Read Manikion YOHANES 4 Bible Online

YOHANES 4 - Manikion bible

YOHANES 4

¹Dara leng Parisi len toua louman dau Yesus dag lusud leinyana lou audi en. Dara en ogun leinyana bedreg dau Yohanes gin touohob.

²Dobnaro. Yesus enin, kaba, en emogun lusud se duhwero. Doba men logodeh len dous eng logun len se duhu gini.

³Dangga sug Yesus ecinaga dag leng Parisi len toua louman dau ginohob, kaba, en emeigtou se leng Yudea meren hancob gin debero. Doba en eihwededau sungga dig leng Galilea meren hancob deitda.

⁴Doba sug en eihweda, kaba, Allah out en mebes naugb en eraga leng Samaria meren hancob. Anai gini aimo dau areg Allah esedeb naugb en sug nosohob.

⁵Dangga sug en eragasa leng Samaria meren hancob gin, kaba, en edebeij cinogo hom, moho Sikar. Cinogo gini, kaba, deinyor Yakub men sesa gen eic dou en meisi Yusub sug nosohob.

⁶Dara Yakub men cinogo mes naugb duhu toua eb deinyor Sikar gini. Dangga sug Yesus en ec bedebeij cinogo mes inggohob, kaba, en eigtou debin en mog sungga. Anai deinyor igdabogo, dara en mog toua omsires namcirohob.

⁷Sug en eigtou debin en mog dag gin, kaba, gida hom dau leng Samaria en en dau cinogo ingga naugb en edagain duhu se cinogo mes gini. Dangga Yesus acgeij en an duhu, endagai: Ban bagain duhu ingma dou dan didegahabi.

⁸Yesus acgeij gida gini, anai men logodeh laugwan leihweda naugb ledouma ared se beimes dau enohob.

⁹Sug gida ingga en ouman, doba Yesus acgeij en an duhu, kaba, en eija medocesa an gin namcir. Anai leng Yahudi, kaba, len lousan lenin dau leng Samaria namcir. Dangga hang, en enara bauni dou Yesus ucugb deit, endagai: Dagiro, naugwe hang, ban bacgeij dan an duhu. Anai ban, kaba, dau leng Yahudi. Doba dan, kaba, dau leng Samaria gina?

¹⁰Doba Yesus enara bauni en mer ucugb deit, endagai: Ban bemecinaga dau areg Allah esedeb naugb en eic dou ban dag misenbuma. Dara ban bemecinaga dang dacgeij ban an duhu gin dag misen touebma. Anai sug ban becinaga dan dag misenohob, kaba, ban bemeic duhu dou danero. Doba ban eng bacgeij duhu dau dan dous. Anai duhu gedig dan deic dou ban gini, kaba, eic maireseb geb huhugb dou ban namcir.

¹¹Sug gida ingga ouman dau gin, kaba, en enara baised Yesus mer, endagai: Adehsud, ban bemeic areng bemagain duhu geic maireseb huhugb gin dou dana? Anai cinogo mes gin, kaba, aga deisa medam namcirdaha.

¹²Ban eng aboho agas edreg dau emen emjemouwa Yakubei? Anai enin eng ogo cinogo gin deb naugb emen. Hanoba enin an en mehir dara men aremeta, len laugwan leg dau duhu gin toua, doba len laugwan lomom dauwohoba?

¹³Doba Yesus enara bauwun en mer ucugb deit, endagai: Gareg en eg duhu dau cinogo mes gini, kaba, cum merijeben ucugb deit.

¹⁴Doba gareg en eg duhu gedig dan deic dou en gini, kaba, merijemeba en deitero. Anai duhu gedig dan deic dou en, kaba, aninim dag mer edeij bohw besesa se en medoc mes. Hang eic maireseb huhugb dou en toua namcir.

¹⁵Sug gida graga en ouman Yesus mer an gin dangga, kaba, en acgeij en an duhu gini, endagai: Adehsud, ban beic duhu areg ban ben dou dan graga dou dan dideg iteitogini. Dauntoba merijemeba dan, kaba, dan demen naugb demdagain duhu sugin toua deitero.

¹⁶Doba Yesus enara bauni en mer. Hanoba en arougb en, endagai: Ban beihwedesa aban tu naugb ban bedahwan ban absuwa toua en en suginahabi.

¹⁷Doba gida enara dougwo en mer, endagai: Dan insuwa ingmaro.

¹⁸Sug Yesus ouman dau gin, kaba, en ousa deisa en mer an, endagai: Areg ban ben dou dan gini, kaba, asesa dag misen namcir. Anai sug nosa, kaba, ban bes ban absuwa merug sergemohob. Doba giji hom geic ban daiyamo gini, kaba, en emedag ban absuwa misen touwero. Dangga areg ban ben dou dan gini, kaba, se geica namcirohob.

¹⁹Sug gida ouman Yesus ens dau men geicara augwan asesa dou enohob, kaba, en ousa deisa en mer an, endagai: Indeic, ban, kaba, bedag sud hom gesai Allah moro dou lusud dag misenohob.

²⁰Sug gida ingga eigdoumesa Yesus moho dauwohob, kaba, en eijidougwo en an deit, endagai: Emen emjemouwer, kaba, len lesijaresa Allah se menmod gada. Doba yeng Yahudi, kaba, yen yen dougwo emen, yendagai: Allah en ouwan naugb maman maugwan masijaresa en se men Tuari se Yerusalem hom dous.

²¹Doba Yesus enara bakebin gida ingga en mer ucugb deit, endagai: Daneh, yeng Samaria, kaba, yen yesijaresa, doba yen yemecinaga sud hom gedig yen yesijaresa ginero. Emeng Yahudi, kaba, emenin dous eng emecinaga sud hom ginohob. Anai Sud Hom Geigdoc Lusud Dau Meren Gogom Augwan, kaba, en en dau emen meijouhuda hom gini.

²²Doba inggaida. Anai cum, kaba, lusud lemesijaresa maman Mamina Allah se meijen menmod gini dara Yerusalem toua deitero.

²³Doba lona ebeij deinyorohob naugb sug len lesijaresa en se geica namcir engga. Anai Mena Gogoufu ens areg asesa Allah enin medoc mes augwan dou lenohob. Anai augwan gin, kaba, aimo dau areg Allah enin ouwan dangga.

²⁴Dara maireseb menau geb huhugb gini, kaba, en dau Allah enin dous. Anai en kaba, eni Mena misen. Dangga hang, lusud areg len louwan lesijaresa Allah dag misen, kaba, esloulougb naugb Mena Gogoufu eic maireseb menau geb huhugb dou len, dara en ens areg asesa Allah enin medoc mes dou len nosahabi, len lemesijaresa en toua dag misen namcir. Anai gini aimo dau areg Allah ogod an deb sug nosohob.

²⁵Doba gida graga, kaba, en enara baunun Yesus mer deit, endagai: Dan decinaga sug Sud Hom Geigdoc Maman Dau Maman Gogom Augwan en en, kaba, en ens meijouhw dau aremer augwan dag misen dou maman toua.

²⁶Doba Yesus auni dou en. Hanoba en ens enin dou en, endagai: Dan indugwengga, denara dou ban gini.

²⁷Sug Yesus auni dou gida ingga inegaba, kaba, men logodeh toua ledagunyohob. Dangga sug len leiya, doba Yesus enara dou gida gin, kaba, len leimiman dau gin namcir. Doba sud hom ingma emeijidougwo gida ingga an areg en ouwan. Dara sud hom ingma emeijidougwo Yesus an men mou genara dou gida gin touwero. Doba len laugwan lesa dag lodinanir namcir.

²⁸Dangga gida ingga en arges men debecij dougwo duhu deb sungga. Hanoba en obga ucugb dig beimes naugb en edenara dou men lusud.

²⁹Sug en edebeij lenohob, kaba, en enara dou len, endagai: Yen yin naugb yideiya sud hom geigtou dougwo Yakub men cinogo mes gadahabi. En edag Sud Hom Geigdoc Maman Dau Maman Gogom Augwan gragenggei? Era naroei? Anai en ens indan geicara augwan asesa dou danohob.

³⁰Sug len louman gida mer an ginohob, kaba, len laugwan len dau cinogo ingga naugb len ledeiya Yesus sug eigtou dougwo cinogo mes graga.

³¹Irir sug gida graga edahwan men lusud dau beimes ingga, kaba, Yesus men logodeh leic ared laganini en, lendagai: Adehsud, ban bet ared ginahabi.

³²Doba Yesus enara bauni dou len ucugb, endagai: Indan ared inggeb dara dan ginohob. Doba yen yemecinaga dau ginbuma.

³³Sug men logodeh louman gin, kaba, len leijidougwom ucucugb, lendagai: En emouwan ared debin maman ginero, kaba, ligbum len len naugb ledeic ared dou en betohobei?

³⁴Sug Yesus ouman len merir an gin, kaba, en ens meijouhw eisaugb gini asesa dou len deit, endagai: Indan ared, kaba, dag dan daimo areg asesa Allah enin medoc mes dous. Dara dan daimo en mer an areg en arougb dan an gini augwan terimda edebeij sug ouwedoc gin toua.

³⁵Sug Yesus ens meijouhw dau men ared asesa dou men logodehohob, kaba, en eic gainyenara hom ucan dou len deit. Dauntoba len lemeigtou lemateteij lusudero. Doba len lahwan len dedemeda naugb Allah eic maireseb huhugb dou len touahabi. Hanoba en enara dou len, endagai: Sug yen yeba meij, kaba, yen yos igda doum, yendagai: Igda hogu deitahabi, kaba, maman ared se maman lo emohoseri naugb maman mameic meij deb. Doba dan denara dou yen naugb yen yemeigtou yemateteij deitlo. Doba yen yesa yauweilahabi. Anai ared se lo augwan ohoser namcir naugb sug yen yeic meij debohob.

³⁶Dangga yen yemeisan gurog dau ginlo. Doba yen yeic meijuwemougb esesa naugb yen youci meij gin debinim terimda. Anai meij gin, kaba, emetaha touwero, doba eb beb huhugb namcir. Dara meijen geicara gini, kaba, dag mogud touwero. Doba Allah esedeb naugb en eic siouwa dou yen an gin touohob. Dangga, kaba, sud hom geba meij dara sud hom geic meij debinim, kaba, lan lahwas mardoc eigouhw an gin namcir toua.

³⁷Augwan gini aimo dau meijen aremeijouhw dag misen touohob. Anai yen yenara, yendagai: Sud hom en eba meij. Dara sud hom gus, kaba, en esedeh naugb sug en eic meij baihiro deb deit.

³⁸Dangga dan toua darougb yen naugb yen yedouci meij debinim se lo gedig yen yemeba meij ingma deb nosa habero. Anai len gus, kaba, len leic merug erij naugb leba meij gini deb nosohob. Doba yen, kaba, yen yedec mera dau gin dous.

³⁹Sug Yesus esulou men logodeh dauwohob, kaba, leng Samaria dau cinogo Sikar gini, len toua ledagunya debin len. Sug len lenohob, kaba, len laganini en, lendagai: Adehsud, ban batou desij emen suginahabi. Len lacgeij en dangga, anai gida graga edenara dou len dag Yesus ens dau men geicara augwan asesa dou enohob. Hang len toua lod merna deisa Yesus en edag sud hom Geigdoc Len Dau Meren Gogom Augwan. Sug len laganini en dag ginohob, kaba, Yesus aimo len merir. Hanoba en atou desij len se loba hwai sungga naugb en edidib Allah mer men meijouhw augwan asesa dou len toua.

⁴⁰

⁴¹Dangga lusud leinyana deit sug len louman dau areg Yesus edidib dou len gin, kaba, len merdoc ebdebin an en, dag eni Sud Hom Geigdoc Len Dau Meren Gogom Augwan touohob.

⁴²Hanoba len lenara dou gida graga ucugb, lendagai: Iteitogini, kaba, emen emdoc ebdebin an en emogdoc areg ban beden dou emen deitero. Doba ogdoc areg enin edidib dou emenohob. Anai emenin ouman dau enin mers teisisohob. Dangga hang, emen emecinaga dag eni sud hom geigdoc mamang se cinogo augwan dau sesar men gogom aud maireseb menau geb huhugb dag misen namcirohob.

⁴³Sug Yesus eigtou desij leng Sikar graga se lona hwaiyohob, kaba, en emecicugb dig leng Yudea meren hancob deitero. Doba en eihwedig leng Galilea meren hancob dous.

⁴⁴Anai Yesus enin ens dau leng Yahudi meren aremeijouhw hom dou men logodeh deb nosohob, endagai: Sug sud hom en esai Allah moro dou lusud, kaba, lugmahara lebin en mer an gini. Doba sug en ecicugb dig enin men cinogo, kaba, men lusud lemeigdoumesa en moho an gin touwero. Dangga hang, en eihweda naugb en eigtou desij lusud se leng Galilea meren hancob gin dous.

⁴⁵Sug en edebeij meren hancobohob, kaba, len leinyana lesa dagasa naugb lebin en. Dara len merdoc agahugouhw an en toua namcir. Anai sug len lougwanara debin Lona Gohw Bedreg se Yerusalem, kaba, len leiya dau men geicara dag ganusbus augwan touohob.

⁴⁶Sug len lesa dagasa Yesus dauwohob, kaba, en eihweda naugb en atou desij len se cinogo Kana se leng Galilea meren hancob deit. Sungga, kaba, en eperwei duhu dag anggur mohu deb nosohob. Dara se cinogo Kapernaum se leng Galilea hancob ingga, kaba, mougt mera medam men gedeijan en toua moongga. En meisi areba medam.

⁴⁷Sug en ouman dag Yesus ecicugb dau Yudea dig leng Galilea meren hancobohob, kaba, en eihwededau Kapernaum dig Kana naugb en edenara dou Yesus. Anai en meisi areba medam dag ahauwohob. Dangga sug en edebeij Yesusohob, kaba, en acgeij en, endagai: Ban baimo dani naugb ban bedeic geigouhw dou dan indisahabi. Anai eni deinyor omom se cinogo Kapernaum gaihohob.

⁴⁸Doba Yesus enara bagod dougwo en mer, endagai: Yen youwan dan dens ganusbus dara gansins dou yenahabi, yen meigdoc emebdebin an dani. Doba mogud, kaba, yen meigdoc emebdebin an danero.

⁴⁹Doba sud hom gedeijan mougt mera medam gin, kaba, en agodgod Yesus namcir, endagai: Adehsud, ban baimo dan dedemeda sug dan indisi en emomombuma.

⁵⁰Doba Yesus en arougb en, endagai: Ban beihweda. Anai ban abisi eigouhwohob. Sug sud hom gini en ouman dag en meisi eigouhwohob, kaba, en od mena debsa Yesus mer an gin namcir. Hanoba en ecicugb dig men tueda.

⁵¹Sug en ecicugb, doba en edebeij se ucina mogumsi, kaba, men sogougwir ledagaseni. Hanoba len len dou en, lendagai: Ban abisi eigouhwohob.

⁵²Sug en ouman dau gini, kaba, en eijidougwo len ucugb deit, endagai: Dan indisi eigouhw aisohoba? Hang len launi dou en, lendagai: Mos gesrougb augwan obsara dau en se igda ehin maga giyohob.

⁵³Sug sud hom gini en ouman men sogougwir merir an gin dangga, kaba, en mena eiseisan sug igda ehin maga gia, kaba, Yesus enara dou en dag en meisi eigouhw ginohob. Dangga hang, eni dara leng leigtou desij en se men tu, kaba, len laugwan merdoc ebdebin an Yesus toua.

⁵⁴Ganusbus hom gin, kaba, goucan ganusbus hom gedig Yesus aben dou leng Galilea se cinogo Kana gin nosa. Hang edag ganusbus gedig hwaiyohob.