Read Manikion YOHANES 7 Bible Online

YOHANES 7 - Manikion bible

YOHANES 7

¹Sug Yesus ens enin dag ared gouwaden dau bogo dou lusud se cinogo Kapernaum gin bouwohob, kaba, en eihweda sungga sungga se leng Galilea meren hancob naugb en esai Allah en moro dou len gus toua. Anai en ecinaga dag leng Yahudi meren mougtir se leng Yudea meren hancob, kaba, len lesedeb naugb leic gomom dou enohob. Dangga hang, en emouwan naugb en emecicugb sungga touwero.

²Doba sug leng Yahudi meren lona naugb sug len len tu meijesa ebeij deinyorohob, kaba, Yesus magtor lenara lareineg en, lendagai: Ban beihwededau sugini dig leng Yudea meren hancob ucugbda. Dauntoba aban logodeh se cinogo ingga, kaba, len toua leiya dau aban geicara ganusbus gin touahabi.

⁴Anai sug sud hom en ens ganusbus dag gini, kaba, en emecgoneh mog anero. Doba en eic maga ainyes an gin dou len gus, dauntoba len lecinaga en dag misen touahabi. Dangga sug ban beic ganusbus dag misenohob, kaba, ban bemecgoneh ban abug an gin dau lusud touwero. Doba ban beic ban abaga an ainyes dou len laugwan toua.

⁵En magtor lenara dag gini anai len toua loududa lendag en emen naugb eigdoc lusud dau meren gogom touwero.

⁶Doba Yesus enara bauwun len merir an gini, endagai: Indan lona areg Allah esedeb naugb sug dan deihwedig Yerusalem gin, kaba, emedagasebma. Doba yen, kaba, yen meijohora ebeibei Yerusalem astesda lona terimda. Anai ara ara ingma emata dougwo yenero.

⁷Hang lusud gedig Bilis oiharaga len se cinogo gin, kaba, len merdoc emecgwan yen touwero. Anai yen yeicara aninim dag lenohob. Doba dan, kaba, len gini len merdoc ecgwan dan terimda. Anai dan den dougwo len dag meren geicara augwan, kaba, mog mog namcirohob.

⁸Dangga yen yeino dan indin naugb yen yedougwan ared debin lona sug maman mahud tu meijesa inggada. Doba dan, kaba, dan demeihwedebma. Anai indan lona areg Allah esedeb naugb sug dan deihweda, kaba, emedagasebma.

⁹Sug Yesus enara bedeinyum dou en magtor dangga dauwohob, kaba, en eigtou se leng Galilea meren hancob gini se lona hosa deitda.

¹⁰Sug Yesus magtor leino en men naugb ledougwanara debin tu meij se Yerusalem dauwohob, kaba, en toua oucan lenda. Doba sug en eihweda gin, kaba, en emerba moc inoro. Doba en edeigtou augwougb dous.

¹¹Dangga astesda lona sug lusud lougwanara gin, kaba, leng Yahudi meren mougtir len lehilon en terimda. Hanoba len leijahaija dougwo len gus, lendagai: Yen yeiya sud hom gin, kaba, en toua moongginei?

¹²Sug lusud louman gini, kaba, len merir laisedim eisaugb Yesus gin toua. Ligbum, kaba, len leigdoumesa en moho, lendagai: Eni sud hom gedag beim namcir. Doba laingma, kaba, len loto len merir an gini, lendagai: Naro. Sud hom gini, kaba, en eicara baugwohosa lusud naugb len laijahasero dous.

¹³Doba areg len len doum gin, kaba, len lemen ainyes naugb len gus lemoumanero. Doba len lec luluf an doum dous. Anai len lahau dau sug len lenara doum ainyes, kaba, leng Yahudi meren mougtir leic gogom dou len toua.

¹⁴Dangga sug lona naugb len lougwanara debin tu meij gini ebeij taitaijohob, kaba, Yesus en toua einesa Allah Men Tuari naugb en edidib Allah mer men meijouhw augwan asesa dou len deit.

¹⁵Sug leng Yahudi meren mougtir len louman dau areg Yesus edidib dou lusud gin, kaba, len leimiman dau en namcir. Hanoba len leijidougwom, lendagai: Gareng arautut sud hom gini, hang en emecinaga aremeijouhw augwan dag gina? Anai sud hom ingma, kaba, en emens dau augwan gini dou en touebma.

¹⁶Doba sug Yesus ouman dau areg len leijidougwom an gini, kaba, en enara bagod len merir, endagai: Areg dan dedidib gin, kaba, dan demeic dau danin indoc mes dou yenero. Doba en dau sud hom gesa dan aud yen enin medoc mes dous.

¹⁷Hang dan demeigdoumesa dan indoho an gin dou yen touwero. Anai gareg en edidib ara ara dau enin medoc mes dou lusud, kaba, en ouwan naugb lusud leigdoumesa enin moho an gin dous. Doba gareg en ecinaga dag en esai sud hom gus en moro dou lusud dous, kaba, en emouwan naugb len lemeigdoumesa en moho an ginero. Doba en ehilon naugb len leigdoumesa sud hom gesa en aud len gini en moho dous. Dangga areg en esai dou len gini, kaba, dag en emereiyara dou len touwero. Doba en enara augwan se geica dou len terimda. Dara gareg dau yen en medoc erleij naugb en aimo areg asesa Allah enin medoc mes namcir, kaba, en toua emdecinaga dag areg dan dedidib dou yen gini, kaba, emen dau danin indoc mesero. Doba en dau Allah enin medoc mes dous, anai Allah enin emens gin dou ens.

¹⁸

¹⁹Musa eic Allah men gomnomna dou yen sug nosohob. Gini misenei? You, augwan gini misenohob. Dangga dagiro naugwe hang, yen youwan yeic gomom dou dana? Anai en ens dau areg dan desai dau gin deb se men gomnoma sug nosohob. Dobnaro. Sud hom ingma dau yen, kaba, en emaimo areg en og gini augwan dag misen touebma. Doba yen yedreg namcirohob. Hang yen yemehilon ucina naugb sug yen yeic gomom dou dan toua.

²⁰Sug lusud louman Yesus mer an gin dag ginohob, kaba, len lenara gouji dou en, lendagai: Gareg en ouwan es ban, hang ban bemenara dag gin dou emena? Mena mog mog einesa ban abdoc mes namcirohobei?

²¹Doba Yesus enara bauni dou leng Yahudi meren mougtir ucugb deit, endagai: Dan daben ganusbus hom deseino yen se Lona Gemeicaresero gin. Hang yen meigdoc emesrougb an dan naugb yen yemeic gomom dou dan icira gin toua.

²²Doba yen toua, sug lona naugb yen yec merus dau meijen logodeh mahaniheni edagasa se Lona Gemeicaresero, kaba, yen yemamsoho len se lona ingga gin touwero. Doba yen yeic meijus naugb yen yec len merus dau len se lona ingga toua. Anai gini aimo dau areg Musa arougb yen an ginohob. Hang yen yemedreg en mer gin touwero. Dobnaro. Areg Musa arougb yen an gini, kaba, emebiji dau enero. Doba ebiji dau yen meijemouwer sug nosohob.

²³Dangga hang, sug yen yec godeh mahaniheni hom en mos dau en se lona ingga, dauntoba yen yemedreg Musa men gomnomna an gin touwero, kaba, dagiro, naugwe hang, yen meigdoc mog mog an dan sug dan deic geigouhw dou sud hom mohora agaim se Lona Gemeicaresero gin toua?

²⁴Hang yen yemogod aremer aga lusud yemaimo dau areg yen yeiya ginero. Doba yen yogod aremer aga len aimo dau areg edag beim se geica an len dous.

²⁵Doba ligbum dau leng se Yerusalem, kaba, len leijidougwom, lendagai: Sud hom graga, kaba, maman mougtir len lehilon en naugb leic gomom dou en gia ingginei? Dangga dagiro, naugwe hang, len lemen dougwo enero? Anai yen yeiya en eic mos naugb en edidib Allah mer men meijouhw ainyes dou lusud terimda. Gedangga, kaba, len toua loudesa en edag Sud Hom Geigdoc Maman Dau Maman Gogom Augwanohobei?

²⁶

²⁷Dobnaro. Anai Sud Hom Geigdoc Maman Dau Maman Gogom Augwan, kaba, maman mamecinaga sug en gun touwero. Doba en en aud maman augwougb dous. Doba sud hom gini, kaba, maman macinaga sug en gunohob. Hang en emedag Sud Hom Geigdoc Maman Dau Maman Gogom Augwan dag misen touwero.

²⁸Doba Yesus, kaba, en edidib Allah mer men meijouhw se Allah Men Tuari gin terimda. Dangga sug en ouman, doba lusud leijidougwom dag ginohob, kaba, en esa mer debin len. Hanoba en eijidougwo len, endagai: Yen youdesa yen yecinaga areg eisaugb dan dara dan dugun augwan dag misenohobei? Naro, yen yemecinaga dani dara sug dan dugun touebma. Anai sug dan den aud yen gini, kaba, dan demen augwougb dau danin indoc mesero. Doba sud hom gus en mer ogod an dan, hang dan demen aud yen gini naugb dan desai en moro dou yen toua. Dangga areg en en dou yen gin, kaba, eigouhw naugb yen yod meijina debsa en an gin terimda. Anai en emereiyara dou yen touwero, doba en enara se geica dou yen namcirohob. Dara yen yemecinaga sud hom gesa dan gini dag misen touebma.

²⁹Doba danin, kaba, dan decinaga en dag misenohob. Anai enin eng mer ogod an dan, hang dan demen aud yen toua.

³⁰Sug lusud louman en mer an gin, kaba, len louwan lagaigeij Yesus. Doba sud hom ingma dau leng gini kaba, en emeic mos naugb en sug emagaigeij Yesus touwero. Doba en arges dau namcir. Anai Allah men lona areg en ogod an deb naugb sug Yesus omom taiba sogo salib icira lusud meren sesar gin kaba, emedagasebma.

³¹Doba leinyana dau lusud ingga, kaba, len lod merna debsa enohob. Hanoba len len dougwo lusud graga, lendagai: Yen youdesa dagiro? Sug Sud Hom Geigdoc Maman Dau Maman Gogom Augwan en en aud maman, kaba, en emeic ganusbus ingma bemedreg dau ginsei? Naro.

³²Doba leng Parisi, kaba, len louman dau areg lusud lec luluf eisaugb Yesus dag gin doumohob. Dangga hang, leni dara gembala gesa taij meren mougtir, kaba, len larougb leng lesedougwo Allah Men Tuari naugb sug len ledagaigeij Yesus toua.

³³Dangga Yesus esulou lusud laugwan mougwa hom ucan deit, endagai: Dan demeigtou desij yen terberbahabero. Doba se lona hosa deit, kaba, dan decicugb aud sud hom gesa dan aud yen gini ucugb dangga.

³⁴Se lona ingga, kaba, yen yehilon dougwo dan, doba yen yemdeiya danero. Anai usi gedig dan deigtousa gin, kaba, yen yemdebeij touwero.

³⁵Sug leng Yahudi meren mougtir len louman dau gini, kaba, len leijidougwom ucucugb, lendagai: Sud hom gini en eihwedigiro, hang maman mamdeiya enero gina? En eihwedig lugmahara meren cinogo gedig maman lusud latou desij len naugb en edidib Allah mer men meijouhw augwan dou len touei?

³⁶Anai en enara dou maman dag cum, kaba, maman mahilon dougwo en. Doba maman mamdeiya enero. Dara en enara dou maman toua dag usi sug en eigtousa, kaba, maman mamdebeij touwero. Augwan gini, kaba, meijouhw dagiro, inggina?

³⁷Se lona gouwedoc naugb sug leng Yahudi lougwanara debin tu meij gini, kaba, Yesus eisa besa naugb en enara dou lusud deit. Anai lona hom gini, kaba, moho agas edreg dau lona gus sug len lougwanara debin tu meij gin augwan namcir. Dangga sug en eisa besohob, kaba, en enara dou len dara mer medam, endagai: Gareg dau yen merijebeni, kaba, en en aud dan naugb dan deic duhu dou en beg.

³⁸Dara gareg en medoc ebdebin an dan, kaba, duhu geic maireseb menau geb huhugb dou lusud agunya dau en toua. Augwan gini esogwa deisa areg len log deb se Surad Injil Meb Mohon deb eisaugb dan sug nosa touohob.

³⁹Doba areg Yesus eic duhu bainyen dou len gini, kaba, en emen dau duhu misen dou lenero. Doba en en eisaugb Mena Gogoufu deb dou len dous. Anai gareg en medoc ebdebin an en, kaba, en os dou len naugb en emesa Mena Gogoufu aud len toues. Doba sug en enara gini, kaba, Allah emeigdoumesa en dau gomom aud gogouf cucugb ucugbuma. Hang Allah emesa Mena Gogoufu aud lusud naugb sug en eperwei Yesus en mohw an len touebma.

⁴⁰Sug lusud louman Yesus mer an gin, kaba, merug hosa len louma debin en, lendagai: Indeic, sud hom gin, kaba, eni sud hom gesai Allah moro eisaugb Mesias sug en en dou maman.

⁴¹Doba ligbum, kaba, len len dougwo len, lendagai: Sud hom gin, kaba, eni sud hom gesai Allah moro eisaugb Mesias dou maman, isnaro. Doba en eng Mesias Geigdoc Maman Dau Maman Gogom Augwan ginohob. Doba ligbum deit, kaba, letaha len merir an gini, lendagai: Yen youdesa Sud Hom Geigdoc Maman Dau Maman Gogom Augwan, kaba, en en dau leng se Galileaei? Naro, en emen dau Galilea, isnaro.

⁴²Anai Surad Injil Meb Mohon en dou maman dag Mesias, kaba, eni sud hom dau Daud medebeitor len dous. Dangga hang, en emen dau leng se Galilea touwero. Doba sug mem ouwadan en, kaba, en ouwadan en se Bedlehem dous. Anai se Bedlehem gini, kaba, Daud en gun engga.

⁴³Dangga hang, len merdoc dag hom eisaugb Yesus ginero. Doba len merir laisedim endaha.

⁴⁴Dara lingma, kaba, len louwan lagaigeij en. Doba sud hom ingma dau len, kaba, en emeic mos naugb gin touwero.

⁴⁵Sug leng Yahudi meren mougtir len leiya, doba leng lesedougwo Allah Men Tuari len lecicugb dara merug mogud en, kaba, len lehin merir se len, lendagai: Dagiro, naugwe hang, yen yemagaigeij sud hom graga aud emen suginero, anara?

⁴⁶Doba len lenara laugbtarera dougwo len merir, lendagai: Emen ememagaigeij enero. Anai men genara, kaba, aninim dag sud hom ingma men genara touwero, doba susugb dau lusud gus laugwan namcir.

⁴⁷Sug leng Parisi louman dau gin, kaba, len lenara debin len, lendagai: Sud hom gin, kaba, en augwohosa yen, aninim dag en augwohosa len gus laugwan touohobei?

⁴⁸Anai len gin, kaba, len lemecinaga Musa men gomnomna dag misenbuma. Hang Allah ouwara dougwo len touohob. Doba yen yeiya dau mougtir gus dara emeng Parisi, kaba, dag emingma emobsara aud touohobei? Naro, sud hom ingma dau emen, kaba, en emobsara dou enero.

⁴⁹

⁵⁰Doba sud hom dau leng Parisi, en moho Nikodemus, kaba, en owun len merir an gin namcir. Hanoba en enara dou len, endagai: Maman gomnomna en dou maman dag maman mamogod aremer gogom debin sud hom augwougblobma. Doba en ens dau men geicara dou maman. Dauntoba sug maman macinaga meijouhw augwan nosahabi, kaba, maman mamogod aremer gogom debin en daiyamo. Sud hom Nikodemus gin, kaba, eni sud hom gedebeij Yesus naugb loba sug nosohob.

⁵¹

⁵²Doba sug leng Parisi dara mougtir len louman Nikodemus en mer an gini, kaba, len merir eigdoc en icira gini. Hanoba len lenara dou en, lendagai: Ban toua dau leng Galilea, hang ban benara dangga dou emenei? Ban becic Surad Injil Meb Mohonahabi. Anai sug ban beicara baimo dag gin, kaba, ban becinaga dag sud hom gesai Allah moro eisaugb Mesias dou maman, kaba, en emen dau leng se Galilea naugb enara dou mamanero.