Read Manikion YOHANES 6 Bible Online

YOHANES 6 - Manikion bible

YOHANES 6

¹Lona hosa debin gin, kaba, Yesus an men logodeh len leisa ij dig Galilea, era Tiberias, nagama deit.

²Dara lusud leinyana leila ucan len toua. Anai len leiya dau ganusbus sug Yesus eic geigouhw dou leng areber leinyana sug nosohob.

³Sug Yesus dara men logodeh len ledebeij nagamohob, kaba, len leisaugb se mengarougb hom naugb leigtou sungga.

⁴Doba lona sug len leisaugb dig men gorougb gin, kaba, deinyor lona sug leng Yahudi len lougwan ared debin meren Lona Gohw Bedreg gin touohob.

⁵Dangga sug Yesus esa bauweila, doba lusud leinyana len len aud en, kaba, en eijidougwo men godeh hom, moho Pilipus, endagai: Maman mameic ared daugiro naugb maman mameic dou lusud leinyana gouji gina?

⁶Doba en eijidougwo Pilipus naugb en ainyen en dangga dous. Anai enin ecinaga men geicara an gin augwan edeinyumohob.

⁷Doba Pilipus enara bauni Yesus mer ucugb, endagai: Maman mameic aregoufu edeinyum naugb sug maman mauma ared dou len leinyana gin dagiro? Anai gini et perag mogo huntun hom naugb sud hom et mehir mougwa hom dous dangga.

⁸Dara sud hom dau Yesus men logodeh hom deit, en moho Andreas, Simon Petrus magto, en toua enara bouwasi Pilipus mer an gini, endagai: Eisaugb ared, kaba, godeh hom men roti mogo sergem dara hosei magac hwai, isinggini. Doba gini emedeinyum naugb lusud leinyana gouji gin dagiro?

⁹

¹⁰Doba sungga, kaba, aremon geigouhw toua moongga. Dangga, kaba, Yesus arougb men logodeh, endagai: Yen yen dou lusud gin laugwan leigtouahabi. Sug len len dou lenohob, kaba, len laugwan leigtou se aremon ingga toua. Dau leng leigtou gin, kaba, len lecic ligiji mogud dous, kaba, merug ribu sergem.

¹¹Sug len laugwan leigtousohob, kaba, Yesus os roti graga. Hanoba en en sijo dou Allah toua. Sug en en sijo dou en dauwohob, kaba, en eic roti dou men logodeh naugb len lohw anir toua. Gin dauwohob, kaba, en eic hosei dou men logodeh lohw anir dag gin toua. Hang len laugwan letara medam namcir.

¹²Sug len laugwan letara beicer namcirohob, kaba, Yesus arougb men logodeh, endagai: Yen youci ared mougwu augwan debinim se aigdaga mes, dauntoba hom emebero.

¹³Dangga sug len louci ared mougwu dau roti mogo sergem gedig lusud let dau gin debinimohob, kaba, len leisgoho se aigdaga mes sisa hobjerai atij an namcir.

¹⁴Sug lusud leiya dau Yesus men ganusbus gini, kaba, len lenara doum, lendagai: Indeic, sud hom gin, kaba, sud hom grag Allah esedeb en naugb en esai en moro eisaugb Mesias sug en en dou maman se cinogo gin deit, eng gini.

¹⁵Doba Yesus ecinaga dag len louwan lagaigeij en deb naugb len leigdoumesa en moho dag mougt mera medam naugb len deit. Dangga hang, en asid enin aigus se menmod hom dau len toua.

¹⁶Sug Yesus men logodeh leigtou naugb en terimda igdedeij deinyor lobohob, kaba, len louwada dig Galilea mebera naugb len leihwedig Kapernaum ucugb deitda. Dangga sug loba dougwo Yesus namcirohob, kaba, len leisa ij ino dau en dig Kapernaum toua. Anai en emen aud len touebma.

¹⁷

¹⁸Sug len leisa ij ginda, kaba, loungmen medam eisa. Hang duhu toua oc medam namcir.

¹⁹Doba sug len leisa ij ledebeij se duhu medi taijohob, kaba, len leiya Yesus ec mohora se duhu mod ucan len bedebeij deinyor lenohob. Dangga hang, len lahau dareg merug omom an namcir.

²⁰Doba Yesus oho mer debin len, endagai: Yen yemahaulo. Anai dan Yesus eng doucan yen ginin.

²¹Sug len louman Yesus enin mer asesa, kaba, len merdoc emahau deitero. Doba len lebin en naugb en eigtou desij len se ingmes toua. Sug Yesus aingmo desij len se ingmes inegohob, kaba, ij toua edos us nagama ginohob.

²²Loneinda deit sug lusud gedig len latou deb dig nagama len leisa dau latouda, kaba, len merdoc eica dag loba greb, kaba, ij homto dous inggebga. Dara len lecinaga dau sug Yesus men logodeh len leisa ij, kaba, dag Yesus emaingmo desij len touwero, doba en eigtou deb dous.

²³Hang len merairesi lahilon dougwo Yesus, doba len lemeiya enero. Doba sug len leicara dag gin, kaba, leng dau cinogo Tiberias ingga len ledeic meren ij hosa deb se usi irir sug maman Adehsud en en sijo dou Allah aga roti naugb len let giohob.

²⁴Dangga sug len lecinaga, doba Yesus mogero. Dara men logodeh toua len leisa ij dau lenohob, kaba, len laingmo leng Tiberias meren ij aibibra naugb len ledehilon Yesus an men logodeh se Kapernaum deitda.

²⁵Sug len ledebeij dig nagamohob, kaba, len ledeiya Yesus en toua moongga. Hanoba len leijidougwo en, lendagai: Adehsud, ban ben aisohoba?

²⁶Doba Yesus owun len meroho namcir. Hanoba en enara dou len, endagai: Yen yemehilon dan an ganusbus gedig dan dens dou yen gia ginero. Doba yen yehilon dan an ared gedig yen yet beijeijohob gin dous. Anai yen meiju emobgesa meijouhw dau ganusbus ingga augwan dag misen touebma.

²⁷Dobnaro. Yen yemeic meijuwemougb esesa icira ared misen ginlo. Doba yen yeic meijuwemougb esesa icira ared gedig Lusud Meraguna Mebin dan deic dou yen dous. Anai ared misen, kaba, etaha bediyebeiya ucugb dangga. Doba ared gedig dan deic dou yen, kaba, emetaha bemediyebeiya deitero. Doba eic maireseb huhugb dou yen terimda. Anai dan Indina Allah ouma debin dan dag dan indoho agas edeinyum naugb ginohob. Yen youman dan indir an areg dan den dou yen gin deigeigouhw. Anai augwan gini asesa dag misen namcir.

²⁸Sug len louman dag gini, kaba, len leijidougwo en ucugb, lendagai; Emen emeicara dagiro, dauntoba emen emaimo areg asesa Allah enin medoc mes gina?

²⁹Dangga Yesus auni dou len, endagai: Areg asesa Allah enin medoc mes, kaba, dag yen meigdoc ebdebin an dan, en eng esa dan aud yenohob.

³⁰Doba len leija launi ucugb dou en deit, lendagai: Ban besedeb ganusbus dag ara naugb ban bens dou emen. Dauntoba sug emen emeiya dau gini, kaba, emen emdoc ebdebin an ban dag Allah esa ban aud emen dag misenohob.

³¹Anai emen emjemouwer, kaba, Musa eic ared, moho mana dau bogo dou len se lomougwisa sug nosa naugb len letohoba? Augwan gini esogwa deisa areg len log deb se Surad Injil Meb Mohon deb sug nosa touohob, lendagai: En eic ared dau bogo dou len naugb len let.

³²Doba Yesus auni dou len, endagai: Yen youman dan indir deigeigouhwahabi. Areg Musa eic dou yen meijemouwer se lomougwisa sug nosa, kaba, ared misen dau bogo touwero. Doba areg dan Indina enin eng eic dou yen, kaba, gini ared misen dau bogo dous.

³³Anai ared misen gedig en eic dou yen gin, kaba, dag sud hom gen dau bogo naugb en eic maireseb menau geb huhugb dou yen se cinogo augwan toua. Areg dan den dou yen gini, kaba, asesa dag misen namcir.

³⁴Sug lusud louman en mer an gin, kaba, len lacgeij en, lendagai: Adehsud, emen emouwan naugb ban beic ared gin eng mogud dou emen besesa terimda.

³⁵Dangga hang, Yesus ens enin ainyes dag misen dou len toua, endagai: Gareg en en aud dan, kaba, sir emeba en deitero. Dara gareg en medoc ebdebin an dan, kaba, merij emeba en touero. Anai danin eng dedag ared geic maireseb menau geb huhugb dou lusud dous.

³⁶Dara yen yecinaga dan dedag roti misen geic maireseb menau geb huhugb dou lusud. Anai yen yeiya dau ganusbus areg dan daben deseino yenohob. Doba yen meigdoc emebdebin an dan touwero, aimo dau areg dan den dou yen touohob.

³⁷Doba astesda sud hom gareg dan Indina en eic len dou dan deb sug nosohob, kaba, len eng len aud dan toua. Dara gareg en en aud danohob, kaba, dan demecicugb en touwero. Doba dan debin en beigtou desij dan beb huhugb namcir.

³⁸Anai dan demouwaden dau bogo naugb dan demaimo areg dau danin indoc mesero. Doba dan douwaden dau bogo naugb dan daimo areg asesa sud hom gesa dan aud yen enin medoc mes gin dous.

³⁹Dara areg sud hom gesa dan aud yen en ouwan, kaba, dag dan insira emagada sud hom ingma dau gareg en eic dou dan deb gin touwero. Doba dan demeigdoumesa len laugwan dau gomom se lona gouwedoc toues.

⁴⁰Dangga gareg en medoc eica Allah Meisi dan, hanoba en medoc ebdebin an dan toua, kaba, en emomom deitero. Doba dan demeigdoumesa en se Lona Gouwedoc naugb dan demeic maireseb menau geb huhugb dou en toues. Anai augwan gini aimo dau areg dan Indina enin ogod an deb sug nosohob.

⁴¹Sug leng Yahudi graga len louman, doba Yesus ens enin dag roti misen gouwaden dau bogo dou lenohob, kaba, len logurgur an en mer gini namcir.

⁴²Hanoba len lenara doum, lendagai: Sud hom gin, kaba, Yusub en Meisi Yesus enei? Era naroei? Anai maman macinaga en mena dara mem lan toua asesohoba? Dangga dagiro, naugwe hang, en enara dou maman dag en edag ared misen gouwaden dau bogo naugb mamanohoba?

⁴³Doba Yesus etaha len merir an, endagai: Yen yemeijidougwom eisaugb dan doum ucucugblo.

⁴⁴Anai sud hom ingma, kaba, en emen aud dan augwougwero. Doba en en aud dan ogdoc sug dan Indina enin eng arautut en dous. Hang dan demeigdoumesa en dau gomom aud maireseb menau geb huhugb se Lona Gouwedoc toues. Anai dan Indina enin eng esa dan aud yenohob.

⁴⁵Augwan gini aimo dau areg leng lesai Allah en moro sug nosa len log deb se Surad Injil Meb Mohon deb sug nosa touohob, lendagai: Se lona daiyamo gacin, kaba, Allah enin emedidib aremeijouhw augwan asesa dou lens. Dangga gareg en medoc edag beim an dan Indina an en mer gini, hanoba en medoc eica en an toua, kaba, len lemotogoto danero, doba len len aud dan toua terimda.

⁴⁶Doba areg dan den dou yen graga, kaba, gini meijouhw dag len leiya dan Indina en mebes dara len merairesi gin touohobei? Naro, gini men meijouhwero. Anai sud hom ingma, kaba, en emeiya dan Indina dara en maires mougwa hom touebma. Doba danin dous eng deiya dan Indina dara dan indiresohob. Anai danin dous eng den dau Allah aud yenohob.

⁴⁷Dangga yen youman dan indir ginahabi. Gareg en medoc ebdebin an dan, kaba, en emomom deitero, doba maireseb huhugb eb naugb enohob.

⁴⁸Anai danin eng dedag roti geic maireseb huhugb dou yen dous. Augwan gini asesa dag misen namcirohob.

⁴⁹Anai yen meijemouwer, kaba, len let ared, moho mana se lomougwisa sug nosa. Doba len laugwan lomom andohob.

⁵⁰Doba gareg en et roti gen dau bogo gin, kaba, en emomom deitero. Doba maireseb huhugb eb naugb en namcir.

⁵¹Danin eng dedag roti gouwaden dau bogo naugb dan deic maireseb menau geb huhugb dou lusud. Dangga gareg en et ared gin, kaba, en emomom deitero. Doba maireseb huhugb eb naugb en namcir. Dara ared gedig dan deic dou en gin, kaba, dag dan indug gedig dan deic dou lusud se cinogo augwan. Dauntoba len lemomom deitero, doba maireseb menau geb huhugb eb naugb len laugwan toua terimda.

⁵²Doba sug leng Yahudi louman dau gini, kaba, len merdoc esrougb medam an en namcir. Hanoba len lenara merir edregim ucucugb, lendagai: Sud hom gin, kaba, en eic en mog dag ara dou maman naugb maman mata?

⁵³Dangga Yesus ou mesira mougwa hom ucan dou len deit, endagai: Yen youman dan indir an gin toua deitahabi. Sug yen yemet Lusud Meraguna Mebin dan indug, dara yen yemeg dan indugwihi ginero, kaba, maireseb menau geb huhugb emeb naugb yen touwero.

⁵⁴Doba gareg dau yen en et dan indug, dara en eg dan indugwihi, kaba, en emomom deitero. Doba dan demeigdoumesa en dau gomom aud maireseb huhugb se lona gouwedoc gin toues.

⁵⁵Anai dan indug dag ared misen. Dara dan indugwihi dag duhu misen gin dous.

⁵⁶Dangga gareg en et dan indug, dara en eg dan indugwihi, kaba, aman amahwas dag homohob. Augwan gini asesa dag misen namcir.

⁵⁷Dan Indina gedig en eic maireseb huhugb dou lusud, kaba, enin eng esa dan aud yenohob. Sug maireseb huhugb eb naugb en dag ginohob, kaba, dan demomom touwero. Doba maireseb huhugb eb naugb dan ogdoc en touohob. Dangga gareg dau yen en et dan indug gin, kaba, en emomom toua deitero. Doba maireseb huhugb eb naugb en toua terimda, anai aman amahwas dag homohob.

⁵⁸Dangga roti gouwaden dau bogo gin, kaba, aninim dag ared gedig yen merjemouwer len let se lomougwisa sug nosa ginero. Anai areg len let gin, kaba, ared misen dous. Hang emeic maireseb huhugb dou len touwero, doba len lomom andohob. Doba gareg dau yen en et roti gouwaden dau bogo gini, kaba, en emomom deitero, doba maireseb huhugb eb naugb enohob.

⁵⁹Areg Yesus en en dou leng Yahudi meren mougtir gin, kaba, en ebedbed dou len se meren tuari se Kapernaum.

⁶⁰Doba Yesus men logodeh leinyana, kaba, len toua merugwengga desij len gini. Dangga sug len louman dau areg en enara dou lusud dag gragohob, kaba, len logurgur an en mer gini. Hanoba len lenara doum, lendagai: Maman mamouman en mer an areg en en dou len ginlo. Anai areg en en dou len gin, kaba, edreg dau maman mamdoc mes namcirohob.

⁶¹Doba len lemenara dau gin dou Yesusero. Doba en, kaba, en ecinaga dag len logurgur eisaugb en mer graga dag len let en mog dara len leg en mogwihi ingga augwougb ginohob. Hanoba en eijidougwo len, endagai: Areg dan den dou lusud graga, kaba, eic yen meigdoc momogo dou yen, hang yen yemasid yenin dau dan touei?

⁶²Sug yen meigdoc momogo an areg dan den dou lusud gragohob, kaba, dagiro, naugwe hang, sug yen yeiya Lusud Meraguna Mebin dan decicugb se dan dugun deseino yen, kaba, yen meigdoc emebara an dana?

⁶³Doba yen meigdoc momogo an areg dan den dou lusud gragero. Anai lusud misen, kaba, meren goubesa emedeinyum naugb sug len leic maireseb menau geb huhugb dou lusudero. Doba maireseb menau geb huhugb gin, kaba, ogdoc Mena Gogoufu gen dau Allah gin dous. Dangga hang, areg dan desai dou yenohob, kaba, ousa yen naugb Mena Gogoufu gin, kaba, en en aud yen naugb en eic maireseb menau geb huhugb dou yen toua.

⁶⁴Doba ligbum dau yen, kaba, yen meigdoc emebdebin dan an areg dan den dou yen ginero. Doba yen yotogoto dan indir an gini terimda. (Yesus enara dangga dou men logodeh, anai en ecinaga dau gareg dau len en medoc emebdebin an enero. Dara sud hom gareg en ohw en se len gus merisira len laugwan teiteiyohob.)

⁶⁵Sug Yesus enara dag graga dou men logodeh dag ginohob, kaba, en esulou len ucan deit, endagai: Dan decinaga dag areg dan den dou yen graga, kaba, edreg dau yen meigdoc mes namcirohob. Hang dan den dou yen dag sud hom ingma, kaba, en emen aud dan dau eninero. Doba ogdoc sug dan Indina arautut en dara eic goubesa dou en naugb gin dous.

⁶⁶Dobnaro. Ogdoc aremer hom gin, kaba, men logodeh leinyana len lemaimo en deitero, doba len lasid lenin dau en namcir. Anai en enara dou len dag len let en mog dara len leg en mogwihi touohob.

⁶⁷Dangga hang, Yesus eijidougwo men logodeh merug sisa hobjerai, endagai: Yen yasid yenin dau dan toua namcirei?

⁶⁸Doba Simon Petrus en enara bauni Yesus mer ucugb, endagai: Adehsud, emen emougbda dau ban aud gara en deita? Anai areg ban besai dou emen, kaba, gin dous eng ens ucina maireseb menau geb huhugb dou emeni.

⁶⁹Hang emen ememeija emouwesa ban toua deitero. Doba emen emod emina debsa ban namcir. Anai emen emecinaga dag ban eng Sud Hom Gecabeci Gen Dau Allah aud emenohob.

⁷⁰Doba Yesus owun en mer an gini, endagai: Naro, dan douci yen meijug sisa hobjerai debinim naugb daninohob. Gini misenei? You, gini misenohob. Doba hom dau yen, kaba, en medoc dag Bilis en medoc an danohob.

⁷¹Doba areg Yesus enara dou Petrus gin, kaba, en enara dou en eisaugb Simon dau cinogo Keriod en meisi Yudas gin dous. Anai Yudas gin, kaba, eni dau Yesus men logodeh merug sisa hobjerai gin toua. Doba eng sud hom gohw Yesus deb se leng Yahudi meren mougtir merisira gini.