Read Manikion YOHANES 21 Bible Online

YOHANES 21 - Manikion bible

YOHANES 21

¹Lona aibibra debin sug Yesus ens enin ainyes dou men logodeh se dimei gragohob, kaba, en edens enin ainyes dou men logodeh se Tiberias mebera deit. Doba areg en ens enin ainyes an gin, kaba, men meijouhw dag gini.

²Se lona hom, kaba, Simon Petrus, dara Tomas gedig lusud leija en toua dag lang marogoc agacgecim, dara Nataniel dau cinogo Kana se leng Galilea meren hancob, dara Sebedeus meisi lahwai, dara Yesus men logodeh lahwai gus, kaba, len laugwan ledeigtou se Tiberias mebera.

³Sug len leigtou se Tiberias mebera dag gini, kaba, Simon Petrus enara dou mesir, endagai: Dan dederba diara debin hosei dangga. Doba mesir toua launi dou en, lendagai: Maman maugwanda. Dangga len laugwan leihweda ledeisa ij hom naugb lederba diara debin hosei toua. Doba se loba hom sug len lerba diara gini, kaba, len lemesma hosei homero namcir.

⁴Sug lona esgohob, kaba, Yesus en toua edesa Tiberias meberohob. Doba len lemecinaga en touwero.

⁵Dangga Yesus eijidougwo len, endagai: Indihirija, yen yeic hosei ingma naugb sug matohobei? Doba len launi dou en, lendagai: Emen ememesma hom touwero.

⁶Sug Yesus ouman len merir an gin, kaba, en arougb len, endagai: Yen yerba diara debin hosei dig ij nagama aud yen meisira misen, kaba, yen yemaic hosei ingmes. Dangga sug len laimo en mer naugb lerba diara debin hoseiyohob, kaba, len lesma hosei einyana atij diara mes namcir. Hang emedeinyum naugb sug len leigdoumesan touwero.

⁷Dangga Yesus men godeh hom gedig en medoc gororougb en namcir, kaba, en enara dou Petrus, endagai: Ban beiya maman Adehsud eng inggesa gac. Sug Petrus en ouman dag meren Adehsud inggedesa gac, kaba, en eg men sansun gouji dougwo en ucugb. Hanoba en esogwesa se duhu aud enda. Anai sug en erba diara debin hosei, kaba, en eg men sansun gouji dau enohob.

⁸Doba mesir gus, kaba, len leisa ing mes dangga. Hanoba len lohugouhw diara an hosei einyana dig lonogeda. Anai len lemdeba aigus dau lonogero, doba deinyor dag len lec merohora mougb huntun hom dous.

⁹Sug len lesogwa dau ing mes se lonogohob, kaba, len leiya, doba hosei eb se smougb. Dara roti toua eb desij se smougb mebera deb gini toua.

¹⁰Doba Yesus eijer, endagai: Yen yodo hosei gedig yen yerba diara debin menenau ingga ingmanahabi.

¹¹Sug Petrus ouman Yesus mer an gin, kaba, en toua aingma deisa ingmes. Hanoba len laugwan lesara diara an hosei dig lonogeda. Sug len lesara anim, kaba, len leiya, doba hosei medam mogud dag huntun hom mos sergem homoi edeisu atij diara mes namcir. Doba diara emobogougb an hosei einyana gin touwero.

¹²Sug len lesara diara an hosei dig lonogohob, kaba, Yesus eija len, endagai: Yen yen naugb maman mat hosei dara roti ginahabi. Doba len lahau dau en. Hang sud hom dau len en emeic mos naugb emeijidougwo en ucugb touwero. Anai len laugwan lecinaga dag eni maman Adehsud misenohob.

¹³Sug len laugwan lacinimohob, kaba, Yesus eic roti. Hanoba en ohw an len naugb len laugwan let. Dau, kaba, en eic hosei dou len toua deit.

¹⁴Sug Yesus ens enin ainyes dou men logodeh se Tiberias mebera dag gin, kaba, gini dag mougwa homoi dau lona sug Allah eigdoumesa en dau gomom ucugwohob.

¹⁵Sug len letara bouwa dauwohob, kaba, Yesus eijidougwo Simon Petrus, endagai: Simon, Yona meisi, ban abdoc gororougb dan edreg dau len laugwan ginei? Doba Simon enara bauni ucugb dou en, endagai: Adehsud, ban becinaga dag dan indu ehigehi banohob. Dangga Yesus en dou en deit, endagai: Sug ban abu ehigehi danohob, kaba, ban bagauwesa indan domba.

¹⁶Sug Yesus enara dou Simon Petrus dauwohob, kaba, en eijidougwo en mougwa hom dara deit, endagai: Simon, Yona meisi, ban abdoc gororougb dan dag misen ingginei? Doba Petrus enara bauni ucugb dou en deit, endagai: Adehsud, ban becinaga dag dan indu ehigehi ban dag misenohob. Dangga Yesus en dou en deit, endagai: Ban abu ehigehi dan dag misenohob, kaba, ban bagauwesa indan domba toua.

¹⁷Doba Yesus eijidougwo Petrus mougwa hom dara deit, endagai: Simon, Yona meisi, ban abdoc gororougb dan dag misen namcir ingginei? Dangga Petrus medoc momogo medam, anai Yesus enara barauwi en mougwa homoi icira an ginohob. Hang en enara bauni Yesus mer ucugb dou en, endagai: Adehsud, ban becinaga augwan dag misen namcir. Dangga hang, ban becinaga dag dan indu ehigehi ban dag misenohob. Sug Petrus auni dangga dou Yesusohob, kaba, Yesus arougb en, endagai: Ban bagauwesa indan domba dara geigouhw namcir.

¹⁸Doba ban bouman dan indir gin deigeigouhw deitahabi. Anai sug ban bugdeh mesaba, kaba, len gus lemen dougwo banero. Doba ban bec asa abu naugb ban beihweda sungga sungga baimo dau areg banin bouwan dous. Doba sug ban bedag sud bodohob, kaba, ban bou ban absira hwas dou len gus naugb len lohud darem dous. Hanoba len lahwan ban aud usi gedig banin bemouwanero namcir toua. Areg dan den gini, kaba, dag misen namcir.

¹⁹Doba areg Yesus enara dou Petrus gin, kaba, dauntoba en ecinaga meijouhw deb sug len gus lemeic gomom dagiro dou ena? Anai gini dag en aigdoumesa Allah moho namcir. Sug Yesus enara dangga dou Petrusohob, kaba, en enara mougwa hom dara dou en deit, endagai: Ban beicara baimo dan se indan ucina aud gomom ucan dan toua.

²⁰Sug Yesus ens ucina aud gomom dou Petrus dag gragohob, kaba, Petrus en eineg. Hanoba en eiya, doba godeh hom gedig Yesus medoc gororougb en namcir, kaba, en toua moongga se medigo. Dangga en eijidougwo Yesus, endagai: Adehsud, dagiro naugb godeh hom gina? En toua omomei? Era naroei? Petrus eijidougwo en dag gini, anai se loba sug len letara sug ouwedoc, kaba, godeh hom gin eng eigtou deinyor Yesus. Dara en eng toua eijidougwo maman Adehud se loba ingga dag gareg dau len en ohw en se len gus mesirohoba?

²²Doba Yesus enara bauni Petrus mer ucugb, endagai: Sug sud hom gini en mena agau terim bedebeij sug dan decicugwen, era en omom, kaba, gini aban aremer naugb ban binero. Doba gini ogdoc dan dous. Dangga ban abdoc momogo an ginero. Doba ban, kaba, ban beicara besogwa deisa aban ucina gedig dan dens dou banohob ucan dan dous.

²³Dangga mesir leigdoc loungmen an gini. Hanoba len ledecic dou mesir gus deit dag Yesus men godeh hom gin, kaba, en emomom deitero, doba en maireseb terimda. Dobnaro. Yesus emenara ingma dangga dou Petrusero. Doba en enara dou Petrus dag sud hom gini en omom, era en maireseb terimda edebeij Lona Sug Yesus En Edecicugb, kaba, gini Petrus men aremerero, doba ogdoc Yesus enin dous.

²⁴Gareg en ens dara en og augwan se surad gin, kaba, en toua dau Yesus men logodeh. Dangga emen emecinaga dag areg en ens dara en og gin, kaba, augwan se geica namcirohob.

²⁵Dara dan demog dau Yesus men geicara augwan se surad ginero. Anai sug dan dog dau men geicara astesda hom yom se surad gin, kaba, dan doudesa lusud meren hancob augwan emesa naugb gin touwero.