Read Manikion YOHANES 19 Bible Online

YOHANES 19 - Manikion bible

YOHANES 19

¹Sug leng Yahudi lesa merir aninim danggohob, kaba, Pilatus en einesa men dimei ucugb. Hanoba en arougb men sadodor, endagai: Yen yohugouhw Yesus gini naugb yen yedogod enda.

²Dangga sug Pilatus men sadodor lohugouhw endohob, kaba, len lecgun lisug maga an mog. Hanoba len leg se en mougt, dara len leg sansun gagas geirir hom se en toua.

³Sug len leicara dag gin dou en dauwohob, kaba, len legregim naugb leic en lacecim, lendagai: Ban abireseb huhugb naugb ban besedougwo leng Yahudi dag meren mougt mera medam terimda. Len lenara dag gin ineg, kaba, aisa len merisira naugb len loto en toua.

⁴Sug len logod en dauwohob, kaba, Pilatus en eihwedig medigo naugb en edenara dou leng Yahudi deit, endagai: Yen yaugwan yeiya sug indan sadodor lahwan sud hom gin aud yenahabi. Dauntoba sug yen yeiya en, kaba, yen yecinaga dag dan dehilon en. Doba men aremer gecgu hom ingma naugb sug maic gomom dou en touwero.

⁵Dangga sug men sadodor lahwan Yesus an lisug mog dara sansun geirir ainyes deseino leng Yahudiohob, kaba, Pilatus ens Yesus dou len. Hanoba en enara ceg ceg en dou len, endagai: Yen yeiya sud hom graga inggini. Dan demeic gomom dou en augwougb dagiro?

⁶Doba sug gembala gesa taij meren mougtir, dara leng lesedougwo Allah Men Tuari len leiya Yesus se len meriresi dangga, kaba, len lesa merir medam an dou Pilatus, lendagai: Ban barougb aban sadodor naugb len letob en dara sogo salib namcir. Doba Pilatus enara bauni len merir ucugb, endagai: Yen youwan dangga, kaba, yenin yedahwan en naugb yen yetob en se sogo salib dous. Anai dan dehilon en, doba men aremer hom naugb sug maic gomom dou en touwero.

⁷Doba leng Yahudi len lenara launi ucugb dou Pilatus, lendagai: Emenin emen gomnomna ogod aremer gomom naugb en debohob. Anai en eigdoumesa enin moho dag Allah Meisi mohora hom deseino emenohob.

⁸Sug Pilatus ouman len merir an gin, kaba, en medoc ogom edreg deit naugb sug en ogod aremer gomom deinaugb Yesus gini.

⁹Dangga sug en einesa men dimei ucan Yesusohob, kaba, en eijidougwo en deit, endagai: Ban daugiro? Doba Yesus en emauni ara ara hom dou enero. Doba en eigtou dag lodinanir namcir.

¹⁰Sug Pilatus eiya, doba Yesus emauni dou enero, kaba, en enara dou en, endagai: Indan goubesa inggebga naugb dan darges ban ucugb. Dara dan detob ban dara sogo salib toua. Dangga dagiro, naugwe hang, ban bemens aremeijouhw asesa dou dan touwero?

¹¹Doba Yesus enara bauni dou en ucugb, endagai: Goubesa augwan gin, kaba, emen dau baninero. Doba dau sug Allah eic dou ban, hang ban bemetob dan toua. Anai sug Allah emeic goubesa dou banero, kaba, aban goubesa ingmemeb naugb dan touwero. Dangga gareg en ohw dan augwougb se ban absira, kaba, men sesar medam edreg dau ban toua namcir.

¹²Sug Pilatus ouman Yesus mer an gini, kaba, en ahau medam. Dangga en ehilon ucina naugb en arges Yesus toua. Doba leng Yahudi lesa merir medam aninim deit, lendagai: Gareg en eigdoumesa enin moho dag mougt mera medam, kaba, en emeigdoumesa mougt mera medam dau yeng Roma en moho deitero. Doba en eicara bauwun en moho namcirohob. Dangga hang, sug ban barges sud hom gin, kaba, aban mougt mera medam gini en emeija ban dag en mesi toua deitero. Doba ban bedag men mocohob. Anai sud hom gin, kaba, en eigdoumesa enin moho dag mougt mera medam touohob.

¹³Sug Pilatus ouman len merir an gin, kaba, en arougb men sadodor naugb len lahwan Yesus dig medigo aud men maija moc gowunaresa geb se usi moho Igdahab Geihwidua. (Era se lec Ibrani mer, kaba, Gabata.) Sug len ledebeij se maija mocohob, kaba, Pilatus en eigtousa naugb en ogod aremer naugb Yesus toua.

¹⁴Doba sug Pilatus ogod aremer ingga, kaba, ebeij igdabogohob. Dara leng Yahudi meren Lona Gohw Bedreg toua ebeij deinyorohob. Dangga hang, Pilatus en ens Yesus dou leng Yahudi mougwa hom ucan deit, endagai: Meijen Adehsud, ingginbo.

¹⁵Doba len lenara dara merir medam, lendagai: Naro, ban betob en dara sogo salib bomom namcir. Dangga Pilatus eijidougwo len ucugb deit, endagai: Yen youwan naugb dan deic gomom dou meijen Adehsud namcirdei? Era dagiro? Doba gini en eija len ceg ceg Yesus gin dous. Doba gembala gesa taij meren mougtir len launi en mer ucugb, lendagai: Sud hom gin, isnaro. Doba emen emeigdoumesa yeng Roma meijen mougt mera medam hom dous eng edag mougt mera medam naugb emen gini.

¹⁶Sug Pilatus ouman len merir dangga, kaba, en arges Yesus deb se men sadodor merisira naugb len letob en se sogo salib. Sug en arges en deb se len merisirohob, kaba, len lahwan en naugb ledetob en se sogo salib toua namcir.

¹⁷Dangga sug len lagunya dau Yerusalemohob, kaba, len lahwan en aud mengarougb hom, moho Mougt Mera Mer. (Era se lec Ibrani mer, kaba, dag Golgoda.) Dara len larougb en naugb en odo men sogo salib teitei dara en aud us ingga toua.

¹⁸Sug len ledebeij mengarougb inggohob, kaba, len letob en dara sogo salib namcir. Dara len letob lahwai desij en toua. Laingma, kaba, dig en mesira misen, doba laingma, kaba, dig en mesira metigi. Hanoba Yesus enin se meraufu.

¹⁹Sug len letob Yesus dara sogo salibohob, kaba, Pilatus arougb men lusud, endagai: Yen yog se surad, yendagai: Sud hom gin, kaba, eni Yesus dau cinogo Nasared. En edag leng Yahudi meren mougt mera medam. Sug len log augwan se suradohob, kaba, en arougb len, endagai: Yen yetob surad an moho gini dara sogo salib dig en mougt toua.

²⁰Dara en arougb men lusud naugb len lemog surad an moho gini se lec Ibrani mer dousero. Doba len log se Latin mer, dara Grika mer toua. Dangga lusud leinyana lecic dau surad an moho gin. Anai us mougb gedig len letob Yesus se sogo salib se gin, kaba, emeb aigus dau Yerusalemero, doba deinyorto namcir.

²¹Doba gembala gesa taij meren mougtir len len dougwo Pilatus, lendagai: Ban bemog en edag emeng Yahudi emen mougt mera medam se surad dangga, isnaro. Doba ban bog endag, enin eigdoumesa enin moho dag emen mougt mera medam dous.

²²Doba Pilatus en ohoiya len merir. Hanoba en enara dou len, endagai: Areg dan dogohob, kaba, ebsugeb namcir.

²³Sug len letob Yesus dara sogo salib dauwohob, kaba, len leg men sansun augwan dau en namcir. Hanoba len lekeba dag hogu icira daum toua. Hang astesda dau len, kaba, sud hom en oho hom dous. Dara len leg sansun gagas geb aimei dau en toua. Doba sansun hom gin, kaba, len lemogon mohw emebsero. Doba len lesinsin dag hom namcir dous.

²⁴Dangga sug leng sadodor len leiya, doba sansun gin mohw emebsero, kaba, len lenara doum, lendagai: Maman mamaga anim, isnaro. Doba maman marba nomor maic dous. Dauntoba gareg nomor ens en, kaba, enin gang en emoho dous. Len leicara dag gini, dauntoba esogwa deisa areg Daud en erba Ugwaremer an gin deb sug nosa touohob, endagai: Indan sansun augwan, kaba, len lekeba doumohob. Doba indan sansun geb aimei, kaba, len lemekeba doumero. Doba len lerba nomor laic dous.

²⁵Doba Yesus mem, dara mem medamouwa, dara Mariam, Klopas mesouwa, dara Mariam dau cinogo Magdala, kaba, len laugwan lesa deinyor sogo salib meiyo an Yesus toua.

²⁶Dangga sug Yesus eiya, doba en men dara godeh hom gedig en medoc gororougb en lan lasa deinyor sogo salib meiyo an en, kaba, en esulou mem, endagai: Daneh, dan decug indan godeh hom gini dag ban abisi naugb en esedougwo ban deit.

²⁷Gin ouwohob, kaba, en esulou men godeh hom gin toua deit, endagai: Dan decug Daneh gini se ban absira naugb ban besedougwo en dag ban abim toua. Dangga dau lona ingga, kaba, men godeh hom gini en ahwan Yesus mem se men tu toua namcir.

²⁸Sug Yesus esulou mem dara men godeh hom lahwas dauwohob, kaba, en eiyagarij lusud, endagai: Merijeba dani. En eicara dag gini, anai en ecinaga dau sug en eicara dag gin, kaba, en aimo areg Allah ens deb naugb en augwan bouwedoc namcirohob.

²⁹Dangga sug len louman Yesus eiyagarij len dag gin, kaba, len leic augb keita geb se dum mohu naugb len logun se anggur mohu gedougdaha geb se igdebir sungga. Sug len logun sehob, kaba, len leihwi se aremerij hisob maga. Hanoba len lemoutan dou Yesus naugb en outut toua.

³⁰Sug en oututohob, kaba, en enara, endagai: Augwan ouwedocohob. Sug en enara dag gini inegohob, kaba, en mergo obsara. Hanoba en esa mena deisa Mena mesira naugb en omom namcir.

³¹Doba sug Yesus esa mena bomom gin, kaba, leng Yahudi meren Lona Gemeicaresero toua ebeij deinyorohob. Dara se Lona Gemeicaresero gini, kaba, len merna eiseisan Lona Gohw Bedreg naugb len lougwanara debin toua. Dangga sug lona hwas gini adedim dag ginohob, kaba, leng Yahudi leigdoumesa Lona Gemeicaresero gini agas edreg dau Lona Gemeicaresero gus augwan namcir. Hang leng Yahudi meren mougtir leihwedaud Pilatus. Anai len lemouwan naugb merdesa emeb se sogo salib se lona gouji ginero. Sug len ledebeij enohob, kaba, len ledenara dou en, lendagai: Ban barougb aban sadodor naugb len ledeised leng leb se sogo salib ingga len merohobaga bedug namcir, dauntoba len lomom dedemeda. Hanoba ban barougb len naugb len leic merdesa dau sogo salib naugb ledec toua.

³²Dangga sug leng sadodor leihwedaud usi ginohob, kaba, len ledeised sud hom dau lahwai gedig len letob lan desij Yesus graga en mohobaga bous nosahabi. Dauwohob, kaba, len ledeised en mesi homa mohobaga toua ucan.

³³Doba sug len ledebeij Yesusohob, kaba, len leiya en, doba en omomohob. Dangga hang, len lemeised en mohobaga touwero.

³⁴Doba sud hom dau len, kaba, en eic kebtemaga bedesugb Yesus se mocbo meniha. Sug en edesugb inegohob, kaba, mogwihi dara mohu ohw dau Yesus en mocbo meniha gin toua.

³⁵Aremer augwan gini esogwa deisa areg len log deb se Surad Injil Meb Mohon eisaugb Yesus deb sug nosa touohob, lendagai: Len lemeised en mori hom emousero. Dara len log ingma deit, lendagai: Sug len ledesugb en, kaba, lusud lesa lauweila en toua. (Aremer gin, kaba, sud hom en eiya augwan se en mairesohob. Dangga hang, en emesai gin augwan asesa dou yen toua. Dauntoba yen meigdoc ebdebin an areg en esai dou yen gini dag misen namcir. Anai sug en eiya augwan asesa gragohob, kaba, en ecinaga dag areg en esai dou yen gin, kaba, augwan toua se geica namcirohob.)

³⁶

³⁷

³⁸Sug Yesus omomohob, kaba, Yusub, dau cinogo Arimatea, en eihwedaud Pilatus naugb en edacgeij en an Yesus maga. Dangga sug en edebeij Pilatusohob, kaba, en acgeij en, endagai: Ban bouwan, kaba, dan dideic Yesus maga dau sogo salib naugb dan didecda. En eicara dag gini, anai en toua dag Yesus men logodehohob. Doba en ahau dau leng Yahudi meren mougtir. Hang en emens enin ainyes an gin dou len touwero. Doba en ecgoneh mog dau len namcir. Dangga sug Pilatus ousan dou enohob, kaba, en eihweda naugb en edec Yesus maga dau sogo salib toua.

³⁹Doba sug en eihwedaud sogo salib gin, kaba, sud hom, moho Nikodemus, en aimo en. Hanoba en arougb men sogougwir naugb len lodo aremoung mohu dau mur dara gaharu ucan lan toua. Dara aremoung mohu gin, kaba, men gogom augwan edebeij kilo mos homoiyohob. Nikodemus gin, kaba, eni sud hom gedig en edebeij Yesus se loba sug nosohob.

⁴⁰Sug lan ladebeij sogo salib meiyohob, kaba, lan laic Yesus maga dau toua. Hanoba lan laic minc lagacgec en maga. Dauwohob, kaba, lan lair aremoung mohu graga debin en maga ucan deit. Anai augwan gini aimo dau leng Yahudi meren gaben sug len lec aremogougb danggohob.

⁴¹Doba deinyor sug len letob Yesus se sogo salib gini, kaba, lo hom toua moongga. Dara se lo gin, kaba, igdohos mes hom gedig lusud lemec aremogougb mougwa hom sebuma toua moongga.

⁴²Dangga sug Yusub dara Nikodemus lan laiya, doba igdohos mes gin deinyor, kaba, lan lado Yesus maga naugb ladec sungga toua. Anai leng Yahudi meren Lona Gemeicaresero ebeij deinyor namcirohob.