Read Manikion YOHANES 20 Bible Online

YOHANES 20 - Manikion bible

YOHANES 20

¹Doba edebeij Ari sug lona esgesgaba, kaba, Mariam dau cinogo Magdala en eisa lonamenmen naugb edogod dougwo igdohos mes an Yesus. Anai Lona Gemeicaresero ouwa dauwohob. Sug en edebeij aremogougb modohob, kaba, en eiya, doba len leila igdohos meh dauwohob.

²Sug en eiya dau ginohob, kaba, en obga ucugb aud Simon Petrus, dara Yesus men godeh hom gedig en medoc gororougb en toua. Sug en edebeij lanohob, kaba, en en dou lan, endagai: Lusud leic maman Adehsud en maga dau igdohos mesdohob. Doba emen ememecinaga len ledob en deb sugiro deitohoba?

³Sug lan toua lauman gin, kaba, lan labursa Mariam medigo naugb ladogod dougwo igdohos mes deit.

⁴Dangga sug lan laobga, kaba, Yesus men godeh hom gedig en medoc gororougb en, kaba, en obga eino Petrus men. Hanoba en en edebeij igdohos mes nosa.

⁵Sug godeh hom gini en edebeij igdohos mesohob, kaba, en emeinesa namcirdero. Doba en ou mergo bogug dous. Dangga en emeiya ara ingma emeb se igdohos mes touwero. Doba en eiya minc gedig len lagacgec Yesus maga inggeb se igdohos mes deb dous.

⁶Doba sug Simon Petrus en toua edagunyohob, kaba, en emesa ucucugb se medigoro. Doba en eic mos namcir se igdohos meseda. Dangga en toua emeiya ara ingma emeb se igdohos mes touwero. Doba en eiya minc mogud inggeb dous.

⁷Dara en eiya minc gedig len lahud dougwo Yesus mougt, kaba, emeb debin minc gedig len lagacgec en magero. Doba ebtoumou beb se mohw dangga.

⁸Sug Yesus men logodeh gobgeino graga en eiya, doba Petrus einesa igdohos mes namcirohob, kaba, en eic mos naugb en einesa ucan en toua. Dangga en toua eiya minc dougwo mougt emebdebin se minc dougwo maga ginero, doba ebtoumou beb se mohw dangga dous. Hanoba en medoc ebdebin an dag Yesus eisa dau gomom dag misenohob. (

⁹Dara sug Yesus eisa dau gomom ucugb dag gin, kaba, aimo dau areg Allah en ogod deb deinaugb en sug nosa. Hang lusud len log deb dau gini se Surad Injil Meb Mohon deb sug nosa touohob. Doba areg len log deb gin, kaba, Yesus men logodeh lahwai graga lan mardoc emobgesa meijouhw se lona ingga asesa touebma.)

¹⁰Dangga hang, sug Petrus dara godeh hom gini lan laiya augwanohob, kaba, lan lacicugb dig maran tu ucugb deitda.

¹¹Doba Mariam, kaba, en esa beb dougwo igdohos moc deb. Sug en eb gin, kaba, en ou mergo bogug dougwo igdohos mes toua.

¹²Dangga en eiya, doba malaikad lahwai eng laigtou se boromei gedig len lob Yesus maga deb se graga deb gini. Laingma, kaba, lahig dig mougt. Laingma, kaba, lahig dig mohora. Lang gin lahwai, kaba, lan lag sansun gogoufu namcir.

¹³Dangga lan laijidougwo en, landagai: Daneh, ban beb an garena? Doba Mariam en auni dou lan, endagai: Dan deb an indan Adehsud. Anai len leiyoho en maga dau sugindohob. Hang dan demecinaga sug len ledob en deb touwero.

¹⁴Sug en enara dag gin dou lanohob, kaba, en eineg dig medigo. Hanoba en eiya sud hom gesa dig en medigo. Doba en emecinaga dag en ingga Yesusero.

¹⁵Dangga Yesus eijidougwo en, endagai: Daneh, ban behilon garena, hang ban bemeb an en gina? Doba Mariam en oudesa Yesus en edag sud hom gesedougwo lo ingga dous. Hang en emeijidougwo en ucugb, endagai: Adehsud, sug ban beic en maga dau sugindohob, kaba, ban bedens sug ban bedobdeb dou danahabi. Dauntoba dan dedeic en naugb dobdeb en se mohw gin ucugb deit.

¹⁶Doba Yesus eija en moho, endagai: Mariam. Sug Mariam ouman Yesus mer asesohob, kaba, en eineg namcir beija Yesus moho se lec Ibrani mer, endagai: Raboni. (Meijouhw gini dag indan Guru.)

¹⁷Doba Yesus en dougwo en, endagai: Ban bemos danlobma. Anai dan demedebeij dan Indinabuma. Dangga ban becicugb aud dan indaguner dara dan indamouwer yen yaugwanahabi. Hanoba ban ben dou len dag iteitogin, kaba, dan deihwedaud maman Mamina ucugb. Anai eni dan Indina dousero, doba yen toua Meijina. Dara ban ben dou len dag dan decicugb aud maman Allah. Anai en emedag indan Allah dousero, doba yen toua meijen Allah.

¹⁸Sug Mariam dau cinogo Magdala en ouman dag ginohob, kaba, en ecicugb aud Yesus men logodeh. Hanoba en enara dou len, endagai: Dan deiya maman Adehsud en eisa ucugb dau gomomohob. Sug en en dou len danggohob, kaba, en ecic dau areg Yesus en en dou enohob graga augwan asesa ucan dou len deit.

¹⁹Dangga edebeij se Ari loba, kaba, Yesus men logodeh len laugwan merugwengga se tu hom. Hang len louf misis augwan dougwo len namcir. Anai len lahau dau meren mougtir dau leng Yahudi sug len leic gogom dou len toua. Doba sug len leigtou dag gin, kaba, Yesus agunya debin len se dimei mes ingga. Hanoba en ou len, endagai: Allah eic geigouhw dou yen dougwo areg gecgu augwan terimda.

²⁰Sug en ou len dauwohob, kaba, en ens mosutimei mes dara mocbo meniha mes dou len toua. Dangga hang, men logodeh merdoc agahugouhw namcir. Anai len leiya, doba meren Adehsud en eisa dau gomom ucugwohob.

²¹Doba Yesus enara dou len deit, endagai: Allah eic geigouhw dou yen dougwo areg gecgu augwan namcir. Sug en acgeij Allah naugb en eic geigouhw dou len dag ginohob, kaba, en esulou len, endagai: Dan darougb yen naugb yen yesai dan induro dou lusud se cinogo augwan. Aninim dag dan Indina esa dan naugb dan desai en moro dou yen touohob.

²²Dangga gareg dau len en esga men sesar dou yen, hanoba yen toua meigdoc esgirahesa naugb yen yogod an namcir, kaba, Allah toua aigdougwohob. Doba sug yen meigdoc emesgirahesa sesar ingga naugb yemogodero, kaba, Allah toua emaigdougworo, doba eb naugb en terimda. Sug Yesus esulou len dauwohob, kaba, en esa mena se len. Hanoba en enara dou len deb, endagai: Dan desa Mena Gogoufu se yen meigdoc mes.

²⁴Doba sug Yesus ens enin ainyes dou men logodeh aimougtut se loba gin, kaba, sud hom dau Yesus men logodeh sisa hobjerai, en moho Tomas, kaba, en mogero. Lusud leija en moho toua dag lang marogoc agacgecim toua.

²⁵Dangga Yesus men logodeh gus len len dou en, lendagai: Emen emeiya maman Adehsud eisa dau gomom ucugwohob. Doba Tomas esbes len merir, endagai: Sug dan demeiya paku mohw icira en mesira, dara dan demob dan insira mob se en mesira mes dara mocbo meniha mesahabi, kaba, dan indoc emebdebin anero. Doba sug dan deiya augwan gini se dan indiresohob, kaba, dan indoc ebdebin an en dag en eisa dau gomom ucugb dag misenohob.

²⁶Ari hom debin gin, kaba, Yesus men logodeh len laugwan merugwengga se dimei mes hom gin deit. Dara Tomas en toua moongga desij len. Dara len louf misis augwan dougwo leng Yahudi namcir touohob. Doba Yesus agunya debin len augwougb se dimei mes ingga deit. Hanoba en ou len, endagai: Allah eic gesgigouhwesa dou yen dougwo areg gecgu augwan namcir.

²⁷Sug en enara dou len dag gin dauwohob, kaba, en eija Tomas. Hanoba en enara dou en, endagai: Ban bin naugb ban beiya dan insira mes ingginahabi, ban bemou absira mob deisa. Hanoba ban bou ban absira bousousa dan inducba meniha mes gin toua. Dauntoba ban bemeija abuwesa dan deitero. Doba ban bod abina debsa dan namcir dag dan deisa dau domom ucugb dag misenohob.

²⁸Sug Tomas eiya gin, kaba, en argobin. Hanoba en enara, endagai: Indeic, ban, kaba, indan Adehsud dara indan Allah ingginohob.

²⁹Doba Yesus enara bauni en mer ucugb, endagai: Ban beiya gini, hang ban abdoc emebdebin an danohobei? Naro. Dangga gareg en emeiya dan se en maires mougwa hombuma, doba en medoc ebdebin an dan augwougb dous, kaba, Allah eic geigouhw medam dou en namcir.

³⁰Dara Yesus aben ganusbus einyana ingma dara abeba men logodeh meriresi. Doba dan demog augwan se indan surad ginero.

³¹Doba ganusbus areg dan dens dou yen se indan surad ginohob, kaba, dan dog dauntoba yen yecinaga dag Yesus gini, kaba, en edag Allah Meisi misen. Dara en edag Sud Hom Geigdoc Yen Dau Sesar Men Gogom Augwan gin toua. Dara dan dog augwan gini se surad, dauntoba yen yecinaga dau sug yen meigdoc ebdebin an en, kaba, dag en emeic maireseb menau geb huhugb dou yen toues.