Read Manikion YOHANES 3 Bible Online

YOHANES 3 - Manikion bible

YOHANES 3

¹Se cinogo Yerusalem gini, kaba, leng Yahudi meren mougt mera medam hom, moho Nikodemus dau leng Parisi, en toua moongga.

²Dangga se loba hom, kaba, en edebeij Yesus naugb edenara dou eni. Sug en edebeij enohob, kaba, en enara baineino Yesus men, endagai: Adehsud, ban beic ganusbus einyana dou emenohob. Dangga hang, emen emecinaga dag Allah esa ban aud emen naugb sug ban bedidib en mer meijouhw augwan asesa dou emen toua. Anai sug Allah emesa sud hom aud emen dag misenero, kaba, en emeic ganusbus dag Adehsud bang ginero.

³Doba Yesus enara bauni en mer gini, endagai: Ban bouman dan indir gin deigeigouhwahabi. Anai ban bouwan Allah oiharaga ban ucugb, kaba, esloulougb naugb ban bedag godeh mahaniheni ucugb deitahabi. Augwan gini asesa dag misen namcir.

⁴Sug Nikodemus ouman Yesus mer an gin, kaba, en ouma medocesero. Hanoba en eijidougwo Yesus ucugb deit, endagai: Adehsud, dan demedag lugdeh mahaniheni se indim menuhwa naugb en emouwadan dan deit, dagiro? Anai dan dedag sud bodohob gina?

⁵Doba Yesus enara bauni en mer ucugb, endagai: Ban bouman dan indir deigeigouhw deitahabi. Sud hom ingma emeinesa Allah men goiharaga ogdoc sug mem ouwadan en dous ginero. Doba ogdoc sug Mena Gogoufu einesa en medoc mes, hanoba eic maireseb menau geb huhugb dou en touahabi.

⁶Anai gareg mem ouwadan en, kaba, en maireseb aimo maga men geicara se cinogo gin dous. Doba sud hom areg Mena Gogoufu einesa en medoc mesohob, kaba, men geicara aimo maireseb menau geb huhugb gin toua.

⁷Dangga hang, ban bemeimiman dau sug dan den dou ban dag yen yaugwan yedag logodeh mahaniheni deit gin touwero. Anai augwan gini aimo dau areg Allah enin esedeb naugb yenohob.

⁸Dara maireseb menau gin, kaba, sud hom ingma emarougb Mena Gogoufu en an touwero. Doba en eic dou lusud aimo dau areg enin ouwan dous. Aninim dag loungmen sug en eisa, kaba, sud hom ingma emarougb en an touwero. Doba en eisa sungga sungga augwougb toua. Hang ban bemecinaga en eisa daugiro, beihwedig touwero. Doba ban bouman en mougb dangga dous.

⁹Doba Nikodemus, kaba, en eijidougwo Yesus ucugb deit, endagai: Augwan gini emacgunog dagiro?

¹⁰Doba Yesus enara debin en, endagai: Ban bedag sud hom gedig en edidib Musa men gomnomna men meijouhw augwan asesa dou leng Israel moho agas ginohob. Dangga dagiro, naugwe hang, ban bemecinaga areg graga augwan ginero?

¹¹Anai areg dan desai dou yen gin, kaba, dan deic areg geb se cinogo daimeh debin gin dou yen touohob. Dangga sug yen meigdoc emebdebin an dan sug dan decic dau areg geb se cinogo daimeh dou yenero, kaba, dagiro yen meigdoc ebdebin an dan sug dan decic dau areg geb se bogo dou yen toua? Naro, yen meigdoc emebdebin an dan sug dan decic dau areg se bogo dou yen touwero. Dara areg emen emesai dou yen dau bogo gin, kaba, emen emesai augwougb dou yen touwero. Doba emen emeiya dara emecinaga augwan dag misenohob. Hang emen emesai dou yen toua. Anai sud hom ingma, kaba, en emeisaugb dig bogo mougwa hom touebma. Doba Lusud Meraguna Mebin gedig dan douwaden dau bogo aud yenohob, kaba, danin dous eng eisaugb dig bogo ginohob. Dobnaro. Sud hom ingma dau yen, kaba, en emouwan naugb ebin areg emen emecic gin se en medoc mesero. Doba yen yotogoto augwan gin namcir. Ban bouman dan indir an areg dan den dou ban gini deigeigouhw terimda. Anai augwan gini asesa dag misen namcir.

¹²

¹³

¹⁴Dara aninim dag Musa eigdoumesa sogo an hinogo dau kermum gohoseri naugb leng Israel se lomougwisa sug nosa, kaba, lusud lemeigdoumesa sogo an Lusud Meraguna Mebin dan toues, aimo dau areg Allah esedeb naugb danohob. Dauntoba gareg en medoc ebdebin an dan dag dan domom taiba sogo salib naugb men sesarohob, kaba, Allah eic maireseb menau geb huhugb dou en toua terimda.

¹⁵

¹⁶Anai Allah medoc gororougb lusud se cinogo gin augwan. Dangga hang, en emeic en Meisi dan dag mogud dou len toua. Dauntoba gareg en medoc ebdebin an dan, kaba, en emomom deitero. Doba Allah eic maireseb menau geb huhugb dou en namcir.

¹⁷Anai Allah emesa en Meisi dan se cinogo gini naugb dan demogod gomom deb naugb lusudero. Doba en esa dan aud len naugb dan deigdoc len dau meren gogom augwan dous.

¹⁸Dangga gareg en medoc ebdebin an Allah Meisi danohob, kaba, Allah emogod gomom deinaugb en se lona daiyamo gacin toua deitero, doba en arges dau namcirohob. Doba gareg en medoc emebdebin an danero, kaba, Allah ogod gomom deinaugb en debohob. Anai en medoc emebdebin an Allah Meisi mohora hom danero, doba en asidged danohob.

¹⁹Dara Allah emogod aremer gomom gini deinaugb lusud augwougb touwero. Doba en ogod deinaugb len, anai en ens areg asesa enin medoc mes augwan dag mouf dou len deb nosohob. Doba lusud merdoc mes gororougb meren geicara gecgu gin terimda. Dangga hang, len lemaimo areg se mouf gin touwero, doba len laimo areg geb se lobeigbogo dous.

²⁰Anai gareg en medoc gororougb men geicara gecgu gini, kaba, en emen naugb emeinesa mouf touwero. Doba en medoc esdigeij mouf gin namcir. Anai en ecinaga dau sug en einesa mouf ginohob, kaba, dag mouf ens men geicara gecgu gini eb ainyes dou en toua. Dangga hang, en emouwan gin touwero.

²¹Doba gareg en ouwan eicara baimo areg asesa Allah enin medoc mes, kaba, en emeigtou se lobeigbogo deitero, doba en einesa mouf. Dauntoba mouf ens men geicara eb ainyes dou lusud dag men geicara augwan gin, kaba, aimo areg asesa Allah enin medoc mes dag misenohob.

²²Sug len lougwanaresa Lona Gohw Bedreg dauwohob, kaba, Yesus dara men logodeh leihweda se leng Yudea meren hancob naugb en eigtou desij men logodeh sungga se lona aibibra. Hanoba en ogun lusud se duhu toua.

²³Dara Yohanes en toua ogun lusud se duhu se usi hom moho Ainon deinyor cinogo Salim. Anai sungga, kaba, duhu einyana. Dangga lusud leinyana len len aud en naugb en ogun len se duhu toua.

²⁴Aremer augwan gini acgunog sug Herodes emouf Yohanes se tu gesisugbuma.

²⁵Doba sug Yohanes men logodeh len leiya Yesus en ogun lusud se duhu toua, kaba, len len aud en naugb leijidougwo en an gini. Anai len merir laised sud hom dau leng Yahudi endag gareng men ucina eic len merdoc ecabeci deseino Allah ena?

²⁶Dangga sug len ledebeij enohob, kaba, len lenara dou en, lendagai: Adehsud, ban abdoc eiseisan sud hom grag ban bens dou emen sug en agunya debin maman se Yordan mebera dig igda eisaugb sug nosohobei? Anai iteitogin, kaba, en ogun lusud se duhu. Dara lusud laugwan louwa aud en toua. Hang men ucina gin toua eigouhwei? Era naroei?

²⁷Doba Yohanes auni dou len, endagai: Aremer augwan dag gin, kaba, emen dau lusud lenin merdoc mesero. Doba aimo dau areg Allah enin ouwan naugb en eic dou lusud dous.

²⁸Dara yenin yecinaga sug dan den dou yen sug nosa, kaba, dag dan demeigdoumesa danin indoho dag Sud Hom Geigdoc Yen Dau Sesar Men Gogom deseino yen touwero. Doba dan den dou yen dag dan deino en men naugb desedeb ucina deb naugb en dous.

²⁹Anai sug sud hom eic mesouwa, kaba, en mesouwa gini emeb naugb en mesi ginero. Doba eb naugb mesuwa gin dous. En mesi misen, kaba, en eigtou se misis moc naugb en ouman dau sug mesi enara dou mesouwohob. Dangga sug en ouman, doba mesuwa enara geigouhw dou mesouwa ginohob, kaba, en medoc agahugouhw an mesi gin namcir. Hang iteitogin, kaba, dan indoc agahugouhw an sud hom gin toua terimda. Anai en, kaba, dag sud hom geic mesouwohob. Doba dan dedag en mesi misen dous.

³⁰Dara en moho, kaba, eisaugb dig gadeda namcir. Doba dan indoho, kaba, eb tainya dig gaihida dous. Anai augwan gini aimo dau areg Allah esedeb sug nosohob.

³¹Gareg en ouwaden dau bogo, kaba, en moho edreg dau areg gus augwan namcirohob. Anai gareg dau cinogo gin, kaba, eni aninim dag lusud se cinogo gin dous. Hanoba men geicara dara areg en en, kaba, augwan gini dag lusud meren geicara gin toua terimda. Doba gareg en en dau bogo, kaba, en moho agas bedreg dau augwan namcir. Anai en emen dau cinogo ginero, doba en dau bogo ginohob.

³²Hang en ens dau areg en eiya dara areg en ouman se bogo augwan asesa dou maman touohob. Doba sud hom ingma, kaba, en medoc emebdebin an areg en en dou maman gin touwero.

³³Doba gareg en ebin areg en esai dou maman gini se en medoc mes, kaba, en ouma debin Allah dag en mer gin, kaba, mer areibahau touwero, doba mer misen namcirohob.

³⁴Dangga hang, sud hom gareg Allah esa en aud mamanohob, kaba, en emereiyara dou maman touwero. Doba areg en esai dou maman gin, kaba, dag geica namcir. Anai sug Allah esa Mena Gogoufu se en medoc mes, kaba, en emekeba ingma dauwero. Doba en esa augwan batij bobdaga se en medoc mes ginohob.

³⁵Dara en Mena medoc gororougb en Meisi. Hanoba en eigdoumesa en moho dag mougt mera medam naugb augwan gin touohob.

³⁶Dangga gareg en medoc ebdebin an Allah Meisi mohora hom ginohob, kaba, Allah eic maireseb menau geb huhugb dou en toua. Doba gareg en emaimo Meis gin en merero, kaba, en emdesma maireseb huhugb gin touwero. Doba Allah medoc esrougb an en namcir naugb en eic gogom dou en toua terimda.