba Petrus en aideido dougwo deit namcir, endagai: Dan, isnaro. Sug en aideido dougwo dag gin inegohob, kaba, berougwu eba mer bagod en mer an toua.

²⁸Sug lona esgohob, kaba, leng Roma meren sadodor lahwan Yesus dau Kayapas men tu ingga aud leng Roma meren mougt mera, moho Pilatus, se men tu deit. Dangga sug len ledebeij Pilatus men tu magohob, kaba, leng sadodor mogud dous eng lahwan Yesus aud Pilatus se men dimeiyeda. Doba leng Yahudi dara meren mougtir, kaba, len laugwan lesa dig medigo dous. Anai lona naugb sug len lougwanara debin meren Lona Gohw Bedreg gin, kaba, ebeij deinyor namcirohob. Dangga hang, len lemouwan naugb lugmahara meren tu gin, kaba, emeic gogor dou lenlo. Doba len lecabeci deseino Allah, dauntoba edeinyum naugb sug len let ared se Lona ingga toua.

²⁹Dangga, kaba, Pilatus en en dau men dimei mes. Hanoba en eijidougwo len, endagai: Sud hom gini men geicara gecgu dagiro, hang yen yemahwan en aud dan gina?

³⁰Doba len launi dou en ucugb, lendagai: Ban boudesa endag sud hom ingga men geicara gecgu ingmaro, hang ban bemeijidougwo emen ucugb dag ginei? Naro. Sud hom ingga, kaba, en edreg emen gaben namcirohob. Hang emen emahwan en dou ban toua. Naro, kab, naro.

³¹Dangga Pilatus asid dou len, endagai: Sug en edreg dau meijen gaben dag ginohob, kaba, yen yeihwedan en dau sugindahabi, yenin yemdogod gogom debin en yaimo dau meijen gomnomna an en dous. Doba leng Yahudi meren mougtir, kaba, len lenara dougwo en mer, lendagai: Emen emogod aremer gomom debin emen lusud deitero. Anai yeng Roma, kaba, yen yen dougwo emen an ginohob.

³²Doba aremer augwan gini acgunog, dauntoba esogwa deisa areg Yesus enara dou men logodeh sug nosohob. Anai en ens dou len dag leng Yahudi lemeic gomom dou enero. Doba dag leng Roma eng letob en se sogo salib dous, aimo dau meren gaben an en dangga.

³³Sug Pilatus ouman leng Yahudi merir an dag graga, kaba, en einesa men dimei ucugb. Hanoba en arougb men sadodor naugb len ledahwan Yesus aud eni. Sug len lahwan Yesus aud enohob, kaba, en eijidougwo Yesus, endagai: Ban eng bedag mougt mera medam naugb leng Yahudiei?

³⁴Doba Yesus eijidougwo en ucugb, endagai: Len gus len dangga dou ban, hang ban bemeijidougwo dan dag ginei? Era ban beic dau banin abdoc mes dousei?

³⁵Doba Pilatus enara bauwun Yesus mer an gini, endagai: Ban bauwam endag dan dau yeng Yahudi, hang ban bemeijidougwo dan an dag ginei? Naro. Banin aban lusud dara meijen gembala gesa taij meren mougtir len eng lemoho lemas ban dou dan gini. Areg len len dou dan gini, kaba, dag misenei? Era naroei? Ban bens augwan asesa dou danahabi.

³⁶Doba Yesus enara bauni en mer ucugb, endagai: Dan demedag mougt mera aninim dag mougt mera se cinogo ginero. Anai sug dan dedag mougt mera aninim dag len se cinogo gin, kaba, indan logodeh lemamsoho dan debero. Doba len lebehnehino dougwo dan terimda. Dauntoba len gus lemohw dan se leng Yahudi meren mougtir merisira touwero. Doba dan dedag mougt mera gedig susugb dau mougtir se cinogo gin namcir. Dangga hang, indan logodeh ingma, kaba, len lemebehnehino dougwo danero. Doba len lamsoho dan dou len gus naugb len lohw danohob.

³⁷Sug Pilatus ouman dau gin, kaba, en auni Yesus mer ucugb dou en, endagai: Ban benara dag gin, kaba, ban toua bedag mougt mera medamohoba? Era dagiro? Doba Yesus auni en mer ucugb dou en, endagai: Ban eng benara dangga. Dan, kaba, ga, naro, anai dan douwaden dau bogo. Hanoba dan indim ouwadan dan se cinogo gini naugb sug dan desai areg se geica dou lusud dous. Gareg en aimo ucina se geica gin, kaba, en ouman dan indir an areg dan desai dou en touohob.

³⁸Doba Pilatus, kaba, en esbesan Yesus naugb en eijidougwo en ucugb, endagai: Geica, kaba, gini dag ara? Sug Pilatus eijidougwo Yesus dag graga dauwohob, kaba, en eihwedig medigo naugb en edenara dou leng Yahudi deit, endagai: Dagiro, naugwe hang, dan dogod aremer gomom naugb sud hom gina? Anai dan dehilon en medoc mes an ginohob, doba men aremer gecgu hom naugb sug maman maic gomom dou en touwero gina?

³⁹Doba astesda se meijen Lona Gohw Bedreg gin, kaba, dan daimo yen meijir naugb dan desga sud hom dau tu gesisug dou yen ucugb. Dangga hang, yen youwan dan darges meijen mougt mera medam gin ucugb dou yenei? Era naroei?

⁴⁰Doba len laugwan lesa merir aninim, lendagai: Sud hom gin, isnaro. Doba ban besga Abbas meisi dou emen dous. (Len lenara dangga dou en, anai Abbas meisi gin, kaba, en mog mog namcir naugb sug en ouwan ocirma leng Roma dau meren hancob touohob.)